“Pea Ko Ia ia ʻe Fai Ki Hono Finangaló, Te Ne ʻIlo ʻa e Akonakí”
ʻĪmisi
Young adult woman ponders scriptures near lake.
Lolotonga hoʻo ako e Sione 7, naʻá ke ako ai naʻe fakaafeʻi kitautolu ʻe Sīsū ke fai e finangalo ʻo e Tamai Hēvaní koeʻuhí ke tau lava ʻo ʻilo ʻoku moʻoni ʻEne tokāteliné (vakai, veesi 17). ʻE tokoniʻi koe ʻe he lēsoni ko ʻení ke ke ako maʻuloto ʻa e fakamoʻoni fakafolofola fakataukei fakatokāteline ko ʻení mo hono kupuʻi lea mahuʻingá, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi fekau, akonaki, pe tokāteline kehekehe ʻo e Fakamoʻuí ʻoku totonu ke feinga e toʻu tupú ke maʻu ha fakamoʻoni ki aí.
Ngaahi ʻEkitiviti Ako ʻOku Ala Fakahokó
ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ia ʻi he hili ʻa e “Sione 7,” ʻa ia ko e lēsoni fakaʻuhinga ia ki he potufolofola fakataukei fakatokāteline ʻo e Sione 7:17 . Kapau ʻoku fie maʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni fekauʻaki mo iá lolotonga e uike ko iá.
Ako maʻuloto mo fakamatalaʻi
ʻOange ha faingamālie ki he kau akó ke nau ako maʻuloto ʻa e fakamoʻoni fakafolofolá ki he Sione 7:17 mo e kupuʻi lea fakafolofola mahuʻinga ko iá. Ko e founga ʻe taha ke ako maʻuloto fakakalasi aí ko hono hiki ʻa e fakamoʻoni fakafolofolá mo e kupuʻi lea mahuʻinga ʻi he palakipoé ʻi ha konga kehekehe ʻe tolu. Vahevahe ʻa e kalasí ki ha kulupu ʻe tolu, pea ʻoange ki he kulupu taki taha ha konga ke nau ako. Fakaafeʻi e ngaahi kulupú ke nau lau maʻuloto fakataha ʻenau ngaahi kongá. Fakakaukau ke vahe ki he kau akó ha ngaahi konga kehekehe kae ʻoua kuo nau ʻilo ʻa e fakamoʻoni fakafolofolá mo e kupuʻi lea mahuʻinga mei heʻenau manatú. ʻE lava foki ke fakaʻaongaʻi ʻa e polokalama, Fakataukei Fakatokāteliné (Doctrinal Mastery), ʻa ia ʻoku maʻu ʻi he ChurchofJesusChrist.org, ke tokoni ke ako maʻuloto ʻe he kau akó.
Sione 7:17
“Pea ko ia ia ʻe fai ki hono finangaló,
te ne ʻiloʻi ʻa e akonakí.”
Lau ʻa e fakamatala ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí.
ʻĪmisi
Official Portrait of President Dallin H. Oaks taken March 2018.
‘Oku totonu ke tau manatuʻi ko e fakamo‘oní ʻoku ‘ikai maʻu taʻe ngāueʻi ia ka ko ha founga ngāue ia ʻoku fie maʻu ai ke tau fai ha me‘a.
(Dallin H. Oaks, “Fakamoʻoní,” Ensign pe Liahona, Mē 2008, 27)
ʻOkú ke pehē ʻoku fekauʻaki fēfē e fakamatala ʻa Palesiteni ʻOakesí mo e meʻa naʻe akoʻi ʻe he Fakamoʻuí ʻi he Sione 7:17 ?
Akoako fakahokó
Vahevahe ʻa e kalasí ki he ngaahi kulupu iiki. Fakaafeʻi e tokotaha ako takitaha ke fili ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié (vakai, Fakamatala ki he ʻElito ʻo e Fakataukei Fakatokāteliné [2022], ngaahi palakalafi ʻo e “Ko Hono Maʻu ʻo e ʻIlo Fakalaumālié.” 5–12). Kole ki he kau akó ke nau fakamatalaʻi ʻa e tefitoʻi moʻoní ki heʻenau kulupú hili hano toe vakaiʻi nounou ʻa e tefitoʻi moʻoní.
Tuku ha ngaahi miniti siʻi ke toe vakaiʻi ‘a e ngaahi tefitoʻi moʻoni ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022). Fili ha taha ʻo e ngaahi tefitoʻi moʻoní ke ke ako lahi ange ki ai.
Te ke fakamatalaʻi nounou fēfē ʻa e tefitoʻi moʻoni naʻá ke filí ki ha taha ʻoku ʻikai ke ne maheni mo ia?
ʻI he taimi ʻoku mahino ai kiate koe ʻa e ngaahi tefitoʻi moʻoni ʻo hono maʻu ʻo e ʻilo fakalaumālié, te ke lava ʻo tokoniʻi koe mo e niʻihi kehé ke maʻu ha fakamoʻoni pe ko e fehangahangai mo e taʻepaú. Fakaʻaongaʻi ʻa e tūkunga ko ʻení ke akoako hono tokoniʻi ha kaungāmeʻa.ʻI ha fepōtalanoaʻaki mo ho kaungāmeʻa ko Luisí, ʻokú ne tala atu ʻoku ʻikai ke ʻi ai haʻane fakamoʻoni ki he [fili ha tokāteliné]. ʻOkú ke manatuʻi e meʻa naʻá ke ako mei he Sione 7:17 , pea ʻi he loto-falala ʻokú ke fakamatalaʻi ange te ne lava ʻo maʻu ha fakamoʻoni ki he tokāteline ko ʻení ʻaki hono [fakamatalaʻi e meʻa ʻe lava ke fai ʻe Luisi ke maʻu ai ha fakamoʻoni ki he tokāteline ko ʻení]. ʻOkú ke lava ʻo tala ʻoku loto-mamahi ʻa Luisi ʻi heʻene tala atu kiate koe, “Kuó u toutou feinga ke fai ia, ka ʻoku teʻeki pē ke u ongoʻi ʻoku ou ʻiloʻi ʻoku moʻoni ia.”
