Faaaliga 21–22

“O Lē Manumalo e Maua e Ia Mea Uma”

E mafai ona e vaai faalemafaufau pe faape’i le nonofo faatasi ma le Atua i le malo selesitila? I vaaiga faaiu o lana faaaliga maoae, na vaai ai Ioane i “le lagi fou ma le lalolagi fou” ma se aai paia na alu ifo mai le lagi (tagai i le Faaaliga 21:1–2). Sa ia molimau e faapea o le Atua “o le a mau foi” ma tagata o lenei aai, “e fai foi i latou mona nuu” (Faaaliga 21:3). O lenei lesona ua faamoemoe e fesoasoani ia te oe e malamalama ai o le avanoa e mau faatasi ai ma le Tama Faalelagi ma Iesu Keriso i le malo selesitila e aoga ai au taumafaiga uma.

Fesoasoani i tagata aoga ia iloa le mana, alofa mutimutivale, ma le tosinaga a le Alii. Fesoasoani i tagata aoga ia iloa le aao o le Alii i le faamanuiaina o tagata i tusitusiga paia. A o latou vaai i lenei mea, o le a sili atu ona latou lagonaina le alofa, mana, ma le alofa mutimutivale o le Alii i o latou tulaga patino.

Sauniuniga a le tagata aoga: Valaaulia tagata aoga e mafaufau loloto pe faape’i le malo selesitila ma pe aisea o le a latou mananao ai e fai mo latou tofi.

Gaoioiga E Ono Mafai Ona Aoao Ai

O le taunuuga mulimuli

Vaai faalemafaufau e faapea, o oe o se tasi o se au taaalo ma ua e muai iloaina o le a manumalo lau ’au i le suega siamupini i le faaiuga o le taamilosaga. Peitai, e te le iloa po o le a le umi o le a i ai le taamilosaga, ma e faamoemoe le faiaoga i tagata taaalo uma e tuuina atu a latou taumafaiga sili ina ia tumau ai pea i le au.

• E mafai faapefea e lenei malamalama ona faatosinaina le ala e te saunia ai ma taalo i taaloga taitasi? Aisea?

• E faapefea ona e tali atu pe afai e faia’ina ni nai taaloga sosoo a lau ’au? E ono mafai faapefea ona e faamalosiau i tagata o lau ’au pe a mavae nei faiaina?

Ia faaalu se taimi e mafaufau ai e uiga i aso e gata ai ma le Afio Mai Faalua.

Tuu atu i tagata o le vasega se taimi e mafaufau loloto ai i fesili nei. Mulimuli i uunaiga a le Agaga e iloa ai pe aoga le talanoaina leotele o fesili.

• O le a le tele o lou mautinoa o le a iu lava ina manumalo le amiotonu i le amioleaga? O le a se mea e mafai ona fesoasoani ia te oe e faateleina ai lou mautinoa?

• Pe e te lagona o le mulimuli i le Faaola e aoga ai au taumafaiga sili e le aunoa? Aisea e moni ai pe aisea foi e sese ai lea manatu?

O le taunuuga mulimuli o le taua i le va o le lelei ma le leaga ua uma ona faaalia mai e le Atua e ala mai i Ana perofeta: o le itu a le Alii o le a manumalo. I le taimi o le Meleniuma, o le a saisaitia Satani ma o le a pule Iesu Keriso i le lalolagi i le filemu mo le afe tausaga (tagai i le Faaaliga 20:1–4). A mavae lenei afe tausaga, o le a “lafoina Satani i le lepa afi ma le teio” e faavavau, ma o le a faia loa le Faamasinoga Mulimuli (tagai i le Faaaliga 20:7–15). A maea le Faamasinoga Mulimuli, o e amiotonu ma faamaoni o le a mautofi i le ola faavavau i le malo selesitila.

A o e suesueina le Faaaliga 21–22, saili le fesoasoani a le Tama Faalelagi e faateleina ai lou manao e tuu atu au taumafaiga silisili i le taumafai ai mo le ola faavavau ma le mamalu selesitila.

