Mataio 26:26-30; Luka 22:19–20

O Le Faamanatuga

I le nofoaga ua ta’ua o le afeafe pito i luga, sa“nofo i lalo [le Faaola] faatasi ma le to‘asefulu ma le to‘alua” (Mataio 26:20) ma faamanatu le tausamiga o le Paseka mo le toe taimi a o i ai i le olaga nei. I le taimi o lenei tausamaaga mulimuli o le Paseka, sa faavaeina ai e Iesu Keriso le sauniga o le faamanatuga o se auala fou mo Ona soo e manatua ai o Ia. O lenei lesona e mafai ona fesoasoani ina ia e malamalama ai ma lagona le taua o le manatua o le Faaola a o e ai ma inu i le faamanatuga.

Valaaulia o tagata aoga ia fefaasoaai atu. Vaai mo avanoa e valaaulia ai tagata aoga e faasoa ane o latou aafiaga. O le fefaasoaai o malamalamaaga ma aafiaga talafeagai e mafai ona fesoasoani e faamanino ai le malamalama o tagata aoga i aoaoga ma mataupu faavae o le talalelei. A o faasoa mai e le vasega nei malamalamaaga ma aafiaga, e tele ina taitai e le Agaga Paia i latou i se molimau e loloto atu o mea moni tonu lava o loo latou faaalia. E ala i le mana o le Agaga Paia, e mafai foi e a latou upu ona i ai se aafiaga taua i loto ma mafaufau o a latou tupulaga.

Sauniuniga a le tamaitiiti aoga: Faailoa atu i tamaiti aoga o le lesona lenei o le a valaaulia ai i latou e iloilo o latou aafiaga i le aai ma feinu ai i le faamanatuga. Valaaulia tamaiti aoga e mafaufau e uiga i o latou aafiaga pito lata mai i le aai ma feinu ai i le faamanatuga ma omai saunia e faasoa mai mea sa latou faia, mafaufau i ai, pe lagonaina na fesoasoani ia i latou e manatua ai le Faaola.

Gaoioiga e ono Mafai Ona Aoao Ai

O le tāua o le faamanatuga

Mo le gaoioiga lenei, mafaufau e valaaulia le tamaiti aoga e galulue ta’ito’alua poo ni vaega toaitiiti. Ona valaaulia lea o i latou e faasoa ane a latou tali i le vasega. E mafai foi ona aogā le valaaulia o tagata aoga e faatino lenei vaaiga.

E faapefea ona e ono tali atu pe afai e fesili atu se tasi ia te oe i le fesili lenei:

Aisea e auai atu ai tagata O Le Ekalesia a Iesu Keriso o le Au Paia o Aso e Gata Ai i le lotu i Aso Sa uma?

O se isi auala nai lo le faitauina ai o le faamatalaga lenei, mafaufau e faasoa atu se aafiaga patino e faaatatau i le iloaina o le matafaioi autu o le sauniga o le faamanatuga o se vaega o le auai ai i sauniga lotu.

O le tasi o mafuaaga taua tatou te o ai i le Lotu o le aai ma feinu i le faamanatuga. Sa faasoa mai e Sister Cheryl A. Esplin, o le sa iai muamua i le Au Peresitene Aoao o le Peraimeri, se feso’ota’iga na faia i le va o se alii e 96 tausaga le matua ma lona atalii e faaalia ai le matafaioi tutotonu o le aai ma feinu i le faamanatuga o se vaega o le auai i le Lotu.

10:39

O le tele ina tatou mafaufau loloto i le taua o le faamanatuga, o le faatupulaia foi lena o lona paia ma le anoa ia i tatou. O le mea lenei sa faailoa atu e se tama e 96 tausaga le matua ina ua fesili lona atalii, “Tama, aisea e te alu ai i le lotu? E le mafai ona e vaaia, e le mafai ona e faalogoina, e faigata ona e alofia. Aisea e te alu ai i le lotu?” Sa tali atu le tama, “O le faamanatuga. Ou te alu e ‘ai ma inu i le faamanatuga.”

(Cheryl A. Esplin, “O Le Faamanatuga—o se Toefaafouina o le Agaga,” Ensign po o le Liahona, Nov. 2014, 14)

O le a sou manatu o le a le malamalamaaga ma lagona o lenei alii e uiga i le faamanatuga ua ala ai ona taua tele ia te ia?

Valaaulia tamaiti aoga e mafaufau loloto lē leoa a o faamae’a lenei iloiloga a le tagata lava ia. Mafaufau e tuu ia i latou se taimi e faamaumau ai a latou tali i totonu o a latou api faamaumau su’esu’ega.

Iloilo ou aafiaga i le auai ai i le lotu ma ai ma inu i le sauniga o le faamanatuga. I le faaaogaina ai o se fua faatatau o le tasi i le lima, o le tasi e maualalo ma le lima e maualuga, tali mai i fesili nei.

O le a le tele o le faamuamua mo oe o le auai i le lotu ma ai ma inu i le faamanatuga?
Pe a e ai ma inu i le faamanatuga, faamata e te mafaufau ia Iesu Keriso ma maua ai se aafiaga aogā?

