Eperu 3–4

Sao atu i le Malologa o le Alii

E finagalo lo tatou Tama Faalelagi ma Iesu Keriso e faamanuia i tatou i a Laua faamanuiaga silisili naua. O le le talitonu ma le loto-maaa e taofia ai le toatele mai le mauaina o nei faamanuiaga. I le uunaia ai o le Au Paia e lafoai ese uiga le talitonu, sa saili ai Paulo e fesoasoani ia i latou e toe liliu atu i feagaiga sa latou osia. O lenei lesona ua faamoemoe e fesoasoani ia te oe e faatoilalo ai le le talitonu ina ia mafai ai ona e maua faamanuiaga folafolaina a le Faaola.

Faalogo atu i tagata aoga ina ia iloatino lelei o latou manaoga. Pe a tali mai tagata aoga i fesili pe faasoa mai ni aafiaga i le vasega, faalogo toto‘a i mea o loo latou fai mai ai. A o e faalogo atu ia i latou ma gauai atu i uunaiga mai le Agaga Paia, o le a mafai ona e iloatino o latou manaoga.

Sauniuniga a le tagata aoga: Valaaulia tagata aoga e mafaufau pe aisea latou te talitonu ai ia Iesu Keriso ma pe faapefea ona faamanuiaina i latou mo le talitonu ia te Ia.

Gaoioiga e ono Mafai Ona Aoao Ai

O lo tatou talitonuga ia Iesu Keriso

O Elder Neil L. Andersen o le Korama a Aposetolo e Toasefululua na faamatalaina se faafitauli ua feagai ma le lalolagi i aso nei:

I nisi o vaega o le lalolagi lea na folafolaina atu ai Lona suafa mo le tele o seneturi, o loo ua faaitiitia ai le faatuatua ia Iesu Keriso. Ua vaaia e le Au Paia totoa i Europa le soloitua o talitonuga i o latou atunuu i le gasologa o le tele o tausaga. O le mea e faanoanoa ai, o iinei i le Iunaite Setete, ua soloitua ai foi le faatuatua. Ua faaalia i se suesuega lata mai nei i le 10 tausaga na sei mavae atu, e 30 miliona tagata i le Iunaite Setete ua laa ese mai le talitonuga i le paia o Iesu Keriso. A tilotilo i le lalolagi atoa, ua valoia e se isi suesuega e faapea, o le tele o tausaga o lumanai, e sili atu i le faaluaina le toatele o le a tuua le faa-Kerisiano nai lo i latou o le a taliaina.

(Neil L. Andersen, “Matou te Tautalatala e uiga ia Keriso,” Ensign po o le Liahona, Nov. 2020, 88)

• O a nisi o taunuuga faamoemoeina, i le taimi nei ma i le lumanai, o tagata e le talitonu ia Iesu Keriso?

Atonu o se avanoa lenei e faamanatu ai i tagata aoga a latou sauniuniga mo le vasega.

Mafaufau i lou lava talitonuga ia Iesu Keriso.

• O le a le malosi o iai i lou lagonaina o lou talitonuga ia Iesu Keriso?

• E mafai faapefea e le filifili e talitonu ia te Ia ona faamanuiaina ai lou olaga?

O aoaoga a Paulo e uiga i le fanauga a Isaraelu

I lana tusi i tagata Eperu, sa faailoa atu ai e Paulo e faapea, ona o sauaga, sa manatu ai nisi o tagata liliu mai e fulitua i lo latou talitonuga ia Iesu Keriso.

Faitau le Eperu 3:7–19 , ma vaavaai mo le tala faasolopito na taua e Paulo e fesoasoani ai i tagata Eperu ia malamalama i le matautia o le le talitonu.

Valaaulia tagata aoga e faasoa mai mea na latou maua. Afai e mafai, tuu atu i se tagata aoga e aotele mai le tala ia Mose ma le fanauga a Isaraelu o loo faasino i ai Paulo. Faaaoga le faamatalaga o loo i le parakalafa lenei pe a talafeagai ai.

O le “faaonoono … i le vao” ( Eperu 3:8) e faasino i le taimi, ina ua uma ona faasaolotoina mai Aikupito, sa faaonoono e Isaraelu le Alii i le toasa ma sa teena faamanuiaga sa Ia moomoo e tuuina atu ia i latou (tagai i le Numera 14 ; Iakopo 1:7–8 ; Alema 12:33–37).

