Filipi ma Kolose

Mauaina o le Malosi ia Iesu Keriso

O a ni faafitauli po o ni luitau o feagai ma oe ma i latou o siomia oe? O le a le mea e faafaigata ai nei luitau? Pe i ai se taimi e te mafaufau ai pe mafai ona e maua le fesoasoani e te manaomia e faatoilalo ai ou luitau? Sa feagai Paulo ma le tele o luitau faigata i lona olaga, e aofia ai le tele o tausaga o le nofo faapagotaina i Roma. A o iai i nei tulaga, sa ia tusi ni tusi i le Au Paia i Filipi ma Kolose ma aoao i latou e liliu atu ia Iesu Keriso mo le malosi. O lenei lesona e mafai ona fesoasoani ia te oe ia iloa ai e mafai ona e maua le malosi e ala ia Iesu Keriso e fetaiai ai ma ou luitau.

Fesoasoani ai i tagata aoga e aoao atu. O le tuuina atu o avanoa mo tagata aoga e aoao le tasi i le isi e mafai ona fesoasoani ia i latou e malamalama atili ai ma faaaoga upumoni ua latou aoaoina.

Sauniuniga a le tagata aoga: Valaaulia le vasega e tauloto le Filipi 4:13 .

Gaoioiga e Ono Mafai Ona Aoao Ai

Luitau ma faafitauli o lo o feagai ma le autalavou

Fuafua e tusi e le vasega i luga o le laupapa a latou tali i le fesili muamua o lo o i lalo mo le mau faasino i le lesona atoa.

• O a nisi o faafitauli masani po o luitau o feagai ma le autalavou i la outou eria?

• O fea o nei faafitauli po o luitau e te manatu e le mafai e le autalavou ona faatoilaloina na o i latou lava? Aisea?

I lau api talaaga mo suesuega, faailoa mai ou lava luitau ma faafitauli ma faamatala pe aisea e faigata ai ia te oe. Ia aofia ai mafaufauga pe aisea e te manaomia ai le fesoasoani i le faatoilaloina o i latou.

I lenei lesona o le a e maua ai se avanoa e saunia ai ma aoao atu se lesona puupuu e faaaoga ai tusi a Paulo i Filipi ma Kolose. A o e suesueina nei tusi, vaavaai pe mafai faapefea e upu a Paulo ona fesoasoani ia te oe ma isi e faalagolago ia Iesu Keriso i taimi o luitau.

Mafaufau e valaaulia se tagata aoga e faitau leotele pe aotele le parakalafa lenei e fesoasoani ai ia malamalama le vasega i le faatatauga o le Filipi ma le Kolose.

Sa feagai le Aposetolo o Paulo ma le tele o faafitauli ma luitau. O le Filipi ma le Kolose e peiseai na tusia uma a o faapagotaina ia Paulo i Roma, ae e ofoofogia ona o le taimi faigata lea sa tusia ai e Paulo e uiga i “le filemu o le Atua, o loo silisili lava i mea uma e manatu i ai” ( Filipi 4:7). O nei tusi e lua e ogatusa lelei ma vaai i faamoemoega i le itu lelei, ma o lo o i ai nisi o aoaoga e sili ona manino ma faamaoni a Paulo e uiga ia Iesu Keriso. Na aoao mai Paulo afai tatou te ola i le faatuatua ma le lotofaafetai, e mafai e le Alii ona faalautele le faamoemoega o le talalelei e ala mai ia i tatou—e tusa lava po o a tulaga tatou te i ai—ma e ala i le atiina ae i luga o le faavae o Iesu Keriso e mafai ai ona tatou aloese mai le taitaiseseina e filosofia ma uputuu” (Tusi Lesona a le Tagata Aoga o le Feagaiga Fou [2014], 433; tagai foi i le Bible Dictionary, “ Pauline Epistles ” ma le Taiala o Tusitusiga Paia, “ Filipi, Tusi ia ” ma le “ Kolose, Tusi ia,” scriptures.ChurchofJesusChrist.org).

Afai na valaaulia tamaiti aoga e tauloto le Filipi 4:13 e fai ma sauniuniga mo lenei lesona, valaaulia se tagata aoga se toatasi pe sili atu e tauloto le fuaiupu i le taimi nei.

