Iakopo 1

“Ole Atu ia i le Atua”

O e lagona e mafai ona e ole atu i le Atua mo se fesoasoani pe a i ai ni au fesili e lei taliina pe manaomia Lona atamai i le faia o [au] faaiuga taua? Na tautino mai e Iakopo o soo se tasi e leai se poto e mafai ona “ole atu ia i le Atua, o lē foai tele mai i tagata uma ma le le toe ta’uta’ua; ona foaiina mai ai lea ia te ia” (Iakopo 1:5). O lenei lesona ua faamoemoe e faamalosia ai lau molimau o le a tuuina atu e le Tama Faalelagi ia te oe le poto o se tali i au tatalo.

O le aoaoina atu o tusitusiga paia ma upu a perofeta faatasi ma le talitonuga maumaututu ma le faamoemoe. “O lou faanaunauga autu, o lou tiute taua atoa lava, o le aoao atu o le talalelei a le Alii o Iesu Keriso e pei ona sa faaalia mai i nei aso e gata ai. Ia ao ona outou aoao atu lenei talalelei, i le faaaogaina ai lea o a outou punaoa ma pule tatau ia tusitusiga faavae a le Ekalesia ma saunoaga a i latou na valaauina e le Atua e taitai Ona tagata i nei aso mulimuli” (J. Reuben Clark Jr., The Charted Course of the Church in Education, lomiga toe teuteu [1994; saunoaga i faiaoga faalelotu o le Ofisa o Aoga a le Ekalesia, 8, Aok. 1938], 10, ChurchofJesusChrist.org).

Sauniuniga a le tagata aoga: Valaaulia tagata aoga e faitau le Iakopo 1:5–6 ma mafaufau e uiga i vaega i o latou olaga ua latou manaomia ai le poto po o le taitaiga mai le Atua.

Gaoioiga E Ono Mafai Ona Aoao Ai

O Tali taua

Mafaufau e faaali atu filifiliga ma fesili nei. Tuu atu i tagata aoga se taimi e mafaufau loloto le leoa ai i a latou tali a o lei agai atu i luma.

Vaai i fesili taitasi nei ma mafaufau loloto i nei mea mo fesili taitasi: (1) Ua ou mauaina se tali mai le Atua? (2) O ou saili ea mo se tali mai le Atua ou te lei mauaina lava? (3) Pe ou te lei manao lava e saili se tali?

• Pe o Le Ekalesia a Iesu Keriso o le Au Paia o Aso e Gata Ai o le Ekalesia moni?

• E moni lava o Iesu Keriso o lo’u Faaola?

• O le a se mea e tatau ona ou taulai atu i ai ina ia avea ai ma se soo lelei sili atu o Iesu Keriso?

Mafaufau e fai atu i tagata aoga e faasoa mai ni isi o fesili taua atonu o loo latou sailia faatasi ai ma i latou o latalata ane ia i latou o ni tali i na fesili.

A o e suesue i upu a le Aposetolo o Iakopo i le Iakopo 1 , vaavaai mo mataupu faavae e mafai ona fesoasoani ia te oe e maua ai tali i fesili taua i lou olaga.

Faasoa atu ni talaaga e uiga ia Iakopo faapea foi ma le faatatauga mo lana tusi. E mafai ona fesoasoani ni isi o nei faamatalaga. I se isi foi faiga, e mafai ona valaaulia tagata aoga e faasoa mai mea atonu ua latou iloa e uiga ia Iakopo ma lana tusi.

Faitau faamatalaga nei e uiga ia Iakopo. Mafaufau po o a ni fesili atonu na ia sailia ai ni tali i lona olaga atoa.

1. Sa peiseai o ia o le uso taufeagai o Iesu Keriso (tagai i le Taiala i Tusitusiga Paia, “ Iakopo, le Uso o le Alii ,” ChurchofJesusChrist.org).

