Atamai i Aoaoga Faavae: Luka 22:19-20

“Ia Outou Faia Lenei Mea ma Faamanatuga ia te Au”

I lau suesuega o le Mataio 26:26–30, sa e aoao ai e uiga i le faailoaina atu e le Faaola o le sauniga o le faamanatuga i Ona soo i le Talisuaga Mulimuli. O lenei lesona o le a tuuina atu ai ia te oe le avanoa e faatupulaia ai lou atamai i le aoaoga faavae o le faamanatuga. O le a e faia e ala i le taulotoina o le mau faasino ma le fasifuaitau autu o le mau mo le fuaitau o le atamai i aoaoga faavae i le Luka 22:19–20, e ala i le faamatalaina atu o le aoaoga faavae, ma le faaaogaina o mataupu faavae o le mauaina o le malamalama faaleagaga.

Fesoasoani i tamaiti aoga e toe iloilo ia mataupu faavae o le mauaina o le malamalama faaleagaga. Saunia ni avanoa masani mo tagata aoga e toe faamanatu ai mataupu faavae o le mauaina o le malamalama faaleagaga: faatino i le faatuatua, iloilo mataupu ma fesili faatasi ai ma se vaaiga e faavavau, ma saili le malamalama atili e ala i punaoa mamana ua filifilia (Pepa Autu o le Atamai i Aoaoga Faavae [2002], “Mauaina o le Malamalama Faaleagaga”). O le a faataitai e tagata aoga ona faaaoga nei mataupu faavae i galuega faatino faataitai taitasi. Ia iloiloina maeaea mataupu faavae ina ia mafai ai e tagata aoga ona manatua ma faaaoga i o latou olaga.

Sauniuniga a le tamaitiiti aoga: Valaaulia tagata aoga e mafaufau i mea e fesoasoani ia i latou e manatua ai le Faaola a o latou aai ma feinu i le faamanatuga ma ia saunia e faaaoga pe faasoa ane lenei aafiaga i lenei lesona.

Gaoioiga e ono Mafai ona Aoao Ai

A’o tauloto ma faamatala

O lenei lesona o le atamai i aoaoga faavae ua fuafuaina ia aoaoina pe a maea ona fai le lesona o le “Mataio 26:26–30; Luka 22:19–20,” o le lesona faatatau mo le fuaitau o le atamai i aoaoga faavae o le Luka 22:19–20 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Mafaufau e valaaulia tagata aoga e faatino lenei tulaga i ni vaega ta’ito’alua, pe valaaulia ni tagata aoga se toalua e faatino le vaaiga faataitai mo le vasega atoa.

Manatu faalemafaufau i le aumaia o se uo i le lotu e na te le iloa ma se mea e uiga i tapuaiga faatulagaina po o Iesu Keriso. I le maea ai o le sauniga faamanatuga, ua ia fesili, “O le a le faamoemoega o le tufaina atu o le falaoa ma le vai i tagata uma?”

E faapefea ona e faamatala atu le mataupu o le sauniga o le faamanatuga i lau uo?

Tuu atu i tamaiti aoga se avanoa e tauloto ai le mau faasino mo le fuaitau o le mau o le atamai i aoaoga faavae Luka 22:19–20 ma lona fuaitau autu o le mau talafeagai. O le gaoioiga o mulimuli mai o se tasi lea o auala e faatino ai. Mafaufau e fetuunai lenei gaoioiga e ala lea i le faatagaina o tagata aoga e galulue i ni paga po o ni vaega toalaiti po o le faaauai o le vasega atoa ma tusia le mau faasino ma le fasifuaitau autu i luga o le laupapa.

I lau api faamaumau suesuega, faaaoga se penitala e tusi faamama ai le mau faasino lenei ma le fasifuaitau autu o le mau: “ Luka 22:19–20 : Na poloa’i mai Iesu Keriso, ia taumamafa i le faamanatuga ’e fai ma faamanatuga ia te au.’”