Faitau le Filipi 4:13, ma vaavaai mo mea na faasoa mai e Paulo e uiga i le taua o Iesu Keriso i lona olaga.

• Aisea e te manatu ai e taua le iloa o lenei aoaoga?

Matamata le vitio “E Mafai Ona Ou Faia o Mea Uma” (1:17) e vaai ai i faataitaiga o mea e mafai ona fesoasoani ai le Faaola ia te oe. O lenei vitio e maua i le ComeUntoChrist.org.

E mafai ona fesoasoani mai Iesu Keriso ia i tatou i luitau

Mafaufau i faafitauli ma luitau o lo o feagai ma le autalavou i la outou eria, faapea foi ma ou lava luitau. Faaaoga laasaga A, E, ma le I o lo o i lalo e saunia ai se lesona e lima minute. Taulai atu i mea e mafai ona e aoao atu e uiga ia Iesu Keriso lea e mafai ona fesoasoani ia te oe ma isi e faatoilalo ai luitau.

Faaali atu le faatulagaga ma faatonuga o le lesona lenei e fesoasoani ai i tagata aoga e saunia a latou lesona. A o galulue tamaiti aoga, savali faasolo i le potu ma fesoasoani ia i latou pe a manaomia. Tuu atu i tagata aoga se taimi ia lava e saunia ai a latou lesona.

E mafai e tagata aoga ona saunia lesona na o i latou lava pe galulue fai paga e faamaea le gaoioiga. E mafai e tamaiti aoga taitasi o se paga ona suesue le afa o fuaitau na o i latou , ona talanoaina lea o a latou fuaitau ma a latou paga. Ona mafai lea e le paga ona saunia ma aoao faatasi atu le lesona.

A. Suesue fuaitau nei, ma vaavaai mo upumoni e te lagona o le a aoga ia te oe ma isi:

Filipi 2:5–8 ; 3:20–21 ; 4:6–7

Kolose 1:12–18 ; 3:1–2, 12–17, 23–24

E. Filifili se fuaiupu po o se vaega o fuaiupu ma faailoa mai se upumoni e mafai ona e aoao atu e uiga i le talalelei a le Faaola. Mo se faataitaiga, o se tasi o upumoni o lo o maua i le Kolose 1:12–14 e faapea na na auina mai e le Tama Faalelagi Lona Alo ina ia mafai ona laveaiina i tatou mai le pouliuli ma faamagaloina agasala.

I. Ia aofia ai se tasi pe sili atu o mea nei i lau lesona:

• Faasoa atu se aafiaga na e maua pe na i ai i se isi tagata e faapupula mai ai le upumoni. Valaaulia i latou o lo o e aotauina e faasoa ane foi o latou aafiaga. E mafai foi ona e faasoa atu ni faataitaiga po o ni aafiaga mai tusitusiga paia po o lauga o konafesi aoao. Mo se faataitaiga, o aafiaga e fesootai i le upumoni ua faamatateteleina o loo i luga e mafai ona taulai atu i le faamagaloina e le Faaola o se tasi po o le laveaiina o i latou mai le pogisa.

• Saili ni mau fefaasinoa’i aoga. Mo se faataitaiga, mo le upumoni faamatatetele o lo o i luga, e mafai ona e faasoa atu le Mosaea 16:9 po o le 2 Peteru 2:9 . Valaaulia i latou o lo o e aoaoina e saili mo nisi mau fefaasinoai e faaaoga ai punaoa e pei o le Taiala i Tusitusiga Paia po o le Taiala mo Autu i Tusitusiga Paia.

• Saili se faamatalaga aoga mai se taitai o le Ekalesia. Mo se faataitaiga, o le upumoni faamatatetele ua faapupula mai i le saunoaga lenei a Sister Reyna I. Aburto o le Au Peresitene Aoao o le Aualofa:

Afai e siomia pea oe e se “puao o le pogisa” [ 1 Nifae 8:23 ], liliu atu i le Tama Faalelagi. E leai se mea na oo ia te oe e mafai ona suia le upumoni e faavavau e faapea o oe o Lona alo ma e alofa o Ia ia te oe. Ia manatua o Keriso o lou Faaola ma le Togiola, ma o le Atua o lou Tama. E malamalama i La’ua. Vaai faalemafaufau ia i La’ua o lata ane ia te oe, o loo faafofoga ma ofoina atu le lagolago. “O le a [laua] faamafanafanaina outou i o outou puapuaga” [ Iakopo 3:1 ]. Ia fai mea uma e te mafaia, ma faalagolago i le togiola alofa tunoa o le Alii.

