Iakopo 2

“O Le Faatuatua, Pe Afai E Le I Ai Galuega, E Mate Lava Ia”

E mafai ona i ai se eseesega i le va o se tagata e fai mai latou te talitonu ia Iesu Keriso ma se tagata e faatinoina le faatuatua ia Iesu Keriso? Na ofoina mai e Iakopo se eseesega taua e faapea, o le faatuatua moni ia Iesu Keriso e le na o mafaufauga po o tala a se tagata, ae faapea foi i mea latou te faia. O lenei lesona o le a mafai ai ona e iloiloina pe mafai faapefea ona e faatinoina atoatoa le faatuatua ia Iesu Keriso e ala i faatinoga amiotonu.

O le fesoasoani atu i tagata aoao ia avea ma tagata auai mataalia. A o sauniuni ai e aoao atu, taulai atu i mea o le a faia e tagata aoao. Faamalosiau i le vasega e fai se taumafaiga e aoao mai tusitusiga paia ma mai le tasi ma le isi. A o faia e tagata aoga lenei mea, o le a faateleina lo latou talitonuga i lo latou gafatia e aoao ai mai tusitusiga paia. O le a sili atu foi ona ono faaaogaina e tagata aoga mea ua latou aoaoina.

Sauniuniga a le tagata aoga: Valaaulia tagata aoga e mafaufau i se tasi e latalata ia i latou o loo i ai se faatuatua malosi ia Iesu Keriso. Afai e mafai, valaaulia tagata aoga e fai atu i lenei tagata fesili e pei o nei: “E faapefea e lou faatuatua ia Iesu Keriso ona aafia ai au faatinoga ma amioga? O le a se mea e ese ona e faia ona o lou faatuatua ia Iesu Keriso?” Valaaulia tagata aoga e o mai saunia e faasoa mai mea na latou aoaoina.

Gaoioiga E Ono Mafai Ona Aoao Ai

O le mauaina o faamanuiaga—e pei o le tutuina o se afi

Tusi se ata o se afi i luga o le laupapa.

O e sailia se faamanuiaga po o se tali i tatalo mai le Tama Faalelagi? E ono fesoasoani le faatusatusa o le faagasologa o le sailia o nei faamanuiaga i le faamumuina o se afi ina ia maua mai ai le malamalama ma le vevela.

• O a laasaga o le a e faia e faamumu ai se afi?

• O le a le taua o le faatinoga o le tutuina o le afitusi?

Faitau le saunoaga lenei a Elder Dale G. Renlund o le Korama a Aposetolo e Toasefululua e aoao ai pe faapefea e le mauaina o faamanuiaga ona pei o le tutuina o se afi. E mafai foi ona e matamata i le “E Tele Mea e Manuia ai,” o loo maua i le ChurchofJesusChrist.org, mai le faailotaimi 1:02 i le 3:27.

Ia tatou faatatauina faamanuiaga faalelagi i se faaputuga tele o fafie. … Ua i ai i [lenei] faaputuga laau o fafie mago, se aofaiga tele faalesuauu e mafai ai ona maua le malamalama ma le vevela mo le tele o aso. …

Ina ia tatala mai le malosiaga o i le faaputuga fafie, e manaomia ona tosiina le afitusi ma faamumu ai fasilaau matamata ninii. O le a vave lava ona ’apo e fasilaau matamata ninii le afi ma mafua ai loa ona mu fafie lapopoa. …

O le tosiina o le afitusi ma le faamuina o fasilaau ninii o ni faatinoga iti e mafai ai ona tatala mai le malosiaga ua faamoemoeina mai fafie. Seiloga lava la e tosi le afitusi, o le a leai a se mea e tupu, e tusa lava po o le a le telē o le faaputuga fafie. …

I se ala talitutusa, o le tele o faamanuiaga a le Atua e finagalo e foai mai ia i tatou e manaomia ai le faatinoga o la tatou vaega—o faatinoga e fua i lo tatou faatuatua ia Iesu Keriso. … E ui i lea, o le faatinoga manaomia e laitiiti lava pe a faatusa i faamanuiaga tatou te maua mulimuli ane.

