Asan’ny Apostoly 27–28

Araho ny Mpaminany

Rehefa avy nenjehina sy nampijaliana ary nogadraina noho ny tsy rariny tany Jerosalema sy Kaisaria ny Apôstôly Paoly, dia nangataka ny hampakatra ny raharahany teo anatrehan’i Kaisara tany Roma izy. Nony teny an-dalana nankany Roma, i Paoly sy ireo niaraka taminy dia nisedra tafio-drivotra mahery, sy fahasimban’ny sambo, ary zava-tsarotra hafa izy ireo. Nanoloana ireo toe-java-niseho ireo, dia nanome torohevitra sy fampitandremana notaomim-panahy i Paoly mba hiarovana ny rehetra. Ity lesona ity dia natao mba hanampy anao hahatsapa ny maha zava-dehibe ny fanarahana ny torohevitry ny mpaminany.

Mahatakatra ny sahan-kevitry ny soratra masina. Manomana ny mpianatra hahafantatra ireo hafatr’ireo mpanoratra notaomim-panahy ny fahatakarana ny sahan-kevitry ny soratra masina. Rehefa takatry ny mpianatra ny fikasana notaomim-panahy nananan’ny mpanoratra, dia vonona kokoa izy ireo hamantatra ireo fitsipika marina sy fotopampianarana izay mifanaraka amin’ny filan’ny tsirairay.

Fiomanan’ny mpianatra: Asao ny mpianatra mba hianatra ny sasany amin’ireo fampianarana izay ataon’ireo mpaminany maoderna ankehitriny. Ohatra, azon’izy ireo atao ny mamaky na mijery ny lahateny tamin’ny Fihaonamben’ny Fiangonana maneran-tany vao haingana, na mamaky lahatsoratra iray izay nataon’ny mpaminany na apôstôly ao amin’ny gazetiboky Ho zatovo mahery , na mamaky lohahevitra vitsivitsy ao amin’ny kiboky Jeunes, soyez forts . Asao ireo mpianatra mba hisaintsaina ny zavatra izay tsapany mikasika ny famaliana ny torohevitra omen’ireo mpaminany.

Sahanasa fianarana azo atao

Manaraka ny mpaminany

Vakio ireto teny mifono torohevitra na fampitandremana nataon’ny mpaminany manaraka ireto avy ao anatin’ny kiboky Jeunes, soyez forts ireto (2011).

Hevero ny hampiseho ireo teny mifono torohevitra na fampitandremana tahaka ity manaraka ity avy ao aminny Jeunes, soyez forts (kiboky, 2011) na mitondrà dika mitovy an’ilay kiboky. Izy ity dia hita ihany koa ao amin’ny application Mediathèque de l’Evangile ao anatin’ny “Zatovo.”

“Manehoa fitiavana isan’andro ho an’ny fianakavianao” (pejy 14).

“Lafiny iray manan-danja ao amin’ny drafitry ny Ray any An-danitra ny fianarana mba hanampiana anao hitovy kokoa Aminy. … Ny fahalalana azonao dia ho sarobidy aminao mandritra ny fiainana an-tany sy any amin’ny fiainana ho avy” (pejy 9).

“Aza manatrika, na mijery, na mandray anjara amin’izay zavatra ambany, na tsy mendrika, na feno herisetra, na mahakasika ny pôrnôgrafia na amin’ny fomba ahoana na amin’ny fomba ahoana” (pejy 11).

“Raha manentana anao hanao zavatra ratsy ireo namanao dia aoka ianao mba ho ilay iray izay mijoro amin’ny tsara, na dia mijoro irery aza ianao” (pejy 16).

• Inona no toetra hitanao fa miavaka asehon’ireo olona manaraka ny torohevitr’ireo mpaminany?

• Nahoana no mety hisafidy ny tsy hihaino ny torohevitr’ireo mpaminany ny zatovo sasany?

• Inona no mety ho vokatra ateraky ny tsy fanarahana ny torohevitr’ireo mpaminany?

Saintsaino ny fomba hamalianao manokana ny torohevitra sy ny tari-dalan’ny mpaminany. Rehefa mandalina ny Asan’ny Apostoly 27 ianao dia katsaho ny fitaomam-panahy avy amin’ny Ray any An-danitra amin’ny alalan’ny Fanahy Masina mba hahazoana fahatsapana izay afaka manampy amin’ny fanamafisana ny fanoloran-tenanao hanaraka ny torohevitra avy amin’ny mpaminanin’ny Tompo.

