Atamai i Aoaoga Faavae: Efeso 1:10

O Le Toefuataiga o Mea Uma

I lau suesuega o le Efeso 1, sa e aoao ai e uiga i le aoaoga faavae o le Toefuataiga. O le lesona lenei e maua ai le avanoa e faateleina ai lou atamai i aoaoga i le Efeso 1:10 e ala lea i le taulotoina o mau faasino ma fasifuaitau autu o le mau, o le faamatalaina o le aoaoga faavae, ma le faaaogaina o mataupu faavae o le mauaina o le malamalama faaleagaga i tulaga masani o le olaga.

O le manatuaina o le faamoemoega o le atamai i aoaoga faavae. Sa faamalamalama mai e Peresitene M. Russell Ballard o le Korama a Aposetolo e Toasefululua e faapea o le atamai i aoaoga faavae “o le a taulai atu i le fausiaina ma le faamalosia o le faatuatua o a tatou tagata aoga ia Iesu Keriso ma tapueina i latou i le gafatia faateleina e ola ai ma faaaoga le talalelei i o latou olaga. I le faaaogaina o tusitusiga paia ma upu a perofeta, o le a latou aoao pe faapefea ona faatino ma le faatuatua ia Keriso e maua ai le malamalama faaleagaga ma le malamalamaga e uiga i Lana talalelei. Ma o le a latou maua avanoa e aoao ai pe faapefea ona faaaoga le mataupu a Keriso ma mataupu faavae o le talalelei i fesili ma luitau latou te faalogo ma vaai i ai i aso uma i a latou tupulaga ma i luga o ala o faasalalauga faaagafesootai” (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [Saunoaga i Faiaoga Faalelotu a le OAE, Fep. 26, 2016], broadcasts.ChurchofJesusChrist.org).

Sauniuniga a le tagata aoga: Valaaulia tagata aoga e o mai saunia i le vasega e faasoa mai ia le itiiti ifo ma le lua ni upumoni latou te lagona e manaomia e tagata uma ona iloa ma malamalama i ai e uiga i le Toefuataiga.

Gaoioiga E Ono Mafai Ona Aoao Mai Ai

O lenei lesona i fuaitau o le atamai i aoaoga faavae ua faatulagaina ia aoaoina pe a uma le lesona o le “Efeso 1,” o le lesona faatatau mo le fuaitau o le atamai i aoaoga faavae Efeso 1:10 . Afai e manaomia ona aoaoina lenei lesona o le fuaitau o le atamai i aoaoga faavae i se isi vaiaso, ia mautinoa e aoao foi le lesona faatatau e talafetaui i ai i lena foi vaiaso.

Faamatala ma tauloto

Vaai faalemafaufau e faapea, e toatele tagata o le vasega sa lei i ai i le aso na suesue ai e lau vasega seminare le aoaoga faavae o le Toefuataiga i le Efeso 1 . Ua fai atu lou faiaoga seminare ia te oe e faaaoga ni nai minute e aotele ai aoaoga e sili ona taua e te lagona e manaomia e tagata aoga uma ona iloa ma manatua e uiga i le aoaoga faavae o le Toefuataiga ma aoaoga mai le Efeso 1:10 .

I le tali mai ai, e mafai e tagata aoga ona faaaoga mea na latou faia mo le sauniuniga a le tagata aoga mo lenei lesona. Faalogo ma le totoa i tali a tagata aoga, ma iloilo lo latou malamalama. Afai e tatau ai, toe faamanatu mau ma mataupu faavae mai le lesona talu ai.

• O a upumoni taua e uiga i le Toefuataiga o le talalelei e te ono faasoaina atu? Aisea?

• E faapefea ona e faamatalaina aoaoga e maua i le Efeso 1:10 i au lava upu?

• E mafai faapefea e le malamalama i le Toefuataiga ona aafia ai le malamalama ma lagona o se tasi agai i le Tama Faalelagi ma Iesu Keriso?

Tuu atu i tagata aoga se avanoa e tauloto ai le mau faasino mo le fuaitau o le atamai i aoaoga faavae Efeso 1:10 ma lona fasifuaitau autu o le mau. O se faataitaiga lenei o se tasi auala e fai ai.

I lau api faamaumau mo suesuega po o luga o lau masini faatekinolosi, tusifaamaumau le fasifuaitau autu o le mau ma le tusi mo le fuaitau o le atamai i aoaoga faavae Efeso 1:10 e ala i le vaevaeina i ni vaega se fa e pei ona faaalia i lalo:

• I le tisipenisione o le atoaga o taimi

• O le a Ia faapotopotoina faatasi

• Mea uma ia Keriso

• Efeso 1:10

Ufiufi laina 2–4, ma toe fai le laina 1 i lou mafaufau seia oo ina e taulotoina. Sui i le laina lona lua, ma toe fai le faagasologa. Fai le mea lava lea e tasi mo laina 3 ma le 4. A e lagona le mautinoa ua e taulotoina uma laina e fa, tusi uma i lau api faamaumau mo suesuega e aunoa ma le tilotilo i ai. Toe fai le faagasologa pe a manaomia seia oo ina mafai ona e tusia le fasifuaitau autu o le mau atoa ma le tusi mai lou manatuaga.

