Galuega 3

O Le Faamalologa o le Tagata Pipili

O se alii sa le mafai ona savali i lona olaga atoa sa aveina atu i le malumalu i Ierusalema i aso taitasi ina ia mafai ona ia augani atu mo se tupe. Sa fetaui ai o ia ia Peteru ma Ioane, o e na tuuina atu ia te ia se meaalofa e sili atu nai lo le tupe sa ia talosagaina. O le faaaogaina o le pule o le perisitua ma i le suafa o Iesu Keriso, na faamalolo ai e Peteru le tagata. O lena aafiaga na tuuina atu ai ia Peteru ma isi Aposetolo le tele o avanoa e molimau atu ai ia Iesu Keriso. O lenei lesona ua faamoemoe e fesoasoani ia te oe e faamalosia ai lou faatuatua e mafai e le Tama Faalelagi ma Iesu Keriso ona fesoasoani ia te oe e faatoilalo luitau o loo feagai ma oe.

Fetuunaiga o lesona ia fetaui ma manaoga o tagata aoga. O le aoao atu e ala i le Agaga e aofia ai sauniuniga maelega ma magafagafa o lesona, lea e aofia ai le faaaogaina o mataupu aoaoina ua saunia. Peitai, o le aoao atu e ala i le Agaga e manaomia ai foi le tatalo, mafaufau, ma le fetuunaiga o lesona ina ia mautinoa ai e mafai e le Agaga ona taulimaina manaoga o tagata aoga taitoatasi ma fesoasoani i tagata aoga e faaaoga mataupu faavae i o latou tulaga taitoatasi. A o e sauni e aoao atu, saili mo musumusuga mai le Agaga Paia e faatatau i le auala e fetuunai ai se lesona e taulima ai manaoga o tagata aoga.

Sauniuniga a le tagata aoga: Valaaulia tagata aoga e mafaufau i se luitau po o se puapuaga o feagai patino ma i latou lea ua latou mananao e saili ai le toomaga po o le malosi o le Tama Faalelagi ma Iesu Keriso e faatoilalo ai. Valaaulia i latou e suesue le Galuega 3:1–8 ma mafaufau i lenei luitau po o puapuaga ma vaavaai mo upumoni e mafai ona fesoasoani ia i latou.

Gaoioiga E Mafai Ona Aoao Mai Ai

Mauaina o le mana faamalolo o le Atua

E tele auala eseese e mafai ai ona aoao atu ia anotusi o le Galuega 3 . O gaoioiga nei e aoao ai ua tuuina atu ai se auala se tasi e aoao atu ai lenei mataupu. Tagai i le vaega o “Gaoioiga Faaopoopo e Aoao Ai” i le faaiuga o le lesona mo isi gaoioiga e aoao ai e mafai ona faaaoga.

Tusi ia upu Luitau ma Puapuaga i luga o le laupapa. Mafaufau foi e tusi tali a tagata aoga i le fesili o loo sosoo ai.

• O a nisi o luitau faaletino, faaleagaga, pe faalelagona po o mafatiaga e oo i ai tagata i le olaga?

Ia mautinoa ua lava avanoa faaletino o siomia ai tagata aoga e faamaea ai le gaoioiga lenei i a latou api faamaumau suesuega e aunoa ma le mafai e isi ona vaai i mea na latou tusia. Afai e le mafai, mafaufau e valaaulia tagata aoga e tau lava o le mafaufau e uiga i se luitau po o se puapuaga o loo feagai ma i latou ona tusi lea o a latou tali i fesili e tolu o loo mulimuli ane.

Mafaufau i se luitau po o se puapuaga o loo feagai patino ma oe lea e te manao e saili le toomaga po o le malosi o le Tama Faalelagi ma Iesu Keriso e faatoilalo ai. Tusi i lalo i lau api faamaumau suesuega, ma ia faaaofia ai foi au tali i fesili nei:

• O a ni faatinoga ua e faia e maua ai le fesoasoani mo lenei luitau po o le puapuaga?

• O le a se mea ua uma ona e iloa e uiga i le Tama Faalelagi ma Iesu Keriso lea e tuuina atu ia te oe le mautinoa o le a La fesoasoani ia te oe?

• O a ni fesili po o ni popolega o ia te oe e uiga i le faatoilaloina o lenei luitau po o puapuaga?

Ua faamalolo e Peteru ma Ioane se tagata pipili

I le lesona lenei, o le a e maua ai le avanoa e aoao ai nisi o upumoni o le talalelei mai le tala o i le Galuega 3 o le faamaloloina e Peteru ma Ioane o se tagata pipili. A o e suesue, ia gauai atu i uunaiga faaleagaga e te maua. Saili e faamalosia lou faatuatua e mafai e Iesu Keriso ona fesoasoani ia te oe i luitau o loo feagai ma oe i le olaga nei.