Ny torohevitra ara-paminaniana nataon’i Paoly

Nony teny an-dalana ho any Roma hampakatra ny raharahany teo anatrehan’i Kaisara i Paoly, dia nanome torohevitra sy fampitandremana ireo mpandeha izy mba ho eren-doza hatrany.

Vitao ity sahanasa manaraka ity amin’ny alalan’ny famakiana ny fampahalalana izay hita eo ambonin’ny efamira tsirairay aloha. Rehefa avy eo dia vakio ireo andinin-tsoratra masina izay miaraka aminy ao amin’ny Asan’ny Apostoly27 . Fintino eo afovoan’ny efamira tsirairay ny tantara amin’ny alalan’ny fanaovana sary tsotra na amin’ny alalan’ny famintinana ireo teny sy ireo zavatra izay nataon’i Paoly. Ataovy azo antoka tsara ny hampidirana ny fihetsik’ireo olona manoloana ny torohevitra izay nomen’i Paoly.

Zarao amin’ireo mpianatra ity taratasy zaraina manaraka ity. Hevero ny hamela ireo mpianatra mba hiara-hiasa tsiroaroa na anaty vondrona kely ary omeo azy ireo ireo andalan-tsoratra masina samihafa. Na koa, azo atao ny manambatra mpianatra efatra anaty vondrona iray, ka omena andalan-tsoratra masina tsy mitovy mba ho vakiana sy hatao sary na fintinina ny tsirairay amin’izy ireo. Rehefa nahavita izany izy, dia asao mba haneho sy hizara ny asany ary hifanakalo hevitra amin’ity fanontaniana manaraka ity ireo mpianatra ao amin’ny vondrona izay misy azy na ny iray kilasy.

Ny dian’i Paoly nankany Roma

Nitondra an’i Paoly sy ireo voafonja hafa tao anaty sambo nisy olona 300 teo ho eo ireo miaramila Romana. Niadana, sy sarotra, ary nampatahotra tokoa ny dian’izy ireo satria tamin’ny faramparan’ny fararano izany ka matetika no nisy tafio-drivotra mahery vaika. Vakio ny Asan’ny Apostoly 27:9–13	Nandritra ny tafio-drivotra mahery vaika, dia niezaka nanamboatra ny sambo sy nanamaivana ny entana hatrany izy ireo. Vakio ny Asan’ny Apostoly 27:20–26
Taorian’ny 14 andro izay nisehoan’ilay tafio-drivotra mahery vaika, dia nanao fanandramana nampatahotra hanatona ny tanety izy ireo. Nalatsak’ireo tantsambo ny vatofantsika ary naniry ny handao ilay sambo izy ireo satria noheverin’izy ireo fa hiankapoka tamin’ny vato izany. Vakio ny Asan’ny Apostoly 27:30–36	Rehefa avy nanamaivana ny sambo izy ireo, dia niezaka nampijanona ilay sambo an-tanety. Vakio ny Asan’ny Apostoly 27:41–44

• Ahoana araka ny hevitrao no fihetsika mety ho nasetrinao ny fampianaran’i Paoly raha tao anatin’ilay sambo ianao? Nahoana?

• Inona no fahamarinana nianaranao avy tamin’ny zavatra izay nohalalininao?

Ampio ny mpianatra hamantatra ireo fahamarinana izay nianarany avy tamin’ny fampianaran’i Paoly. Ny sasany amin’ireo fitsipika ireo dia mety hoe raha tsy miraharaha ny fampitandremana sy ny torohevitra izay omen’ireo mpanompon’ny Tompo isika, dia mametraka ny tenantsika ho tandindomin-doza ary raha mihaino ny torohevitra sy ireo fampitandremana izay omen’ireo mpanompon’ny Tompo isika, dia hanatanteraka ny teny fikasany amintsika ny Tompo.

• Inona ny zavatra fantatrao momba ireo mpaminany izay manome anao fahatokisana ny toroheviny sy ireo fampianarany?

