Efeso 2–5
Mauaina o Upumoni Faavavau
O le a lou mautinoa i lou gafatia e maua ai le upumoni i tusitusiga paia? E aoao e perofeta upumoni mai le Tama Faalelagi mo lo tatou lelei. Mo se faataitaiga, na aoao atu e Paulo le Au Paia i Efeso i upumoni e uiga i le faatoilaloina o le lalolagi ma avea ai atili e faapei o Iesu Keriso. O lenei lesona ua faamoemoe e fesoasoani ia te oe e aoao ai pe faapefea ona maua upumoni mai tusitusiga paia o le a fesoasoani ia te oe i lou olaga ma aumaia oe ia latalata atili atu i le Faaola.
O le faataitaiina o tomai o le suesueina o tusitusiga paia. E mafai ona manuia tagata aoga mai le faataitaiina o tomai mo le suesueina o tusitusiga paia, e pei o le faatatauina o mau i o latou olaga, faaaogaina o fesoasoani mo suesuega, faailoaina o autu ma mamanu, malamalama i faatusa, mauaina o punaoa o le konafesi aoao, tusia o faamatalaga i tusitusiga paia, faia o lisi, faaaoteleina o mea latou te faitauina, sailia ma le faaaogaina o mau fesootai, faauigaina o upu faigata, ma isi mea faapena.
Sauniuniga a le tagata aoga: Valaaulia tagata aoga e suesue i tusitusiga paia i le va o le taimi nei ma le isi vasega e sosoo ai ma vaavaai mo upumoni o loo aoao mai e tusitusiga paia. Valaaulia i latou e mafaufau loloto i auala eseese e mafai ona latou faailoa mai ai nei upumoni.
Gaoioiga E Ono Mafai Ona Aoao Mai Ai
Sailia o le taua
O le vitio “Flecks of Gold” (3:15) e faatatau i ni alii se toalua sa saili i auro. Faitau le tala pe matamata le vitio, o loo maua i le ChurchofJesusChrist.org, mai le faailotaimi 0:00 i le 2:26. Mafaufau i soo se lesona faaleagaga e te aoaoina mai ai.
O le tele o taimi e faapei ai i tatou o le alii faipisinisi talavou mai Boston, i le 1849, e pei ona ta’u mai i le tala, na aafia i le faananauga o le mauaina ai o le auro i Kalefonia. Sa ia faatau ese atu ana mea uma ina ia saili lona manuia i vaitafe o Kalefonia, lea na ta’u mai ia te ia na faatumulia i fasi auro matua lapopoa e tau le mafai e se tasi ona tauave.
I lea aso ma lea aso, sa lolō ai e lea alii talavou lana apa i totonu o le vaitafe ae leai lava se mea na maua. Na pau lona taui o se faaputuga maa ua faatupulaia. I lona le fiafia ma le mativa, na ia sauni ai e toe foi pe a na le fai atu ia te ia i se tasi aso se tagata atamai i le sailiga o le auro, “Atalii, matuā telē tele lena faaputuga maa.”
Na tali mai le alii talavou, “E leai se auro iinei. O le a ou toe foi i lo’u aiga.”
Na savali atu le tagata atamai lea i le faaputuga maa ma fai atu, “Oi, o loo i ai le auro. Pau lava le mea o lou iloa o le auala e maua ai.” Na ia uuina mai i luga ni maa se lua ma faafetoai faatasi. Na ta’e le tasi o maa ma iloa atu ai ni togitogi auro ninii se tele o loo ua feilafi i le la.
I le iloaina atu o se tamai taga e fai i pa’u manu ua tumu o loo fusi i le manava o lea tagata, na fai atu ai le alii talavou, “O loo ou sailia ni fasi auro e pei o auro na e i lau taga, ae le na o ni nai fuifui auro.”
Na faaali atu e le tagata atamai ua loa i le sailiga o le auro lana taga i le alii talavou, lea na tilotilo i ai i totonu ma le faamoemoe o le a ia iloa atu ni fasi auro lapopoa se tele. Sa ofo o ia i lona vaai atu e faatumulia le taga i le faitau afe ma afe o fuifui auro.