• O a faamanuiaga na misia e le fanauga a Isaraelu? Aisea?

O le malologa o le Alii

E finagalo le Tama Faalelagi ma Iesu Keriso ia tatou oo i le La Malologa. Suesue le fuaitau lenei o le mau ma le faamatalaga faaperofeta e aoao ai po o le a le malologa o le Alii. Atonu e fesoasoani pe a su’e ane le upu “ Malologa ” i totonu o le Taiala i Tusitusiga Paia, pe afai o iai.

Faitau le Mataupu Faavae ma Feagaiga 84:24 e aoao atili ai e uiga i le malologa o le Alii (tagai foi i le Alema 13:6, 12–13, 28–29).

Sa aoao mai e Peresitene Iosefa F. Samita (1838–1918) le ala e mafai ai ona tatou sao atu ai i le malologa o le Alii a o i ai i le olaga nei:

Na taua e perofeta anamua le ‘sao atu i le malologa o le Atua’ [tagai i le Alema 12:34 ; Mataupu Faavae ma Feagaiga 84:23–24 ]; o le a lona uiga? I lo’u mafaufau, o lona uiga o le sao atu i le malamalama ma le alofa o le Atua, i le mauaina ai o le faatuatua i lona faamoemoega ma i lana fuafuaga, e oo ai i se tulaga tatou te iloa ai e sa’o i tatou, ma tatou te le o sueina se isi mea, e le o feaveaiina foi i tatou e matagi uma o mataupu, po o i le pepelo ma togafiti leaga a tagata ua saunia e faasese ai. … O le tagata ua taunuu i lena tikeri o le faatuatua i le Atua ma ua lafoai uma le masalosalo ma le atuatuvale mai ia te ia, ua sao atu o ia i le “malologa o le Atua.”

(Aoaoga a Peresitene o le Ekalesia: Iosefa F. Samita [1998], 56)

• E faapefea ona e faamatalaina le malologa o le Alii?

Sa faasoa atu e Alema se savali e talitutusa ma la Paulo i tagata o ona aso, o nisi o i latou sa tauivi foi e talitonu. Faitau le Alema 12:34–37 , vaavaai mo ni malamalamaaga faaopoopo.

• O le a le mataupu faavae e mafai ona e faailoa mai le Eperu 3 ma le Alema 12:34–37 ?

O se tasi o mataupu faavae e te ono aoaoina e faapea afai tatou te tumau faamaoni i le Faaola ma aua le faamaaa o tatou loto, o le a tatou sao atu i le malologa o le Alii.

• O le a sou manatu e mafai faapefea e se loto maaa ma le le talitonu ona taofia i tatou mai le mauaina o faamanuiaga a le Alii?

• Aisea e te manatu ai o le malologa o le Alii o se faamanuiaga e taua ona tulituliloaina?

Filifili e talitonu

Faaali atu fuaiupu nei. Mafaufau e faavasega tagata aoga i ni paga ma tofi tagata aoga taitasi e faitau ia fuaiupu mai se mataupu e tasi. Ona mafai lea ona latou lipoti atu i a latou paga mea sa latou aoaoina.

Faitau le Eperu 3:7–8, 12–15 ; 4:2–3, 6–7, 11. A o e faitau, vaavaai mo mea e mafai ona tatou faia e sao atu ai i le malologa o le Alii. Atonu e te manao foi e faitau le Faaliliuga a Iosefa Samita, Eperu 4:3 (i le faaopoopoga o le Tusi Paia).

Atonu o se avanoa lea mo tagata aoga e faitau ai fuaiupu faaopoopo mai le Tusi a Mamona e pei ona fautuaina mai i le vaega “Gaoioiga Faaopoopo e Aoao ai”.

• O le a se mea e tulaga ese ia te oe mai nei fuaiupu?

