Kolose 1–2

“Ia Mauaa ma Atiina Ae ia te Ia”

E pei lava ona i ai malosiaga faalenatura e mafai ona liaiina pe faatamaia ai se laau, e i ai foi malosiaga o loo taumafai e liaiina ese i tatou taitoatasi mai o tatou faavae faaleagaga ia Iesu Keriso (tagai i le Helamana 5:12). Na tusia e Paulo lana tusi i tagata Kolose ona sa faamata’uina lo latou faatuatua e aoaoga ma faiga sese. O lenei lesona e mafai ona fesoasoani ia te oe e iloa ai malosiaga o loo faamata’uina lou faatuatua ma auala e mafai ona e mausali atili ai ia Iesu Keriso.

O le faaaogaina o meafaitino ma ata. O meafaitino ma ata e mafai ona fesoasoani i tagata o le vasega e fa’aata ai i o latou mafaufau tagata, nofoaga, mea na tutupu, anomea, ma faatusa o loo i tusitusiga paia. O se tasi auala e fesoasoani ai i tagata aoga e vaai faalemafaufau o le valaaulia lea o i latou e tusi ni ata o mea faitino o loo ta’ua i tusitusiga paia.

Sauniuniga a le tagata aoga: Valaaulia tagata aoga e tusi pe pue se ata o le ituaiga laau fualaau aina e sili ona latou fiafia i ai ma aumai le ata i le vasega. Fai atu ia i latou e mafaufau i lesona faaleagaga e mafai ona tatou aoaoina mai laau.

Gaoioiga E Ono Mafai Ona Aoao Ai

E faapefea ona pei oe o se laau?

Mafaufau e valaaulia se volenitia e tusi se ata o se laau i luga o le laupapa. Faaaoga tali a tagata aoga i le gaoioiga lenei e faatumu ai le ata o loo i luga o le laupapa. Valaaulia foi tagata aoga e faaopoopo i a latou lava ata pe tusi se ata mai le gaoioiga sauniuni a le tagata aoga. Fautuaina le vasega e faaauau pea ona faaopoopo manatu a o faagasolo le lesona.

Tusi se ata o le laau fualaau aina e sili ona e fiafia i ai. O le a fai ma e faaopoopo i ai a o faagasolo le lesona.

Mafaufau pe faapefea ona pei oe o lenei laau. Mo se faataitaiga, mafaufau i malosiaga o loo taumafai e lia’i ese pe faatamaia lou faatuatua ia Keriso. Mafaufau pe aisea e te manaomia ai le fesoasoani e te tu malosi ai e tetee atu i na malosiaga ina ia olioli ai i fua o le talalelei.

Sa faaaoga e Paulo le faatusa o se laau e fesoasoani ai i le Au Paia i Kolose ia iloa manino atili ai le taua o a latou sootaga ma Iesu Keriso. Sa ia faaaogaina foi e faamalosia ai i latou mai aoaoga ma faiga sese ia na faamata’uina ai lo latou faatuatua ia Iesu Keriso. Saili musumusuga mai le Agaga Paia ia malamalama atili ai i upu a Paulo ma taumafai e faaaoga.

Fua o le laau

Mafaufau i le fua e sau mai le laau na e tusia ma mafuaaga e te fiafia i ai.

Faitau le Kolose 1:10–22 . Vaavaai mo “fua” (po o faamanuiaga) o loo faamatala mai e Paulo, ma mafaufau i mafuaaga e te manao ai i nei fua. Tusi ni fua i luga o lau laau ma faaigoa i aoaoga a Paulo.

• O a fua po o faamanuiaga na faailoa mai e Paulo?

Mafaufau e valaaulia tagata aoga e tali i fesili nei i a latou api faamaumau mo suesuega ona valaaulia lea o ni volenitia e faasoa mai i le vasega mea na latou tusia.

• O fea o nei fua o loo e fiafia iai i le taimi nei?

• O fea o nei fua ua e manao ina ia e fiafia iai? Aisea?

