Kalatia

Vaaiga Aoao

I le tusi a Paulo i le Au Paia i Kalatia, sa tau atu e Paulo ona popolega loloto ona ua se ese le toatele mai le Alii e ala i le mulimuli atu i aoaoga a nisi o e sa saili e “faasese le talalelei” (tagai i le Kalatia 1:6–7). Sa ia faamamafa mai le taua o le faalogo i afioga a Iesu Keriso na tuuina mai e ala i Ana Aposetolo, o le savavali i la le Agaga e faatoilalo tuinanau o le tino, ma le tulafono o le seleselega.

Sauni e Aoao Atu

O nei faamatalaga e tuuina atu ai i faiaoga ni manatu e uiga i ni mea e ao ona saunia mamao i ai mo lesona taitasi.

Kalatia 1

Faamoemoega o le lesona: O lenei lesona e mafai ona fesoasoani i tagata aoga e aoao ai pe faapefea ona aloese mai le taufaasese ma le fenumiai e ala i le faalogo i afioga a Iesu Keriso na tuuina mai i perofeta anamua ma aso nei.

• Sauniuniga a le tagata aoga: Valaaulia tagata aoga e o mai saunia e tuuina mai ni faataitaiga o manatu po o aoaoga e faaaoga e Satani e taumafai ai e faasese i latou pe taitai ese ai i latou mai le talalelei moni a Iesu Keriso.

• Vitio: “Punavai ua Tofia Faalelagi” (9:16; maimoa mai le faailotaimi 3:14- i le 4:42 ma le 4:43 i le 9:11)

• Fautuaga faafaiaoga mo fesootaiga i vitio: Mafaufau e fatu se palota e le faalauiloaina i luga o upega tafailagi e valaaulia ai tagata aoga e faasoa mai ni tulaga na latou oo i ai pe ono tosina ai i latou i tagata po o manatu e mafai ona toso ese ai i latou mai le moni o le talalelei a Iesu Keriso. Faaaoga tali a tagata aoga i le palota e sui i ata faataitai i le amataga o le lesona.

Kalatia 5

Faamoemoega o le lesona: O lenei lesona ua faamoemoe e fesoasoani i tagata aoga ia avea atili e faapei o Iesu Keriso e ala i le tuuina atu o le avanoa e faailoa ai auala e atili mafai ai atoatoa ona latou “savavali i la le Agaga” ( Kalatia 5:16).

• Sauniuniga a le tagata aoga: Valaaulia tagata aoga e suesue le Mosaea 3:19 ma faailoa mai aoaoga e mafai ona fesoasoani ia i latou e maua ai le fesoasoani a le Faaola e faatoilalo ai lo tatou natura agasala, po o le “tagata faalelalolagi.” E mafai foi ona aoga le valaaulia o tagata aoga e tauloto lenei fuaitau o le mau mo le atamai i aoaoga faavae.

• Ata: Faaali atu le ata o tagata i se tauvaga tosoga maea.

Kalatia 6

Faamoemoega o le lesona: O lenei lesona e mafai ona fesoasoani i tagata aoga ia iloa faatinoga e manaomia ona latou faia e ausia ai a latou sini mo le faavavau.

• Sauniuniga a le tagata aoga: Valaaulia le vasega e faitau le Kalatia 6:7–9 ma o mai saunia e faasoa mai o latou lagona i aoaoga o i nei fuaiupu e ono aafia ai a latou faaiuga i aso taitasi.

• Vitio: “Filifili ma le Atamai” (15:18; matamata mai le faailotaimi 3:03 seia oo i le 4:52)

• Fautuaga faafaiaoga mo fesootaiga i vitio: Mafaufau e valaaulia se taitai o le Ekalesia i le lotoifale (e pei o se epikopo, se peresitene o le paranesi, peresitene o le Aualofa, po o le peresitene o Tamaitai Talavou) e sau ma lauga mo ni nai minute i le amataga o le vasega e uiga i le taua o le polokalama a Tamaiti ma le Autalavou atoa ma le faatutuina ma le saili atu i le ausiaina o sini. Manatua e talanoa ma la outou taitai faamaopoopo o Seminare ma Inisitituti o Mataupu Faalelotu i le lotoifale po o a faatagaga o le a manaomia.

Efeso 1

Faamoemoega o le lesona: O lenei lesona ua faamoemoe e fesoasoani i tagata aoga ia iloa faamanuiaga o loo maua ona sa toefuataina mai e Iesu Keriso Lana talalelei i le lalolagi i aso e gata ai.

• Sauniuniga a le tagata aoga: Valaaulia tagata aoga e lisi ni auala latou te lagona ai le aafia o o latou olaga i le Toefuataiga o le talalelei a Iesu Keriso. Fai atu ia i latou e aumai lenei lisi i le vasega.

• Ata: Faaali pe tusi se ata o vaitafe o tafe atu i totonu o se vai tele.

• Anomea mo tagata aoga: Saunia kopi o le “ O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi ” (ChurchofJesusChrist.org) mo tagata aoga o e e le mafai ona mauaina mai se masini faatekinolosi.

• Vitio: “Peresitene Nelson—O Le A le Uiga o le Toefuataiga mo Oe?” (1:06)

• Fautuaga faafaiaoga mo fesootaiga i vitio: Valaaulia tagata aoga e feauauai e faasoa mai ni malamalamaga anoa na latou maua a o latou suesueina le folafolaga o le Toefuataiga. E mafai ona faia lenei mea i potu e taapeape i ai le vasega pe fai faatasi o se vasega.

Atamai i Aoaoga Faavae: Efeso 1:10

Faamoemoega o le lesona: O le lesona lenei e maua ai le avanoa e faateleina ai le tomai o tagata aoga i aoaoga i le Efeso 1:10 e ala lea i le taulotoina o mau faasino ma fasifuaitau autu o tusitusiga paia, o le faamatalaina o le aoaoga faavae, ma le faaaogaina o mataupu faavae o le mauaina o le malamalama faaleagaga i tulaga masani o le olaga.

• Sauniuniga a le tagata aoga: Valaaulia tagata aoga e o mai saunia i le vasega e faasoa mai ia le itiiti ifo ma le lua ni upumoni latou te lagona e manaomia e tagata uma ona iloa ma malamalama i ai e uiga i le Toefuataiga.

• Fautuaga faafaiaoga mo fesootaiga i vitio: Mafaufau e valaaulia le vasega e mafaufau i isi tulaga faataitai e ono talanoaina e aoaoga mai le Efeso 1:10 . Ona mafai lea ona valaaulia tagata aoga e faasoa mai pe mafai faapefea ona latou faaaogaina le aoaoga faavae o loo aoao mai i le Efeso 1:10 ma mataupu faavae o le mauaina o le malamalama faaleagaga e fesoasoani e talanoaina ai ia tulaga faataitai.