Toe fai leotele le mau faasino lenei ma le fasifuaitau autu o le mau. Ona titina lea o upu po o fuainumera se lua, ma faataitai ona toe fai atu le mau faasino ma le fasifuaitau. Toe fai le faasologa lava lea e tasi, aveese upu po o fuainumera ma tauloto le mau faasino ma le fasifuaitau autu, seia uma upu ma fuainumera ona tapeese. Ona tusi lea o le tele o lenei mau faasino ma fasifuaitau autu i lou mafai ai mai mea o e manatuaina.

Faata’ita’i le faaaogaaga

Pe a talafeagai, fesoasoani i tamaiti aoga e toe iloilo mataupu faavae o le mauaina o le malamalama faaleagaga. O se tasi auala e faia ai lenei mea o le tuu atu lea i tamaiti aoga e faauma le gaoioiga lenei. O lenei iloiloga e le tatau ona silia ma le tolu i le lima minute.

Iloilo faapuupuu ia mataupu faavae o le mauaina o le malamalama faaleagaga (tagai i le Pepa Autu o le Atamai i Aoaoga Faavae [2022], “Mauaina o le Malamalama Faaleagaga”). Filifili se tasi o mataupu faavae e tolu o le mauaina o le malamalama faaleagaga ma tusi se faailoga faigofie po o se ata e te lagona e faatusa i ai.

Faataitai nei ona faaaoga mataupu faavae o le mauaina o le malamalama faaleagaga ma le aoaoga faavae o loo aoao mai i le Luka 22:19–20 e ala i le faitauina o le vaaiga faataitai lenei ma tali fesili o loo mulimuli mai.

O le vaaiga faataitai lenei ua faamoemoe e fesoasoani i tamaiti aoga i se laasaga sili nai lo le na o le tuufaatasia o se lisi o mea e fai i le taimi o le faamanatuga ma mafaufau loloto atili i le avea ai o le faamanatuga o se aafiaga anoa.

Mafaufau e fetuunai le vaaiga faataitai ina ia sili ona talafeagai mo tamaiti aoga.

O Siuli e 15 tausaga le matua, ua avea ma se tagata o le Ekalesia i lona olaga atoa, ma e masani ona auai i taimi uma i ana sauniga lotu. E nonofo faatasi o ia ma lona tina ma lona tina matua, o ni faataitaiga sili ia te ia. O le Aso Sa ua tuanai atu nei, sa faapitoa lava le fiafia o Siuli i mataupu a failauga i le sauniga faamanatuga. Sa faasoa mai e failauga taitasi ni aafiaga mamana ma patino e uiga i le aai ma feinu i le faamanatuga ma le ala e fesoasoani ai e faateleina le aafiaga a le Faaola i o latou olaga. O lenei mea na ia mafaufau ai pe na faapefea ona ia lē mauaina mo ia lava ni aafiaga tutusa faapena se tele. Ua ia iloa i le taimi o le faamanatuga e masani ona faalavelaveina ia i lana telefoni po o mea o loo faia e isi, pe mafaufau foi i le vave e mafai ai ona ia taunuu i le fale e malolo.

Na iai ni ou lagona faapea muamua?
O lea le mafuaaga e te manatu ai e iai taimi e faapea ai faalogona o tagata?

Tuu atu i tamaiti aoga se avanoa e faataitai ai le faaaogaina o mataupu faavae o le mauaina o le malamalama faaleagaga e fesoasoani ai ia Siuli i lenei tulaga. O se tasi lenei o auala e faatino ai lenei mea.

Afai e manaomia e tamaiti aoga se fesoasoani sili atu i le faaaogaina o mataupu faavae o le mauaina o le malamalama faaleagaga i lenei tulaga, mafaufau e faaaogaina fesili o loo lisiina atu i lalo o ulutala papanu e amata ai se talanoaga.

A uma ona tali tamaiti aoga i nei fesili, faamanatu ia i latou mataupu faavae e tolu o le Mauaina o le Malamalama Faaleagaga: (1)faatino le faatuatua,(2) iloilo manatu ma fesili mai se vaaiga e faavavau, ma (3) saili le malamalama atili e ala i punavai mamana ua filifilia.

