Efeso 6:10–24

“Ia Oofu Outou i Ofutau Atoatoa mai le Atua”

Ua tatou i ai i se taua mo agaga o tagata. Na musuia e le Tama Faalelagi Paulo e aoao atu e uiga i le ala e mafai ai ona tatou sao mai i osofaiga a Satani. O lenei lesona ua faamoemoe e fesoasoani ia te oe e malamalama ai i mea ua saunia e le Atua e puipuia ai oe mai mea leaga o le lalolagi, iloilo au tapenapenaga faaleagaga o i ai nei, ma fai se fuafuaga e faaleleia atili ai au puipuiga faaleagaga.

Sauniuniga a le tagata aoga: Valaaulia tagata aoga e iloilo ma faamaea le gaoioiga ua faaautuina “O le ofutau o le Atua o le a fesoasoani e puipuia au mai le leaga” i le Sau, Mulimuli Mai ia te Au—Mo Tagata Taitoatasi ma Aiga ma o mai saunia e faasoa mai mea sa latou aoaoina e uiga i le ofutau o le Atua (“Oketopa 2–8. Efeso: ‘Ina ia Fa’a’atoatoaina ai le Au Paia,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023).

Gaoioiga E Ono Mafai Ona Aoao Mai Ai

E soona saua Satani e ala i ana togafiti.

• O le a sou manatu o a ni eseesega sili i le va o mea o loo e aafia ai i lou talavou ma mea na aafia ai ou matua a o iai i latou i tausaga e pei ona e iai nei?

Faitau le saunoaga lenei a Elder Robert D. Hales (1932–2017) o le Korama a Aposetolo e Toasefululua, ma vaavaai mo se eseesega e tasi na ia faamamafaina:

E lei feagai lava o outou tama ma tama o o outou tama ma ni faaosoosoga e pei ona feagai nei ma outou i aso faipea. O lo o outou ola ai i aso e gata ai. Afai na manao lou tama e aafia i se mea faatupu faalavelave, sa ia alu ma saili atu i lena mea. E le o toe i ai se na mea! I lenei vaitaimi ua saili faaosoosoga ia te outou! Faamolemole ia manatua lena mea! O loo manao Satani ia ona maua outou, ma o loo “taoto mai le agasala i le faitotoa” [ Mose 5:23 ]. O le a faapefea ona e tetee atu i ana togafiti fai faamalosi?

(Robert D. Hales, “Tutu Malolosi i Nofoaiga Paia,” Ensign po o le Liahona, Me 2013, 48–49)

• O a ni auala e maua ai i tatou e faaosoosoga i aso nei nai lo o le tatou tau saili i ai?

Mafaufau e faaali atu faatonuga ma fesili nei ia mafai ona vaai i ai tagata aoga. Valaaulia tagata aoga e mafaufau loloto ma le filemu i a latou tali.

Mafaufau loloto i fesili nei, pe tusi au tali i lau api faamaumau mo suesuega.

• O a nisi o auala o loo taumafai Satani e faaosooso ai ia te oe lava ia?

• O le a sau mea o fai e saili ai le fesoasoani a le Alii e faatautee atu ai i faaosoosoga a Satani? O a nisi o ia mea ua lelei ona e faia? O le a se mea e te ono manaomia ona fai e faaleleia atili ai?

A o e suesue ai i lenei lesona, saili le taitaiga a le Agaga Paia e fesoasoani ia te oe ia iloa ai pe mafai faapefea ona e sailia ma maua atoatoa atili le puipuiga a le Faaola i lou olaga mai osofaiga a Satani.

O le puipuiga a le Alii

Faitau le Efeso 6:10–13, ma vaavaai po o a mea na fai mai ai Paulo sa faasagatau i ai le Au Paia i ona aso.

• O a ni mea e tutusa ai o e vaaia i le va o mea sa faasagatau i ai le Au Paia i Efeso i o latou taimi ma mea o loo tatou faasagatau i ai i le taimi nei?

• Aisea o le a finagalo ai le Tama Faalelagi ma Iesu Keriso ina ia puipuia i tatou mai le leaga? O le a se mea ua aoao mai e lenei naunautaiga ia i tatou e uiga ia i Laua?

• O le a le mea na valaaulia ai e Paulo tagata Efeso e fai ina ia mafai ai ona tetee atu i nei mea leaga?

Mai le Efeso 6:10–13, ua tatou aoao ai afai tatou te oofu i le ofutau atoatoa mai le Atua, o le a mafai ona tatou tetee atu i mea leaga.

O le ofutau o le Atua o se faatusa po o se faailoga mo le puipuiga ua ofoina mai e le Tama Faalelagi ma Iesu Keriso ia i tatou. I le taua o loo feagai ma i tatou, o le ofutau o le Atua ua mamanuina faapitoa mo oe ma tulaga matautia i lou olaga. Ina ia fesoasoani ia e malamalama i lenei puipuiga faalelagi, atonu e te manao e kopi le ata lenei i lau api faamaumau mo suesuega pe lolomi foi. Tusi i luga o le ata au tali i le gaoioiga lenei:

Saunia le pepa lenei e tufatufa atu mo tagata aoga. Pe e mafai foi e tagata aoga ona toe fatu le pepa e tufa atu i a latou api faamaumau mo suesuega. Faaali atu fesili o le a tali e tagata aoga mo vaega taitasi o le ofutau.

