Galuega 2

“Faatumuina i le Agaga Paia”

A o lei maliu o Ia, sa ta’u atu e Iesu i Ana Aposetolo a maliu ese atu o ia, o le a auina mai e le Tama “Lē Faamafanafana, o le Agaga Paia lea” (Ioane 14:26). E pei ona folafola mai, na oo mai le Agaga Paia i Aposetolo e Toasefululua i se ala faavavega i le aso o le Penetekoso. O le faamoemoega o lenei lesona o le fesoasoani lea ia te oe e faaloloto lou malamalama i auala e mafai ai e le Agaga Paia ona faamanuia oe ma fesoasoani ia te oe e aoao pe faapefea ona valaaulia na faamanuiaga i lou olaga.

Iloaina o le Agaga Paia. Vaavaai mo avanoa e fesoasoani ai i tagata aoga ia iloa pe faapefea ona galue le Agaga Paia i o latou olaga patino. E mafai ona e faaaogaina faataitaiga mai tusitusiga paia ma valaaulia tagata aoga e toe manatunatu i o latou lava olaga.

Sauniuniga a le tagata aoga: Valaaulia tagata aoga e talanoaina ma se e pele se auala se tasi ua latou matauina ai o le Agaga Paia e faatasi ma i latou i o latou olaga. Ia valaaulia foi tagata aoga e o mai saunia ma soo se fesili atonu o ia i latou e uiga i le Agaga Paia.

Gaoioiga E Mafai Ona Aoao Mai Ai

Faalauteleina o o tatou tomai

Fuafua po o le a le tele o lou ioeina o le faamatalaga lenei i luga o se fua o le tasi i le fitu, ma tusi lau tali i lau api faamaumau suesuega: Ou te mautinoa e mafai ona ou iloaina pe a ou lagonaina le Agaga Paia i lou olaga.

Atonu o se avanoa lelei lea e valaaulia ai tagata aoga e fai mai ni a latou fesili e uiga i le Agaga Paia lea na sau mai a latou sauniuniga a tagata aoga pe na oo mai foi i le mafaufau.

• O a ni au fesili o i ai e uiga i le Agaga Paia?

I lau api faamaumau suesuega, tusi ai le ulutala “O Auala e mafai ai e le Agaga Paia ona fesoasoani ia te au.” Ia saunia e faaopoopo ni aitema i le lisi i le aluga o le lesona.

Mafaufau e tusi le ulutala lenei i luga o le laupapa ma faaopoopo i ai ni malamalamaaga loloto i le aluga o le lesona.

A o e suesue i le aso, o le a e vaai i faataitaiga o le auala e galue ai le Agaga Paia i olaga o tagata. Mafaufau i mea e mafai ona e aoaoina mai nei faataitaiga e uiga i le auala e mafai ona galue ai le Agaga Paia i lou olaga. O se tasi o upumoni o loo faamamafa mai e nei faataitaiga o le, e ala mai i le Agaga Paia, e fesoasoani ai le Tama Faalelagi ia i tatou e o mai ia Iesu Keriso.

Ua liligi mai le Agaga Paia i le aso o le Penetekoso

A o lei maliu o Ia, sa aoao atu e Iesu Ona soo o le a auina mai e le Tama Faalelagi ia i latou le Agaga Paia pe a mavae ona afio ese Iesu mai le lalolagi. Sa ia molimau mai o le a tuuina mai e le Agaga Paia le faamafanafanaga, tuuina mai le taitaiga, ma molimau atu e uiga ia te Ia (tagai i le Ioane 14:16, 26 ; 15:26).

O manatu faafaiaoga o loo lisi atu i lalo o loo tuuina atu ai se auala se tasi e fesoasoani ai i le vasega e suesue ma talanoaina fuaiupu mai le tusi o Galuega 2 . O se isi faiga e mafai ona vaevae ai tagata aoga i ni vaega se tolu ma valaaulia vaega e suesue i fuaiupu nei:

• Vaega 1— Galuega 2:1–8

• Vaega 2— Galuega 2:22–24, 32–33, 36

• Vaega 3— Galuega 2:37–41

A uma ona suesue i fuaiupu, e mafai e tagata aoga ona talanoaina fesili nei:

• I fuaiupu na e suesueina, na faapefea ona e matauina le Fesoasoani o le Agaga Paia i tagata?

• O a ni mea ua fesoasoani nei fuaiupu e te malamalama ai e uiga i manaoga o le Tama Faalelagi mo i tatou?

• E mafai faapefea ona fesoasoani le Agaga Paia ia i tatou i auala tali tutusa?

A uma se taimi fetaui, valaaulia ni volenitia mai vaega eseese e lipoti mai mea na latou maua ma faasoa mai a latou tali i le vasega.

