Atamai i Aoaoga Faavae: Faaaliga 20:12

“Ona Faamasinoina Ai Lea o E Na Oti … e Tusa ma a Latou Amio”

I se lesona talu ai, “Faaaliga 20:11–15,” sa e aoao ai e uiga i le Faamasinoga Mulimuli ma le matafaioi a le Faaola o lo tatou Faamasino. O lenei lesona o le a fesoasoani ia te oe e tauloto ai le tusi faasino o le atamai i aoaoga faavae ma le fasifuaitau autu o le mau mo le Faaaliga 20:12, faamatala le aoaoga faavae, ma faaaoga mataupu faavae o le mauaina o le malamalama faaleagaga.

Faalogologo i tali a tagata aoga. Aloese mai le manatunatu e uiga i le isi vaega e sosoo ai o le fuafuaga o le lesona a o fai atu pe tali atu e tagata aoga ni fesili. Faalogo ma le toto’a i mea latou te faasoa mai, ma fai atu fesili tulitatao pe a tatau ai ina ia malamalama moni ai i a latou fesili ma manatu faaalia. O ni isi taimi e sili atu ona taua le talanoaina o se autu o loo naunau i ai le tagata aoga pe fesoasoani ia i latou ia malamalama atili i se aoaoga faavae nai lo o le aoaoina uma o anomea i se fuafuaga o le lesona.

Sauniuniga a le tagata aoga: Valaaulia tagata aoga e toe faamanatu le Faaaliga 20:12 ma ia saunia e faasoa mai i le vasega mea ua latou aoaoina e uiga i le Faamasinoga Mulimuli ma pe mafai faapefea ona tatou saunia i ai.

Gaoioiga E Ono Mafai Ona Aoao Ai

O lenei lesona i le fuaitau o le atamai i aoaoga faavae ua faatulagaina ia aoaoina pe a uma le lesona o le “Faaaliga 20:11–15,” o le lesona faatatau mo le fuaitau o le atamai i aoaoga faavae Faaaliga 20:12 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona e talafeagai ai i le vaiaso foi lena.

Mafaufau e fai atu i ni tagata aoga se toatolu a o lei amataina le vasega e toe faamanatu se tasi o mataupu faavae o le mauaina o le malamalama faaleagaga ma ia saunia e faasoa atu se aotelega o lena mataupu faavae i se taimi mulimuli ane o le lesona.

Tauloto ma faamatala

Fesoasoani i tagata aoga e tauloto ma faamatala le tusi faasino ma le fasifuaitau autu o le mau mo le Faaaliga 20:12 e faaaoga ai metotia e sili ona aoga mo i latou.

Mafaufau e faamanatu i tagata aoga e faapea i le lesona talu ai, sa latou suesueina ai se fuaitau o le atamai i aoaoga faavae e uiga i le Faamasinoga Mulimuli. Valaaulia i latou e vaai pe mafai ona latou maua lenei fuaitau i tusitusiga paia i le itiiti ifo ma le lua minute, e ala i le manatuaga po o le faaaoga o isi punaoa.

O le gaoioiga lenei e mafai ona fesoasoani ia te oe e tauloto ai le tusi faasino ma le fasifuaitau autu o le mau “ona faamasinoina ai lea o e na oti … e tusa ma a latou amio” ( Faaaliga 20:12):

• Faitau leotele faalima le tusi faasino ma le fasifuaitau autu o le mau.

• Ona tusi faatolu lea o le tusi faasino ma le fasifuaitau autu o le mau i luga o se fasipepa mai lou manatuaga. A uma taumafaiga taitasi, siaki lou sa’o lelei ma faia soo se fetuunaiga talafeagai i le isi taumafaiga e sosoo ai.

Mafaufau e fesili atu pe mafai e se tagata o le vasega ona ta’u mai le tusi faasino ma le fasifuaitau autu o le mau mai lona manatuaga, pe valaaulia le vasega e tauloto faatasi mai.