Sa fai atu le tagata poto, “Atalii, e foliga mai o loo e pisi tele e saili ni fasi auro lapopoa ua e misia ai le faatumuina o lau taga i nei fuifui auro taua. O le faaputuputuina ma le onosai o nei fuifui auro ua ou mauoa ai.”
(M. Russell Ballard “Mauaina o le Olioli e ala i Auaunaga Alofa,” Ensign po o le Liahona, Me 2011, 46)
-
E mafai faapefea ona fesootai lenei tala i le mauaina o upumoni i tusitusiga paia?
Faitau faamatalaga nei, ma faatulaga mai le tasi i le lima le moni o nei mea mo oe (tasi = e le moni mo au i soo se taimi; lima = e moni pea mo au i taimi uma)__ Ou te talitonu i lo’u gafatia e maua ai upumoni e faavavau i tusitusiga paia faatasi ai ma le fesoasoani a le Agaga Paia.
__ O le mauaina o upumoni i tusitusiga paia o se faamanuiaga lea i lo’u olaga ma fesoasoani ou te lagona ai le latalata atili atu i le Tama Faalelagi ma Iesu Keriso.
Mafaufau e valaaulia tagata aoga o e na faamaeaina le gaoioiga sauniuni a le tagata aoga e faasoa mai o latou aafiaga.
O le mauaina o upumoni i tusitusiga paia
O nisi upumoni i tusitusiga paia e sili atu ona faigata ona maua nai lo isi. Saili le fesoasoani a le Tama Faalelagi e ala i le Agaga Paia e fesoasoani ia te oe e faailoa upumoni i le savali a Paulo i le Au Paia i Efeso. O le a fesoasoani le Agaga Paia ia te oe e ala i le molimau atu ia te oe i nei upumoni (tagai i le Moronae 10:5 ; Ioane 16:13).
O lenei vaega ua faamoemoe e avea o se faataitaiga e fesoasoani i tagata aoga ia iloa ai pe faapefea ona faailoa upumoni i fuaiupu o tusitusiga paia. Mafaufau e faaaoga isi upumoni mai le Efeso 2–5 pe afai e sili ona aoga mo tagata aoga.
Mafaufau e faasoa atu le vitio “Identifying Doctrine and Principles: Students’ Testimonies” (2:38) e fesoasoani ai i tagata aoga ia iloa le taua o le aoaoina o le auala e faataitai ai lenei tomai. O loo maua lenei vitio i le ChurchofJesusChrist.org.
Valaaulia tagata aoga e faasoa mai pe faapefea ona latou faailoaina upumoni i mau.
A o avea Paulo ma se pagota i le fale na pue faapagotaina ai o ia i Roma, sa ia tusi atu i tagata Efeso e faamalosiau ma fautuaina i latou e uiga i le auala e faaauau ai ona faalatalata atili atu ia Iesu Keriso ma le ala e faatoilalo ai osofaiga faaleagaga a le tiapolo.CONTD Faataitai le faailoaina o upumoni mai mea na faasoa atu e Paulo i nei Au Paia.
O se tasi lenei o auala e mafai ona e vaavaai ai mo upumoni e faavavau a o e suesue i tusitusiga paia. Faitau le Efeso 2:4–10, ma fai laasaga nei:
Mafaufau e tusi laasaga nei i luga o le laupapa ina ia mafai e tagata aoga ona tagai i ai i le taimi o le lesona.
-
Vaavaai mo upu, fasifuaitau, po o fuaiupu e foliga mai e sili ona taua. Mafaufau e faailoga na mea i totonu o au tusitusiga paia.
-
Aotele le manatu autu o nei upu, fasifuaitau, po o fuaiupu. (Mo se faataitaiga, e mafai ona e aoteleina le tala a Paulo e uiga i le alofa tunoa i le fuaiupu 8 ?)
-
Faatulaga mea na e aoaoina i se faamatalaga o le upumoni e mafai ona e faaaogaina i lou olaga.
-
O le a se upumoni se tasi na e mauaina? Na faapefea ona e faailoaina lena upumoni?