Ko e hā ha ngaahi ʻuhinga ʻe niʻihi ʻe ngali ʻikai ongoʻi ai ʻe Luisi ʻoku ʻi ai haʻane fakamoʻoní?
ʻI hono fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié, tokoni ke mahino kia Luisi ʻa e ngaahi faingataʻa ʻe ala fie maʻu ke ne ikunaʻi ka ne maʻu ha fakamoʻoní. Te ke lava ʻo fakaʻaongaʻi e ngaahi fehuʻi ko ʻení pe ngaahi fehuʻi kehe ʻokú ke fakakaukau ki aí ke teuteuʻi ha tali ke tokoni kia Luisi.
Ngāue ʻi he tuí
ʻOkú ke pehē ko e hā ʻoku mahuʻinga ai ke hokohoko atu hono moʻui ʻaki e ngaahi akonaki ʻa e Fakamoʻuí neongo ʻoku ʻikai hā mai ha fakamoʻoni ʻi he taimi ʻoku tau fie maʻu aí?
Ko e hā ha aʻusia te ke lava ʻo vahevahe mo Luisi fekauʻaki mo e ngāue ʻoku fie maʻu ke maʻu ai ha fakamoʻoní?
Sivisiviʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
ʻOkú ke pehē ko e hā ʻe ala finangalo e Tamai Hēvaní ke ʻilo ʻe ha taha hangē ko Luisí fekauʻaki mo hono maʻu ha fakamoʻoní?
ʻE lava fēfē nai ke hoko hono maʻu ha mahino ʻoku hoko mai e fakamoʻoní mei he Tamai Hēvaní kae ʻikai ko e fakaʻau pē ʻa e taimí ko ha meʻa ia ʻe lava ʻo tokoni kia Luisí? (vakai, Mātiu 16:13–17).
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
Ko e hā ha ngaahi maʻuʻanga tokoni kuo fokotuʻu fakalangi ʻe ala tokoni kia Luisi ke tafoki ki he ʻEikí ke maʻu ha tokoni ʻi hono maʻu ʻene fakamoʻoní?
Ko e sīpinga ʻe taha ʻo hono fakaʻaongaʻi ha maʻuʻanga tokoni kuo fokotuʻu fakalangí ko hono kumi hake ʻa e lea ʻa Palesiteni Tāleni H. ‘Oakesi ko e “Fakamoʻoní,” ʻa ia ʻoku maʻu ʻi he ChurchofJesusChrist.org, pea vahevahe ha kiʻi fakamatala nounou mei ai ʻe ala tokoni kia Luisi.
ʻI hoʻo fakaʻaongaʻi e ngaahi fakakaukau naʻá ke maʻu ʻi hoʻo fakakaukau ki he ngaahi tefitoʻi moʻoni ʻo hono maʻu ʻo e ʻilo fakalaumālié, hiki ha tali kia Luisi. Mahalo te ke fie maʻu ke fakakau ha aʻusia fakafoʻituitui, ko hoʻo fakamoʻoní, mo ha fakaafe kia Luisi ke ngāue ʻi he tuí.
Fakakaukau ke fakaafeʻi e kau akó ke vahevahe ʻenau ngaahi palaní mo e ngaahi kaungāakó pe ko e kalasí. Mahalo ʻe tokoni ke vahevahe ha aʻusia fakataautaha ʻo hono maʻu ha fakamoʻoni ki ha niʻihi ʻo e ngaahi akonaki ʻa e Fakamoʻuí.
Toe Vakaiʻi
Tokoni ke toe vakaiʻi ʻe he kau akó ʻa e fakamoʻoni fakafolofola mo e kupuʻi lea fakafolofola mahuʻinga ki he Sione 7:17 . ‘Oku totonu ke ngāue ʻaki ‘a e ʻekitivitī toe vakaiʻi ko ʻení ʻi ha lēsoni ʻe akoʻi ʻi he kahaʻu ofi maí.
Hiki ʻa e fakamoʻoni fakafolofolá mo e kupuʻi lea fakafolofola mahuʻingá ʻi he palakipoé ʻi ha laine ʻe tolu, ʻo hangē ko hono fakamatalaʻi ʻi he konga “Ako maʻuloto mo fakamatalaʻí” ʻi he konga kimuʻa ʻo e lēsoní. Hili hono fakaafeʻi e kau akó ke nau lea ʻaki e kupuʻi lea takitaha, tamateʻi ha taha ʻo e ngaahi lainé pea fakaafeʻi e kau akó ke nau toe lau ʻa e kupuʻi lea takitaha. Hili ha ngaahi taimi, tamateʻi ha kupuʻi lea ʻe taha. Toe fai pē ʻa e meʻa tatau kae ʻoua kuo tamateʻi kotoa e laine ʻe tolú pea ongoʻi fiemālie ʻa e kau akó ke lau maʻuloto kotoa e ngaahi laine ʻe tolú.