(Dale G. Renlund, “E tele Mea e Manuia ai,” Ensign po o le Liahona, Me 2019, 70)

• O a ni malamalamaaga ua e maua mai i le talafaatusa a Elder Renlund?

• O le a sou manatu i le uiga o le faatino “e faavae i lo tatou faatuatua ia Iesu Keriso”?

Mafaufau e valaaulia tagata aoga e tali fesili nei i totonu o a latou api faamaumau mo suesuega.

Mafaufau loloto i fesili nei:

• O a ni auala e te faatuatua ai ia Iesu Keriso? O a ni faatinoga e te faia ona o lenei faatuatua?

• O a tali ma isi faamanuiaga ua e maua mai le Atua a o e faatinoina le faatuatua ia Iesu Keriso? Pe o i ai ni auala faaopoopo e te lagona e finagalo le Alii e te faatino ai i le faatuatua? Aisea?

Tatalo mo le Tama Faalelagi e taiala oe a o e sailia tali i nei fesili i le taimi o au suesuega.

O le faatuatua ia Iesu Keriso

Sa faaaoga e Iakopo se isi talafaatusa e aoao ai i tatou i le taua o le faatinoina ma le faatuatua ia Iesu Keriso.

Faitau le Iakopo 2:14–16 , ma taumafai e vaai faalemafaufau po o le a sou manatu pe afai e te molimauina lenei tulaga. (O upu “le ofu” i le fuaiupu 15 o lona uiga e le o lelei ona faaofuina.)

Mafaufau e valaaulia ni tagata aoga se toalua e o mai i luma o le vasega. Fai atu i le tasi o tagata aoga e fai ma tagata aisi ma le isi tagata aoga e avea ma tagata e mafai ona fesoasoani i le tagata aisi. Valaaulia se tagata aoga lona tolu e faitau leotele le Iakopo 2:15–16 a o faatino e isi tagata aoga e toalua le mea o loo faamatalaina i nei fuaiupu.

• O a ni mea ua e aoaoina mai le tala faatusa a Iakopo?

Faitau le Iakopo 2:17–18, 26 (tagai foi i le Iakopo 1:22) ma vaavaai mo se upumoni na faapupula mai e Iakopo e ala i lenei tala faatusa.

Iakopo 2:17–18O le o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie.

• E faapefea ona e aoteleina mea na aoao mai e Iakopo?

O se tasi o auala e tau atu ai le upumoni na aoao mai e Iakopo e faapea, o le faatuatua moni ia Iesu Keriso e manaomia ai faatinoga amiotonu.

• Aisea e te manatu ai e finagalo Iesu Keriso ia tatou faatinoina lo tatou faatuatua?

Atonu e fesoasoani le ta’u atu o se tasi o aoaoga faifai pea i le tusi a Iakopo o le, e tatau ona tatou tausia e matitiva, mama’i, ma e le tagolima (tagai i le Iakopo 1:27 ; 2:1–9 ; 5:14–15). O ia faatinoga e faaalia ai le faatuatua ia Iesu Keriso.

• E ono mafai faapefea e le manatuaina o le Faaola o Iesu Keriso ma Lona agalelei ona faaosofia i tatou e faatino o tatou talitonuga?

O faataitaiga o le faatinoina i le faatuatua

E mafai ona musuia le mafaufau ai i faataitaiga a i latou o e faatino lo latou faatuatua ia Iesu Keriso. Faitau le Iakopo 2:21–25 , ma faailoa mai faataitaiga o i latou i le Feagaiga Tuai o e sa faatino i le faatuatua.

Afai e fesoasoani, mafaufau e fai atu fesili e pei o nei:

• O le a le faalagiga na ta’ua ai Aperaamo ona o ana galuega? (tagai i le Iakopo 2:23). Aisea e te manatu ai o ana faatinoga faamaoni na maua ai lenei faalagiga?