Faitau i le Galuega 3:1–3, ma vaavaai mo nisi o faamatalaga e uiga i lenei tagata, o le sa silia ma le 40 tausaga le matua (tagai i le Galuega 4:22). Atonu e fesoasoani le iloa o “mea alofa” o loo ta’ua i fuaiupu 2–3 o aitema na foai atu e tagata i e matitiva.

• O a ni upu atonu e te faaaogaina e faamatala ai lenei tagata ma lona tulaga? Aisea?

• O a ni ala masani atonu e tali atu ai tagata i se tasi o i ai i le tulaga o lea tagata?

Faitau i le Galuega 3:4–8, ma vaavaai mo upumoni e mafai ona e aoaoina e uiga i le faatoilaloina o o tatou luitau po o puapuaga mai lenei tala. E mafai foi ona e matamata i le “Peter and John Heal a Man Crippled since Birth” (3:21), o loo i le ChurchofJesusChrist.org.

• O le a se mea o tumatila mai ia te oe i lenei tala?

• O le a se mea ua fesoasoani lenei aafiaga ia te oe e aoao ai pe lagona e uiga i le Tama Faalelagi ma Iesu Keriso?

Valaaulia tagata aoga e faasoa mai ni upumoni eseese sa latou mauaina mai lenei tala. Fai atu ia i latou e faasoa mai pe na faapefea ona latou vaaia lena upumoni i le tala faatusi paia ma pe aisea ua latou manatu ai e taua lena upumoni.

Sa aoao atu e Peteru i latou o e sa molimauina le vavega e faapea, sa faia e ala i le faatuatua i le suafa o Iesu Keriso (tagai i le Galuega 3:16). O se upumoni e tasi e mafai ona tatou aoao mai i lenei tala o le, e ala i le faatuatua ia Iesu Keriso, e mafai ai ona faamaloloina i tatou.

• O le a se mea e mafai ona e faasoa mai nei fuaiupu e mafai ona fesoasoani i se tasi o loo aafia i le taimi nei i se tasi o luitau po o puapuaga faaletino, faaleagaga, pe faalelagona na e faailoaina i le amataga o le lesona?

• O le a se mea e mafai ona tatou faia e maua ai le mana o le Tama Faalelagi ma le Faaola e fesoasoani ai ia i tatou i nei luitau?

Matamata i le “The Wounded Shall be Healed” (5:45), o loo maua i le ChurchofJesusChrist.org. Faalogologo i le molimau a Elder Neil L. Andersen o le Korama a Aposetolo e Toasefululua, ma tusifaamaumau soo se upu po o fasifuaitau e tulaga ese ia te oe po o uunaiga e oo mai ia te oe a o e matamata i le vitio.

• O le a se mea sa tulaga ese ia te oe mai aoaoga a Elder Andersen?

Mo le fesili lenei, mafaufau e faasoa atu se faataitaiga patino. Peitai, fesoasoani i tagata aoga o e tali mai ia malamalama e le tatau ona latou faasoa maia i le vasega se mea e patino tele.

• O a ni aafiaga na e oo i ai pe o e iloa e uiga i se mea na mafai e le Faaola ona tuuina mai le malosi po o le faamalologa?

• O le a se mea na e aoaoina pe lagonaina e uiga ia Iesu Keriso i le asō e te manao e manatua?

• O le a se mea ua musuia oe e fai ona o mea ua e suesueina i le aso?

Tala ma Faamatalaga o Talaaga

Aisea e i ai taimi tatou te le maua ai le faamalologa a le Faaola i le taimi ma le ala tatou te mananao ai?

Na aoao mai Peresitene Russell M. Nelson:

Ua ou iloaina, e i ai nisi taimi, e foliga mai ai e le tali maia nisi o a tatou tatalo faatauanau. Tatou te mafaufau, “Aisea?” Ou te iloaina lena lagona! Ua ou iloaina ia popolega ma loimata o taimi faapena. Ae, ua ou iloaina foi o a tatou tatalo e leai se taimi ua le amanaiaina ai. E le faapea ua le talisapaiaina lo tatou faatuatua. Ua ou iloaina e sili atu le lautele o le silafaga a se Tama Faalelagi atamai nai lo tatou. E ui ua tatou iloa o tatou faafitauli ma tiga i le olaga nei, ae Na te silafia lo tatou alualu i luma ma le gafatia e faavavau. Afai tatou te tatalo ia iloa Lona finagalo ma tatou gauai atu lava i ai ma le onosai ma le lototele, e mafai ona tupu le faamalologa faalelagi i Lana lava ala ma le taimi.

(Russell M. Nelson, “Jesus Christ—the Master Healer,” Ensign po o le Liahona, Nov. 2005, 86)

Na aoao mai Elder David A. Bednar o le Korama a Aposetolo e Toasefululua e faapea:

O le amiotonu ma le faatuatua e mautinoa lava e aoga i le faamaloloina o e mamai, tutuli, pe pipili—pe afai o faamalologa faapena e ausia ai faamoemoega o le Atua ma ua tusa ai ma Lona finagalo. O le mea lea, tusa lava pe malolosi o tatou faatuatua, e tele mauga o le a le aveesea ai. Ma e le o ma’i uma ma lē atoatoa o le a faamaloloina. Afai e faatapulaaina mea faafeagai uma, afai e aveesea uma ia faafitauli, o lona uiga o le a le faataunuuina faamoemoega autu o fuafuaga a le Tama.