(Reyna I. Aburto, “Thru Cloud and Sunshine, Lord, Abide with Me!“ Ensign po o le Liahona, Nov. 2019, 58–59)

Valaaulia tagata aoga naunautai e aoao le vasega. I se isi faiga, valaaulia ni vaega toalaiti o tagata aoga e aoao e le tasi le isi ia latou lesona.

Fautuaina le vasega ia faamaoni ma tuu atu a latou taumafaiga silisili a o latou aoao atu ma aoaoina. Valaaulia i latou e saili le fesoasoani i o latou lava luitau a o latou faalogologo ma le toto’a i lesona a tagata o le latou vasega.

A o tatou aoao atu ma aoao mai e ala i le Agaga e faamalolosia i tatou (tagai i le Mataupu Faavae ma Feagaiga 50:22–23). I lau api talaaga mo suesuega, tusi i lalo mea sa e aoaoina ma lagonaina e mafai ona fesoasoani ia te oe e maua ai le malosi mai ia Iesu Keriso a o feagai ai ma ou luitau. Saili le fesoasoani a le Tama Faalelagi e ala i le Agaga Paia e fuafua ai po o le a le mea e finagalo o Ia e te faia e maua ai le malosi o le Faaola. Mulimuli i uunaiga e te maua.

Fautuaina tagata aoga e aoao atu a latou lesona i o latou aiga i le fale. Atonu e aoga le auina atu o se savali i matua e faailoa atu ai ia i latou lenei lesona ina ia mafai ai ona latou uunaia tagata aoga e aoao atu a latou lesona i le aiga.

Manatu ma Talaaga o Faamatalaga

Filipi 2:12–13 . Pe na aoao mai Paulo e tatau ona tatou galulue mo lo tatou lava faaolataga?

E ui o faatinoga e faaalia ai le faatuatua ia Iesu Keriso e taua, ae e taua le iloa e le mafai e i tatou ona “galue” mo le faaolataga (tagai i le 2 Nifae 2:8 ; Mosaea 2:24 ; Alema 22:14). Filipi 2:13 o lo o faamatala mai ai e galue le Atua i totonu o i tatou e fesoasoani ia i tatou e faia mea e le mafai ona tatou faia e i tatou lava (tagai Taiala i Tusitusiga Paia, “ Alofa Tunoa,” scriptures.ChurchofJesusChrist.org; Bible Dictionary, “ Alofa Tunoa ”). O lenei fesoasoani ma le malosi e masani ona ta’ua o le alofa tunoa o le Faaola ma o le mana lea Na te laveaiina ai i tatou (tagai Efeso 2:8).

Maimoa ia Elder Dale G. Renlund o le Korama a Aposetolo e Toasefululua i le vitio “Abound with Blessings” mai le faailotaimi 0:00 i le 5:39 po o Peresitene Dallin H. Oaks o le Au Peresitene Sili i le vitio “What Think Ye of Christ?” mai le faailotaimi 8:58 i le 12:50 e aoao atili ai e uiga i lenei autu.

Filipi 4:13 . O le a le uiga o le “E mafai ona ou faia o mea uma e ala ia Keriso”?

Na faamatalaina mai e Sister Michelle D. Craig o le Au Peresitene Aoao o Tamaitai Talavou:

Ioe, o le a le atoatoa i tatou uma mo lo tatou gafatiaga faalelagi, ma o lo o i ai se upumoni i le iloaina ai e faapea, a tuua na o i tatou ona le lava lea. Ae o le tala fiafia o le talalelei e faapea o le faatasi ai ma le alofa tunoa o le Atua, tatou te lava lea. Faatasi ai ma le fesoasoani a Keriso, e mafai ai ona tatou faia mea uma [ Filipi 4:13 ]. Ua folafola mai e tusitusiga paia o le a tatou “maua le alofa tunoa e fesoasoani mai i ona taimi e manaomia ai” [ Eperu 4:16 ].

