Kalatia 1

“E Lei Maua Lea E Au Mai se Tagata … ae e ala i le Faaaliga a Iesu Keriso”

O se fafine o loo mafatia i le popole ma le atuatuvale

Pe na i ai se taimi na fenumiai ai ou lagona e ala i manatu ma filosofia eseese uma i le lalolagi? Sa oo foi le Au Paia i Kalatia i ni luitau e talitutusa a o tuuina atu ia i latou aoaoga na taitaieseina ai i latou mai le talalelei moni a Keriso. O lenei lesona e mafai ona fesoasoani ia te oe e aoao ai pe faapefea ona aloese mai le taufaasese ma le fenumiai e ala i le anaana i afioga a Iesu Keriso na tuuina mai i perofeta anamua ma aso nei.

Faavaeina o le talafeagai. O le amataina ai o se lesona i se fesili, tulaga, po o se faafitauli talafeagai e mafai ona taitai atu ai tagata aoga e sailiili i mau mo mataupu faavae ma aoaoga faaave o le talalelei o le a avatu ai ia i latou le taiala ma le taitaiga.

Sauniuniga a le tagata aoga: Valaaulia tagata aoga e o mai saunia e tuuina mai ni faataitaiga o manatu po o aoaoga e faaaoga e Satani e taumafai ai e faasese i latou pe taitai ese ai i latou mai le talalelei moni a Iesu Keriso.

Gaoioiga E Ono Mafai Ona Aoao Ai

Fetaiaiga ma manatu sese

Faaali atu vaaiga faataitai nei pe valaaulia tagata aoga e o mai ma a latou lava faataitaiga o tulaga e ono faaseseina ai tagata i manatu faalelalolagi. Valaaulia tagata aoga e talanoaina tulaga ma fesili e faatatau i ai i ni paga po o ni vaega toalaiti a o lei talanoaina o se vasega.

Mafaufau pe faapefea ona e tali atu i tulaga nei:

a. Ua e vaai i se vitio lauiloa po o se faamatalaga ua faasoa mai e le toatele o au uo i luga o faasalalauga faaagafesootai. O loo i ai manatu e tetee ai i mea sa aoaoina ai oe i le aiga ma i le Ekalesia.

e. I le aoga, o nisi o uo e auai i Le Ekalesia a Iesu Keriso o le Au Paia o Aso e Gata Ai o loo tuuina atu ni manatu e feteenai ma aoaoga a le Ekalesia.

E faafia ona e fetaiai ma tulaga faapenei?
O le a se mea e te lagona e tatau ona e faia i tulaga faapenei? Aisea?

Sa fetaiai foi le Au Paia i Kalatia ma aoaoga mai ia i latou o e na saili e “faasese ese le talalelei a Keriso” ( Kalatia 1:7). Mo se faataitaiga, o nisi Kerisiano Iutaia sa faaleaga i aoaoga o le talalelei ma faatupulaia masalosaloga e uiga i le aoaoga a Paulo e faapea o le faaolataga e na o Iesu Keriso lava e auala mai ai.

Ua lapataia e Paulo le Au Paia i Kalatia e faasaga i manatu sese

Na tusia e Paulo se tusi e tetee atu ai i aoaoga sese o loo salalau atu i le Au Paia i Kalatia.

Faitau le Kalatia 1:6–9 . Vaavaai mo mea na tau atu e Paulo e uiga ia i latou o e talai atu se “talalelei” e feteenai ma mea sa ia folafola atu o se Aposetolo a Iesu Keriso.

O le a se mea na e maua e taua i nei fuaiupu? Aisea?

Sa lapataia e Paulo le Au Paia i Kalatia e teena “se isi lava talalelei” ( Kalatia 1:9) e ese mai le talalelei a Iesu Keriso.

Valaaulia tagata aoga e mafaufau loloto i a latou sauniuniga mo le vasega a o latou tali atu i fesili nei.

O a nisi o faataitaiga o manatu sese i o tatou aso e mafai ona taitai ese ai tagata mai le talalelei moni a Iesu Keriso?
O a mataupu faavae moni ua le malamalama ai pe ua aveseseina e le lalolagi?
O a nisi o taunuuga e ono i ai o le faalogo pe mulimuli i isi manatu po o aoaoga nei? O anafea na e vaaia ai nisi o nei taunuuga?

Afai e mafai, matamata le vitio “Punaoa Tofia Faalelagi” mai le faailo taimi 3:14 i le 4:43 e vaai ai i nisi o faataitaiga o taunuuga. E mafai ona maua lenei vitio i le ChurchofJesusChrist.org.

Divinely Appointed Sources
There is a lot we have to filter through to get to the truth, but Heavenly Father has given us divinely appointed sources to help us improve our understanding.

E mafai ona tatou liliu atu i perofeta ma aposetolo mo le upumoni

I lana tusi, sa faamanatu atu ai e Paulo i le Au Paia i Kalatia ia upumoni autu o le talalelei ma le puna o lana pule ma aoaoga.