• E faapefea ona e manatu e mafai ona fesoasoani a tatou galuega e faamalosia ma faaatoatoa ai lo tatou faatuatua? (tagai i le Iakopo 2:22).

E mafai foi ona fesoasoani le faamalamalama atu sa faatino e Raava lona faatuatua e ala i le lamatia o lona ola e puipuia ai auauna a le Atua (tagai i le Iosua 2:1, 3 ; 6:17, 23, 25 ; Eperu 11:31).

Mafaufau e valaaulia tagata aoga e tusi a latou tali i fesili nei i luga o ni fasi pepa se lua. E mafai e tagata aoga ona faaaoga a latou sauniuniga a tagata aoga i lenei gaoioiga.

• O ai e mafai ona e mafaufau i ai, pe mai lou olaga pe mai tusitusiga paia, o loo faaalia le faatinoina o le faatuatua ia Iesu Keriso? O le a se mea ua e aoao mai i lenei faataitaiga?

• O le a se auala e tasi ua avea ai Iesu Keriso ma se faataitaiga o galuega amiotonu? E faapefea e a tatou faatinoga amiotonu ona fesoasoani ia i tatou ia avea atili ai e faapei o Ia?

A uma ona tusi e tagata aoga a latou tali, valaaulia i latou e gaugau uma fasipepa e lua ma ia tofu le lima ma le fasipepa e uu. Ona mafai lea e tagata aoga ona feoai i le potu atoa ma filifili se tagata e faasoa atu i ai. Ona filifili lea e tagata aoga taitasi le lima taumatau po o le tauagavale o le isi tagata aoga e faalogo i a latou tali. E mafai e tagata aoga ona toe fai le gaoioiga lenei faatasi ma isi tagata aoga.

O le tatalaina o faamanuiaga e ala i faatinoga e musuia e le faatuatua

Na tuuina mai e Peresitene Russell M. Nelson le lu’i lenei e faatatau i lo tatou faatuatua ma a tatou faatinoga:

Ina ia faia soo se mea ia lelei, e manaomia se taumafaiga. O le avea ai ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga. …

…O le a se mea e te faia pe afai ua ia te oe se faatuatua sili atu? Mafaufau i ai. Tusitusi e uiga i ai. Ona maua tele ai lea o le faatuatua e ala i le faia o se mea e manaomia tele ai le faatuatua.

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, 2021, 103)

Mafaufau loloto i fesili nei:

• O le a se mea e te faia pe afai ua ia te oe se faatuatua tele atu?

• O a ni laasaga e mafai ona e faia e faatino ai ou uunaiga?

Faaaoga se minute e amata ai ona faatino ou uunaiga. Mo se faataitaiga, e faatatau i mea e te lagona e tatau ona e faia, e mafai ona e auina atu se feau tusitusi, fai se tatalo, tuu se faamanatu i lau kalena, pe fuafua se mea o le a sosoo ona e faia.

Fesili atu pe i ai ni tagata aoga e to’alelei e faasoa mai mea ua amata ona latou faia pe fuafua e fai. O le fefaasoaai o manatu e mafai ona musuia ai isi tagata aoga.

Mafaufau e faasoa atu se molimau po o se aafiaga patino e uiga i le mafuaaga e tatau ai e le faatuatua ia Iesu Keriso ona mamanuina a tatou faatinoga.

Tala Auiliili ma Faamatalaga o Talaaga

Pe na tetee aoaoga a Iakopo e uiga i le faatuatua ma galuega i aoaoga a Paulo?

I le faatatauga o le Iakopo 2:14 , na ese ai le faaaogaina e Iakopo o le upu galuega mai le auala na faaaogaina ai e le Aposetolo o Paulo. Ina ua faaaoga e Paulo le upu galuega, sa ia faasino muamua lava i galuega o le tulafono a Mose (tagai i le Roma 3:27–31 ma le Kalatia 2:15–16). Ina ua faaaoga e Iakopo le upu galuega, sa ia faatatau atu i faatinoga o le tuuto po o galuega o le amiotonu.