Nai lo o le faaaogaina o le gaoioiga lenei, mafaufau e tusi le mau faasino ma le fasifuaitau autu o le mau i luga o le laupapa ma valaaulia volenitia e tusi faataamilo ai upumoni ua latou aoaoina e uiga i le Faamasinoga Mulimuli. Ona valaaulia lea o ni nai tagata aoga e faamatala atili i le vasega atoa mea sa latou tusia.

Manatua i se lesona talu ai, sa e suesueina ai le upumoni faapea o le a faamasinoina i tatou e le Atua mai tusi na tusia e tusa ai ma a tatou galuega. Ina ia fesoasoani ia te oe e iloilo po o le a le lelei o lou malamalama i lenei upumoni, mafaufau faapea ua fesili atu sou tei laitiiti ia te oe i fesili nei i le taimi o suesuega faaleaiga o tusitusiga paia. Tali le tele o ni fesili e te mafaia.

Afai e talosagaina tagata aoga e tali fesili nei, faaali atu fesili mo i latou, ma mafaufau e valaaulia i latou e talanoaina a latou tali ma se paga. Fealuai solo faataamilo i le potu ma faalogologo i a latou tali. Afai e manaomia e tagata aoga se fesoasoani, faamanatu atu ia i latou anomea sa latou suesueina i le lesona “Faaaliga 20:11–15.”

• O ai o le a faamasinoina?

• O ai o le a avea ma o tatou faamasino ma pe aisea?

• O a mea o le a faamasinoina ai i tatou?

• O a tusi o le a faamasinoina ai i tatou? (Tagai i le Faaaliga 20:12)

• E mafai faapefea ona tatou saunia mo le faamasinoga?

O lea la ua na o ni nai minute talu ona e galue i le taulotoina o le fasifuaitau autu o le mau mo le Faaaliga 20:12 , vaai po o mafai lava ona e taulotoina mai lou manatuaga. Siaki lou sa’o lelei pe a manaomia.

Faataitai le faaaogaina

Afai e toatolu ni tagata aoga na fesiligia a o lei amataina le vasega e saunia se aotelega o se mataupu faavae o le mauaina o le malamalama faaleagaga, valaaulia i latou e faasoa mai a latou aotelega i le vasega i le taimi lenei. Afai e lei muai fesiligia tagata aoga, mafaufau e fesili atu mo ni volenitia se toatolu e taitasi ona aotele mai se tasi o mataupu faavae. Ia mautinoa e faamalo atu ma talisapaia tagata aoga taitasi o e latou te aoteleina se tasi o mataupu faavae.

O le faaaogaina o mataupu faavae o le mauaina o le malamalama faaleagaga e mafai ona fesoasoani ia i tatou i tulaga o le olaga masani. Aotele faapuupuu ia mataupu faavae o le mauaina o le malamalama faaleagaga i au lava upu. Ona toe faamanatu lea o parakalafa 5–12 o le vaega o le “Mauaina le Malamalama Faaleagaga” i le Pepa Autu o le Atamai i Aoaoga Faavae (2022), ma vaavaai mo soo se upumoni faaopoopo e mafai ona e faaaofia i lau aotelega.

Mo le gaoioiga lenei, mafaufau e valaaulia tagata aoga e faasoa mai a latou lava ata faataitai lea e manaomia ai e se tasi ona malamalama atili i upumoni e uiga i le Faamasinoga Mulimuli. Ona mafaufau lea e sui se tasi o ata faataitai po o ata faataitai uma e lua i le lesona i ata faataitai e faasoa mai e tagata aoga.

Faitau i ata faataitai nei, ma filifili se tasi e te manao e taulai i ai mo le gaoioiga lenei. Mafaufau pe aisea e ono faapena ai lagona o se tagata o loo i lena tulaga. E mafai ona e fesootai i lagona o se tasi o nei tamaitai talavou? Mafaufau loloto i mea atonu la te lei malamalama i ai e uiga i le Faamasinoga Mulimuli e mafai ona fesoasoani ai ia i laua.