Nampianatra ny Tompo fa amin’ny alalan’ny mpaminany no handrenesantsika ny feony (jereo ny Fotopampianarana sy Fanekempihavanana 1:37–38) ary matetika ny fampitandremany dia ho avy amin’ny alalan’ireo mpaminany izay nofinidiny (jereo ny Fotopampianarana sy Fanekempihavanana 1:1–4). Amin’izao androntsika izao, dia manohana ireo mpikambana ao amin’ny Fiadidiana Voalohany sy ireo Apôstôly Roambinifolo ho mpaminany sy mpahita ary mpanambara isika. Makà fotoana hisaintsainana ny antony hifandraisan’ny Tompo amintsika amin’ny alalan’ireo mpaminany sy ny asehon’izany momba ny fitiavany antsika.

• Inona ny zavatra izay nianaranao momba ny Tompo avy tamin’ny torohevitra sy ireo fampianarana izay nomeny tamin’ny alalan’ireo mpaminaniny?

• Inona avy ireo zavatra niainanao na niainan’ny hafa izay nisafidiananao na hanaraka na tsy hiraharaha ny torohevitra avy amin’ny mpaminany?

Asao ireo mpianatra mba hizara ny eritreriny.

Amin’ity sahanasa manaraka ity, dia afaka manao famerenana sy mampiasa ny fiomanany ho amin’ity lesona ity ireo mpianatra. Hevero ny fomba ahafahan’ireo mpianatra mahazo ny torohevitra avy amin’ireo mpaminany. Fantaro raha toa ka ilaina ny mitondra ny dika mitovin’ireo loharanom-pahalalana ao an-dakilasy na koa raha afaka mijery izany avy ao amin’ny fitaovana elekronika ireo mpianatra.

Makà minitra vitsivitsy hitadiavana sy hianarana ireo torohevitra na fampitandremana izay nomen’ny Tompo antsika vao haingana tamin’ny alalan’ny mpaminaniny. Mety ho anisan’ny toerana hitadiavana izany ny lahateny tamin’ny Fihaonamben’ny Fiangonana maneran-tany, na ny gazetiboky Ho zatovo mahery , na ny kiboky Jeunes, soyez forts. Azonao ampidirina ireo teny avy tamin’ireo mpaminany izay nomena teny am-piandohan’ny lesona.

• Ahoana no ahafahana milaza ity torohevitra avy amin’ny mpaminanin’ny Tompo ity ho porofo fa miahy, sy mitsinjo ary mamindra fo aminao ny Tompo?

• Raha nanaraka ireo torohevitra ireo ianao teo amin’ny fiainanao, dia ahoana ny fomba nitahian’ny Ray any An-danitra anao noho ny fankatoavanao?

• Raha toa ka nisy fomba tsy niraharahanao na tsy nankatoavanao ity torohevitra ity, nahoana ny Mpamonjy be fitiavana no manasa anao hanomboka hanaraka ity torohevitra ity? Ahoana ny fomba mety hanatsaran’izany ny fiainanao?

Asao ireo mpianatra mba hizara ny torohevitra izay nianaran’izy ireo sy ny eritreriny ary ny fahatsapany momba izany.

Manaraka ny torohevitra ara-paminaniana eo amin’ny fiainanao

• Inona avy ireo antony sasany mahatonga anao ho feno fankasitrahana noho ireo torohevitra sy fampitandremana avy amin’ny mpaminany eo amin’ny fiainanao?

Mikatsaha aingam-panahy avy amin’ny Ray any An-danitra amin’ny alalan’ny Fanahy Masina mba hanampiana anao hamantatra ireo fomba nanehoan’ny Tompo fa faly Izy amin’ny fankatoavanao ireo mpaminaniny, sy ireo fomba izay mety hamporisihany anao hivoatra koa. Soraty ireo eritreritra sy fahatsapana izay tonga ao an-tsaina, ary araho izy ireo. Mety hanampy ny mizara ny fahatsapanao amin’ny olona iray izay akaiky anao ao amin’ny fianakavianao na mpitarika ao amin’ny Fiangonana izay azo itokisana ary asao izy ireo mba hanampy anao hanaraka ireo fahatsapanao ireo.

Farano amin’ny fijoroana ho vavolombelona momba ny fitahiana sy ny maha zava-dehibe ny fanarahana ny torohevitra sy ny fampitandreman’ireo mpaminanin’ny Tompo.

Fanazavana sy fampahalalana avy amin’ny zava-miseho

Ahoana ny fomba ahafahan’ny fanarahana ny torohevitra avy amin’ny mpaminany manova ahy?