Faitau le Efeso 6:14–18 e faailoa mai ai vaega taitasi o le ofutau o le Atua, pe matamata i le “O Le Ofutau o le Atua” (2:01), o loo maua i le ChurchofJesusChrist.org. Tusi mea e faatusa i ai vaega taitasi o le ofutau i luga o lau ata. Atonu e fesoasoani le iloa o le “seevae” ( Efeso 6:15) e faasino i le ofuina o se ufiufi mo le puipuia o vae.

Mo se isi mea e sui tulaga ai le vitio o loo fautuaina atu i luga, mafaufau e faaali le ata o le saunoaga a Elder Hales “Tutu Malolosi i Nofoaga Paia” mai le faailotaimi 0:40 i le 2:37, o loo maua i le ChurchofJesusChrist.org.

Mafaufau e vaevae le vasega i ni vaega. Tofi atu i vaega taitasi se vaega e tasi o le ofutau. Afai e toalaiti lau vasega, atonu e moomia ona e tofia ni vaega o le ofutau e sili atu i le tasi i vaega taitasi.

1. O le a le manatu faaleagaga na faatatau i ai e Paulo lenei vaega o le ofutau?

2. O le a se mea e mafai ona faatusa faaleagaga i ai le itutino o loo puipuia e le ofutau?

3. E faapefea ona tatou ofuina lenei vaega o le ofutau a le Alii e maua ai Lana puipuiga mai le amioleaga?

Ina ia faataitai mo tagata aoga le auala e faamaea ai pepa na tufaina atu, mafaufau e faamatala laasaga e fai e faaaoga ai le faataitaiga lenei i se vaega e tasi o le ofutau. Fai i se tagata aoga e faitau leotele le Efeso 6:14 . Ia talanoaina ma le vasega ni tali talafeagai i fesili taitasi. E mafai e tagata aoga ona tali fesili 2 ma le 3 i ni auala eseese. Tagai i le tusiga “O le Ofutau o le Atua” (New Era, Ian. 2009, 22–23) mo ni malamalamaga faaopoopo e uiga i auala e mafai ai e tagata aoga ona tali nei fesili.

Mo “sulugatiti ua fusia i le upumoni” ( Efeso 6:14), o mea nei e mafai ona avea ma tali i fesili o i luga: (1) upumoni; (2) e faatusa i lo tatou ola mama po o le mama a’ia’i; ma le (3) e mafai ona tatou aoaoina upumoni e uiga i le Tama Faalelagi ma Lana fuafuaga o le faaolataga lea e mafai ona faaosofia ai i tatou ia tumau i le ola mama a’ia’i.

A uma ua lava se taimi, valaaulia se sui mai vaega taitasi e lipoti mai e uiga i le latou vaega tofia o le ofutau. A o lipoti mai vaega taitasi, valaaulia tagata aoga e tusi mea na maua e le vaega lea e fai le latou lipoti, i a latou lava pepa na tufaina mai. Mafaufau e fesili i le vasega po o a ni a latou fesili po o ni malamalamaga na latou maua e uiga i aoaoga a Paulo i le ofutau o le Atua.

O le ofuina o le ofutau atoa o le Faaola

Sa faamamafa mai e Paulo ma le Faaola le ofuina o le ofutau atoatoa mai le Atua (tagai i le Efeso 6:11, 13 ; Mataupu Faavae ma Feagaiga 27:15).

• O a ni tulaga lamatia o e vaaia i le ofuina o na o se vaega o le ofutau o le Alii? Aisea e te manatu ai e finagalo le Tama Faalelagi ma Iesu Keriso ia tatou puipuia atoatoa?

• O le a se mea o le a e faia i aso taitasi e oofu atoatoa atili ai le ofutau atoa o le Atua e puipuia ai mai faaosoosoga o loo e feagai ai?

• E faapefea ona avea le liliu atu i le Tama Faalelagi ma Iesu Keriso mo se fesoasoani i lenei auala, o se faaaliga o lou alofa ma le faalagolago ia i Laua?

Molimau atu i le naunautaiga o le Tama Faalelagi ma Iesu Keriso e puipuia i tatou mai faaosoosoga ma faailoa atu le talitonuga mautinoa e mafai e tagata aoga ona maua lenei malosiaga ma le puipuiga mai ia i Laua a o latou mulimuli i uunaiga ua latou maua.

Talatalaga ma Faamatalaga o Talaaga

O le a le taua o itutino o loo puipuia e le ofutau o le Faaola?

Na ta’ua e Peresitene Harold B. Lee (1899–1973):

O loo ia i tatou vaega e fa o le tino lea na fai mai le Aposetolo o Paulo [e] sili ona i se tulaga lamatia e mana o le pouliuli. O sulugatiti, e faatusa i le mama, ola mama. O le loto e faatusa i a tatou amio. O o tatou vae, o a tatou sini po o faamoemoega i le olaga ma mulimuli ane o tatou ulu, o o tatou mafaufauga.

