Efeso 2

O Iesu Keriso, o le Maa Tulimanu Autu

Global Visual Library Low-Fidelity Symbol Knockout

O le Au Paia sa nonofo i Efeso o e sa avea ma Tagata o Nuu Ese a o lei liua i latou atonu na lagonaina le faapei o ni “tagata ese ma e ua aumau” (Efeso 2:19) a o latou tapuai faatasi ma Kerisiano Iutaia. Sa faamanatu atu e Paulo i le Au Paia i Efeso ua tuufaatasia i latou e ala ia Iesu Keriso o ni “tagatanuu faatasi ... o le aiga o le Atua” (Efeso 2:19). O le ekalesia ua latou auai ai nei sa fausia i luga o le faavae o Keriso ma Ana aposetolo ma perofeta ma sa i ai le mana e faamanuia ai i latou a o latou o mai faatasi ma le faatuatua ia Iesu Keriso. O lenei lesona e mafai ona fesoasoani ia te oe e iloa ai ma sailia faamanuiaga o loo avanoa ona o loo taitaia e Iesu Keriso Lana Ekalesia i aso nei e ala i perofeta ma aposetolo.

O le faamamafaina o le matafaioi a perofeta. O le malamalama ai i le matafaioi a perofeta e mafai ai ona fesoasoani i le vasega e tali atu i luitau i lo latou faatuatua. Vaavaai mo ni auala e faamamafa ai matafaioi ma aoaoga taua a perofeta ma faasoa atu lau lava molimau i la latou taitaiga musuia.

Sauniuniga a le tagata aoga: Valaaulia tagata aoga e mafaufau loloto i le fesili “Faamata e faapefea lo’u olaga pe ana aunoa ma perofeta ma aposetolo o e ua valaauina e Iesu Keriso e taitaia Lana Ekalesia?”

Gaoioiga E Ono Mafai Ona Aoao Mai Ai

O se lagona o le auai ai

Aisea e ono lagona ai e se tasi e le fetaui ona avea ai ma se tagata O Le Ekalesia a Iesu Keriso o le Au Paia o Aso e Gata Ai?
Afai e lagona e se tasi e le fetaui i latou i le Ekalesia, o le a se fautuaga e te tuuina atu ia i latou?

Mafaufau e valaaulia tagata aoga e faatino se ata faataitai o le tulaga o loo i le fesili na muamua atu.

Mafaufau loloto pe o a ni ou lagona e uiga i le Ekalesia a le Alii. O anafea na e lagonaina ai se faalogona malosi o le avea ai ma se tasi ua auai i le Ekalesia? Pe na i ai ni taimi na e lagonaina ai e faapea e le fetaui lenei mo oe? O a faamanuiaga e te lagona o loo avanoa i se tagata o le Ekalesia a Keriso? A o e suesueina lenei lesona, vaavaai mo upumoni e uiga i mea na faia e le Alii mo i tatou lea e mafai ona tuufaatasia ai i tatou o ni tagata o Lana Ekalesia.

Talepeina i lalo o papupuni

I le taimi o le Aposetolo o Paulo, o tagata e le o ni Iutaia e liliu mai i le faa-Kerisiano (po o i latou sa avea muamua ma Tagata o Nuu Ese) atonu na lagonaina e faapea e le fetaui i latou ma isi tagata uma o le Ekalesia ma atonu na lagonaina atili le faapei o “tagata ese ma e ua aumau” ( Efeso 2:19). Mo se faataitaiga, i le malumalu i Ierusalema, semanu e le faatagaina i latou e pasia le “pa vaeloto” ( Efeso 2:14) i vaega e sili ona paia o le malumalu lea e na o tagata Iutaia, e aofia ai Kerisiano Iutaia, semanu e mafai ona oo atu iai. E le gata i lea, sa lei ofoina atu muamua i Tagata o Nuu Ese ia faamanuiaga o le talalelei vagana ina ua oo le faaaliga a le Tama Faalelagi ia Peteru (tagai i le Galuega 10).