E mate lava le faatuatua pe a leai ni galuega, ae faapefea galuega e aunoa ma le faatuatua?

Na aoao mai Elder David A. Bednar o le Korama a Aposetolo e Toasefululua e faapea:

O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. … O le na o le faatino lava ia, e le o se faatuatua lena i le Faaola, peitai o le faatino e tusa ai ma mataupu faavae tonu, o se vaega autu lea o le faatuatua.

(David A. Bednar, “Ole Atu ma le Faatuatua,” Ensign po o le Liahona, Me 2008, 95)

Gaoioiga Faaopoopo e Aoao Ai

Iakopo 1:22 . “A ia fai outou ma e anaana i le upu, a e aua le na ona faalogologo i ai”

Mafaufau e faaali le vitio “Ia Fai Outou ma E Anaana i le Upu,” o loo maua i le ChurchofJesusChrist.org, lea o loo faaalia ai le Iakopo 1:19–27 . Valaaulia tamaiti aoga e vaavaai mo aoaoga e fesoasoani latou te malamalama ai i le taua o le faatino ma le faatuatua ia Iesu Keriso.

Iakopo 2:9 . “A e afai tou te faailogaina tagata, ua outou agasala ai”

O lenei mataupu faavae e mafai ona aoaoina o se faataitaiga o le auala e mafai ai ona tatou faaali atu lo tatou faatuatua e ala i a tatou galuega. Ia filifili soo se tagata aoga, ma tuu atu ia te ia se meaalofa laitiiti. Ta’u i le vasega na e tuuina atu i lenei tagata aoga se meaalofa mo se mafuaaga e lei mafaufauina (e pei o le lanu o loo latou ofuina). Fai atu fesili e pei o le “O a ni lagona o outou uma ona o le auala na ou faia ai lenei tagata aoga? Aisea tatou te faaalia ai i ni isi taimi le faaituau i isi?” Valaaulia se tagata aoga e faitau leotele le Iakopo 2:1–4 . Fai atu i le vasega e mulimuli i le faitauga, ma vaavaai po o le a le mea na lapataiina ai e Iakopo le Au Paia. O le a le mea sa latou vaaia? E mafai faapefea ona tatou aloese mai le manatu faapito i isi tagata?

Valaaulia tagata aoga e faitau filemu le Iakopo 2:8 , ma vaavaai mo le mea na faamanatu atu e Iakopo i le Au Paia e fai o le a fesoasoani ia i latou e aveese ai le faaituau. Fai atu i tagata aoga e mafaufau i se tasi latou te iloa o loo faaalia le alofa tutusa i tagata e eseese o latou tulaga. Valaaulia tagata aoga e faasoa mai po o ai na latou mafaufau i ai ma pe aisea foi. Na faapefea ona faaalia e Iesu Keriso le alofa tutusa atu i isi? Valaaulia le vasega e mafaufau pe mafai faapefea ona latou mulimuli atili i le faataitaiga a le Faaola i le ala latou te vaai ma alofa ai i isi tagata.

Iakopo 2:19–20 . O le i ai o le faatuatua i le Atua e ese nai lo o le na ona faailoa atu o loo soifua o Ia

E mafai ona aoao atu lenei gaoioiga pe a uma le saunoaga a Elder Renlund po o le vitio ma fesili o loo mulimuli ai. E mafai faapefea ona malamalama atili tamaiti aoga i le sootaga i le va o le faatuatua ma galuega? Valaaulia i latou e faitau le Iakopo 2:19–20 , ma vaavaai mo le faataitaiga na tuuina mai e Iakopo e faaalia ai e mafai e tagata ona talitonu i le Atua e aunoa ma le faatuatua i le Atua. O le a le mea sa vaaia e tagata aoga? E faapefea ona latou faamatalaina le eseesega i le va o le i ai o le faatuatua i le Atua ma le talitonu i le Atua?