I lalo ifo o ulutala taitasi, tusi i lalo ni auala faapitoa e mafai ai e lena mataupu faavae o le mauaina o le malamalama faaleagaga ona fesoasoani ia Siuli i lona tulaga. Mo se faataitaiga, atonu e te fautuaina atu ni auala patino e mafai ona ia galue ai i le faatuatua, faasoa atu pe mafai faapefea ona fesoasoani le tausia o se vaaiga e faavavau i lona tulaga, ma fautuaina mai nisi o punavai mamana ua filifilia e mafai ona ia faaaogaina mo le taitaiga ma faasinoala.

O le a se mea o le a e fautuaina ai Siuli e amata ona ia faia e foia ai ona atugaluga?
E mafai faapefea ona e faaaogaina mataupu faavae taitasi e tolu o le mauaina o le malamalama faaleagaga e fesoasoani ai ia Siuli?

Fesoasoani i tamaiti aoga e mafaufau i ni auala e fesootai ai ma manatua Iesu Keriso i le taimi o le sauniga o le faamanatuga. A o tali mai tamaiti aoga, mafaufau e fai atu fesili e pei o nei: E faapefea ona fesoasoani lenei mea ia te oe e manatua ai le Faaola? E mafai faapefea ona e fesootai ma manatua le Faaola nai lo le na o le faia o taga?

Faatino i le faatuatua

O le a se fautuaga e te tuuina atu ia Siuli e mafai ona fesoasoani ia te ia ia maua ai se aafiaga sili atu pe a auai i le faamanatuga?
O le a se mea e ono taofia ai lona faia o nei suiga? O le a faapefea ona e foia nei faafitauli?

Iloilo manatu ma fesili faatasi ma se vaaiga e faavavau

O a ni fesili e mafai ona e fai atu ia Siuli e fesoasoani ai ia te ia ia iloa lona tulaga faatasi ma se vaaiga e faavavau? Aisea o le a e filifilia ai na fesili?

Saili le malamalama atili e ala i punavai paia ua atofaina

O le a se mea o loo a’oa’oina i le Luka 22 ma i nisi mau po o taitai o le Ekalesia e ono mafai ona fesoasoani ia Siuli?
O fea se isi mea e mafai ona liliu i ai Siuli mo se fesoasoani e faaleleia ai lona aafiaga i le ai ma inu i le faamanatuga?

Iloiloga

E tatau ona faaaoga le gaoioiga toe faamanatu lenei mo se lesona o le a aoao atu i se taimi lata mai.

Tuu atu ia tofu tamaiti aoga taitasi ma se kata e tusitusi ai po o se pepa pipii. Valaaulia i latou e tusi le “ Luka 22:19–20 : Na poloaiina e Iesu Keriso, ia aai ma feinu i le faamanatuga ‘e fai ma faamanatuga ia te a’u’” i luga o a latou kata po o pepa pipii ona tape lea o nisi o upu ma fuainumera mai lenei mau faasino ma le fasifuaitau autu. Valaaulia tagata aoga e faafesuiai kata po o faamatalaga ma vaai pe mafai ona latou faatumuina upu po o fuainumera o loo misi. Ona valaaulia lea o tamaiti aoga e taumafai e tauloto mai le mau faasino ma le fasifuaitau mai le mafaufau.

Gaoioiga Faaopoopo e Aoao Ai

Isi vaaiga faataitai

Ina ia fesoasoani i tamaiti aoga ia malamalama i le matafaioi autu o loo faia e le faamanatuga i le auai i le lotu, mafaufau e faaaoga le isi vaaiga faataitai lenei:

Sa maua talu ai nei e Elitone se galuega e manaomia ai ona faigaluega o ia i Aso Sa. Na te lei manatu o se mea tele le misi o le lotu i se Aso Sa se tasi po o le lua i le masina. Ae ua iloa nei e Elitone e oo lava i Aso Sa e le o galue ai, e faigata ona lagona soo se uunaiga e auai. E lagona e ia le ivā i le lotu ma e leai se naunau pe fesootai ma soo se tasi tagata.

A uma ona faasoa atu le tulaga faataitai, talanoa pe mafai faapefea e mataupu faavae o le mauaina o le malamalama faaleagaga ona fesoasoani i le tulaga o Elitone. I le avea ai ma se vaega o la outou talanoaga, valaaulia tagata aoga e mafaufau i faamanuiaga e ono misia e Elitone ona o le le ai ma inu pea lava pea i le faamanatuga.