Sa tusi atu Paulo i le Au Paia i Efeso, o e atonu o ni tagata faatoa liliu mai. Faitau le Efeso 2:12–14, 18–21, ma vaavaai pe na faapefea ona faamanuiaina e le Alii tagata o Efeso. Atonu e aoga le iloa o nei fuaiupu e amata i le valaauliaina e Paulo o nei Au Paia e toe manatua o latou olaga a o lei liua i latou. O le “aiga o le Atua” ( fuaiupu 19) o loo taua e Paulo e faasino i le Ekalesia a Iesu Keriso.

Afai e te fia maimoa i se vitio o faapupula mai ai le Efeso 2:10–22, mafaufau e matamata i le “Ye Are No More Strangers” (2:27), e maua i le ChurchofJesusChrist.org.

2:27

Na faapefea ona faamanuia e le Alii tagata Efeso?

E ala i Lana Togiola, na aveesea ai e Iesu Keriso papupuni uma na vavaeeseina ai Iutaia mai Tagata o Nuu Ese ma vavaeese ai foi Nuuese mai le Atua. Ua le toe tatau ona avea Tagata o Nuu Ese ma tagata Iutaia, ola i le tulafono a Mose, pe peritomeina ina ia auai ai i le Ekalesia. Ina ua latou o mai ia Iesu Keriso ma taliaina Lana talalelei, o i latou o “le aiga o le Atua” ( Efeso 2:19)—o se vaega o tagata o le feagaiga a le Atua.

O a ni auala e talepeina ai e le Faaola papupuni i le va o i tatou ma isi?
O le a sou lagona e uiga i le mauaina e tagata uma o le “ala … i le Tama” ( fuaiupu 18) e ala i “le toto o Keriso” ( fuaiupu 13)?
E faapefea ona e aoteleina faamanuiaga o fuaiupu 19–21 i se tasi e lagona e le fetaui i latou i le Ekalesia a le Alii?
Aisea e te manatu na faatusaina ai e Paulo le Ekalesia i se auaiga po o se aiga?

O le maa tulimanu autu

Mafaufau e valaaulia se tagata aoga e tusi mea nei i luga o le laupapa. I se isi faiga, e mafai e tagata aoga ona fausia se faatusa i poloka, ipu, po o tusi o se vasega po o ni vaega toalaiti.

I ona po o Paulo, o se maa tulimanu autu o se maa tele na faataatia i le tulimanu o se faavae. O maa tulimanu taitasi o se faavae e lagolagoina le tele o le mamafa o le fausaga ma sa fai ina ia faafesootai iai puipui. O le tulimanu o laina fesootai ma le faataotoga o isi maa uma sa fuaina mai le maa tulimanu autu.

Tusi se ata faatusa o mea o loo faamatala mai i le Efeso 2:19–21 . E mafai ona e faaigoaina lau ata tusi i faaupuga mai le fuaitau o mau.

Valaaulia se tagata aoga po o tagata aoga e faaali mai a latou ata tusi, po o mea na latou fauina, ma faamatala le mea e faatusa i ai.

O a upumoni e mafai ona tatou aoao mai i le ala na faavaeina ai e Iesu Keriso Lana Ekalesia?

E ono mafai ona faaaoga e tagata aoga ni upu eseese ae atonu o le a faailoa mai ai se upumoni e pei o lenei: O le Ekalesia a le Alii ua fausia i luga o le faavae o aposetolo ma perofeta, faatasi ai ma Iesu Keriso o le maa tulimanu autu.

O le a se mea ua e iloa e uiga ia Iesu Keriso lea ua talafeagai ai le faatusatusaga o Ia i se maa tulimanu autu?
O a ni auala e mafai ona tatou fausia ai o tatou olaga i luga o le Faaola ma Ana aposetolo ma perofeta?
E faapefea e le fausiaina o o tatou olaga i luga o le faavae o Iesu Keriso ma Ana perofeta ma aposetolo ona fesoasoani tatou te maua ai se nofoaga ma se faamoemoega i le Ekalesia?