(Harold B. Lee, Feet Shod with the Preparation of the Gospel of Peace, Brigham Young University Speeches of the Year [Nov. 9, 1955], 2)

O le a se mea e mafai ona ou faia e ofu ai le ofutau atoatoa o le Atua?

Na aoao mai Elder Neal A. Maxwell (1926-2004) o le Korama a Aposetolo e Toasefululua:

O le toina ese o le tagata natura e mafai ai ona oofu ai le ofutau atoatoa mai le Atua, lea na semanu e le ofi atoa muamua! (tagai i le Efeso 6:11, 13).

(Neal A. Maxwell, “Plow in Hope,” Ensign, Me 2001, 60)

Na aoao mai Peresitene M. Russell Ballard o le Korama a Aposetolo e Toasefululua:

Ou te fiafia e mafaufau o lenei ofutau faaleagaga e le o se fasi uamea ua mamanuina ina ia ofi lelei i le tino ae o se ofutau filifili uamea e soosoo faatasi. O filifili uamea e soosoo faatasi e aofia ai ni fasi uamea itiiti se tele e faamau faatasi ina ia mafai e le tagata o faaaogaina ona fetuutuunai e aunoa ma le aveesea o le puipuiga. Ua ou fai atu lena faamatalaga aua mai o’u aafiaga, e leai se mea e sili atu po o se mea maoae se tasi e mafai ona tatou faia e faaauupegaina ai i tatou lava faaleagaga. O le mana moni faaleagaga o loo taoto i faatinoga laiti e tele ua milo faatasi i se ie o le malosiaga faaleagaga e puipuia ma ufitia ai mai i mea leaga uma.

(M. Russell Ballard, “Be Strong in the Lord,” Ensign, Iulai 2004, 8)

E faapefea ona fesootai ofusa o le malumalu i le ofutau o le Atua?

Na faamalamalama mai e Elder Carlos E. Asay (1926–99) o le Au Peresitene o Fitugafulu:

Peitai, o loo i ai se isi vaega o le ofutau e agavaa mo lo tatou iloiloina. O laei faapitoa ia ua lauiloa o le ofusa o le malumalu, po o le ofusa o le perisitua paia, e ofuina e tagata O Le Ekalesia a Iesu Keriso o le Au Paia o Aso e Gata Ai o e ua maua o latou faaeega paia o le malumalu. O lenei ofusa, e ofuina i le ao ma le po, ua i ai ni faamoemoega taua se tolu: o se faamanatu o feagaiga paia na osia ma le Alii i Lona maota paia, o se ufiufi o le puipuiga mo le tino, ma o se faatusa o le tauagafau o laei ma le ola e tatau ona faauigaina ai olaga o soo lotomaualalo uma o Keriso.

(Carlos E. Asay, “The Temple Garment: ‘An Outward Expression of an Inward Commitment,’” Ensign, Aok. 1997, 20)

Galuega Faatino Faaopoopo e Aoao Mai Ai

Lesona e faaaoga ai meafaitino

O loo lisi atu i lalo isi auala e mafai ona amata ai le lesona:

1. Mafaufau e aumai ni meafaigaluega mo le puipuiga e faaaoga i taaloga po o isi gaoioiga ma talanoaina pe faapefea ona latou puipuia tagata auai.

2. Faaali atu ata o ni laau se tele (e pei o se laau e i ai laau tuitui) po o manu (e pei o manu e i ai seu, matiuu, nifo, po o ufiufi), ma talanoaina pe faapefea ona latou puipuia i latou lava.

O le avea ai o Iesu Keriso ma ofutau

E mafai ona valaaulia tagata aoga e suesue fuaiupu nei e aoao atili ai e uiga i vaega o le ofutau o loo maua i le Efeso 6:14–17 ma pe faapefea ona faatusa vaega taitasi ia Iesu Keriso:

• “sulugatiti ua fusia i le upumoni” (tagai i le Isaia 11:5 ; Ioane 14:6)

• “ufifatafata o le amiotonu” (tagai i le Isaia 59:17 ; Filipi 3:9)

• “ua seevae i le sauniga o le talalelei o le filemu” (tagai i le Isaia 9:6 ; Mataio 5:9)

• “talita o le faatuatua” (tagai i le Moronae 7:33)

• “puloutau o le faaolataga” (tagai i le Salamo 27:1 ; 1 Tesalonia 5:8 ; Mosaea 3:17 ; Mataupu Faavae ma Feagaiga 93:8 ; Eperu 5:9)

• “pelu a le Agaga, o le afioga lea a le Atua” (tagai i le Mataupu Faavae ma Feagaiga 6:2 ; 1 Nifae 15:23–24 ; Helamana 3:29–30)

A uma ona fai e tagata aoga, fai atu ia i latou e faasoa mai soo se malamalamaga na latou maua e uiga i le ala e mafai ai e Iesu Keriso ona puipuia i latou mai mea matautia faaleagaga latou te feagai.