Iloilo Lou Aoaoina 1

Mataio 1–2; Luka 1–2; Ioane 1

O le muai lesona lea o le iloiloga faavaitaimi o ni lesona o le a e auai ai i le gasologa o au suesuega i le Feagaiga Fou. O lesona nei o loo faamoemoe e fesoasoani ia te oe e iloilo ai au sini, lou aoaoina, ma le tuputupu ae faaletagata lava ia.

Uunaia suesuega o tusitusiga paia i aso taitasi. O se tasi o auala e uunaia ai tagata aoga e suesue a latou tusitusiga paia i aso taitasi o le tuuina atu lea o avanoa masani mo i latou e faasoa mai i le vasega mea o loo latou aoaoina ma lagonaina i le taimi o a latou suesuega faaletagata lava ia o tusitusiga paia.

Tapenaga a le tagata aoga: Valaaulia tagata aoga e mafaufau po o a mai le faagasologa o a latou suesuega i tusitusiga paia ma sauni e faasoa mai ni manatu na maua po o auala ua faaleleia ai le faia o latou suesuega lata mai nei.

Gaoioiga e Mafai ona Aoao Mai Ai

Faamoemoega mo le iloiloga o lesona

Faaali lenei ata ma le fesili mo tagata aoga e vaavaai i ai pe a ulufale mai i le vasega.

Tusi se ata faigofie o se laau i taimi eseese o lona tuputupu ae. E mafai e le ata ua faaali atu ona fesoasoani ia te oe. A o e tusia le ata, mafaufau pe faapefea ona e tali lenei fesili. A maea ona tusi lau ata, tusi i lalo lau tali i le fesili i luga o le laupepa e tasi.

• E faapefea ona faatusaina lou tuputupu ae faaleagaga i le tuputupu ae o se laau?

Na faamatala e Peresitene M. Russell Ballard, le Sui Peresitene o le Korama a Aposetolo e Toasefululua, nisi o gaoioiga e mafai ona tatou faia e faatupu atili ai lo tatou tuputupu ae faaleagaga ma taulai ia tatou sini faavavau:

I le tele o tausaga, ua ou matauina ai o i latou o e aupito tele mea latou te ausiaina i lenei lalolagi o i latou ia e i ai se vaaiga mamao mo o latou olaga, faatasi ma ni sini e faatumau ai lo latou taulaiga i a latou vaaiga mamao atoa ai ma fuafuaga faataatitia i auala e ausia ai. O le iloaina o le mea o loo e agai i ai ma le ala ua e faamoemoe e te taunuu ai i lena mea e mafai ona maua ai le uiga anoa, faamoemoega, ma le ausiaga i le olaga. …

O le toe foi atu i le afioaga o le [Atua] ma le mauaina o faamanuiaga e faavavau lea e maua mai le osia ma le tausia o feagaiga, o sini aupito sili ia ona taua e mafai ona tatou faatutuina. …

Ua ou matauina o le faatumauina o le taulaiga i le toe foi atu ma le mauaina o faamanuiaga folafolaina, e manaomia ai ona faamasani ona ou fesili ia te au lava ia, “O a mai au?”

E tai pei o le faia o se faatalanoaga maoti ma oe lava ia. Ae afai e faalefetaui i lau faalogo, mafaufau i ai: o ai a se isi tagata i lenei lalolagi e sili atu lona iloa ia te oe nai lo oe lava ia? E te iloa ou mafaufauga, o au amioga lilo, ou manaoga, ma au miti, sini, ma fuafuaga. Ma e sili atu lou iloa i lo se isi lava tagata i lou tulaga alualu i luma i le auala e toe foi atu ai ma le mauaina.

(M. Russell Ballard, “Toefoi Atu ma Mauaina,” Ensign po o le Liahona, Me 2017, 62–64)

• O le a se mea ua e aoao mai ia Peresitene Ballard e faatatau i le fuaina faavaitaimi o lou tuputupu ae faaleagaga?

Ina ia fesoasoani ia te oe e fuaina lou tuputupu ae masani, o nisi o au lesona o le a fai ma aoaoga e iloilo ai. O nei lesona e mafai ona vaai i ai o ni avanoa e te manatunatu loloto ai ma faamanatu ai auala ua e aoao i ai ma faaleleia atili. E mafai foi ona fai ma avanoa e faailoa ai mea o loo manaomia pea ona e aoaoina po o auala e mafai ai ona e faaleleia atili.

O le o mai ia Iesu Keriso ma avea ma Ona soo

Fesoasoani i tagata aoga e iloilo lo latou alualu i luma e fesootai ma le o mai ia Keriso ma avea ma Ona soo. O le vaega o totoe o lenei lesona o le a faailoa ai nisi manatu i auala e faia ai lenei mea. E faalagolago i aafiaga e aoao mai ai tagata aoga, e mafai ona fetuunai nei manatu pe toe suia i isi auala e fesoasoani ai i tagata aoga e iloilo lo latou aoaoina.

O le tasi o faamoemoega autu o seminare o le fesoasoani lea ia te oe ia e sau atoatoa ia Iesu Keriso ma avea ma Ona soo, po o le mulimuli ia te Ia. O le faalogo atu i upu a le Faaola e ala ia tatou suesuega o tusitusiga paia ma i faaaliga faaletagata lava ia o se vaega taua lea o le mulimulitai ia Iesu Keriso.

