Mataio 13:24–30, 36–43

O le Faataoto i le Saito ma le Titania

Sa faaaogaina e le Faaola le faataoto i se fanua o saito ma titania (o vao oona) e aoao atu ai e uiga i e amiotonu ua faapotopotoina faatasi faapea ma e amioleaga e susunuina ao lei toe afio mai o Ia. O lenei lesona e faamoemoe ina ia faatupulaia ai lou naunautaiga e auai i le faapotopotoina o Isaraelu.

Uunaia le Faaaogaina. O le faamoemoe o le aoaoina o le talalelei o le fesoasoani ai lea i tamaiti o le vasega e faaaoga aoaoga faavae ma mataupu faavae o loo maua i tusitusiga paia. O fesili ma gaoioiga e uunaia ai le faaaogaaga e mafai ona fesoasoani i tamaiti o le vasega e iloa ai pe faapefea ona faaaoga nei mataupu faavae i o latou lava tulaga.

Sauniuniga a le tamaitiiti o le vasega: Valaaulia tamaiti o le vasega e o mai sauniuni e faatalanoaina fesili nei: O ai se tasi o tagata muamua o lou aiga na auai i le Ekalesia? O le a se mea ua e iloa e uiga i le latou tala [o lo latou liliu mai]? E mafai ona talanoaina e tamaiti o le vasega nei fesili ma se tasi o lo latou aiga.

Gaoioiga e Mafai ona Faaaoga e Aoao Ai

O le faataoto i le saito ma le titania

Valaaulia tamaiti o le vasega e talanoaina fesili nei. Manatu e faasoa ane ni aafiaga patino.

• O ai le tagata muamua o lou aiga na auai i le Ekalesia?

• O ai sa fesoasoani e valaaulia i latou i le Ekalesia?

• Na faapefea ona aafia lou olaga i le avea ai o lenei tagata ma se tasi o le Ekalesia?

• E faamata e faapefea ona aafia isi tagata i lau faaiuga e tausia au feagaiga ma le Atua?

I le Mataio 13, sa faaaoga e le Alii le faataoto i le saito ma le titania e aoao ai e uiga i le faapotopotoina mai o tagata i Lana Ekalesia. A o e suesue, mataitu musumusuga a le Agaga e fesoasoani ia e malamalama i le mafuaaga ua faapotopotoina ai e le Alii Ona tagata ma le auala e mafai ona e fesoasoani atu ai.

E mafai ona suesue tamaiti o le vasega i nei faataoto taitoalua po o ni vaega toalaiti. Mafaufau e faaali atu laasaga e fa mo le faagasologa o suesuega ma fesili nei.

Suesue i le faataoto o loo i le Mataio 13:24–30 . Atonu e fesoasoani le iloa o le titania o “se vao po o se laau e oona e tali foliga tutusa ma le saito. E le mafai ona iloa le eseesega mai le saito seiloga ua matua” (Taiala i Tusitusiga Paia, “ Titania,” scriptures.ChurchofJesusChrist.org).

Ina ia fesoasoani i au suesuega, faaaoga lenei mamanu o laasaga e fa:

1. Saili mo auiliiliga taua.

2. Fai ni faatusatusaga faaleagaga.

3. Ia iloa lesona taua.

4. Filimaoti le faaaogaina mo oe lava ia.

• O a ni faamatalaga auiliili i lenei faataoto sa taua ia te oe?

• O a ni faatusatusaga faaleagaga sa e faia?

• O a ni lesona taua na e iloaina?

• E faapefea ona e faaaogaina lesona mai lenei faatoto i lou olaga?

Faitau le Mataio 13:36–43, ma vaavaai po o a mea na aoao atu e le Alii e uiga i lenei faataoto.

• O le a se mea ua faaopoopoina atu e le faamatalaga a le Faaola i lou malamalamaaga i lenei faataoto?

I le tatou tisipenisione, sa faasoa mai e le Alii se tasi o auala e mafai ona faataunuuina ai lenei faataoto. Faitau le Mataupu Faavae ma Feagaiga 101:64–65, ma vaai mo mea na folafola atu le Alii e fai ao lei oo i le Afio Mai Faalua. Atonu e aoga le iloa o le faleteusaito o se fale faapitoa mo le teuina o le saito.

• O a ni mea ua e aoaoina e uiga i le Alii mai nei fuaiupu?

O se upumoni e tasi e mafai ona tatou aoaoina mai lenei faataoto o le saito ma le titania o le i aso mulimuli, o le a faapotopoto e le Alii ia Ona tagata e sauniuni ai mo Lona Afio Mai Faalua.Mafaufau e tusifaamaumau lenei upumoni i autafa o le Mataio 13:30 .