Fai i nisi o tagata aoga e faasoa atu. Faamalo atu ia i latou i a latou taumafaiga. O nisi o upumoni e mafai ona aofia ai mea nei: E alofa mutimutivale le Atua ma e alofa ia i tatou (tagai i le Efeso 2:4); a o tatou faatinoina le faatuatua ia Iesu Keriso, e faaolaina i tatou i Lona alofa tunoa (tagai i le Efeso 2:5, 8); ua le lava le na o a tatou galuega e laveaiina ai i tatou (tagai i le Efeso 2:8–9). A o faasoa mai tagata aoga, mafaufau e fai atu fesili tulitatao e pei o nei:
-
E mafai faapefea e lenei upumoni ona fesoasoani ia te oe e lagona ai le alofa o le Tama Faalelagi ma Iesu Keriso mo oe pe fesoasoani ia te oe ia avea atili e faapei o i Laua?
-
Na faapefea ona e faaaogaina pe mafai foi faapefea ona e faaaogaina lenei upumoni i lou olaga?
Faataitai le faailoaina o upumoni
E ono fesoasoani le tuu o tagata aoga e galulue taitoatasi e saili upumoni. Ona mafai lea ona latou sue se isi tagata aoga i le vasega o lē sa suesue i le fuaitau lava lea e tasi ma faatusatusa ia upumoni na latou maua i le tasi ma le isi.
Faaaoga laasaga na lisiina atu muamua. Filifili se seti se tasi pe lua o fuaiupu nei, ma saili mo upumoni e faavavau o loo i ai.
-
O le Efeso 4:20–32, e aofia ai le Faaliliuga a Iosefa Samita i le vaefaamatalaga 26a (Atonu e fesoasoani le iloa o le “tagata tuai” i nei fuaiupu e faatusa i auala agasala muamua ma o le “tagata fou” e faatusa i le ola ai i se olaga amiotonu e ala ia Iesu Keriso.)
Filifili se tasi o upumoni na e maua, ma mafaufau loloto pe mafai faapefea ona fesoasoani ia te oe e lagona ai le alofa o le Tama Faalelagi ma Iesu Keriso mo oe pe fesoasoani ia te oe ia avea atili ai e faapei o i Laua.
I le faaaogaina ai o punaoa o loo avanoa mo oe (pepa, penitala vali, meafaigaluega faatekinolosi, ma isi), fatu se pepa faalauiloa o i ai se savali e mafai ona faaopoopo i le mekasini o le Mo le Malosi o le Autalavou. Ia aofia mea nei i lau pepa faalauiloa o i ai se savali:
-
O le mataupu faavae na e faailoaina ma fuaiupu e tasi pe sili atu o tusitusiga paia i le mea na e maua ai
-
O se ata faigofie po o se ata na tusia e fesoasoani i le aufaitau ia malamalama ai i le upumoni pe faapupula mai ai le ala e mafai ai e se tasi ona faaaoga lenei upumoni i o latou olaga
Mafaufau e faaali atu ni nai faataitaiga o pepa faalauiloa o i ai savali mai le ChurchofJesusChrist.org. E mafai ona fesoasoani le sootaga lenei: https://www.churchofjesuschrist.org/media/collection/inspirational-picture-quotes-images?lang=eng.
Pe vaai e iloa ai pe o le lomiga aupito lata mai o le mekasini o le Mo le Malosi o le Autalavou o loo aofia ai se pepa faalauiloa o i ai se savali.
Valaaulia tagata aoga e faasoa le latou pepa faalauiloa o i ai se savali ma faamatala atu. Mafaufau e fai atu fesili tulitatao e pei o nei: “Na faapefea ona e maua lenei upumoni?” “E faapefea ona fesoasoani ia te oe e te lagona ai le alofa o le Tama Faalelagi ma Iesu Keriso mo oe?” “Na faapefea ona faamanuiaina oe e le Alii a o e taumafai e ola ai i lenei upumoni?”
Tomanatunatu i le sailia o upumoni
Mafaufau i mea na oo ia te oe i le tausaili ai mo upumoni e faavavau i tusitusiga paia.
-
O a ni auala na e lagonaina na faamanuiaina ai oe?
-
O le a se mea na faigata?