O le amataga ma le gataaga

O se tasi o mea taua na vaaia e Ioane i lana faaaliga o le manumalo lea o Iesu Keriso ia Satani i le iuga o le lalolagi. I le Faaaliga 21–22, na faamatala ai e Ioane le taunuuga o i latou o e sa tau faatasi ma le Faaola e faatoilalo le amioleaga.

Faitau le Faaaliga 21:1–7 , ma vaavaai mo faamanuiaga o le a tuuina mai e le Atua i e faamaoni. Atonu e te manao e faailoga faamanuiaga na e anoa ia te oe.

Afai e te manao e aoao atili e uiga i le Ierusalema Fou o loo ta’ua i le fuaiupu 2 , mafaufau e sue i le Taiala i Tusitusiga Paia .

Ia maitau, i le fuaiupu 2 , o le tane o se faatusa o le Faaola, ma o le tamaitai faaipoipo o se faatusa o le Ekalesia, po o i latou o e mulimuli faamaoni ia te Ia.

I le fuaiupu 7 , o se atalii po o se afafine o Keriso o se tasi na tausia a latou feagaiga ma Ia.

Mafaufau e faaali atu fesili nei i luga o le laupapa. Valaaulia ni tagata aoga o naunau e faasoa mai a latou malamalamaaga i le vasega.

• O a faamanuiaga o le a tuuina mai e le Atua i e faamaoni e sili ona anoa ia te oe? Aisea?

• O le a se mea na e aoaoina e uiga i le Tama Faalelagi ma Iesu Keriso mai nei fuaiupu? Aisea e taua ai mo oe ona e malamalama i nei mea e uiga ia i Laua?

A o tali mai tagata aoga, mafaufau e fai atu fesili e pei o nei: O a ni auala o le a mafai e le Faaola ona “faia ia fou mea uma lava”? ( Faaaliga 21:5). E faapefea ona avea o Ia ma “amataga ma le gataaga”? ( Faaaliga 21:6). O le a le uiga o le, e ala ia Iesu Keriso, e mafai ai ona tatou manumalo ma “maua mea uma”? ( Faaaliga 21:7).

Mautofi i le malo selesitila

Valaaulia tagata aoga e faasoa mai upumoni e uiga i le malo selesitila latou te maua i le Faaaliga 21:1–7 . E mafai e tagata aoga ona faailoa mai ni nai mataupu faavae. Mafaufau e tusi upumoni latou te faasoa mai i luga o le laupapa. Ia lagona le saoloto e faaalu se taimi e talanoaina ai se tasi pe sili atu foi o nei upumoni.

O ni isi o upumoni e tele o loo aoao mai i nei fuaiupu e aofia ai mea nei: I le malo selesitila, o le a afio ai le Atua ma faamafanafana i Lona nuu, ma o le a latou le toe oo i le oti, faanoanoa, po o le tiga; ma o i latou o e manumalo ma le faamaoni i tofotofoga o le olaga faaletino o le a mautofi i faamanuiaga e faavavau i le malo selesitila.

Mafaufau e faaali atu punaoa ma fesili nei po o le tuuina atu o se pepa e tufa atu. A o suesue e tagata aoga ia punaoa ma tali i fesili, ia magafagafa mo i latou o e atonu e manaomia se fesoasoani faaopoopo po o se taitaiga.

Vaai faalemafaufau e faapea, o se tasi o au uo e le manatu o le tauivi ai mo le malo selesitila e talafetaui ma mea uma e manaomia ai.

Saunia se tali puupuu e mafai ona e faasoa atu i lau uo e mafai ona fesoasoani ia i latou e malamalama ai o le malo selesitila e matua talafetaui mo soo se taumafaiga e manaomia e ola ai i le talalelei. Atonu e te manao e faaaoga ni isi o punaoa nei ma tali fesili nei e fesoasoani ia te oe e saunia ai lau tali:

Na aoao mai Elder L. Tom Perry (1922–2015) o le Korama a Aposetolo e Toasefululua:

Ou te talitonu a mafai ona tatou fatufatuina i o tatou mafaufau se ata manino moni o le ola faavavau, o le a amata ona suia a tatou amio. O le a le manaomia ona tauanauina i tatou e faia le tele o mea e manaomia i le tumau ai e oo i le iuga, e pei o le [auaunaga], auai i a tatou sauniga, o i le malumalu, ola i ni olaga mama, faia o a tatou tatalo, po o le faitauina o tusitusiga paia. O le a tatou mananao e faia nei mea uma ma sili atu ona ua tatou iloa o le a latou saunia i tatou e o i se nofoaga tatou te faananau e o i ai.