(Michelle D. Craig, “Lē Faamalieina Faaleagaga,” Ensign po o le Liahona, Nov. 2018, 54)

Na aoao mai Peresitene Dallin H. Oaks:

I le talanoa ai e uiga i nisi o ona lava luitau faaletino, sa tusia ai e le Aposetolo o Paulo, “Ou te mafaia mea uma lava i le faamalosi mai o Keriso ia te au” ( Filipi 4:13).

Ma o lea ua tatou iloa ai lena mea ona o Lana Togiola, o lo o i ai i le Faaola le mana e lagolago ai—e fesoasoani ai—i tiga ma mafatiaga uma faaletino. O nisi taimi e faamaloloina ai e Lona mana se vaivaiga, ae ua aoao mai e tusitusiga paia ma o tatou aafiaga e faapea o nisi taimi e lagolago pe fesoasoani mai o Ia e ala i le tuuina mai ia i tatou o le malosi po o le onosai e onosaia ai o tatou vaivaiga.

(Elder Dallin H. Oaks, “Faamalosia e Ala i le Togiola a Iesu Keriso,” Ensign po o le Liahona,, Nov. 2015, 62)

Gaoioiga Faaopoopo e Aoao Ai

Filipi 2:12–13 . Galuega, alofa tunoa, ma le faaolataga

Filipi 2:12–13 e mafai ona avea o se fuaitau faigata. Valaaulia le vasega e suesue ma le toto’a ma faailoa mai mea ua aoao mai e Paulo. Mafaufau e valaaulia i latou e suesue i faamatalaga i le vaega o “Faamatalaga ma Talaaga” i le Filipi 2:12–13 ma le faamatalaga amata mo lenei fuaitau i le Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2023. Fai atu ia i latou e faamatala mai mea na latou maua na fesoasoani ia i latou e malamalama atili ai i le aoaoga faavae taua o galuega, alofa tunoa, ma le faaolataga. Valaaulia i latou e faasoa mai pe faapefea e lenei malamalama ona faamalosia lo latou faatuatua ma le alofa mo Iesu Keriso.

Kolose 1:9–18 . Matafaioi a Iesu Keriso

Valaaulia tagata aoga e suesue i nei fuaiupu mo suafa, faalagiga, ma matafaioi a Iesu Keris. E mafai ona valaaulia tagata aoga e faasoa mai ni faataitaiga mai tusitusiga paia, i o latou lava olaga, po o olaga o i latou latou te iloa lea na faataitaia ai e le Faaola nei suafa, matafaioi, po o faalagiga. Valaaulia tagata aoga e faasoa mai se matafaioi e sili ona anoa ia i latou ma pe faapefea ona aafia ai o latou lagona ia Iesu Keriso.

Kolose 2:6 . Savavali ia Keriso

Valaaulia le vasega e faasoa mai o latou manatu i le uiga o le “savavali … ia [Keriso]” ( Kolose 2:6). Valaaulia i latou e suesue i fuaitau nei, ma vaavaai po o le a le uiga o le savavali ia Keriso: Kolose 1:9–18 ; Kolose 2:6 ; Kolose 3:1–11 . E mafai foi ona latou suesue i le saunoaga lenei a Peresitene Henry B. Eyring:

Ma o le a le uiga o le savavali faatasi ma le Alii? O lona uiga o le faia o mea Na te faia, auauna atu i le ala o Ia auauna atu ai. Na Ia ositaulagaina Lona lava tulaga toafimalie ina ia faamanuia ia i latou e le tagolima, o se mea lena tatou te taumafai e fai. Na foliga mai sa Ia maitauina faapitoa ia tagata o e na le amanaiaina ma teena e tagata, o lea e tatau ai foi ona tatou taumafai e faia lena mea. Na Ia molimau mai ma le malosi ae lotoalofa i le moni o aoaoga faavae na Ia mauaina mai Lona Tama, e tusa lava pe sa lei taliaina, ma ia ao ona tatou faia foi. Sa ia fetalai mai i tagata uma, “O mai ia te a’u” ( Mataio 11:28), ma e tatou te fai atu i tagata uma, “O mai ia te Ia.”

(Henry B. Eyring, “Savali Ma Au,” Ensign po o le Liahona, Me 2017, 84)

Valaaulia tagata aoga e faasoa mai mea na latou maua ma saili le fesoasoani a le Tama Faalelagi e faia ai se fuafuaga mo auala e mafai ai ona latou savavali atoatoa ia Keriso.