Filipi 4

Mauaina o le Olioli ma le Filemu ia Iesu Keriso

O le a se mea e aumaia ia te oe le filemu ma le mafanafana i taimi o le atuatuvale ma tofotofoga? I lana tusi i tagata Filipi, sa talanoa ai pea lava pea Paulo e uiga i le olioli ma le filemu. I le faaiuina ai o lenei tusi, sa aoao atu Paulo o Iesu Keriso o le punavai o le filemu ma le olioli ma sa faamamafa mai ai mea e mafai ona faia e le Au Paia e lagona ai le olioli ma “le filemu o le Atua” (Filipi 4:7). A o e suesue, saili ia iloa auala e mafai ona e maua ai le olioli atili ma le filemu e ala ia Iesu Keriso i lou lava olaga.

Galuega tusitusi. O le valaaulia o tagata aoga e tali tusitusi i fesili faatupu manatu e mafai ona fesoasoani e faaloloto ma faamanino ai o latou manatu. A o tali atu tagata aoga i fesili e ala i le tusitusi a o lei faasoaina atu o latou manatu i le vasega, o le a maua e i latou se taimi e fatufatu ai o latou manatu ma maua uunaiga mai le Agaga Paia.

Sauniuniga a le tagata aoga: Valaaulia tagata aoga e fesili i ni nai uo po o tagata o le aiga pe faapefea ona aumai e Iesu Keriso ia i latou le filemu ma le olioli i o latou olaga.

Gaoioiga E Ono Mafai Ona Aoao Ai

O le gaoioiga lenei ua faamoemoe e fesoasoani ai i tagata aoga ia iloa faafitauli ua feagai ma i latou i le sailiga o le filemu ma le fiafia. E mafai foi ona fesoasoani ia i latou e iloilo po o fea latou te o i ai e maua ai le filemu ma le fiafia sili. Mafaufau e faaali atu le ata lenei pe toefatufatua’i mo tagata aoga e maimoa i ai.

O luitau sa feagai ma Paulo

Iloilo le ata lenei e faatusa i le Aposetolo o Paulo ma ni isi o ona luitau ma popolega sa ono i ai. Ia manatua o nei mea e faaopoopo atu i le nofo faapagota ai o Paulo a o tusi atu lana tusi i le Au Paia i Filipi. Mafaufau pe na faapefea ona avea nei luitau ma mea faalavefau i lagona o le filemu ma le olioli o Paulo.

I lau api faamaumau mo suesuega, fai se li’o o loo i ai se ata faatagata faafasilaau po o se ata e fai i ni laina tusitusia e faatusa ia te oe, e pei ona faia mo Paulo. I fafo atu o le li’o, lisi ai ni isi o ou lava popolega po o atugaluga atonu o ni isi taimi e faigata ai ona e lagonaina le filemu ma le olioli.

Mafaufau po o fea o fesili nei o le a sili ona lelei e talanoaina e le vasega ma pe o le fea e sili ona lelei mo tagata aoga e tali mai iai i a latou api faamaumau mo suesuega.

• O fea e vaavaai i ai tagata e maua ai le filemu ma le olioli sili i lenei olaga? O fea e te saili i ai mo le filemu ma le olioli? Pe ua faamanuiaina oe i au taumafaiga?

O le feau o le olioli ma le filemu

E ui ina nofo faapagota Paulo i le fale ma sa feagai foi ma isi luitau, ae sa masani ona talanoa Paulo e uiga i le olioli ma le filemu i lana tusi i tagata Filipi. E ui ina ta’u atu e Paulo i tagata Filipi sa ia maua le olioli tele i lo latou agalelei ma le popole ia te ia (tagai i le Filipi 4:1, 10, 14–16), sa ia faamanatu atu pea ia i latou le punavai autu o lona olioli.

Faitau le Filipi 4:4, 10, 13 , ma mafaufau e faailoga pe o ai na faasino i ai e Paulo o le mafuaaga o lona olioli ma le malosi.

• O le a sou manatu i le mafuaaga na faasoa soo ai Paulo e uiga ia Iesu Keriso, o le puna o lona malosi, olioli, ma le filemu?

Na aoao mai Peresitene Russell M. Nelson i le mafuaaga ua avea ai Iesu Keriso ma puna o le filemu ma le olioli.

O o’u uso e ma tuafafine pele, o le olioli ua tatou lagonaina e itiiti lava se mea e faatatau i tulaga o tatou olaga ae e matua fesootai mea uma i le taulaiga o o tatou olaga.

Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagonaina le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ia te Ia ma ona o Ia. O Ia o le puna o le olioli uma. …

E pei lava foi ona ofo mai e le Faaola le filemu lea e “silisili lava i mea uma e manatu i ai” [ Filipi 4:7 ], Ua Ia ofoina mai foi le malosi faateleina, loloto, ma le lautele o le olioli lea e tetee i manatu faaletagata po o le malamalama faaletino. Mo se faataitaiga, e le mafai ona e lagona le olioli pe a mafatia lau tama i se ma’i e leai se togatifi, pe ua leai sau galuega pe ua faalata oe e lou toalua. Peitai o le olioli tonu lava lena o loo ofoina mai e le Faaola. O Lona olioli e faifai pea, ma faamautinoa mai o o tatou “puapuaga o le a na o sina taimi laitiiti” [ Mataupu Faavae ma Feagaiga 121:7 ] ma o le a faapaiaina mo lo tatou manuia [tagai i le 2 Nifae 2:2 ].

