Mataio 13

Na Faaaoga E Iesu Keriso Faataoto E Aoao Atu Ai

While on a ship, Jesus teaches parables to listeners on shore.

O tagata lulu saito ma tagata sele saito, o fua o le sinapi ma mea faafefete, o oa ma penina—o nisi nei o faatusa na faaaoga e Iesu Keriso a o Ia aoao atu i faataoto. “O le ua i ai taliga e faalogo ai, ina faalogo mai ia o ia” (Mataio 13:9, 43), o le valaaulia lea a le Faaola. O lenei lesona o le a avatu ai mo oe ni avanoa e suesue ai i faataoto, ia maua ai lo latou uiga faaleagaga, ma ia vaavaai ai mo auala e faatino ai mea ua e aoaoina.

O le faamatalaina ma le faaaogaina o faataoto. A o suesue tamaiti o le vasega i faataoto a Iesu, manatua e lē gata ona tatau ona malamalama i o latou uiga masani, ae e taua le saili mo faaaliga mai le Agaga Paia e fesoasoani mai ai ia i tatou e faamatala ma faaaoga faataoto mo o tatou lava olaga.

Sauniuniga a le tamaitiiti o le vasega: Valaaulia tamaiti o le vasega e iloilo lo latou agavaa e malamalama ai i faataoto a le Alii. E mafai ona faitau e tamaiti o le vasega le Mataio 13:44–48 ma fuaina lo latou mautinoa o lo latou agavaa e maua ai lesona faaleagaga mai nei faataoto pupuu.

Gaoioiga e Mafai ona Faaaoga e Aoao Ai

Vaavaai mo uiga

Mafaufau e faaali i tagata o le vasega se ata o loo natia ai ni mea i totonu. Valaaulia tamaiti o le vasega e saili mea o loo natia ma talanoaina pe o a ni taumafaiga na latou manaomia ona fai ina ia maua ai ia mea.

Faaalu sina taimi puupuu e sailia ai mea ua natia o loo i totonu o le ata o loo i lalo.

O a mea na faigofie ia te oe ona maua? O a mea na manaomia ai nisi o taumafaiga?

E pei o le sailiga mo mea i totonu o lenei ata, o le sailiga mo le uiga o mau e tele ona manaomia ai ona tatou aoao pe faapefea ona sailia ma suesue i latou. A tatou valaaulia le Agaga Paia e fesoasoani mai ia i tatou e suesue i mea o loo tatou faitauina, e mafai ona tatou mauaa ai ni uiga faaopoopo sa ono natia i le amataga.

O le a se taimi na e mauaina ai le uiga o mau sa ono natia mai ia te oe i le amataga?
O le a se mea na fesoasoani ia te oe na faamanuiaina ai lou mauaina o lesona faaleagaga po o le uiga mai mau?

E ono lelei lenei taimi o le lesona e valaaulia ai tamaiti o le vasega e lipoti mai i a latou sauniuniga mo le vasega.

I lenei lesona, o le a e mauaina ai le avanoa e faataitai ai ona saili mo le uiga loloto o mau, ae maise ai i faataoto a le Alii. Taumafai e saili ma faatino ni auala fou e fesoasoani ia te oe e suesue ai i mau.

Na faaaoga e Iesu Keriso faataoto e aoao atu ai

Sa tele ona aoao atu Iesu Keriso e ala i le faaaogaina o ni tala pupuu ua ta’ua o faataoto. I nei faataoto, na faatusaina ai e Iesu meafaitino taatele po o tulaga masani i upumoni faaleagaga (tagai i le Taiala i Tusitusiga Paia, “ Faataoto,” scriptures.ChurchofJesusChrist.org). Sa i ai le taimi na fesiligia ai e soo o Iesu o Ia pe aisea na Ia aoao atu ai i faataoto (tagai i le Mataio 13:10).

Faitau i le Mataio 13:11–13, 16, ma vaavaai pe aisea na fetalai ai le Faaola e aoao atu o Ia i faataoto.

O le a se mea ua fesoasoani atu ai nei fuaiupu e te malamalama ai e uiga pe aisea na aoao atu ai le Faaola i faataoto?
Aisea ua e manatu e vaai, faalogo, ma malamalama ai isi tagata i feau a le Alii ae lē mafai e isi?