(David A. Bednar, Accepting the Lord’s Will and Timing Ensign po o le Liahona, Aok. 2016, 34)

E mafai faapefea ona ou maua le mana faamalolo o le Faaola pe a ou oo i puapuaga faaleagaga?

Na aoao mai Peresitene Russell M. Nelson:

O puapuaga e mafai ona oo mai, mai mafuaaga faaleagaga faapea foi ma le faaletino. Sa manatua e Alema le Itiiti e faapea, o lana agasala sa matua tiga lava ma sa ia manao ai ia “tia’ia uma le agaga ma le tino, ina ia le aumaia [o ia] e tu i luma o … le Atua, e faamasinoina i [ana] galuega” [ Alema 36:15 ]. I taimi faapena, e mafai faapefea ona faamaloloina i tatou e Ia?

E mafai ona tatou salamo atoatoa! E mafai ona tatou liua atoatoa! Ona mafai lea e le “Alo o le Amiotonu” ona faamanuiaina atoatoa i tatou i Lona aao faamalolo.

… O le faatuatua, salamo, papatisoga, se molimau, ma le liua tumau e taitai atu ai i le mana faamalolo o le Alii.

(Russell M. Nelson, “Jesus Christ—the Master Healer,” Ensign po o le Liahona, Nov. 2005, 86)

Gaoioiga Faaopoopo e Aoao Ai

Aoteleina o aoaoga o le Galuega 3:1–8

A uma ona faitau le Galuega 3:1–8, faaali atu ata nei, ma fai i tagata aoga e faamatala le tala o nei ata i a latou lava upu. E mafai ona fesoasoani lenei mea i tagata aoga e faatumauina ai le tala i o latou mafaufau.

(1)

(2)

(3)

(4)

O le aafiaga o lenei vavega i isi

Fesoasoani i tagata aoga ia malamalama o le faamalologa na faia i le malumalu i lena aso sa i ai se aafiaga tele i le toatele o tagata. Suesue fuaiupu nei, ma vaavaai pe na faapefea e lenei vavega ona aafia ai tagata o loo lisi atu i lalo.

Mafaufau e vaevae tagata aoga i ni vaega se tolu ma tofi atu i vaega taitasi se tasi o seti o fuaiupu nei e suesue (e mafai ona atofa atu i se vaega se tasi ia fuaitau muamua e lua).

Galuega 3:8 —O le tagata na faamaloloina Galuega 3:9–13, 19 ; 4:4 —O tagata i le malumalu Galuega 4:13–18 —O taitai Iutaia

A uma ona suesue tagata aoga, talanoaina ma i latou mea sa latou aoaoina. Mafaufau e faaaoga fesili e pei o nei:

O le a se mea na e matauina e uiga i le ala na aafia ai vaega eseese o tagata ona o lenei vavega?

Aisea e te manatu ai sa ese le aafiaga o nisi o tagata nai lo isi?

Pe ana fai na e i ai faatasi ma tagata i le malumalu, mata e faapefea ona suia lou vaai ia Peteru ma Ioane ina ua uma ona e molimauina lenei vavega?

Galuega 3:19–21 . O le toefuataiga o mea uma

Faamatala atu, ina ua uma ona faamalolo e Peteru ma Ioane le tagata pipili, sa vave ona salalau atu le tala i le vavega. E toatele tagata na potopoto faatasi e faalogologo ia Peteru ma Ioane, e aofia ai nisi sa teenaina muamua Iesu Keriso.

Valaaulia se tagata aoga e faitau leotele le Galuega 3:19–21 . Fai i le vasega e mulimuli i le faitauga, ma vaavaai mo mea na faatonu e le Aposetolo o Paulo tagata na potopoto iina e fai.

Faamatala atu faapea e tusa ai ma le Galuega 3:21, na valoia e Peteru faapea o Iesu Keriso o le a tumau i le lagi “seia oo i tausaga e toe fuatai ai mea uma lava.” O le vaega o le “toefuataiga o mea uma” e faatatau i le Toefuataiga o le talalelei i aso e gata ai.

Mafaufau e talanoaina fesili e pei o nei:

• E tusa ai ma le fuaiupu 21, o ai faatasi ma Peteru na valoia faapea o le a i ai se Toefuataiga o le talalelei i aso e gata ai?

• O a mea autu ua uma ona tutupu e fesootai ma le faataunuuga o lenei valoaga?

Faasoa atu lau molimau faapea o perofeta a le Alii i le tele o vaitaimi eseese na valoia le taimi o loo tatou ola ai ma na tulimatai atu i le Toefuataiga o le talalelei ma le Afio Mai Faalua o le Alii.