-
Na faapefea e le saili mo upumoni ona fesoasoani ia te oe e iloa ai le alofa o le Tama Faalelagi mo oe?
-
E mafai faapefea ona e faaaogaina mea ua e aoaoina i le aso i au suesuega patino pe faaleaiga o tusitusiga paia?
Tala Auiliili ma Faamatalaga o Talaaga
Efeso 2:4–9 . O le a le alofa tunoa ma o le a le aoga mo au?
A o auauna ai o se tasi o le Au Peresitene Sili, sa faauigaina ai e Peresitene Dieter F. Uchtdorf le alofa tunoa o le Atua “o le fesoasoani faalelagi ma le faaeega paia o le malosi lea tatou te tuputupu ae ai mai tagata sese ma le le atoatoa ua tatou i ai nei o ni tagata faaeaina o le ‘upumoni ma le malamalama, seia oo ina faamamaluina [i tatou] i le upumoni ma [iloa] mea uma’ [ Mataupu Faavae ma Feagaiga 93:28 ]” (“O Le Meaalofa o le Alofa tunoa,” Ensign po o le Liahona, Me 2015, 107). Mo nisi faamatalaga e uiga i le alofa tunoa, mafaufau e faitau le lauga atoa, o loo maua i le ChurchofJesusChrist.org.
Mo nisi malamalamaga i le alofa tunoa o le Faaola, faitau le Mosaea 2:20–24 ma le Filipi 2:12–13 .
Efeso 4:22 . O le a le uiga o le “tuu ese le tagata tuai”?
Na aoao mai Paulo afai tatou te filifili e talia le sauniga o le papatisoga, ua tatou osigafeagaiga e faamuta o tatou ala tuai (pe “tuu ese le tagata tuai” [ Efeso 4:22 ]) ma amata ai se olaga fou o ni soo o Iesu Keriso (tagai i le Roma 6:1–6 ; Mataupu Faavae ma Feagaiga 20:37). E aofia ai i lenei mea le tuua o a tatou agasala ma soo se mea o le a taotaomia ai i tatou mai le latalata atili atu i le Tama Faalelagi. E le mafai ona tatou faatupua lenei faagasologa na o i tatou lava. E tupu ona o Iesu Keriso ma Lana Togiola ma le aafiaga faapaiaina a le Agaga Paia.
Galuega Faatino Faaopoopo e Aoao Mai Ai
Malamalama loloto atili ai i le upumoni
A uma ona faailoa mai e tagata aoga se upumoni mai le Efeso, e mafai ona valaaulia i latou ia malamalama loloto atili i le upumoni. E mafai ona latou faaaogaina punaoa o tusitusiga paia, Autu o le Talalelei (topics.ChurchofJesusChrist.org), polokalama o le Potu Tusi o le Talalelei, po o isi punaoa o loo maua e sue ai upu autu. Ona mafai lea ona valaaulia i latou e faasoa mai mea na latou aoaoina e uiga i upumoni ma pe mafai faapefea ona latou faaaogaina upumoni i o latou olaga.
Malamalamaaga o le Tusi a Mamona i le alofa tunoa o Iesu Keriso
Afai o le a fesoasoani i tagata aoga e talanoaina le alofa tunoa o Iesu Keriso nai lo le sailia o mataupu faavae i tusitusiga paia, valaaulia i latou e suesue le Efeso 2:1–12, ma faatusatusa pe faape’i o latou olaga e aunoa ma le alofa tunoa o Iesu Keriso (tagai i fuaiupu 1–3) pe faape’i o latou olaga i Lona alofa tunoa (tagai i fuaiupu 4–8). Ona mafai lea ona latou suesue i fuaitau mai le Tusi a Mamona o loo aoao mai ai e uiga i le alofa tunoa o le Faaola (tagai i le 2 Nifae 10:24–25 ; Iakopo 4:6–7 ; Helamana 12:24 ; Eteru 12:27 ; Moronae 10:32–33), faailoa mai o latou lava manaoga mo le alofa tunoa o le Faaola, ma fatu se fuafuaga mo le auala e mafai ai ona latou saili soo atu mo Lona alofa tunoa.