Ny Filoha Henry B. Eyring ao amin’ny Fiadidiana Voalohany dia nampianatra izao manaraka izao:

Ny fisafidianana ny tsy handray ireo torohevitry ny mpaminany dia manova tanteraka ny faritra ijoroantsika. Lasa mampidi-doza kokoa izany. Ny tsy fanekena ny torohevitra avy amin’ny mpaminany dia mampihena ny herintsika handray torohevitra nentanim-panahy amin’ny hoavy. Ny fotoana tsara indrindra nanapahana hevitra ny hanampy an’i Noa hanamboatra ilay sambofiara dia tamin’ny fotoana voalohany nangatahany izany. Isaky ny nangataka izy taorian’izay, ny tsy famaliana tsirairay dia nampihena ny fahenoana ny Fanahy. Koa isaky ny nangataka izy dia toa miha-adaladala kokoa izany, mandrapahatongan’ny orana. Avy eo dia efa tara loatra izany.

Isak’izay nisafidy ny hanemotra ny fanarahako ireo torohevitra nentanim-panahy teo amin’ny fiainako aho, na nanapa-kevitra fa niavaka tamin’ny rehetra ny tenako, dia fantatro fa nampidi-doza ny tenako aho. Isaky ny nihaino ny torohevitr’ireo mpaminany aho, sy nahatsapa izany tamin’ny alalan’ny vavaka, ary avy eo nanaraka izany, dia hitako fa nizotra nankany amin’ny toerana azo antoka aho.

(Henry B. Eyring, “Finding Safety in Counsel,” Ensign, Mey 1997, 25)

Satria tsara fanahy ny Tompo, dia niantso mpanompo izy mba hampitandrina ny olona amin’ny loza. Izany antso mba hampitandrina izany dia mihamafy sy mihamanan-danja satria ireo fampitandremana manan-danja indrindra dia mikasika ireo loza izay tsy mbola eritreretin’ny olona akory hoe tena misy.

(Henry B. Eyring, “A Voice of Warning,” Ensign, Nov. 1998, 32)

Asan’ny Apostoly 27:9 . Inona no dikan’ny hoe “efa lasa sahady ny fifadian-kanina”?

“Ny fifadian-kanina” eto angamba dia manondro ilay andro masin’ny Jiosy izay nantsoina hoe andron’ny Sorompanavotana, izay nanamarika ny fiantombohan’ny vanim-potoana noheverina ho tsy azo antoka ny fandehanana teny amin’ny Ranomasina Mediteraneanina noho ny tafio-drivotra mahery vaika. Matetika ny andron’ny Sorompanavotana dia natao tamin’ny faran’ny volana septambra na fiandohan’ny volana ôktôbra.

Asan’ny Apostoly 27:28 . Hatraiza ny “fathom” iray?

Ny “fathom” dia ny halaviran’ny elenelana misy eo amin’ny rantsantanana lava indrindra amin’ny tanana iray ka hatramin’ny rantsantanana lava indrindra amin’ny tanana ilany rehefa mihinjitra ny sandry. Ny “fathom” iray dia mirefy efatra hakiho eo ho eo.

Sahanasa fianarana fanampiny

Asan’ny Apostoly 28 . Andriamanitra dia afaka manova ny fitsapana ho fitahiana

Asao ireo mpianatra mba handalina ireo zavatra isan-karazany izay niainan’i Paoly ka voasoratra ao amin’ny Asan’ny Apostoly 28:1–6 ; 28:7–14 ; 28:16–24 ; ary 28:30–31 mba hanampiana azy ireo hahatakatra ny fahamarinana fa raha mahatoky isika, dia afaka manampy antsika hanova ny fitsapana ho fitahiana ho an’ny tenantsika sy ho an’ny hafa Andriamanitra, araka izay hita ao amin’ny Asan’ny Apostoly 28 . Afaka mijery ireo fanamby isan-karazany izay natrehan’i Paoly ireo mpianatra ary ny fomba nijanonany ho mahatoky hatrany. Inona avy ireo fanamby sasantsasany izay entina hitsapana ny finoan’ny zatovo ankehitriny? Inona ihany koa ny porofo mampiseho fa tsy mitsahatra manova ireo fitsapana ho fitahiana Andriamanitra?