• O faapefea ona faapotopoto e le Alii ia Ona tagata i aso e gata ai?

• O le a lou matafaioi i lenei galuega taua?

O le faapotopotoina o Isaraelu

Ina ia fesoasoani i tagata aoga ia malamalama loloto i le faapotopotoina o Isaraelu, mafaufau e fai ni kopi o vaega o le saunoaga lenei a Peresitene Nelson, faatasi ma faamatalaga mai le vaega o “Tala ma Faamatalaga o Talaaga”.

Faaali atu nei faamatalaga i vaega eseese o le potuaoga, ma valaaulia tagata aoga e savalivali ma faitau iai. A uma ona suesue i nei faamatalaga, e mafai ona faasoa atu e tamaiti aoga o latou manatu i se paga.

Sa aoao mai Peresitene Nelson e uiga i taumafaiga a le Alii e faapotopoto Lona nuu i aso e gata ai. Matamata i le “Faamuamua le Atua” mai le taimi 4:07 agai le 5:48, pe faitau i le anotusi lenei. E mafai foi ona e sueina ni isi mau po o isi saunoaga e faalolotoina atili ai lou malamalama i le faapotopotoina o Isaraelu.

O loo faapotopotoina e le Alii i latou o loo loto e faamuamua le Atua i o latou olaga. O loo faapotopotoina e le Alii i latou o le a filifili e avea le Atua ma faatosinaga sili ona taua i o tatou olaga.

Mo le tele o seneturi, na valo’ia ai lava e perofeta lenei faapotopotoina, ma o loo tupu i le taimi nei lava! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi!

O lenei faapotopotoina a o lumanai ai le meleniuma o se talatuu faaletagata lava ia o le faalauteleina o le faatuatua ma le lototele faaleagaga mo le faitau miliona o tagata. Ma i le avea ai ma tagata O Le Ekalesia a Iesu Keriso o le Au Paia o Aso e Gata Ai, po o le “feagaiga a Isaraelu o aso e gata ai,” ua poloaiina ai i tatou e fesoasoani i le Alii i lenei galuega taua tele.

Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu.

(Russell M. Nelson, “Ia Faamuamua le Atua,” Ensign po o le Liahona, Nov. 2020, 92–93)

• O a ni mea ua e malamalama i ai e uiga i le faapotopotoina o Isaraelu?

• O a ni ou fesili e uiga i nei mea?

• O lea se mea i le faataoto i le saito ma titania ua fesoasoania ia te oe e malamalama i le taua o le faapotopotoina o Isaraelu?

O lou matafaioi i le faapotopotoina o Isaraelu

Matamata i le vitio “Gatherers in the Kingdom” (1:50) pe faitau i le faamatalaga lenei mai ia Peresitene Russell M. Nelson, ma vaai mo le auala e fesootai ai le faapotopotoina o Isaraelu ia te oe:

La’u autalavou pele tulagaese, na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto Isaraelu. E leai se mea o tupu i le lalolagi i le taimi nei, e sili atu ona taua nai lo lena. E leai se isi mea e sili atu lona taunuuga. E matua leailava.

O lenei faapotopotoina e tatau ona avea ma mea uma ia te oe. O le misiona lenei na auina mai ai oe i le lalolagi.

O la’u fesili la lea ia te oe “Pe ua e loto ea e auai i se vaega o talavou a le Alii e fesoasoani e faapotopoto ia Isaraelu?”

(Russell M. Nelson ma Wendy Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, 12, ChurchofJesusChrist.org)

Faatalanoa ma le vasega o latou manatu e uiga i le faapotopotoina o Isaraelu ma auala e mafai ona latou fesoasoani ai. E mafai ona fesoasoani mea nei i tagata aoga e mafaufau loloto ai i mea ua latou aoaoina i le aso.

Tusi se parakalafa po o ou mafaufauga ma manatu e uiga i le faapotopotoina o Isaraelu ma le faataoto o le saito ma le titania. Valaaulia le Agaga Paia e musuia ou mafaufauga ma lagona ao e tusitusi. O fesili nei e mafai ona fesoasoani atu ia te oe e filifili ai se mea e te tusia ae ua nao se taiala.

• O a ni ou fesili e uiga i le faapotopotoina o Isaraelu sa iai muamua ua mafai ona e taliina i le taimi nei?

• O le a se mea ua e aoaoina i le faapotopotoina o Isaraelu e uiga i le faatuatuaina o oe e le Faaola ma Lona alofa mo tagata uma?

• E faapefea ona e fesoasoani ia te oe lava faapea ma isi ia faapotopoto ma le nuu o le Alii?

Tala ma Faamatalaga o Talaaga

Aisea e manao ai le Alii e faapotopoto mai Lona nuu?