Faitau le Kalatia 1:1–5, 10–12, ma vaavaai mo mea na faasoa mai e Paulo e mafai ona fesoasoani i le Au Paia e alofia ai le faaseseina i aoaoga sese.

O a upumoni o le talalelei na faamanatu atu e Paulo i tagata Kalatia?

O le a sou manatu e mafai faapefea e le taulai atu i upumoni e uiga i le Tama Faalelagi ma Iesu Keriso i fuaiupu 3–5 ona fesoasoani ia i tatou e aloese ai mai le faaseseina?
O le a le mea na aoao atu e Paulo i tagata Kalatia i fuaiupu 1, 11–12 e uiga i le mafuaaga e tatau ai ona latou talitonu i mea sa ia aoao atu?

Sa faamanatu atu e Paulo i Kalatia o ia o se Aposetolo, ua valaauina “e le … mai le tagata, a o Iesu Keriso” ( Kalatia 1:1), ma sa ia maua le talalelei “e ala i le faaaliga a Iesu Keriso” ( Kalatia 1:12). O le tasi o upumoni e mafai ona tatou aoao mai i upu a Paulo o le e faaali mai e Iesu Keriso aoaoga faavae moni i Ana perofeta ma aposetolo.

Na aoao mai e Elder Neil L. Andersen o le Korama a Aposetolo e Toasefululua e uiga i le taua o upu a perofeta anamua ma ona po nei:

O le āi uamea o le afioga a le Atua. Ou te fiafia e mafaufau i ai i le itu lenei: O le afioga a le Atua o loo i ai ni elemene malolosi lava e tolu lea e felavasai ma lagolagoina e le tasi le isi e fausia ai se āi uamea e le maluelue. O nei elemene e tolu e aofia ai, muamua, o tusitusiga paia, po o upu a perofeta anamua. …

O le elemene lona lua o le afioga a le Atua o le faaaliga patino ma musumusuga lea e oo mai ia i tatou e ala i le Agaga Paia. …

… O le elemene lona tolu, o se faaopoopoga taua e fesootai ma le isi lua[,] … e fai ma sui o upu a perofeta soifua.

(Neil L. Andersen, “Hold Fast to the Words of the Prophets” [Brigham Young University devotional, Mat. 4, 2007], speeches.byu.edu)

O a ni mea ua aoao mai e le Atua ia i tatou e uiga ia te Ia mai Lona finagalo e tuuina mai ia i tatou nei punaoa?
E mafai faapefea e le anaana i afioga a Keriso mai perofeta anamua ma aso nei ona fesoasoani ia te oe e alo ese ai mai le faaseseina?
E mafai faapefea ona fesoasoani faaaliga patino ia te oe e aloese ai mai le faaseseina?

Afai e mafai, matamata le vitio “Punaoa Tofia Faalelagi” mai le faailo taimi 4:44 i le 9:11 e vaai ai pe faapefea e upu a perofeta anamua ma aso nei, faapea foi ma faaaliga patino, ona fesoasoani i le tele o talavou e saili le upumoni ma aloese mai le taufaasese.

O le a se mea na tulaga ese ia te oe e uiga i le ala na fesoasoani ai le Alii i nei tagata e tali atu i o latou tulaga faigata?
A o e matamata ai i le vitio, o a ni mafaufauga po o ni lagona na oo mai ia te oe e fesootai i ou lava tulaga o le soifuaga?

Afai e i ai se taimi, mafaufau e faaaoga le gaoioiga o “Punaoa tofia faalelagi” i le vaega o “Gaoioiga Faaopoopo e Aoao ai”.

O lou tulaga patino

Mafaufau i mea ua e aoaoina ma lagonaina i lenei aso. Saili le fesoasoani a le Tama Faalelagi e ala i le Agaga Paia ma faailoa mai ni auala atonu e mafai ona e vaivai ai i le taimi nei i faaseseega. O a aoaoga sese po o manatu faalelalolagi e ono lepetia ai lau molimau ia Iesu Keriso? Pe o e faitau, matamata, pe faalogo i soo se mea e ono faaseseina ai oe?

O le a se mea na e aoaoina mai lenei lesona e sili ona aoga ia te oe? Aisea?
O a suiga e te manao e fai i lou olaga o le a puipuia ai oe mai le faaseseina?
E mafai faapefea ona e anaana atoatoa i afioga a Iesu Keriso mai perofeta anamua ma ona po nei? O le a se eseesega o le a i ai mo oe pe a e faia?

Tuu atu i tagata aoga ia lava le taimi e manatunatu ai ma tusitusi. Valaaulia tagata aoga naunautai e faasoa atu. Uunaia i latou e saili faaaliga patino lava ia a le tagata i mea e mafai ona latou faia e aloese patino ai mai le taufaasese.

Manatu ma Talaaga o Faamatalaga

Pe na aoao mai e Paulo e le tatau ona tatou faalogo i feau mai agelu faalelagi?