O lou faavae

Mafaufau po o le fea o gaoioiga nei e sili ona lelei i le taulimaina o manaoga o tagata aoga. Atonu e aoga i tagata aoga le faia o ni filifiliga se lua e galulue ai taitoatasi, po o gaoioiga e mafai ona atofa atu i ni vaega toalaiti.

A o e faia nisi o gaoioiga nei, mafaufau loloto i fesili nei:

O le a la’u mea o fai e fausia ai lo’u olaga i luga o le faavae o perofeta ma aposetolo faatasi ma Iesu Keriso o le maa tulimanu autu? O a ni faamanuiaga ua ou mauaina?
O a ni auala e ono finagalo le Alii ou te fausia atili ai i luga o lenei faavae?

A. Faaaoga sina taimi e mafaufau loloto ai pe faape‘i lou olaga e aunoa ma perofeta ma aposetolo a le Alii i le lalolagi i aso nei. Vaai faalemafaufau i le olaga e aunoa ma la latou pule mai le Alii, ma a latou aoaoga musuia, taitaiga, ma faataitaiga faaKeriso. Tusi i lau api faamaumau mo suesuega pe faapefea ona ese le olaga ma mea o le a e misia.

E. Mulimuli ane i lana tusi, sa ta’ua ai e Paulo nisi faamanuiaga e oo mai e ala i perofeta, aposetolo, ma isi taitai o le Ekalesia. Faitau le Efeso 4:11–14 ma mafaufau e faailoga nei faamanuiaga. Atonu e fesoasoani le iloaina o se fai evagelia o se peteriaka, ma o se faifeau e faasino i se taitai o se aulotu, e pei o se peresitene o le siteki po o le itu, epikopo po o le peresitene o le paranesi. Tusi i lalo se auala se tasi pe lua ua e maua ai nei faamanuiaga.

I. Filifili se autu se tasi pe lua i le Mo Le Malosi o le Autalavou (tamaitusi, 2011). Tusi i lalo ni auala patino na fesoasoani ai lenei taiala mai aposetolo ma perofeta a le Alii ia te oe.

O. Mafaufau pe na faapefea ona fesoasoani perofeta ma aposetolo ia te oe ia iloa le Faaola ma avea atili ai e faapei o Ia. Tusi ou manatu i totonu o lau api faamaumau mo suesuega. O vitio nei (o loo maua i le ChurchofJesusChrist.org) e mafai ona fesoasoani ia te oe e manatunatu ma tusitusi ai.

“Vaega mai ‘O Le Keriso Soifua: O Le Molimau a le Au Aposetolo’” (2:45)

2:45

“O Loo Soifua o Ia: O Molimau ia Iesu Keriso” (2:11)

2:3

A uma ua lava se taimi, valaaulia ni tagata aoga se toatele e faasoa mai faamanuiaga ua latou maua mai le Alii e ala mai i perofeta ma aposetolo. Faamamafa atu le taua ma le aoga o le faalogo atu i mafaufauga ma aafiaga o tagata aoga. Mafaufau e faaopoopo ou lava manatu ma lau molimau.

O le a se mea na e aoaoina?

Ina ia faamaea ai lenei lesona, mafaufau e uiga i mea sa e aoaoina. Mafaufau pe faapefea e le fausiaina o lou olaga i luga o le faavae o perofeta ma aposetolo faatasi ma Iesu Keriso o le maa tulimanu autu ona tuufaatasia oe ma “le auaiga o le Atua” ( Efeso 2:19). Mafaufau pe o le a faapefea ona e fausia atili lou olaga i luga o le faavae o perofeta ma aposetolo faatasi ma le Faaola o le maa tulimanu autu.

Afai e lava le taimi, mafaufau e valaaulia tagata aoga e faasoa mai mea na latou aoaoina po o mea o le a latou faia e fausia ai o latou olaga i luga o Iesu Keriso ma Ana perofeta ma aposetolo.

Talatalaga ma Faamatalaga o Talaaga

Efeso 2:14 . O le a le “pa vaeloto o le vaeluaina” na tautala i ai Paulo?