Faaaoga nai minute e iloilo ai au lava suesuega o tusitusiga paia ma taumafaiga ia maua faaaliga mo oe lava ia. Faamaumau ou manatu i lau api talaaga mo suesuega. O nisi nei o fesili e fesoasoani ia te oe e iloilo ai:

• O a mai le faagasologa o au suesuega faaletagata lava ia o tusitusiga paia? O a mea ua e faia e faaleleia ai lou tomai e suesue ma faaaoga afioga a le Alii i lou olaga? O le a se vaega o au suesuega i tusitusiga paia na faafaigata pe e lei aoga ua e manao e faalelei atili?

• Sa faapefea ona e lagonaina le aoaoina po o uunaiga a le Agaga Paia ia te oe i lenei tausaga? O a ni au fesili o i ai e uiga i le mauaina o faaaliga faaletagata lava ia? O a ni mea e mafai ona e faia e saili ai nisi avanoa ia lagonaina ai le siufofoga o le Agaga?

Faatino lou aoaoina

O nei gaoioiga ua mamanuina e maua ai e tagata aoga se avanoa e faamatala ai nisi o matafaioi o Iesu Keriso na latou aoaoina talu ai nei.

Filifili e fai se tasi o nei gaoioiga pe fai uma le lua e faailoa mai ai mea ua e aoaoina e uiga ia Iesu Keriso ma Ana matafaioi mai au suesuega o le Mataio 1 – 2 ; Luka 1 – 2 ; ma le Ioane 1 . E mafai ona e iloiloina lau api talaaga mo suesuega e faamanatu ai ia te oe upu moni ua e aoaoina.

Faaali filifiliga nei mo tagata aoga e faatatau atu i ai a o latou faamaeaina le faia o lenei gaoioiga.

Sauni ni anomea tusiata mo tagata aoga pe afai o maua mea nei, e pei o penitala, peni, valigao, peni maka, vali, laupepa, ma isi mea faapena. E mafai foi ona fai nei mea e faaaoga ai le kelei po o se gaoioiga e fai i fafo e faaaoga ai le sioka i luga o auala savali.

Filifiliga A: O se fatufatuga e valaaulia ai isi e “faauta i le Tamai Mamoe a le Atua”

I le Ioane 1, na tatou faitauina le valaaulia a Ioane le Papatiso mo ona au soo e “faauta i le Tamai Mamoe a le Atua” ( Ioane 1:36). O se tasi o faauigaga o le upu faauta o le tagai ane, matauina, po o le vaai totoa i se mea po o se tasi.

Mo lenei gaoioiga, fatufatu se mea e mafai ona fesoasoani i tagata e “faauta i le Tamai Mamoe a le Atua,” pe malolo ma mafaufau loloto ia te Ia ma i matafaioi Na te faatinoina i o tatou olaga. Amata i le mafaufau i uiga auaumama, matafaioi, ma suafa o Keriso ua e aoao i ai. Saili fuaitau o mau na e aoaoina ai nei upu moni e faatatau ia Iesu Keriso. Mafaufau e faaaoga se mau e fai ma autu o lau fatufatuga. Mo lenei gaoioiga, e mafa ona e faia se tasi o nei galuega faatino:

• Fatufatu se ata o faatufugaga e fai ma faatusa o se uiga auaumama, se matafaioi, se suafa, po o se faalaniga o Keriso e anoa ia te oe, ma saunia se faamatalaga o le mea ua e fatuina.

• Tusi e uiga i se aafiaga paitno na fesoasoani e faaloloto atili ai lou malamalama i le Faaola.

• Talosaga i isi tagata aoga, uo, po o tagata o lou aiga e faasoa mai ni mea na latou vaai i ai e faatatau ia Keriso. Faaaoga o latou manatu i le mea e te fatufatuina. O nisi faataitaiga o se tusiga i se lau api talaaga, o se ata faatusa, po o se vitio teuteuina o mea na latou faasoa mai.

Filifiliga E: O se folasaga ia Iesu Keriso

Fatu se lisi o faalaniga e tolu o le Faaola o le a e faaaogaina e faailoa atu ai se tasi ia Iesu Keriso. Faailoa ma tau le mau na e mauaina ai. Ia aofia ai ma se faamatalaga puupuu o uiga o faalaniga taitasi ma le ala e mafai ai ona ese le olaga o se tasi pe afai na latou iloa nei faalaniga.

Ia aofia ai ma se tala faatusi paia po o se aafiaga faaletagata lava ia lea na faatino e le Faaola e faailoa ai faalaniga taitasi ua e filifilia. Mo se faataitaiga, e mafai ona e lisiina le faalaniga “Emanuelu,” o lona uiga “Ua ia te i tatou le Atua” ( Mataio 1:23). E mafai ona e faailoa mai ni faataitaiga mai lou olaga po o olaga o isi i le taimi sa “i ai ma” oe po o latou le Faaola.

O lenei gaoioiga e mafai ona faamaeaina o se ata faatusa (e pei o se ata tusi, ata vali, po o se ata vane) pe na o se tusiga. Mafaufau e saili ni auala e faaauau ai ona saili faalaniga o le Faaola a o e suesue i le Feagaiga Fou i lenei tausaga.

A ua lava se taimi na tuuina i tagata aoga e faauma ai a latou galuega, tuu i ai se avanoa e faasoa ai a latou fatufatuga ma le vasega (pe i ni vaega faipaga po o ni vaega toalaiti). Mafaufau e faaiu le vasega i le tuuina atu o se molimau ia Iesu Keriso. E ono fesoasoani le taulai atu o lenei molimau i nisi o matafaioi ma faalaniga sa talanoaina i lenei lesona.