Filipi; Kolose

Vaaiga Aoao

I le taimi o lona faafalepuipuiina i Roma, sa tusia ai e Paulo ni tusi i le Au Paia i Filipi ma Kolose ma aoao i latou e liliu atu ia Iesu Keriso mo le malosi. Sa ia aoao atu o Keriso o le puna o le filemu ma le olioli, ma sa ia faamamafa mai mea e mafai ona faia e le Au Paia ia lagona ai le olioli ma “le filemu o le Atua” (Filipi 4:7). Sa ia faamanatu atu foi ia i latou e “tutumau i le faatuatua, o faavaeina, ma mausali” (Kolose 1:23) ma ia “mauaa ma atiina ae” (Kolose 2:7) ia Keriso.

Saunia e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona muai saunia mo lesona taitasi.

Filipi ma Kolose

Faamoemoega o le lesona: O lenei lesona e mafai ona fesoasoani i tagata aoga ia iloa e mafai ona latou maua le malosi e ala ia Iesu Keriso e fetaiai ai ma o latou luitau.

Sauniuniga a le tagata aoga: Valaaulia le vasega e tauloto le Filipi 4:13 .

Anotusi e faaali atu: O faatonuga mo tagata aoga e faamaea ai le latou lesona e lima minute le umi (e aofia ai faataitaiga)

Fautuaga faafaiaoga i fesootaiga i vitio: Valaaulia tagata aoga e tape le leo ma le vitio a o latou saunia a latou lesona. A uma le taimi faatulagaina, tuu atu ia i latou e toe ki a latou vitio ma le leo, ma tuu tagata aoga i potu e vaevae iai. Valaaulia se tagata aoga naunautai se toatasi pe toalua e aoao atu a latou lesona i le vaega toalaiti.

Filipi 3

Faamoemoega o le lesona: O lenei lesona e mafai ona fesoasoani i tagata aoga ia malamalama i le taua o le faia o osigataulaga ina ia iloa ai Iesu Keriso.

Sauniuniga a le tagata aoga: Afai e mafai, valaaulia tagata aoga e ao mai ni tala mai tagata o le aiga po o tuaa o e na faia ni osigataulaga e mulimuli ai ia Iesu Keriso. Uunaia i latou e o mai saunia e faasoa mai nei aafiaga i le vasega.

Filipi 4

Faamoemoega o le lesona: O le a saili e tagata aoga e faailoa mai auala e mafai ona latou maua ai le olioli ma le filemu faateleina e ala ia Iesu Keriso i o latou lava olaga.

Sauniuniga a le tagata aoga: Valaaulia tagata aoga e fesili i ni nai uo po o tagata o le aiga pe faapefea ona aumai e Iesu Keriso ia i latou le filemu ma le olioli i o latou olaga.

Anotusi e faaali atu: O le ata o Paulo ma ona faalavefau ma papupuni i le filemu ma le fiafia e ono i ai

Fautuaga faafaiaoga mo fesootaiga i vitio: Mafaufau e faataga tagata aoga ona faaaoga le laupapa paepae e faaopoopo ai o latou manatu i luga o le lau vaaia o le masini a o latou lisiina auala e maua ai le olioli ma le filemu faateleina e ala ia Keriso.

Kolose 1–2

Faamoemoega o le lesona: O lenei lesona e mafai ona fesoasoani i tagata aoga e iloa ai malosiaga o faamatauina ai lo latou faatuatua ma auala e mafai ona latou mausali atili ai ia Iesu Keriso.

Sauniuniga a le tagata aoga: Valaaulia tagata aoga e tusi pe pue se ata o le ituaiga laau fualaau aina e sili ona latou fiafia i ai ma aumai le ata i le vasega. Fai atu ia i latou e mafaufau i lesona faaleagaga e mafai ona tatou aoaoina mai laau.

Vitio: “Mauaina o le Olioli ia Keriso” (9:56; matamata mai le faailotaimi 0:09 i le 3:56); “Siitia Ae i Luga Lou Ulu ma Olioli” (9:51; matamata mai le faailotaimi 5:48 i le 7:48); “Asiosio Faaleagaga” (2:24)

Fautuaga faafaiaoga mo fesootaiga i vitio: Mafaufau e faaaoga se ata tusi po o se laupapa paepae ma valaaulia tagata aoga e fesoasoani e tusi se laau malosi o loo mauaa ia Keriso ma faaigoa vaega eseese a o faagasolo le lesona.

Iloiloga 21 o le Atamai i Aoaoga Faavae

Faamoemoega o le lesona: O lenei lesona o le a tuuina atu ai i tagata aoga avanoa e faataitai ai le faaaogaina o fuaitau o le atamai i aoaoga faavae o le Feagaiga Fou i le tele o tulaga eseese.

Sauniuniga a le tagata aoga: Valaaulia tagata aoga e filifili se fuaitau faapitoa o le atamai i aoaoga faavae o le Feagaiga Fou na fesoasoani ia i latou ma ia saunia e faasoa mai i le vasega pe na faapefea ona fesoasoani ia i latou.

Anomea mo tagata aoga: O se fasipepa ma se mea e tusi ai mo tagata aoga taitasi

Fautuaga faafaiaoga mo fesootaiga i vitio: E mafai ona tuu tagata aoga i potu vaevae e talanoaina ai laasaga 1 e oo i le 4 i le gaoioiga tusitusi o le atamai i aoaoga faavae. Ina ia tuu atu i tagata aoga se avanoa e galulue ai ma ni tagata eseese o le vasega, mafaufau e tuu i latou i se potu vaevae ese mo fesili taitasi.