Tusi i lau api faamaumau mo suesuega le faamatalaga lenei, ma ia aofia ai au tali i le fesili talu ai i le avanoa muamua:Afai ou te manao _______________, e manaomia ona ou ________________.

Faitau le Kolose 1:23 , ma vaavaai mo mea na fai mai Paulo e manaomia ina ia mafai ona tatou mauaina nei fua. Faatumu le avanoa lona lua i mea sa e mauaina.

O se tasi lenei o auala e faauma ai lenei upumoni: Afai ou te manao ina ia faamalosia ma maua le togiola ma le filemu e ala ia Keriso, e manaomia ona ou faaauau pea i le faatuatua ua faavaeina ma mausali. O lefaavaeina ma le mausali e mafai foi ona faauigaina o le faatuina ma le faamautuina po o le “tutumau ma lē masi’i ese” ( Mosaea 5:15).

• O le a le foliga o le “tutumau i le faatuatua, faavaeina, ma mausali”? ( Kolose 1:23).

• O le a se mea ua e iloa e uiga ia Iesu Keriso lea e uunaia ai oe e faaauau ona faavae ma faamausali ia te Ia?

• O a ni upumoni faaopoopo e uiga ia te Ia na e maua i nei fuaiupu e faateleina ai lou mautinoa po o le manao ina ia faavae ma faamausali ia te Ia?

Faitau le Kolose 2:6–7 , ma vaavaai mo mea na aoao mai e Paulo e uiga i aa o le tatou laau. Faaigoa le palapala o siomia ai lau laau e tusa ma mea ua ia fai mai ai.

• O fea na aoao mai Paulo e tatau ona tatou totoina ai o tatou aa?

• O le a lou manatu i le uiga o le “mauaa” ai ia Keriso?

• E faapefea ona fesoasoani mai le faamauaa o i tatou lava ia Iesu Keriso ina ia faavae ma mausali ai? O a foliga vaaia o ia mea?

Mafaufau i se tasi e te iloa o loo faaalia le faavaeina, mausali, ma le mauaa ia Keriso.

Afai e aoga mo tagata aoga se faataitaiga, mafaufau e faasoa atu se tasi po o faataitaiga uma nei e lua.

O faataitaiga nei e lua o tagata o loo mauaa ia Keriso. Sa faasoa mai e le Peresitene Aoao o Alii Talavou o Steven J. Lund se faataitaiga o lona atalii ma’i lava sa faaauau ma faataunuu ma le faamaoni ona tiute o le perisitua. Afai e mafai, matamata i le “Mauaina o le Olioli ia Keriso” mai le faailotaimi 0:09 i le 3:57 e faalogo ai i lenei tala.

Sa faasoa mai e Brother M. Joseph Brough, o le sa auauna i le Au Peresitene Aoao o Alii Talavou, se tala e uiga i lona afafine talavou sa onosaia ma le faamaoni luitau o le siitia atu i se nofoaga fou ma filifili e auauna atu i se misiona. Afai e mafai, matamata le “Sii i Luga Lou Ulu ma Olioli” mai le faailotaimi 5:48 i le 7:48 e faalogo ai i lenei tala.

Valaaulia tagata aoga e faasoa mai o latou manatu e uiga i tagata sa latou mafaufau i ai. Tuu atu ia i latou e faamatala i ni paga pe i ni vaega toalaiti ata o le a latou tusia i le gaoioiga o le a sosoo.

Tusi ni aa loloto ma malolosi mo lau laau. Faaigoa ni isi o aa o loo i ai i uiga o nei tagata po o faatinoga latou te faia ua e lagona ai le latou fesootai mausali ma Iesu Keriso.

Toe faamanatu le Kolose 1:23 ; 2:6–7 . Ona faitau lea o le Kolose 2:8, 12 ma le saunoaga lenei a Peresitene Dallin H. Oaks o le Au Peresitene Sili. Faaigoa aa o lau laau i auala faaopoopo e mafai ai ona tatou fesootai mausali atili atu i le Faaola.