A uma ona e iloiloina ou aafiaga, mafaufau pe aisea na e faatulagaina ai oe lava e pei ona e faia. A o e suesueina lenei lesona, saili le fesoasoani a le Alii ia faamatala lotoina lou malamalama i le taua o le manatua o le Faaola a o e ai ma inu i le faamanatuga.

O Iesu Keriso na faavaeina le faamanatuga

Sa auai Iesu Keriso i le tausamiga o le Paseka a o lei oo i Ona puapuagā i Ketesemane ma le maliu i luga o le satauro. O lenei tulaga sa oo ina lauiloa o le Talisuaga Mulimuli. Ina ua uma ona talisua le Faaola i le Paseka faatasi ma Ona Aposetolo, sa Ia faatuina ai le sauniga o le faamanatuga.

Afai o le a manuia tamaiti aoga mai se malamalama loloto sili i le sauniga o le Paseka ma lona sootaga i le faamanatuga, mafaufau ia fai le gaoioiga i le vaega o “Gaoioiga Faaopoopo e Aoao Ai” i le faaiuga o le lesona lenei.

Faitau le Mataio 26:26–30 ma le Luka 22:19–20, ma vaavaai mo mea na aoao atu e le Faaola i Ona Aposetolo e uiga i le faamoemoega o le faamanatuga. Atonu e te mana’o e vase lalo ifo o upu taua po o fasifuaitau. Atonu foi e te mana’o e matamata le vitio “Always Remember Him” mai le faailotaimi 0:00 i le 0:53. O loo maua lenei vitio i le ChurchofJesusChrist.org.

5:28

O le a le faamoemoega o le Faaola i le faavaeina o le sauniga o le faamanatuga?

O se tasi o upumoni e mafai ona tatou aoao mai i nei fuaitau e faapea Na faavaeina e Iesu Keriso le faamanatuga e fesoasoani ai ia i tatou ia manatua o Ia.E ui lava e lei oo le Faaola i puapuaga ma mafatiaga o Lona taulaga togiola, o le sauniga ma faatusa sa Ia aoaoina ai Ona Aposetolo e fesoasoani ai ia i latou e manatua ai o Ia ma le meaalofa o Lana Togiola.

O a mau po o ni aafiaga patino ua fesoasoani ia te oe e tomanatu ai i le taulaga na faia e le Faaola mo oe?
O a ni ou lagona mo le Faaola pe a e faitauina nei fuaiupu pe mafaufau i nei aafiaga?

Afai e manaomia e tamaiti aoga se fesoasoani e toe manatua ai aafiaga ma lagona, mafaufau e faasoa atu ni aafiaga patino, o upu a Brother Lund i le vaega o “Tala ma Faamatalaga o Talaaga” o lenei lesona, po o isi mau e pei o le Mataupu Faavae ma Feagaiga 19:16–19 po o le Alema 7:11–13 . I se lesona i le lumanai, o le a suesue auiliili ai e tamaiti aoga nei fuaitau o se vaega o le malamalama ai i puapuaga ma aafiaga o le Faaola i le Togalaau o Ketesemane.

E mafai faapefea e faatusa o le faamanatuga ona fesoasoani ia te oe e malamalama atili ai i mea na faia ma mafai ona faia mo oe e le Faaola?

Fausiaina o se otootoga o se lesona

Manatu faapea ua talosagaina oe e aoao atu le mataupu o le faamanatuga i se su’esu’ega o tusitusiga paia o le a faia i lou aiga. O le faaaogaina o mau na e suesueina ma isi mau faasino e te filifilia (e pei o Autu o le Talalelei, “Faamanatuga,” topics.ChurchofJesusChrist.org, po o lauga talulata mai nei o le konafesi aoao), ia saunia e fesoasoani i isi ia malamalama ma lagona le taua o le faamanatuga.

E le gata i lea, o le tusiga “The Bread and the Water” (Ensign, July 2017, 68–69) e mafai foi ona fesoasoani.

Faaali faatonuga nei mo tagata aoga e vaavaai iai a o latou fai le otootoga o a latou lesona.

O lau otootoga o le lesona e tatau ona aofia ai mea nei: (1) tasi pe sili atu mau po o faamatalaga mai taitai o le Ekalesia e uiga i le faamanatuga e suesue ma mafaufau loloto i ai, (2) ia le itiiti ifo ma le lua ni fesili e mafai ona e faia ina ia faalolotoina ai le malamalama, ma (3) se valaaulia e faaaoga ai upumoni ua e talanoaina. Faaaoga nisi po o fesili uma nei e fesoasoani e ta’iala ai oe i le faia ai o lau otootoga.

O le a le faamanatuga?
E mafai faapefea e le faamanatuga ona fesoasoani ia i tatou e malamalama atili ai i le Faaola ma Lona Togiola?
O le a se mea na fesoasoani ia te oe e maua ai ni aafiaga aogā a o e ai ma inu ai i le faamanatuga?
Mata e faapefea ona ese lou olaga pe afai e te manatua soo Iesu Keriso?