Na aoao mai e Peresitene Russell M. Nelson le auala e mafai ona tatou faatoilaloina ai le le talitonu:

Filifili e talitonu ia Iesu Keriso. Afai e i ai ni ou masalosaloga i le Atua le Tama ma Lona Alo Pele, po o le faamaoniga o le Toefuata’iga po o le moni o le valaauga paia o Iosefa Samita o se perofeta, filifili e talitonu ma tumau i le faatuatua. Tuuina atu au fesili i le Alii ma i isi punavai faatuatuaina. Su’esu’e faatasi ma se naunautaiga ia talitonu nai lo le na o le faamoemoe e mafai ona e maua se pona i le talaaga i le soifuaga o se perofeta po o se mea faaletonu i tusitusiga paia. Taofi le faatupuina o ou masalosaloga e ala i le talanoaina ma isi tagata masalosalo. Faataga le Alii e ta’ita’i oe i lau malaga o le sailiga faaleagaga.

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103)

Vaai faalemafaufau e i ai sau uo o loo tauivi e talitonu ia Iesu Keriso. Tusi se savali agalelei e uunaia ai i latou. Ia mautinoa e aofia ai ia le itiiti ifo ma le tasi se fuaiupu o le mau mo i latou e suesue i ai. Afai e talafeagai, faaopoopo iai lau molimau ia Iesu Keriso. O le mafaufau ai i le saunoaga a Peresitene Nelson ma fesili nei e mafai ona fesoasoani ia te oe a o e tusia le savali.

• O le a se mea latou te ono oo iai pe afai latou te filifili e talitonu i le Faaola?

• O le a se mea latou te ono misia pe afai latou te filifili le le talitonu?

• O le a se mea o le a e uunaia i latou e fai ia talitonu ai ia Iesu Keriso?

Molimau atu a o saili tagata aoga e mulimuli i le Faaola ma galulue e aveese le le talitonu mai o latou olaga, o le a latou oo i Lona malologa.

Tala Auiliili ma Faamatalaga o Talaaga

E mafai faapefea ona ou maua se loto talitonu sili atu?

Na tusia e Peresitene Dieter F. Uchtdorf, a o i ai i le Au Peresitene Sili:

E leai se tulaga faamaneta e maua ai le talitonu Ae o le manao ia talitonu o le laasaga taua muamua lea! E le faailoga tagata le Atua. O Ia o lou Tama. E finagalo o Ia e fetalai atu ia te oe. Peitai, e manaomia ai sina fiailoa itiiti faasaeanisi—e manaomia se suesuega faataitai o le afioga a le Atua—ma le faatinoga o se “vaega itiiti o le faatuatua” [ Alema 32:27]. E manaomia ai foi sina lotomaualalo itiiti. Ma e manaomia ai se loto matala ma se mafaufau tatala. E manaomia ai se sailiga, i le uiga atoa o le upu. Ma e masalo o le mea sili ona faigata o mea uma, e manaomia ai le onosai ma le faatalitali i le Alii.

Afai tatou te le faia se taumafaiga e talitonu ai, ua pei lava la i tatou o le tagata na te seieseina le uaea o le molīsulu ona tuuaia lea o le molī i le le faasusulu maia o se malamalama.

(Dieter F. Uchtdorf, “Aua le Matatau, Na o le Talitonu,” Ensign po o le Liahona, Nov. 2015, 78)

O ai e mafai ona fesoasoani ia i tatou e maua ai le malologa o le Faaola?

Na taua e Elder W. Craig Zwick o le Fitugafulu:

E alofa le Tama Faalelagi i Ana fanau taitoatasi ma e finagalo ia tatou toe foi uma atu ia te Ia. Ua Ia tuuina mai perofeta ma taitai perisitua ma le pule moni o le perisitua e fesoasoani ia tatou tumau ai i luga o le ala sa‘o ma le vaapiapi. Ua tatou maua, lea, o le taitaiga a nei taitai e fesoasoani ia i tatou e sao atu ai i Lona malologa.

(W. Craig Zwick, “Enter into the Rest of the Lord,” Ensign, Fep. 2012, 24)

Gaoioiga Faatino Faaopoopo e Aoao Mai Ai

O Le malologa o le Alii i le Tusi a Mamona

E toatele perofeta i le Tusi a Mamona na aoao mai e uiga i le sao atu ai i le malologa o le Alii. E mafai ona aoga i tagata aoga le faitauina o nisi po o fuaitau uma nei ma fefaasinoai i latou i le Eperu 4:3. Alema 13:12, 16Alema 16:16–17Alema 60:13Moronae 7:3