O le malumalu i Ierusalema sa i ai ni lotoa po o ni eria, ma e na o ni tagata patino e mafai ona ulu atu i lotoa taitasi. Sa faataga ia Tagata o Nuu Ese e ui ae i le matietie o le malumalu ma ulu atu ai i le lotoa i fafo, e igoa o le Lotoa o Tagata o Nuu Ese. Peitai, o lotoa i totonu o le malumalu, sa pupuni mai le oo atu iai o Tagata o Nuu Ese i se pa vaeloto faapitoa po o se papuipui sa i ai pe tusa ma le tasi le mita le maualuga. Afai e laasia e se Tagata o Nuu Ese tala atu o lenei papuipui, e mafai ona fasiotia o ia. Na maua e le au suesue o fausaga anamua ni poloka maamora se lua na fausia ai lenei papupuni, ma o loo i ai tosivane faa-Eleni ma le faa-Latina e faitauina: “E le tatau ona laasia e se tagata ese talaatu o papupuni o loo siomia ai le malumalu. Po o ai lava e maua o faia faapea, o le a tuuaia o ia lava mo lona maliu lea o le a mulimuli mai” (Richard Neitzel Holzapfel, Eric D. Huntsman, Thomas A. Wayment, Jesus Christ and the World of the New Testament [2006], 160).

Ina ua mavae le malaga lona tolu faafaifeautalai a Paulo, sa tuuaia e nisi o Iutaia i Ierusalema ia Paulo i le aumaia o Tagata o Nuu Ese i talaatu o le papupuni, na mafua ai se vevesi ma iu ai ina pueina faapagota ia Paulo (tagai i le Numera 1:51 ; Galuega 21:27–29).

Efeso 2:20 . Aisea ua faavae ai le Ekalesia a Iesu Keriso i luga o aposetolo ma perofeta, faatasi ai ma Keriso o le maa tulimanu autu?

Na molimau mai Elder Jeffrey R. Holland o le Korama a Aposetolo e Toasefululua e uiga i le faavae o le Ekalesia a Keriso:

I taimi o le Feagaiga Fou, i taimi o le Tusi a Mamona, ma taimi o ona po nei, o nei taitai ua avea ma maa faavae o le Ekalesia moni, ua faatulagaina faataamilo ma mauaina lo latou malosi mai le maa tulimanu autu, “le papa o lo tatou Togiola, o [Iesu] Keriso lea, o le Alo o le Atua” [ Helamana 5:12 ]. … O lea faavae ia Keriso sa i ai ma e avea pea lava o se puipuiga i taimi “e auina mai ai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi.”

(Jeffrey R. Holland, “Perofeta, Tagatavaai ma Tali Faaaliga,” Ensign po o le Liahona, Nov. 2004, 7)

Galuega Faatino Faaopoopo e Aoao Mai Ai

Efeso 4:11–14 . Faamanuiaga mai le mulimuli i perofeta ma aposetolo

Afai o le a manuia tagata aoga mai se talanoaga loloto o le Efeso 4:11–14, valaaulia i latou e faitau nei fuaiupu, ma vaavaai pe aisea na tuuina mai ai e le Alii i le Ekalesia ia aposetolo, perofeta, ma isi taitai. O se tasi o mataupu faavae e mafai ona latou faailoa mai o le: Ua valaauina e le Alii ia aposetolo, perofeta, ma isi taitai o le Ekalesia e fesoasoani e faaatoatoa le Au Paia ma puipuia i latou mai mataupu sese.

Faaali pe tusi se ata o se vaa i le lotolotoi o vai sousou. Talanoaina le mea e mafai ona tupu i se vaa e felafoaiina i luga o le vai i afa malolosi, ma pe faapefea ona fesootai lena mea ia i tatou. Ia talanoaina foi pe faapefea ona fesoasoani Iesu Keriso ia i tatou e faatautaia nei vai faigata i le ala na Ia faatulagaina ai Lana Ekalesia, O Le Ekalesia a Iesu Keriso o le Au Paia o Aso e Gata Ai.