(Russell M. Nelson, “Olioli ma le Ola ai Faaleagaga,” Ensign po o le Liahona, Nov. 2016, 82)

• O le a le mea na aoao mai e Peresitene Nelson sa sili ona taua ia te oe? Aisea?

• O le a sou manatu e faapefea ona aafia lou olaga i lou malamalama ma lou faaaogaina moni o aoaoga a Peresitene Nelson?

• Na faapefea ona aumaia e Iesu Keriso ia te oe le filemu ma le olioli i lou olaga?

O le mauaina o le olioli na ofoina mai e Iesu Keriso

O le gaoioiga lenei e mafai ona faamaeaina e tagata aoga taitoatasi, pe mafai foi e tagata aoga ona suesue taitoatasi ona fai lea o se lisi faatasi ma le vasega.

Na tuuina mai faatasi e Peresitene Nelson ma le Aposetolo o Paulo se fautuaga patino tonu i mea e mafai ona tatou faia e maua ai le filemu ma le olioli ua mafai ona o Iesu Keriso.

Faitau le Filipi 4:6–9, 11 ma le saunoaga lenei a Peresitene Nelson, ma vaavaai pe faapefea ona tatou maua le filemu ma le olioli ia Iesu Keriso. Atonu e te manao e faailoga i au tusitusiga paia pe tusi i lau api faamaumau mo suesuega mea ua e mauaina. Ia manatua sa faasino Iosefa Samita i le Filipi 4:8 e faapea o “le apoapoaiga a Paulo” ma sa aofia ai o se vaega o le mataupu faavae o le faatuatua lona sefulutolu.

E faapefea la, ona tatou maua lena olioli? E mafai ona tatou amata i le “vaavaai atu ia Iesu o le na te taitaiina ma le na te faaatoatoaina le faatuatua” [ Eperu 12:2 ] “i mafaufauga uma” [ Mataupu Faavae ma Feagaiga 6:36 ]. E mafai ona tatou tuuina atu le faafetai mo Ia i a tatou tatalo ma i le tausia o feagaiga na tatou osia ma Ia faapea ma lo tatou Tama Faalelagi. A o avea ai lo tatou Faaola ma se vaega sili ona moni ia i tatou ma pe a tatou augani atu mo Lona olioli ina ia tuuina mai ia i tatou, o le a faateleina ai lo tatou olioli.

(Russell M. Nelson, “Olioli ma le Ola ai Faaleagaga,” Ensign po o le Liahona, Nov. 2016, 82)

I le taimi ae lei faia pe o loo faia foi le gaoioiga suesue lenei, mafaufau e valaaulia i latou e faalogologo, usu, pe faitau upu o se viiga e fesootai ma le autu o le filemu. Mo manatu i viiga e mafai ona faaaoga, tagai i le “Filemu” i le faasino autu o Viiga, o loo maua i le ChurchofJesusChrist.org.

Iloilo le lisi po o faamatalaga mai lau suesuega o le Filipi ma upu a Peresitene Nelson, ma mafaufau pe o le a le mea e sili ona tulaga ese ia te oe ma pe aisea. Faailoa mai se mataupu faavae ma tusi i lau api talaaga faatasi ai ma le tusi faasino o le mau e maua mai ai. O lau upumoni ua faamamafaina e ono amata faapenei:

E mafai ona ou olioli ma maua atili le filemu o le Atua pe a ou…

Saili musumusuga mai le Agaga e faaloloto ai lou malamalama i le upumoni na e maua e ala i suesuega faaopoopo. O ni isi o auala e mafai ona e faia ai lenei mea e aofia ai:

• O le sueina o se upu autu mai le mataupu faavae na e maua i le Taiala i Tusitusiga Paia , Taiala Autu po o le Autu o le Talalelei, o loo maua i le ChurchofJesusChrist.org.

• O le mauaina o mau fefaasinoa’i i mau fesootai. E mafai ona faaaoga ai fuaitau nei o le atamai i aoaoga faavae po o mau o loo maua i vaefaamatalaga. Mafaufau e tusia nei tusi faasino o mau ia latalata ane i le fuaiupu lea na e faailoa mai ai le mataupu faavae.

• O le toe faamanatuina o le Mo Le Malosi o le Autalavou (tamaitusi, 2011), ma taulai atu i le “Loto faafetai,” “Faamaoni ma le Amiosao,” po o isi tulaga faatonuina e faatatau i le mataupu faavae na e faailoaina.