(L. Tom Perry, “O Le Talalelei a Iesu Keriso,” Ensign po o le Liahona, Me 2008, 44)

Faaaliga 7:13–17

Faaaliga 21:22–27

Mosaea 2:41

Mataupu Faavae ma Feagaiga 76:51–52, 59–60, 69–70

Mataupu Faavae ma Feagaiga 130:2

O ni isi o fesili nei e mafai ona fesoasoani e taiala ai ou manatu a o e mafaufau i lau tali:

• O le a se mea e faaosofia ai lou fiafia pe a e mafaufau e uiga i le ola ai i le malo selesitila?

• O le a se mea ua e aoaoina e uiga i le Faaola e faaosofia ai oe e mulimuli ia te Ia ma taumafai ia maua le malo selesitila?

• O a ni aafiaga na e maua faatasi ma le Tama Faalelagi ma Iesu Keriso ua faateleina ai lou manao e toe mau faatasi ma i Laua?

• Na faapefea ona fesoasoani lo La alofa ia te oe e te lagona ai e mafai ona ausia le malo selesitila?

Tuu atu i tagata aoga e faasoa mai i se vaega toalaiti pe faatasi ma le vasega mea na latou tusia. Atonu e aoga le fai atu o fesili tulitatao e pei o le “Aisea e taua ai lena faamanuiaga ia te oe?” “Aisea e te manatu o lena mea o le a uunaia ai lau uo e taumafai malosi mo le malo selesitila?” ma le “O le a se mea na e faalogo i ai mai se tasi o lau vasega e taua ia te oe?”

Tomanatu mo ni nai minute i le alofa o le Tama Faalelagi ma Iesu Keriso ma lo La’ua naunau mo oe ia maua le ola faavavau. Mafaufau pe mafai faapefea ona e faaalia lou lotofaafetai mo lo La’ua alofa mutimutivale ma le alofa tunoa.

A lava le taimi, valaaulia tagata aoga e faasoa mai o latou manatu. Mafaufau e faasoa atu se molimau patino i upumoni na aoaoina i lenei lesona.

Tala Auiliili ma Faamatalaga o Talaaga

Gaoioiga Faaopoopo e Aoao Ai

O le a faape’i totonu o le aai o le Atua?

Mafaufau e valaaulia tagata aoga e faitau le Faaaliga 21:10–11, 23–27 . A uma ona faitau faamatalaga o le aai ma tagata o le a i ai iina, talanoa i fesili e pei o le “O le a se mea e sili ona tulagaese ia te oe i nei fuaiupu?” po o le “O le a sou manatu o le a faape’i le nofo ai i lena aai?”

“Le Alii e Iesu, ia e afio mai” ( Faaaliga 22:20)

Mafaufau e valaaulia tagata aoga e faitau le Faaaliga 22:12–14 , ma mafaufau pe mafai faapefea ona faatatau nei upu ia i latou.

I le tali atu i le tautinoga mulimuli a le Faaola “E moni, ou te vave alu atu,” sa tali atu ai Ioane ma le valaaulia lenei: “O lea lava, le Alii e Iesu, ia e afio mai” ( Faaaliga 22:20). Sa aioi atu Ioane i le Alii ia vave toe afio mai i le lalolagi. Valaaulia tagata aoga e mafaufau pe aisea atonu latou te mananao ai i le Faaola e “vave alu atu.”

O se isi faiga e amataina ai le lesona

Mafaufau e faaali le vitio o le savali a Peresitene Dieter F. Uchtdorf “O Lau Iuga Fiafia” (20:47), o loo maua i le ChurchofJesusChrist.org, mai le faailo taimi 2:27 i le 3:40. A uma le vitio, valaaulia tagata aoga e talanoa i mea e manaomia mai ia i latou e maua ai le meaalofa silisili a le Tama Faalelagi.