Fautua i tamaiti aoga e taumafai e fai nisi mea e manatua ai le Faaola a o latou aai ma feinu i le faamanatuga.

Tala ma Faamatalaga o Talaaga

O le a le fesootaiga i le va o le Paseka ma le faamanatuga?

O le faamatalaga “O Le Talisuaga o le Paseka” (New Era, Ape. 2019, 8–9) e mafai ona fesoasoani e malamalama ai i le sootaga i le va o le Paseka ma le faamanatuga.

Aisea tatou te faaaoga ai le vai mo le faamanatuga nai lo le uaina?

I le Mataupu Faavae ma Feagaiga 27:1–2 ua faapea mai e le afaina po o le a le mea e faaaoga mo le faamanatuga pau lava le mea ia faatino “ma le manatu tasi i le mamalu o [Keriso]” ( fuaiupu e 2). I le taimi nei, ua talosagaina i tatou e taitai o le Ekalesia e faaaoga le vai a o tatou aai ma feinu i le faamanatuga.

O le a se mea e mafai ona ou faia ia atili ai ona anoa le faamanatuga?

Na aoao mai Peresitene Steven J. Lund, le Peresitene Aoao o Alii Talavou:

O taimi uma lava lava e u’u ai e se tiakono se fata o le faamanatuga, e faamanatu mai ai ia i tatou le tala paia o le Talisuaga Mulimuli, o Ketesemane, o Kalevaria, ma le tuugamau i le togalaau. Ina ua fetalai atu le Faaola i Ona Aposetolo, “Tou te faia le mea lenei e fai ma faamanatuga ia te a’u” [Luka 22:19], sa Ia fetalai mai foi i le faagasologa o tausaga ia i tatou ta’ito’atasi. Sa Ia fetalai e uiga i le vavega faifaipea o le a Ia saunia a o tuuina atu e tiakono, aoao, ma ositaulaga i le lumanai Lona faatusa ma valaaulia Ana fanau ia talia Lana meaalofa togiola.

O faatusa uma o le faamanatuga e faasino atu ai i tatou i lena meaalofa. Tatou te mafaufau i le areto lea na Ia tofitofi—ma le falaoa o loo tofitofi e ositaulaga i o tatou luma i le taimi nei. Tatou te mafaufau i le uiga o le vai ua faapaiaina, i lena taimi ma le taimi nei, ao pasi mai ma le paia a’ia’i ia tatalo o le faamanatuga mai gutu o ositaulaga talavou i o tatou loto ma i le lagi, e toefaafouina ai feagaiga ia e fesootaia i tatou i mana o le faaolataga a Keriso. Atonu tatou te mafaufau po o le a le uiga pe a aumaia e se tiakono ni faatusa paia ia i tatou, e tu e pei ona ia faia i le mea semanu e tu ai Iesu pe ana i ai o Ia iina, ma ofo mai Na te siitia a tatou avega ma o tatou tiga.

(Steven J. Lund, “Mauaina o le Olioli ia Keriso,” Ensign po o le Liahona, Nov. 2020, 36)

Na aoao mai e Peresitene Dallin H. Oaks o le Au Peresitene Sili le fautuaga lenei:

I le taimi o le lotu faamanatuga—ae maise lava i le taimi o le sauniga o le faamanatuga—e tatau ona tatou tulimatai atu e tapuai ma ia aloese mai isi gaoioiga uma, ae maise lava mai amioga e faalavelave ai i isi o loo tapuai. E oo lava foi i se tagata e moeiini filemu e le faalavelave lava i isi. O le sauniga o le faamanatuga e le o se taimi lea e faitau ai ni tusi po o mekasini. Le autalavou e, e le o se taimi o ni talanoaga taumusumusu i telefoni feaveai, po o ni feau feaveai i telefoni i tagata o loo i isi nofoaga. Pe a tatou aai ma feinu i le faamanatuga, tatou te osia se feagaiga paia e faapea, o le a tatou manatua pea le Faaola. O se tulaga faanoanoa le vaaia o tagata o loo solia lena feagaiga i le sauniga tonu o loo latou osia ai lea feagaiga.

(Dallin H. Oaks, “Sauniga Faamanatuga ma le Faamanatuga,” Ensign po o le Liahona, Nov. 2008, 18–19)

Gaoioiga Faaopoopo e Aoao Ai

O le tausamiga o le Paseka

Ina ia fesoasoani i tagata aoga ia malamalama i le sootaga o le Paseka ma le faamanatuga, valaaulia tagata aoga e iloilo ata o le tausamiga o le Paseka ma le faamanatuga, pe mafaufau e faaali atu falaoa mafolafola (po o masi) ma se ipuinu i le tasi itu o se laulau ma fata faamanatuga i le isi itu o le laulau. Valaaulia tagata aoga e faasoa mai mea ua latou iloa e uiga i vaega o le tausamiga o le Paseka na vaaia anamua ma lona sootaga i le sauniga o le faamanatuga lea tatou te vaaia i aso nei.