2. E faapei o isi uso taufeagai o le Alii, atonu na te lei talitonu muamua o Iesu o le Keriso (tagai i le Ioane 7:3–5).

3. E mulimuli ane sa avea ai o ia ma se Aposetolo ma, e tusa ai ma tala a le au tusitala Kerisiano anamua, o le uluai epikopo o le Ekalesia i Ierusalema (tagai i le Galuega 12:16–17 ; 21:17–18 ; Kalatia 1:18–19 ; 2:9).

Faitau le Iakopo 1:1 e faailoa mai ai po o ai na tusi atu i ai Iakopo.

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua e faapea “na talanoa atu Iakopo … i tagata e lei faapotopotoina, e lei talia le talalelei, e lei o mai i le lafu a Keriso” (Doctrinal New Testament Commentary [1973], 3:243).

• O a ni isi o fesili e ono i ai i tagata e lei mauaina le talalelei?

Faitau le Iakopo 1:5–6 , ma vaavaai mo upumoni na aoao mai e Iakopo e mafai ona fesoasoani ia i tatou pe a i ai ni a tatou fesili taua ma e mafai ona fesoasoani ia i latou o loo sailia upumoni o le talalelei. (Atonu e fesoasoani le iloa o le le toe ta’uta’ua o lona uiga o le saili masei pe o le otegia.)

Iakopo 1:5–6O le o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e mauagofie.

• O le a se mea na e mauaina?

Faalogologo ma le toto’a i tali a tagata aoga. Atonu e aoga le fesili i tagata aoga pe aisea e taua ai mea na latou maua ma o latou lagona e uiga i ai. Afai latou te le faasoa maia se mea e pei o le mataupu faavae o loo i lalo, fai atu le fesili lenei:

• O le a se mea ua e aoaoina e uiga i le Tama Faalelagi mai lenei fuaitau?

Mafaufau e tusi tali a tagata o le vasega i luga o le laupapa.

O se tasi o upumoni o loo maua i lenei fuaitau e faapea o le a faamanuiaina i tatou e le Atua i le poto pe afai tatou te ole atu ia te Ia i le faatuatua.

• O le a sou manatu i le uiga o le “ole atu ma le faatuatua, aua lava ne’i masalosalo”? ( Iakopo 1:6).

• Aisea e te manatu ai e finagalo le Tama Faalelagi ia e liliu atu ia te Ia mo ni tali?

A o faaauau lau suesuega, mafaufau i manatu, lagona, ma aafiaga na e oo i ai ina ua e sailia le poto, po o tali i au fesili, mai le Atua.

A o lei amataina le vaega e sosoo ai o le lesona, atonu e fesoasoani le iloa o le lesona o loo loma “Atamai i Aoaoga Faavae: Iakopo 1:5–6,” o le a valaaulia ai tagata aoga e suesue le Iosefa Samita—Talafaasolopito 1:8–17 .

O le faataitaiga a Iosefa Samita

E mafai ona fesoasoani le mafaufau loloto i se faataitaiga o le mataupu faavae faapea o le a faamanuiaina i tatou e le Atua i le poto pe afai tatou te ole atu ia te Ia i le faatuatua. O le sailia o le poto mai le Atua sa i ai se aafiaga loloto ia Iosefa Samita.

Matamata le vitio “Iosefa Samita: O Le Perofeta o le Toefuataiga” mai le faailotaimi 5:07 seia oo i le 8:42, o loo maua i le ChurchofJesusChrist.org, ma vaavaai pe na faapefea ona aafia le olaga o Iosefa i lenei upumoni.

• O a ni mea na ootia faapitoa ai oe mai le mea na oo ia Iosefa Samita?

• Na faapefea ona aafia le olaga o Iosefa i le tali a le Atua, lea na oo mai i le Uluai Faaaliga? Na faapefea ona aafia ai le lalolagi? Na faapefea ona aafia ai oe?

O lou aafiaga

Tuu se taimi i tagata aoga e faamaea ai mea nei i totonu o a latou api faamaumau mo suesuega:

Tusi mafaufauga, lagona, ma aafiaga na e maua a o e saili le poto mai le Atua. Mafaufau ia aofia ai ni isi o mea nei:

• O ou mafaufauga ma lagona e uiga i le naunautaiga o le Atua e tali au fesili (tagai i le Iakopo 1:5–6).