O lesona o le a fai mulimuli ane o le a talanoaina ai nisi faataoto e tau umi atu, e pei o le faataoto i le lulu saito ma le faataoto i saito ma titania.

O le faagasologa o le a mulimuli mai nei e mafai ona fesoasoani ia te oe e malamalama atili ai i faataoto a le Faaola ma aoao mai ai lesona faaleagaga taua. Ia faamaumau nei laasaga i totonu o lau api talaaga o suesuega.

Saili mo auiliiliga taua.
Fai ni faatusatusaga faaleagaga.
Saili mo lesona taua.
Faamautinoa le faaaogaina mo oe lava ia.

Faataitai ona fai nei laasaga taitasi a o e tagai i se faataoto puupuu.

O se faataitaiga lenei o le faaaogaina o nei laasaga e fa a o suesue i le Mataio 13:44 . E pule oe pe faaaoga lenei faataitaiga po o nisi e fesoasoani ai i tagata aoga e aoao pe faapefea ona mauaina lesona mai faataoto ma le faaaogaina o faataoto i auala o le a fesoasoani tele ai ia i latou.

Saili mo auiliiliga tauaFaataitai ona fai le laasaga muamua o lenei faagasologa i le faitauina o le Mataio 13:44 ma vaavaai mo auiliiliga taua. E mafai ona aofia i nei auiliiliga tagata, nofoaga, meafaitino, faatinoga, po o mea tutupu. E mafai ona e faailogaina mea ua e mauaina i totonu o au tusitusiga paia.

O a ni auiliiliga taua sa e mauaina?

O auiliiliga sa e ono matauina e aofia ai le oa, le tagata na mauaina, ma lona faatauina atu o ana mea uma ina ia maua ai e ia.Fai ni faatusatusaga faaleagagaO le faia o faatusatusaga faaleagaga e ono tupu fua a o e mauaina auiliiliga taua, ae e ono manaomia foi se taumafaiga e sili atu. Aua e te fefe e manatunatu i auiliiliga ma vaavaai mo faailo, i le faaaogaina o fesoasoani mo mau o loo avanoa mo oe.

Mafaufau pe faaali ni nai meafaitino masani e mafai ona faaaogaina e tagata aoga e faataitai ai ona fai ni faatusatusaga faaleagaga, e pei ona faamatalaina i le palakalafa o le a mulimuli mai nei.

Mo le faataitaiga o lenei tomai, fai sina taimi puupuu e faatusatusa ai nisi meafaitino i mea faaleagaga. Mo se faataitaiga, e mafai ona e faatusaina se titina i le mataupu faavae o le salamo.

O a ni faatusatusaga na e mafaufau i ai?

I le faataoto o loo i le Mataio 13:44, na fesoasoani mai ia i tatou le Faaola i le faia o se tasi fesootaiga i le taimi na Ia fetalai mai ai, “E tusa foi le malo o le lagi i le oa” ( Mataio 13:44).

O a ni faatusatusaga faaleagaga e mafai ona e faia e faaaoga ai isi auiliiliga o lenei faataoto?

Saili mo lesona tauaIna ia maua lesona taua, e ono fai ma fesoasoani le faia o ni fesili e uiga i auiliiliga sa e matauina ma faatusatusaga faaleagaga na e faia.

Afai ua tatou iloa “O le malo o le Atua i le lalolagi O Le Ekalesia a Iesu Keriso o le Au Paia o Aso e Gata Ai” (Taiala i Tusitusiga Paia, “ Malo o le Atua po o le Malo o le Lagi,” scriptures.ChurchofJesusChrist.org), o a la ni lesona sa ono manao le Faaola e tatou te malamalama i ai mai Lana faataoto?

O se tasi o lesona e ono mafai ona tatou aoaoina mai lenei faataoto o le taimi e tatou te mauaina ai le Ekalesia a le Faaola ma iloaina lona taua, e tatau ona tatou lafoai ma le fiafia isi mea uma ina ia taliaina ai le faamanuiaga o le avea ma vaega o le malo o le Atua. Mafaufau pe faamaumau lesona taua ua e aoao i ai i totonu o au Faamatalaga i luga o le ChurchofJesusChrist.org po o i totonu o au tusitusiga paia.Faamautinoa le faaaogaina mo oe lava iaFaamautinoa le faaaogaina mo oe lava ia i le toe fesili lava o oe ia te oe po o a ni mea o manaomia ona e faia i lou lava olaga ina ia faaaoga i ai lesona ua e mauaina.