O le gaoioiga talu ai e mafai ona fetuunai e ala i le faaali atu o vaega e fa ua vaevaeina ma atofa atu ni vaega eseese o tagata aoga i vaega taitasi. Ona faasino lea i le tasi vaega, ma fai atu i tagata aoga i lena vaega e toe fai leotele mai la latou vaega. Toe fai le mea lenei mo vaega uma. Faasino i vaega eseese mo ni nai taimi e fesoasoani ai i tagata aoga e faataitai le fai atu ma le faalogo i nei fasifuaitau. Ona fai lea i le vasega e faataitai le toe faia faatasi o le fasifuaitau atoa ma le mau faasino. Fai lenei mea i le po o le a lava le tele o le taimi e manaomia ai e tagata aoga ona tauloto lenei fuaitau o le atamai i aoaoga faavae ma lana fasifuaitau autu o le mau.

Faataitai le faaaogaina

Mafaufau e toe faamanatu ia parakalafa 5–12 i le Pepa Autu o le Atamai i Aoaoga Faavae (2022). Filifili se tasi o mataupu faavae e tolu o le mauaina o le malamalama faaleagaga, ma fatu se aikona po o se ata faatusa faigofie e faamanatu atu ai ia te oe lenei mataupu faavae ma lona manatu autu. Mo se faataitaiga, mo le mataupu faavae “iloilo manatu ma fesili faatasi ma se vaaiga e faavavau,” e mafai ona e mafaufau e fai se ata e pei o lenei:

Ina ia mautinoa e lava se taimi mo le gaoioiga faataitai lenei, mafaufau e tuu atu i tagata aoga se taimi faatapulaa o le lua i le fa minute e fatu ai se ata faatusa faigofie o se tasi o mataupu faavae o le mauaina o le malamalama faaleagaga. A uma ona faia e tagata aoga, valaaulia ni nai tagata e faasoa mai a latou ata ma faamatala mai pe faapefea e mea na latou fatuina ona faatusa i le mataupu faavae na latou filifilia.

Faitau le tulaga faataitai lenei e fesoasoani ia te oe e faataitai ai le faaaogaina o mataupu faavae o le mauaina o le malamalama faaleagaga ma le aoaoga faavae o loo aoao mai i le Efeso 1:10 e faapea i le taimi o le tisipenisione o le atoaga o taimi, o le a faapotopotoina faatasi mea uma ia Keriso. Ona faaaoga lea o le ata faataitai lenei, pe fatu sau oe lava ata faataitai, e tali ai fesili o loo mulimuli mai.

Sa papatisoina sau uo ma lona aiga ma lagona le mautinoa i lena taimi o loo ia mulimuli ai i le faataitaiga a Iesu Keriso e ala i le auai i Lana Ekalesia. Ae i le tausaga ua tuanai talu mai lona papatisoga, sa tele ina faaosoosoina o ia e isi uo e solia poloaiga. Ua amata ona ia taumate pe o le Ekalesia moni lava lenei a Keriso ma pe aoga le tumau faamaoni i le talalelei.

E ui o loo tele ni upumoni e mafai ona fesoasoani i lau uo, mafaufau pe mafai faapefea e aoaoga faavae o le Toefuataiga ma le tisipenisione o le atoaga o taimi ona faamalosia ma faamalosiauina o ia.

Nai lo le fai atu i tagata aoga e tali mai i fesili uma nei i le taimi e tasi, mafaufau e faaopoopo ni mea eseese e fesoasoani ai i tagata aoga ia maua se aafiaga e le mafaagaloina. Mo se faataitaiga, e mafai ona valaaulia tagata aoga e galulue i ni paga po o ni vaega toalaiti e talanoaina ia fesili. E mafai foi ona latou faia se tala faatino o le ata faataitai e faaaoga ai a latou tali i nisi o fesili nei. I le avea ai ma se isi filifiliga, e mafai ona atofa i paga po o vaega toalaiti na o se tasi o mataupu faavae o le mauaina o le malamalama faaleagaga e tali atu ai ona tuuina atu lea o o latou manatu i le vasega.

Faatino i le faatuatua

• O a laasaga e mafai ona e uunaia lau uo e fai ina ia faatino ai i le faatuatua?

• E mafai faapefea e le faatino i le faatuatua ona fesoasoani i lau uo i ana fesili ma atugaluga?

Iloilo mataupu ma fesili faatasi ai ma se vaaiga e faavavau

• O le a se mea ua e iloa e faatatau i aoaoga a le Faaola e uiga i le Toefuataiga?

• E mafai faapefea e le faatumauina o se vaaiga e faavavau ona fesoasoani ia te oe ma lau uo i lenei tulaga?

Saili le malamalama atili e ala i punavai ua tofia faalelagi

• E mafai faapefea e upumoni o loo maua i le Efeso 1:10 ona fesoasoani i lenei tulaga?

• Afai e i ai sou taimi faaopoopo ae e te lei tali atu i lau uo, o le a se mea e te ono toe faamanatu pe suesue i ai? O a ni punaoa e mafai ona e valaaulia lau uo e suesue iai o ia lava? Aisea?

A maea ona tuu se taimi i tagata aoga e mafaufau loloto ma tali atu i fesili o i luga, mafaufau e valaaulia i latou e faasoa atu po o le a le ata faataitai na latou faaaogaina ma talanoa i a latou tali.

Toe faamanatuina o le atamai i aoaoga faavae

Ina ia fesoasoani i tagata aoga e toe faamanatu le fuaitau o le atamai i aoaoga faavae ma le fasifuaitau autu o le mau mo le Efeso 1:10 i se lesona i le lumanai, mafaufau e faaaoga le gaoioiga lava lea e tasi e fa vaega o le taulotoina na folasia mai i le amataga o lenei lesona.