Tuu atu i tagata aoga se avanoa e faasoa mai ai mea sa latou aoaoina. Fai atu fesili tulitatao e mafai ona fesoasoani ia i latou e faaaoga ai mea ua latou aoaoina, e pei o nei:

• E mafai faapefea e le faaaogaina o lenei mataupu faavae ona fesoasoani ia te oe ina ia e maua le olioli ma le filemu? O le a se mea o le a e faia e maua ai le fesoasoani ma le mana o le Faaola e faia ai lenei mea?

• O le a se auala e ono suia ai lou olaga a o e lagonaina le faateleina o le faamoemoe ma “le filemu o le Atua”?

Tala Auiliili ma Faamatalaga o Talaaga

O le a se mea e mafai ona ou faia pe a faigata ona maua le filemu ma le faamoemoe?

E mafai faapefea ona ou maua le filemu ia Iesu Keriso?

Na aoao mai Elder Ulisses Soares o le Korama a Aposetolo e Toasefululua:

O le saili atu ia Keriso i mafaufauga uma, ma mulimuli ia te Ia ma o tatou loto atoa e manaomia lo tatou faaogatasia o o tatou mafaufauga ma manaoga ma Ia. O loo faasino mau i lenei faaogatusaina o le “tumau i le Alii” [ Filipi 4:1 ]. O lona uiga ia tatou faatautaia pea lava o tatou olaga ia ogatasi ma le talalelei a Keriso ma taulai atu i aso taitasi i mea uma e lelei. Ua na o iina lava e mafai ai ona tatou maua “le filemu o le Atua, o loo silisili lava i mea uma e manatu i ai” ma o le a “leoleoina ai [o tatou] loto ma mafaufau e ala ia Keriso Iesu” [ Filipi 4:7 ].

(Ulisses Soares, “Saili Atu ia Keriso i Mafaufauga Uma,” Ensign po o le Liahona, Nov. 2020, 82–83)

Na aoao mai, Sister Jean B. Bingham, Peresitene Aoao o le Aualofa:

O Iesu Keriso o le punavai foi o le filemu. Ua Ia valaaulia i tatou e “faalagolago i [Lona] aao ua lava” [“Lean on My Ample Arm,” Hymns, no. 120] ma folafola mai le “filemu … o loo silisili lava i mea uma e manatu i ai” [ Filipi 4:7 ], o se lagona e oo mai pe a “fetalai mai le filemu [e Lona Agaga] i o [tatou] agaga” [ Alema 58:11 ] e tusa lava po o a luitau o siomia ai i tatou. Pe o ni tauiviga patino, faalavelave faaleaiga, po o faafitauli faalenuu, o le a oo mai le filemu pe a tatou talitonu ua i ai i le Alo Pele e Toatasi na Fanaua a le Atua le mana e faamalolo ai o tatou agaga mafatia.

(Jean B. Bingham, “Ina Ia Atoa Lo Outou Olioli,” Ensign po o le Liahona, Nov. 2017, 86)

O a faamanuiaga o le a oo mai a o ou saili mo le filemu ia Iesu Keriso?

Na aoao mai Peresitene Russell M. Nelson:

O lenei, o’u uso e ma tuafafine pele, ou te faamanuia ia te outou ina ia faatumuina i le filemu o le Alii o Iesu Keriso. O Lona filemu e le mafai ona malamalama atoa i ai le tagata soifua. Ou te faamanuia ia te outou i se mana’o faateleina ma le gafatia e usitai ai i tulafono a le Atua. Ou te folafola atu a outou faia, o le a lilofia outou i faamanuiaga, e aofia ai le lototele sili atu, faateleina o faaaliga faaletagata lava ia, o le fealofani sili atu i totonu o o outou aiga, ma le olioli e ui i le lotolotoi ai o le lē mautonu.

(Russell M. Nelson, “O Se Taeao Fou,” Ensign po o le Liahona, Nov. 2020, 119)

Gaoioiga Faaopoopo e Aoao Ai

O le Filipi 4:8 ma le Mataupu Faavae o le Faatuatua 1:13

Mafaufau e tuuina atu i le vasega se taimi e matau ai mea e tutusa ai le Filipi 4:8 ma le Mataupu Faavae o le Faatuatua 1:13 . Ona mafai lea e le vasega ona fatu se faamatalaga e faaaoga ai le faamatalaga o le “afai/ona” e faavae i nei aoaoga ma le folafolaga a Paulo i le Filipi 4:9 . I se isi itu, e mafai e tagata aoga ona faia se mea e pei o le gaoioiga i le Sau, Mulimuli Mai ia te A’u—Mo le Peraimeri: Feagaiga Fou 2023 ma le ulutala “E mafai ona ou ‘mafaufau i mea’ e moni, faamaoni, ma mama.”

Fatu se pepa lautele o i ai se savali

Mafaufau e valaaulia le vasega e fatu se pepa lautele o i ai se savali e pei o na o loo maua i le mekasini o le Mo le Malosi o le Autalavou e faavae i se tasi o aoaoga a Paulo i le Filipi 4 . Valaaulia tagata aoga e faasoa mai mea na latou fatuina ma mafuaaga na latou filifili ai mea na latou faia.