E tatau ona tatou saili atu ia mauaa mausali atili ma liua i le talalelei a Iesu Keriso (tagai i le Kolose 2:6–7). Tatou te ausia lenei liua e ala i le tatalo, e ala i le faitauina o tusitusiga paia, e ala i le auauna atu, ma e ala i le taumafa e le aunoa i le faamanatuga ina ia maua pea Lona Agaga e faatasi ma i tatou. E ao foi ona tatou saili atu mo le suiga tele o le loto (tagai i le Alema 5:12–14) lea e suitulaga ai manaoga amioleaga ma popolega faaloloto i le alofa o le Atua ma le naunau e auauna atu ia te Ia ma Lana fanau.

(Dallin H. Oaks, “O Le Faataoto o le Lūlū Saito,” Ensign po o le Liahona, Me 2015, 35)

Valaaulia tagata aoga e faasoa mai “aa” ua latou mauaina. Faasoa ni isi po o fesili uma nei e pei ona manaomia:

• Na faapefea ona e lagonaina le fesootai atili atu i le Faaola a o e mulimuli i le faataitaiga a i latou o e ua faavaeina ma mausali ia Keriso?

• E mafai faapefea e le auai i sauniga o le talalelei e pei o le papatisoga (tagai i le Kolose 2:12) ona faafesootai atili ai oe ia Keriso?

• Mata e ese faapefea lou olaga pe ana faapea e sili atu lou faavae ma mausali ia Keriso?

E toatele tagata e ono faia ni filifiliga e mafai ona faalolotoina ai o latou aa ia Keriso, ae o le ala latou te mulimuli ai i na filifiliga e le maua ai ni taunuuga anoa. Mo se faataitaiga, e mafai e se tasi ona faitau a latou tusitusiga paia i aso taitasi ae le faaaluina se taimi e faailoa ai, mafaufau loloto, ma faaaoga upumoni mai tusitusiga paia.Mafaufau loloto pe faapefea ona e mulimuli i au filifiliga ma pe o manaomia ona e faia ni suiga.

O le tetee atu i malosiaga e lia’ina ai

E pei lava ona i ai malosiaga faalenatura e mafai ona liaina pe faatamaia ai se laau, e i ai foi malosiaga o loo taumafai e lia’ina ese i tatou mai o tatou faavae faaleagaga ia Iesu Keriso.

Faataamilo i lau laau, tusi ata o matagi po o afa e ono lia’ina ai lau laau. Faaigoa nei matagi ma afā i ni malosiaga e mafai ona lia’ina ese oe faaleagaga mai le faavaeina ma le mausali ia Iesu Keriso. Atonu e te manao e faitau le Kolose 2:4, 8 e vaai ai i ni isi o malosiaga sa feagai ma le Au Paia i Kolose.

• E mafai faapefea e aa na e faailoa mai i le asō ona fesoasoani ia te oe e maua ai le mana o le Faaola e tu malosi ai e tetee atu i malosiaga ia na e faailoaina?

Afai e mafai, matamata i le “Asiosio Faaleagaga” (2:24). Vaavaai pe faapefea ona fesoasoani atu le faavae ma le mausali ia Keriso ia te oe.

Saili le fesoasoani a le Tama Faalelagi e ala mai i le Agaga Paia e faailoa mai ai mea o loo lelei ona e faia ma mea e mafai ona e faaleleia ina ia e faavaeina ma mausali atili ai ia Iesu Keriso. Tusi i lalo ou manatu ma uunaiga i lau api faamaumau mo suesuega, ma tautino e te mulimuli i ai.

Tala Auiliili ma Faamatalaga o Talaaga

Aisea e manaomia ai ona tatou mauaa ia Keriso?