I le tele o auala e mafai ai ona faaaogaina lenei upumoni, e mafai ona tatou mafaufau e fai se tautinoga e atili auauna ma le faatuatua i se valaauga i le Ekalesia po o le lafoai o mea uma o o tatou olaga o loo taofia i tatou mai le taliaina atoatoa o faamanuiaga o le talalelei a Iesu Keriso.

Na faapefea e le mulimulitaia o lenei auala mo le faia o suesuega ona fesoasoani ia te oe e maua ai le uiga mai lenei faataoto puupuu?

Uunai tagata aoga e taumafai pea ma ia aua nei loto vaivai pe afai e faafaigata ona latou malamalama i faataoto.

Filifili i se tasi o mau faasino o tusitusiga paia o le a mulimuli mai nei, ma mulimulitai i laasaga taitasi e fa ua faamatalaina i luga. (A maea, e mafai ona e faataitai i se tasi pe sili atu o isi mau faasino.)

O le a se mea na e maua a o e suesueina le faataoto i le faaaogaina o laasaga e fa?
O le a se mea ua e manatu e mafai ona tatou aoaoina e uiga i le Faaola e ala i Lana filifiliga e faaaoga faataoto e aoao atu ai lesona taua?

Tala ma Faamatalaga o Talaaga

Aisea na faaaoga ai e Iesu Keriso faataoto e aoao atu ai?

“E tuuina atu e le faataoto i le e faalogo, ia mea moni faalelotu e fetaui tonu lava le tele ma lona faatuatua ma le poto; i e le fia faalogo ma e le musuia, ua na o se tala, ‘e vaai ae le vaai ai,’ ae i e ua aoaoina ma e faaleagaga, e faaalia ai mealilo po o mea natia o le malo o le lagi. O lea, ua faaalia ai e le faataoto le tulaga o le malamalama moni uma. Ua na o lē e saili e maua e ia” (Bible Dictionary, “ Parables ”).

Aisea e taua ai ona saili mo le uiga mai faataoto ma a tatou aafiaga?

Na aoao mai David A. Bednar o le Korama a Aposetolo e Toasefululua e faapea:

E tatau ia i tatou taitoatasi ona saili mo lesona ma lapataiga o loo maua i mea faigofie e tutupu i le olaga i aso uma. Pe a tatou saili mo se mafaufau ma se loto e tatala atu ia maua le taitaiga faalelagi e ala i le mana o le Agaga Paia, o le a mafai e nisi o aoaoga aupito silisili e mafai ona tatou mauaina ma le tele o lapataiga sili ona mamana e mafai ona malupuipuia ai i tatou, ona tupu mai i o tatou lava aafiaga masani. O loo i ai ni faataoto mamana i tusitusiga paia ma i o tatou olaga i aso taitasi.

(David A. Bednar, “Mataala Pea i le Tatalo,” Ensign po o le Liahona, Nov. 2019, 34)

O a mea o aoao mai e faataoto mai le Mataio 13 e uiga i aso mulimuli?

Na aoao mai le Perofeta o Iosefa Samita (1805–44) o faataoto a le Faaola i le Mataio 13 e fesoasoani mai ai ia i tatou e malamalama i le potopoto faatasi mai o tagata i totonu o le Ekalesia i taimi o le Feagaiga Fou faapea foi i aso mulimuli: “O fetalaiga a le Faaola, e pei ona faamaumauina i le mataupu 13 o Lana Talalelei e tusa ma faamatalaga a le tagata paia o Mataio, … i lou manatu, o loo aumai ai ia i tatou se malamalamaga manino i le mataupu taua o le potopoto faatasi e pei ona faamaumauina i totonu o le Tusi Paia” (“To the Elders of the Church of the Latter Day Saints,” Latter Day Saints’ Messenger and Advocate, Dec. 1835, 2:225; ua faafouina le sipelaina o upu, faateteleina o mataitusi, ma faailoga).

Mo nisi faamatalaga e uiga i aoaoga a Iosefa Samita i le ala e faatatau ai faataoto i le Mataio 13 i le faapotopotoga i aso e gata ai, tagai i le siata o loo maua i le “Mataupu 5: Mataio 13–15” i le Tusi Lesona a le Tagata Aoga o le Feagaiga Fou (2018).