O le Penetekoso o se aso malolo faa-Iutaia e tupu i le 50 aso talu ona uma le tausamiga o le Paseka. O Iutaia mai atunuu lata ane o le a malaga atu i Ierusalema mo lenei aso malolo lea na faamanatuina ai le seleselega muamua o le vaitau (tagai i Taiala i Tusitusiga Paia, “ Penetekoso,” scriptures.ChurchofJesusChrist.org). Faitau i le Galuega 2:1–8, ma vaavaai pe na faapefea ona faataunuuina le folafolaga a le Faaola e uiga i Aposetolo na mauaina le Agaga Paia i lenei aso. (Manatua o “laulaufaiva peiseai o le afi ua vaevaeina” i le fuaiupu3 e faasino i se faaaliga vaaia o le i ai o le Agaga Paia.)

I fuaiupu 4–8, sa maua ai e Aposetolo le meaalofa o gagana, “o se meaalofa o le Agaga Paia lea e faatagaina ai tagata musuia e tautatala i ai, malamalama, pe faaliliuina gagana e le masani ai” (Taiala i Tusitusiga Paia, “ Gagana, Meaalofa o le,” scriptures.ChurchofJesusChrist.org).

• Na faapefea ona faamanuiaina e le Agaga Paia le au soo ma i latou o loo faalogologo atu ia i latou?

• O le a sou manatu na faapefea ona faaleleia e le meaalofa o gagana le tomai o Aposetolo e fesoasoani ai i isi ia o mai ia Keriso?

• E mafai faapefea ona tatou maua lenei meaalofa i aso nei?

Mafaufau e faaopoopo ni malamalamaaga mai fuaiupu na e suesueina i le lisi na e fatuina i lau api talaaga mo suesuega.

Ua molimau Peteru ia Iesu Keriso

E mafai ona tatou vaai i se isi auala e mafai ai e le Agaga Paia ona fesoasoani ia i tatou e ala i le tilotilo atu i le lototoa lea na aoao atu ma molimau atu ai Peteru.

I le manatuaina o mea na tutupu o loo faaalia i le Galuega 2 sa lei leva ona mavae le faasatauroina o Iesu, faitau le Galuega 2:22–24, 32–33, 36 ma vaavaai pe na faapefea ona fesoasoani le Agaga Paia ia Peteru i lenei tulaga e talai atu ma le lototele ma le lototoa e uiga ia Iesu Keriso. (Tagai foi i le Galuega 3:12–20 .)

• O a mea na e vaaia?

• O le a le mea ua e aoao mai i lenei tala e uiga i le ala e fesoasoani ai le Agaga Paia ia te oe? (Tagai foi i le Galuega 1:8 ; 4:31 .)

Faaopoopo ou manatu i lau lisi i lau api talaaga mo suesuega.

Mafaufau e valaaulia tagata aoga e mafaufau ma faasoa mai ni aafiaga i se taimi na fesoasoani ai le Agaga Paia ia i latou e aoao atu isi e uiga ia Iesu Keriso pe molimau atu ma le lototoa. Manatu e faasoa foi se faataitaiga a oe lava ia.

O le aafiaga o aoaoga a Peteru i isi

Sa i ai le aafiaga o le Agaga Paia ia i latou o e na faalogo i aoaoga a Peteru e uiga ia Iesu Keriso. Faitau i le Galuega 2:37–38, 41, ma vaavaai pe na faapefea ona fesoasoani le Agaga Paia i nei tagata. O le upu tuia mai le fuaiupu 37 o lona uiga o le faanoanoa po o le salamo ma ta’u mai ai sa mananao tagata e sui.

• O le a se mea sa tumatila ia te oe mai nei fuaiupu?

• Na faapefea ona fesoasoani le “tuia o o latou loto” i nei tagata ia latalata atili atu ai ia Iesu Keriso? ( fuaiupu 37).

Faatusatusa le mea na tupu i tagata na aoao atu e Peteru i le folafolaga na faia e le Atua i Ana auauna i le Mataupu Faavae ma Feagaiga 100:5–8 .

• O a nisi o faataitaiga o suiga e ono musuia ai i tatou e le Agaga Paia e faia o le a fesoasoani tatou te latalata atili atu ai ia Iesu Keriso?

Valaaulia tagata aoga e mafaufau e uiga ma faasoa mai ni faataitaiga o taimi na musuia ai i latou e le Agaga Paia e faia ni suiga na latou latalata atili atu ai ia Iesu Keriso. Fautuaina i latou e faasoa mai ni faataitaiga e le patino tele. Manatu e faasoa foi se faataitaiga a oe lava ia.

Afai e mafai, atonu foi e aoga le valaaulia o se tagata faatoa liliu mai i le vasega ma fai atu ia i latou e faaalu ni nai minute e faasoa mai ai o latou faataitaiga faaletagata i le auala na fesoasoani ai le Agaga Paia ia i latou e latalata atili atu ia Iesu Keriso ma Lana Ekalesia. Manatua ia maua mai le faamaoniga mai le taitai faamaopoopo o le S&I i le lotoifale faapea foi ma le taitai perisitua i le lotoifale o lea tagata a o lei faia.

Mafaufau e faaopoopo ou manatu mai le Galuega 2:37–38, 41 i le lisi i lau api talaaga mo suesuega.

Manatunatu i mea sa e suesueina

Valaaulia tagata aoga e toeiloilo le lisi na latou fatuina i a latou api talaaga mo suesuega. O fesili nei e mafai ona fesoasoani i tagata aoga e talanoaina ma teuloto mea sa latou aoaoina. Molimau atu i upumoni sa talanoaina i le lesona lenei.