O aoaoga a Paulo i le Kalatia 1:8–10 o nisi taimi e faaaoga sese ai e finau ai e faasaga i faaaliga a agelu ma le folafolaina atu o se talalelei toefuataiina. Peitai, e lei aoao atu e Paulo faapea o agelu uma e tatau ona teena, aua ua faaali mai i tusitusiga paia o le a oo mai agelu i aso e gata ai e toe folafola le talalelei (tagai i le Faaaliga 14:6). Ae, na aoao atu Paulo e faapea afai e sau se tasi— e oo lava i se agelu— e taitai ese tagata mai le talalelei moni, ona tatau lea ona teena i latou (tagai foi i le Alema 30:53).

Aisea e tatau ai ona ou faaaogaina punaoa faalelagi i la’u sailiga mo le upumoni?

Matamata le vitio “Discovering Truth” (4:48), e maua i le ChurchofJesusChrist.org. I lenei vitio, o loo faaaoga ai e Peresitene Dieter F. Uchtdorf, a o i ai i le Au Peresitene Sili, se talafaatusa e faamalamalama ai le taua o le sailia o le upumoni mai punaoa faalelagi nai lo le faalagolago i le poto o tagata.

Iloaina o le Upumoni
E fiafia le Tama Faalelagi ia i tatou pe a tatou saili ia iloa le upumoni. E fiafia o Ia e aoao i tatou i lea fasifuaitau i lea fasifuaitau, o lea mataupu i lea mataupu.

E faapefea ona faaaoga lapataiga a Paulo i aso nei?

Na lapatai mai Peresitene Dallin H. Oaks o le Au Peresitene Sili:

Upumoni ma le Fuafuaga
Ua aoao mai Peresitene Oaks faapea e tatau ona tatou sili le upumoni mai punavai faamaoni ma faasoa atu nisi o upumoni faavae lea e faamatalaina le mafuaaga ua ola ai le Au Paia o Aso e Gata Ai faapei ona latou ola ai.

O loo tatou ola i se taimi o le matua faateleina ai o faamatalaga faasalalau ma le faalauaitele. Ae e le o faamatalaga uma nei e moni. E tatau ona tatou faaeteete a o tatou saili i le upumoni ma le filifilia ai o punavai mo lena sailiga. E le tatau ona tatou aloaia le ta’uta’ua po o le pule faalelalolagi o ni punavai agavaa o upumoni. E tatau ona tatou faaeteete e tusa ai ma le faalagolago i faamatalaga po o fautuaga e ofoina mai e tagata faafiafia lauiloa, tagata afeleti ta’uta’ua, po o punavai e le mailoa i le initoneti. O le tomai faapitoa i le tasi matata e le tatau ona avea o se tomai faapitoa i le upumoni i isi mataupu.

(Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25)

O Gaoioiga Faaopoopo e Aoao Ai

Kalatia 3:28 . Avea ia “Tasi ia Keriso Iesu”

Atonu e sili atu ona talafeagai mo nisi vasega le taulai atu i le Kalatia 3:28 ma le upumoni faapea ua tasi i tatou uma ia Keriso, e tusa lava po o a o tatou talaaga ma tupuaga. Afai o lea, valaaulia tagata aoga e mafaufau i ni auala e tuu eseese ai e tagata i latou lava i ni vaega. O faataitaiga e mafai ona aofia ai ituaiga, tapuaiga, itupa, po o le ituaiga faaleitupa. Faamatala atu sa vaevaeina e le Au Paia i Kalatia i latou lava pe o i latou o Iutaia po o Nuuese.

Valaaulia tagata aoga e suesue le Kalatia 3:26–29 e vaai po o a mea na aoao mai e Paulo e uiga i le avea ai ma tasi ia Keriso. Valaaulia i latou e faasoa mai mea na latou aoaoina e mafai ona fesoasoani i tagata o le Ekalesia i aso nei ia faateleina lo latou lotogatasi. Valaaulia i latou e faitau le Ioane 17:20–23 ma tali fesili e pei o le “O le a le mea na faia e le Faaola ma o loo faaauau pea ona Ia faia e tuufaatasia ai i tatou ia tasi? O le a se mea o aoao mai ia i tatou e uiga ia te Ia ma Lona finagalo ia tasi i tatou o le tasi ma le isi, ma Ia lava, ma le Tama? E mafai faapefea ona tatou lotogatasi atili ma isi atoa ma le Atua?”

Punaoa paia filifilia

A uma ona faailoa mai e le tagata aoga le upumoni i le Kalatia 1:11–12 ma talanoaina nisi o “isi talalelei” e ono faaseseina ai pe taitai ese ai i latou mai le talalelei moni a Iesu Keriso, valaaulia i latou e saili punaoa tofia faalelagi mo upumoni e faafetaiaia ai feau taufaasese i le lalolagi. Mo se faataitaiga, e mafai ona faailoa mai e tagata aoga e faapea, e mafai e le lalolagi ona faauigaina le faaipoipoga i isi auala e ese mai le ala ua faatulagaina e le Alii (e pei o le va o se tane ma se fafine). E mafai ona valaaulia i latou e saili le “O Le Aiga: O Se Folafolaga i le Lalolagi e maua ai upumoni e aloese ai mai le faaseseina e nei manatu.