• O ou mafaufauga ma lagona e uiga i le aafiaga a Iosefa Samita i le ole atu i le Atua mo le poto.

• O aafiaga na e oo i ai pe o loo i ai nei i le sailia o le poto mai le Atua ma le mauaina o tali. (O nei aafiaga e mafai ona aofia ai le sailia o tali i fesili i le amataga o le lesona.)

• O auala e te manao e saili ai le poto mai le Atua i le taimi nei po o le lumanai.

• O uunaiga ua e maua mai le Agaga Paia i le taimi o lenei lesona e mafai ona fesoasoani ia te oe.

Valaaulia nisi o tamaiti aoga e faasoa mai o latou manatu. Taumafai ia fetala’i ma faalogo i mea ua latou mananao e faasoa mai. Faafetai atu ia i latou mo a latou tali. O ni isi nei o fesili tulitatao e ono mafai ona fai:

• O le a se eseesega ua faia e nei mafaufauga, lagona, po o aafiaga i lou olaga?

• Mata e mafai e se isi tagata i le vasega ona faasoa mai se aafiaga talitutusa?

Afai e i ai ni fesili a tagata aoga e uiga i le sailia o le poto mai le Atua, e mafai ona latou manatua na fesili mo le lesona e sosoo ai, “Atamai i Aoaoga Faavae: Iakopo 1:5–6,” lea e talanoaina ai pe mafai faapefea e mataupu faavae o le mauaina o le malamalama faaleagaga ona fesoasoani i le sailia o le poto.

Ina ia fesoasoani e saunia tagata aoga mo le valaaulia lenei, mafaufau e faaali le vitio “Origin” (4:57) e pei ona fautuaina mai i le vaega mo “Tala Auiliili ma Faamatalaga o Talaaga”.

Mafaufau i au aga masani patino o le tatalo ma le ole atu mo le poto ma tali mai le Atua. O le a le taimi mulimuli na e ole atu ai i lou Tama Faalelagi mo le poto pe mo tali i au fesili? O le a se mea e mafai ona e faia i le aso e amata ai ona fesili atu ma le faamaoni atili ma faia i le tele o taimi? Tusi i lau api faamaumau mea ua e lagona e finagalo le Tama Faalelagi e te faia ona o mea ua e suesueina i le aso.

Atonu e fesoasoani i tagata aoga le iloa o se lesona i le lumanai (“Iloilo Lou Aoaoina 11”), o le a maua ai e tagata aoga se avanoa e toe manatunatu ai i mea sa latou filifili e fai ona o lenei lesona i le Iakopo 1 .

Molimau atu i le alofa o le Atua mo tagata aoga taitasi ma Lona finagalo e faamanuia i latou taitoatasi i le poto. Molimau atu o le a faamanuiaina o latou olaga e ala i le sailia o le poto mai ia te Ia.

Tala Auiliili ma Faamatalaga o Talaaga

Aisea e taua ai le maua o le poto mai le Atua ma maua la’u lava molimau mai ia te Ia?

Mafaufau i le fesili na muamua atu a o e matamata i le vitio “Origin” (4:57), o loo maua i le ChurchofJesusChrist.org.

Na aoao mai Peresitene Russell M. Nelson:

O finagalo moni ea le Atua e fetalai atu ia te oe? Ioe! …

E te le tau tuufesili po o le a le mea e moni [tagai i le Moronae 10:5]. E te le tau mafaufau po o ai e mafai ona e malu faatuatuaina. E ala mai i faaaliga faaletagata lava ia, e mafai ai ona e mauaina lau oe lava ia molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona aveesea se molimau na foaina i lou loto ma le mafaufau e uiga i le mea e moni. …

O i tatou o soo o Iesu Keriso. O le upumoni aupito sili ona taua o le a molimau atu ai le Agaga Paia ia te oe e faapea o Iesu o le Keriso, le Alo o le Atua soifua. O loo soifua o Ia!