• O le fea o faamanuiaga mai le Agaga Paia na sili ona faagaeetia ai oe?

• Aisea e taua ai le Agaga Paia e fesoasoani ia i tatou e o mai ia Iesu Keriso ma aumai isi ia te Ia?

• O a laasaga e mafai ona e faia ina ia olioli atoatoa ai i faamanuiaga a le Agaga Paia?

Tala ma Faamatalaga o Talaaga

E faapefea ona fesoasoani le Agaga Paia ia i tatou ia latalata atili ai i le Tama Faalelagi ma Iesu Keriso?

Na aoao mai Peresitene Dallin H. Oaks o le Au Peresitene Sili:

O le misiona o le Agaga Paia o le molimau i le Tama ma le Alo (tagai i le Ioane 15:26 ; 2 Nifae 31:18 ; 3 Nifae 28:11), e taitai tatou i le upumoni (tagai i le Ioane 14:26 ; 16:13), ma faali mai mea uma e tatau na tatou faia (tagai i le 2 Nifae 32:5). O lenei laina patino o fesootaiga ma lo tatou Tama Faalelagi e ala mai i Lona Agaga Paia, o se puna o la tatou molimau o le upumoni, o lo tatou malamalama, ma lo tatou taitaiga patino mai se Tama Faalelagi agaalofa. O se mea taua lea o Lana fuafuaga ofoofogia o le talalelei, lea e mafai ai e tagata taitoatasi uma o Lana fanau ona maua se molimau patino i lona moni.

(Dallin H. Oaks, “O Laina e Lua o Fesootaiga,” Ensign po o le Liahona, Nov. 2010, 83)

O Peresitene M. Russell Ballard o le Korama a Aposetolo e Toasefululua, na molimau mai:

Pe a lagonaina e tagata taitoatasi … le galue o le Agaga ia i latou pe a latou vaaia foi se faamaoniga o le alofa ma le alofa mutimutivale o le Alii i o latou olaga, o le a faamalamalamaina i latou ma faamalosia faaleagaga ma o le a faateleina lo latou faatuatua ia te Ia.

(M. Russell Ballard, “Now Is the Time,” Ensign, Nov. 2000, 75)

E faapeī le lagona o le Agaga Paia, ma e mafai faapefea ona e valaauliaina?

O le vitio “Feeling the Holy Ghost” (3:17) o loo aumaia ai faataitaiga o auala e lagona ai e tagata le Agaga Paia. O loo maua lenei vitio i le ChurchofJesusChrist.org.

O le vitio “Having the Holy Ghost” (2:56), e maua i le ChurchofJesusChrist.org, o loo aumaia ai faataitaiga o le auala e valaaulia ai le Agaga Paia.

Gaoioiga Faaopoopo e Aoao Ai

O se isi auala e amata ai le lesona

I lana saunoaga i le konafesi aoao ia Aperila 2017, na faamatala ai e Elder Gary E. Stevenson o le Korama a Aposetolo e Toasefululua se tala e uiga i se taimi na ia auai atu ai i se aiga talavou mo le afiafi faaleaiga. Faaali le vito “How Does the Holy Ghost Help You?” mai le taimi 0:00 i le 1:15. O loo i ai lenei vitio i le ChurchofJesusChrist.org.

A uma ona matamata le vitio, valaaulia tagata aoga e mafaufau pe faapefea ona latou taliina le fesili a le tama talavou.

Faaavanoaina o lou taimi mo le Agaga Paia

Faatasi ai ma le pisi o le olaga, e mafai ona faigata ona faataatia ese le taimi e tuu atu ai i le Agaga Paia e faamanuia i tatou i musumusuga. Matamata le vitio “The Soul’s Sincere Desire” (3:28), ma vaai pe na faapefea ona taulima e se tasi o tamaitai talavou lenei luitau. O loo maua lenei vitio i le ChurchofJesusChrist.org.

O le mataupu faavae a Keriso e mafai ona fesoasoani ia te a’u ia maua le Agaga Paia ma sau ia Keriso

E mafai ona valaaulia le vasega e faitau le Galuega 2:38, ma vaavaai mo le tali a Peteru i le motu o tagata na fesili, “Se a se mea ta te faia?” ( Galuega 2:37). Mafaufau e fai atu fesili nei:

• O a laasaga o loo otooto mai e Peteru i le fuaiupu 38 ?

• E faapefea ona faatatau na laasaga i se tasi ua uma ona papatisoina?

Ina ia fesoasoani i tagata aoga ia malamalama atili i le tali i le fesili lona lua, mafaufau e faaaoga le saunoaga lenei a Elder Dale G. Renlund o le Korama o Aposetolo e Toasefululua: “E mafai ona faaatoatoaina i tatou e ala i le faateleina o le … faatinoina o le faatuatua ia [Keriso], salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma mafai ona tumau e oo i le iuga, ma mea uma e aofia ai” (Le Au Paia o Aso e Gata Ai, Taumafai Pea,” Ensign po o le Liahona, Me 2015, 56).