Na faamatala mai e Elder Neal A. Maxwell (1926–2004) o le Korama a Aposetolo e Toasefululua:

O mea e tutupu ma tulaga i aso e gata ai e taua tele ai mo i tatou o tagata o le Ekalesia ona faavaeina atili, mauaa, faatuina, ma mausali (tagai i le Kolose 1:23 ; 2:7 ; 2 Peteru 1:12). Na fetalai atu Iesu i Ona soo, “ia faamausali lenei mea i o outou loto, ina ia outou faia mea o le a ou aoao atu, ma poloaiina ai outou” [Faaliliuga a Iosefa Samita, Luka 14:28 ]. Afai e le faamausaliina, o le a matuia feteenaiga. Afai e mausali, tatou te le “felafoaiina” [ Efeso 4:14 ], e ala i tala faatupu, aoaoga faavae sese, po o ituaiga amioga ma atamai faalelalolagi. …

Peitai, e le mafai ona mausali i tatou i le faia o mea ua poloaiina ai e Iesu sei vagana ua tatou mausali muamua e uiga ia te Ia. … O le mea lea, o la tatou galuega, o le “faaleleia [o i tatou lava] ma le finagalo o le Atua, ae lē ma le manao … o le tino” ( 2 Nifae 10:24).

(Neal A. Maxwell, “Overcome … Even As I Also Overcame,” Ensign po o le Liahona, Me 1987, 70)

Atonu foi e te manao e matamata i le “Mauaina o le Sulufaiga mai Afa o le Olaga” mai le faailotaimi 0:00 i le 3:49 e tagai ai ia Elder Ricardo P. Giménez o loo ofo mai ni malamalamaga faaopoopo.

Kolose 2:13–15 . O le a le mea na aoao atu e Paulo i le Au Paia i Kolose e uiga i le faatusa o le Faasatauroina o le Faaola?

Sa faamanatu atu e Paulo i le Au Paia i Kolose ua faamagaloina i latou e le Atua (tagai i le Kolose 1:14, 20, 22). O le ata faatusa sa faaaoga e Paulo i le Kolose 2:14–15 o loo faamamafa mai ai le ala na mafai ai ona faamagaloina a tatou agasala ona o le Togiola a Keriso. I ona po o Paulo o se agaifanua a tagata Roma ona tusi i luga o se pepamaa solitulafono sa faia e se tagata ua tausalaina. A oo ina faasatauroina le tagata agasala, ona tutui ai lea o le pepamaa lea i le satauro ina ia tilotilo i ai tagata uma lava e ui ane ai (tagai i le Ioane 19:19–22). Sa faaaoga e Paulo lenei faatusa i fuaiupu 13–15 e aoao ai tagata o Kolose ua faamagaloina i latou. Sa peiseai o se lisi o moliaga uma faaleagaga ma tuuaiga e faasaga i le Au Paia i Kolose sa tuuina i luga o se pepamaa ma tu’itu’i i le satauro. E ala i le Faasatauroina o Iesu Keriso, na fufulueseina ai nei mea pe tapeeseina.

Gaioiga Faaopoopo e Aoao Ai

Kolose 3:12–24 . Uiga faa-Keriso

Valaaulia tagata aoga e faasoa mai ni isi o a latou tala e fiafia i ai mai le soifuaga o le Faaola. Fai atu ia i latou e faailoa mai uiga na faaalia e le Faaola i na tala. Valaaulia lea o i latou e mafaufau i tagata latou te iloa o e faaalia nei uiga auaumama. Fai atu ia i latou e faasoa mai ni mafuaaga latou te fiafia ai e faatasi ma nei tagata. Valaaulia tagata aoga e suesue le Kolose 3:12–24 , ma vaavaai mo uiga po o amioga faa-Keriso. Atonu latou te mauaina foi ni auala e mafai ona latou atiina ae ai nei uiga. Valaaulia tagata aoga e saili le fesoasoani a le Tama Faalelagi e ala i le Agaga Paia e filifili ai se uiga se tasi latou te mananao e galulue ai mo se tasi pe lua masina a sosoo ai. Ona mafai lea ona latou fatuina se fuafuaga pe faapefea ona latou sailia le fesoasoani a le Tama Faalelagi e atiina ae ai lena uiga.