1. E i ai ni uo a Stephanie o loo ola i se olaga faalelalolagi. Ua ia tautino mai e ui o loo latou solia poloaiga, ae o mea o loo latou faia e foliga e manaia i ni isi taimi. Na te lei maitauina ni taunuuga tetele le lelei mo a latou filifiliga ma o loo mafaufau e auai atu ia i latou.

2. O Kayla o se tamaitai talavou amiotonu e salamo ma le lotomaualalo pe a ia faia ni mea sese, ae o loo ia lagonaina pea le fefe pe a talanoa tagata e uiga i le Faamasinoga Mulimuli. E taumafai o ia e aua nei mafaufau i ai.

E mafai e tagata aoga ona faauma taitoatasi le gaoioiga lenei pe fai faatasi foi ma se paga.

Tusi se tusi ia Stephanie po o Kayla e te talitonu e mafai ona fesoasoani ai ia te ia e aloese ai mai le faanoanoa i le lumanai po o le fefe fua e leai se pogai . I se isi auala, e mafai ona e filifili e tusi atu i se tasi e te iloa e mafai ona faamanuiaina lona olaga e ala i le malamalama lelei atili i le Faamasinoga Mulimuli. Ia faaaofia i lau tusi pe faapefea e mataupu faavae taitasi o le mauaina o le malamalama faaleagaga ona talafeagai i o latou tulaga. Atonu e te manao e mafaufau i mea nei a o e filifili po o le a se mea e tusi.

• E mafai faapefea ona e fesoasoani ia Stephanie po o Kayla e vaai i mea mai se vaaiga e faavavau? E mafai faapefea e lenei mea ona fesoasoani ia te ia?

• O le a se mea ua e aoaoina e uiga i le Tama Faalelagi, Iesu Keriso, ma le ata o le faaolataga e ono mafai ona fesoasoani ia Stephanie po o Kayla? Na faapefea ona e aoaoina nei upumoni?

• O a punaoa faalelagi ua filifilia o le a e fautuaina e liliu atu i ai ina ia mafai ona aoaoina le upumoni e uiga i le Faamasinoga Mulimuli? E mafai faapefea e upumoni o loo aoao mai i le Faaaliga 20:12 ona fesoasoani ia te ia?

• E ono mafai faapefea ona e faamalosiau ia te ia e faatino i le faatuatua i le taimi nei ma i le lumanai?

Tuu atu i tagata aoga le avanoa e faasoa leotele ai i le vasega pe i se vaega toalaiti mea na latou tusi atu ai i le tamaitai talavou i le ata faataitai na latou filifilia. Faalogo ma le toto’a a o latou faasoa mai, ma mafaufau e fai atu fesili tulitatao e pei o fesili nei e fesoasoani e faalolotoina ai lo latou malamalama: “Pe o i ai ni fuaiupu o tusitusiga paia faapitoa po o ni faamatalaga mai taitai o le Ekalesia e ono fesoasoani ia te ia? E faapefea ona latou fesoasoani i ai?” “O le a se mea ua fesoasoani ia te oe e malamalama ma saunia ai mo le Faamasinoga Mulimuli? Mata e te fautuaina Stephanie po o Kayla e fai se mea faapena? Aisea pe aisea e leai ai?”

Afai o le a fesoasoani i tagata aoga e manatua lelei atili ai le fasifuaitau autu o le mau mo le Faaaliga 20:12 , valaaulia i latou e taumafai e tauloto tasi lava mai le manatuaga ae latou te lei tuua le vasega.

Toe faamanatuga o le atamai i aoaoga faavae

I le amataga po o le faaiuga o se lesona o loo loma, faaalu ia le silia ma le tolu i le lima minute e toe faamanatu ai le fuaitau o le atamai i aoaoga faavae Faaaliga 20:12 . O se tasi o auala e faia ai lenei mea o le faaali atu lea o le tusi faasino ma le fasifuaitau autu o le mau, ma sui ni upu se lua pe tolu i ni avanoa. A uma ona faatumu sa’o e le vasega ia avanoa, toe faaali atu le tusi faasino ma le fasifuaitau autu ma ni avanoa eseese. E mafai ona toe fai faatele lenei mea i avanoa eseese i taimi taitasi.