Na aoao mai Elder David A. Bednar o le Korama a Aposetolo e Toasefululua e faapea:

E faapotopoto e le Alii Lona nuu pe a latou talia o ia ma tausi Ana poloaiga. …

… E faapotopoto e le Alii Lona nuu e tapuai, e atinae le Ekalesia, mo se puipuiga, ma ia maua fautuaga ma faatonuga. …

Na ta’utino mai e le Perofeta o Iosefa Samita e faapea, o tupulaga uma, o le faamoemoega paia o le faapotopotoina o le fausia lea o malumalu ina ia mafai ai e fanau a le Alii ona maua sauniga aupito silisili ma maua ai le ola e faavavau.

(David A. Bednar, “The Spirit and Purposes of Gathering” [faigalotu a le Iunivesite o Polika Iaga–Idaho, 31 Oketopa, 2006], byui.edu)

O a faleteusaito ia o le a faapotopotoina i ai e e amiotonu mo le saogalemu?

Na aoao mai Elder David A. Bednar o le Korama a Aposetolo e Toasefululua e faapea:

[O le] fesootaiga moomia i le va o le mataupu faavae o le faapotopotoina ma le fausiaina o malumalu o loo faamamafaina i totonu o le Tusi a Mamona:

“Faauta, sa matua le faatoaga, ma amuia lava outou, ona sa outou sasau atu le selesaito, ma outou selesele mai ma lo outou malosi, ioe, sa outou galulue i le aso atoa; ma faauta i le tele o a outou fusisaito! Ma o le a faaputuputuina i latou i falesaito, ina ia le faamaʼumauina i latou” ( Alema 26:5).

O fusisaito i lenei faatusatusaga ua faatusa i tagata fou faatoa papatisoina i le Ekalesia. O faleteusaito o malumalu paia.

(David A. Bednar, “Taofi ma le Mamalu o se Igoa ma le Tulaga,” Ensign po o le Liahona, Me 2009, 97)

O le a le matafaioi a le Tusi a Mamona i le faapotopotoina o Isaraelu?

Na aoao mai Peresitene Russell M. Nelson:

O le Tusi a Mamona e totonugalemu i lenei galuega. O loo folafola mai ai le aoaoga faavae o le faapotopotoina mai. E mafua ai ona aoao tagata e uiga ia Iesu Keriso, e talitonu i Lana talalelei, ma auai i Lana Ekalesia. O le mea moni, afai e leai se Tusi a Mamona, o le a le tupu le faapotopotoina folafolaina o Isaraelu.

(Russell M. Nelson, “O Le Faapotopotoina o Isaraelu ua Faataapeapeina,” Ensign po o le Liahona, Nov. 2006, 80)

Gaoioiga Faaopoopo e Aoao Mai Ai

E faapotopoto e le Alii Lona nuu

E ui ua valaaulia tatou e le Alii e auai ma Ia ao Ia faapotopotoina Lona nuua, ae o le iuga o Ia lava e faatinoina le faapotopotoina. Mafaufau e valaaulia le vasega e suesue i ni isi pe suesue uma mau nei, ma vaavaai mo aoaoga a le Alii e uiga i Lana matafaioi i le faapotopotoina o Lona nuu: Teuteronome 30:3 ; Isaia 27:12 ; 54:7 ; Esekielu 34:12 ; 1 Nifae 22:25 ; Iakopo 5:71–72 ; Mataupu Faavae ma Feagaiga 29:1–2 ; 33:6 .

O se isi gaoioiga e mafai ona fai, o le valaaulia o tagata aoga e suesue i le “ Isaraelu ” i le Taiala i Tusitusiga Paia, ma vaavaai mo fuaitau o mau e faamatalaina ai le matafaioi a le Alii i le faapotopotoina o Lona nuu.

E tuputupu ae faatasi o e amiotonu ma e amioleaga

E mafai ona aoga i tagata aoga le mafaufau i auala na fa’aaogaina ai e le Faaola le faataoto o le saito ma titania (vao oona) e aoao mai ai o le a faapotopoto e le Alii e e amiotonu i aso e gata ai ona faaumatia ai lea o e amioleaga i Lona Afio Mai Faalua. A maea ona aoao e le vasega le faataoto i le Mataio 13:24–30, e mafai foi ona latou suesue i le Mataupu Faavae ma Feagaiga 86:1–7, ma vaavaai mo ni faamatalaga faaopoopo e tuuina mai e lenei faaaliga. E mafai ona faatalatalanoa e tagata aoga ia fesili e pei o nei: O a mea ua faatusa i ai faailoga o i lenei faataoto? O faapefea ona faaalia le alofa mutimutivale o le Alii i lenei faataoto?