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95–96)

Iakopo 1:6 . O le a le uiga o le “ole atu i le faatuatua”?

Sa ta’ua e Elder David A. Bednar o le Korama a Aposetolo e Toasefululua le Iakopo 1:5–6 ma faamalamalama mai:

Maitau le mea e manaomia e ole atu ai i le faatuatua, lea ua ou malamalama o lona uiga o le tatau ona le gata ina faaupu ae ia faia, o le matafaioi valalua i le ole atu ma le faatino, o le mea e manaomia e fesootai atu ma ia galue. …

O fesili a Iosefa na taulai atu e le na o i le mea sa ia manaomia e iloa ae po o le a foi le mea e tatau ona fai! O lana tatalo sa le na o le, “O fea le ekalesia e sa’o?” O lana fesili o le, “O le fea o ekalesia e tatau ona ou auai ai?” Na alu Iosefa i le togavao e ole atu i le faatuatua, ma sa ia naunautai e faatino.

O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. … Tatou te fetaomi atu i luma ma tumau i le galuega mamana o le tatalo, i le maea ona tatou fai atu “amene,” e ala i le faatinoina o mea na tatou tau atu i le Tama Faalelagi.

O le ole atu i le faatuatua e manaomia ai le faamaoni, taumafaiga, tautinoga, ma le finafinau.

(David A. Bednar, “Ole Atu ma le Faatuatua,” Ensign po o le Liahona, Me 2008, 94–95)

Gaoioiga Faaopoopo e Aoao Ai

Molimau a matua

Ina ia faamalolosia molimau a tagata aoga e uiga i le tatalo, mafaufau e fesili atu i ni isi o o latou matua po o taitai o le Ekalesia i se aso se tasi pe lua a o lei amataina le vasega e tusi i lalo aafiaga na latou oo iai i le mauaina o le poto mai le Atua o le tali i talosaga. Faitau faamaumauga taitasi i le vasega. I ni isi tulaga, atonu e aoga le tuuina atu o se kopi o faamaumauga i tagata aoga pe afai o o latou matua po o se taitai o le Ekalesia.

Fautuaga faaperofeta e uiga i le sailia o le poto mai le Atua

Afai e aoga mo tagata aoga le suesue i fautuaga faaopoopo faaperofeta e uiga i le sailia o le poto mai le Atua, valaaulia i latou e faaaoga ni nai minute e saili ai punaoa o loo maua. Atonu latou te saili mo faaupuga e pei o le “Tatalo,” “Faaaliga,” po o le “Molimau” i le Taiala i Tusitusiga Paia po o le Polokalama o le Potutusi o le Talalelei. O nisi nei o fuaitau o le atamai i aoaoga faavae atonu latou te filifilia o se vaega o la latou suesuega: Faataoto 3:5–6 ; 2 Timoteo 3:15–17 ; 2 Nifae 28:30 ; Mosaea 4:9 ; Moronae 10:4–5 ; Mataupu Faavae ma Feagaiga 1:37–38 ; 8:2–3 .

Tetee atu i faaosoosoga

O le manatu lenei e mafai ona aoga mo se lesona i le lumanai:

Mafaufau e valaaulia tagata aoga e lisi i luga o le laupapa faaosoosoga masani o loo feagai ma le autalavou.

Valaaulia tagata aoga e faitau le Iakopo 1:12–16 e sue ai upumoni na aoao mai e Iakopo e uiga i faaosoosoga. Atonu e fesoasoani le ta’u atu faapea i le Faaliliuga a Iosefa Samita o le Iakopo 1:12 ua suia ai le “onosai i le faaosoosoga” i le “tetee atu ai i faaosoosoga”.

Mafaufau e fai atu fesili e pei o nei:

• Aisea e taua ai ona iloa o le Atua e leai se taimi e avea ai ma le faapogai o faaosoosoga?

• O le a se mea na fesoasoani ia te oe e tetee atu i faaosooga?

• E mafai faapefea ona tatou liliu atu i le Tama Faalelagi ma Iesu Keriso e fesoasoani ia i tatou e faatoilalo o tatou faaosoosoga?