Mateu 13:3–8, 18–23

Shëmbëlltyra e Mbjellësit

Jezusi dha mësim një shëmbëlltyrë për një njeri që mbillte fara. Këto fara ranë në lloje të ndryshme toke, çka solli rezultate të ndryshme. Po kështu, fjala e Perëndisë merret në mënyra të ndryshme nga ata që e dëgjojnë. Ky mësim do të të ndihmojë ta përgatitësh zemrën për ta marrë dhe për t’u ushqyer me fjalën e Perëndisë.

Përdorimi i sendeve dhe figurave. Sendet dhe figurat mund t’i ndihmojnë nxënësit të përfytyrojnë njerëzit, vendet, ngjarjet, gjërat dhe simbolet në shkrimet e shenjta. Për shembull, në vend që thjesht të flisni për sendet në shkrimet e shenjta, ftojini nxënësit t’i vizatojnë.

Përgatitja e nxënësve: Ftojini nxënësit ta përsiatin këtë pyetje nga përvijimi i kësaj jave tek Eja, Më Ndiq – Për Individët dhe Familjet: “Pse ndonjëherë zemrat tona e pranojnë të vërtetën, ndërsa në raste të tjera kemi tundimin t’i rezistojmë?” (“20–26 mars. Mateu 13; Lluka 8; 13: ‘Kush Ka Vesh për të Dëgjuar, Le të Dëgjojë’”, Eja, Më Ndiq – Për Individët dhe Familjet: Dhiata e Re 2023).

Veprimtari të Mundshme të të Mësuarit

Përgatitu për ta dëgjuar fjalën e Perëndisë

Merrni parasysh ta filloni orën mësimore duke i ftuar disa nxënës të japin përgjigjet e tyre për pyetjen që u ftuan të përsiatin gjatë përgatitjes për orën mësimore.

Merr pak kohë për të vlerësuar se sa i gatshëm je për ta marrë fjalën e Perëndisë. Përdore këtë vlerësim me secilin nga pohimet e mëposhtme:

Shpesh–Ndonjëherë–Rrallë herë

Paraqitini pohimet ose lexojini ato ngadalë në mënyrë që nxënësit të kenë kohë të mendojnë për pranimin e tyre vetjak të fjalës së Perëndisë. Nxënësit duhet të përsiatin në heshtje për përgjigjet e tyre dhe të mos përgjigjen me zë të lartë.

Unë i studioj shkrimet e shenjta me qëllim që të mësoj dhe të rritem në karakter.

Unë përpiqem ta dalloj ndikimin e Shpirtit në jetën time dhe t’i ndjek udhëzimet që më janë dhënë.

Unë e dëgjoj dhe i bindem këshillës së dhënë nga Zoti nëpërmjet profetëve dhe apostujve të Tij.

Unë kërkoj ta forcoj dëshminë time vetjake për Jezu Krishtin dhe ungjillin e Tij.

Tani që e ke shqyrtuar qëndrimin tënd për fjalën e Perëndisë, je gati për ta studiuar shëmbëlltyrën e mbjellësit. Në këtë shëmbëlltyrë, Zoti përmendi disa probleme të mundshme që mund t’i pengonin farat të rriteshin, të lëshonin rrënjë dhe të jepnin frutë. Ashtu si me të gjitha shëmbëlltyrat e Tij, Zoti përdori elemente të njohura për të dhënë mësime shpirtërore.

Përdor modelin e mëposhtëm me katër hapa për të studiuar shëmbëlltyrën e mbjellësit. Pavarësisht se si u përgjigje për pohimet e mësipërme, ky mësim është hartuar të të ndihmojë ta përgatitësh zemrën për të marrë bekimet që Zoti dëshiron të të japë. Ndërsa studion, kërko mënyra për të pasur një përvojë kuptimplotë me fjalën e Perëndisë.

Nëse ky model u paraqit në mësimin e mëparshëm, merrni parasysh t’u kërkoni nxënësve të kujtojnë secilin nga hapat dhe pastaj t’i shkruajnë ato në tabelë.

Gjej hollësi të rëndësishme.
Bëj krahasime shpirtërore.
Zbulo mësime të vyera.
Përcakto zbatimin në planin personal.

Gjej hollësi të rëndësishme

Për veprimtarinë e mëposhtme, nxënësit mund të punojnë në dyshe. Një nxënës në secilën dyshe mund të lexojë grupin e parë të vargjeve, ndërsa tjetri të theksojë hollësi të rëndësishme. Pastaj secili mund të bëjë një vizatim në ditarin e vet të studimit. Nxënësit pastaj mund të ndërrojnë rolet dhe ta përsëritin procesin për grupet e tjera të vargjeve.

Një mënyrë për të përfytyruar hollësi të rëndësishme është ta vizatosh secilën pjesë të shëmbëlltyrës. Ndaje një faqe në ditarin tënd të studimit në katër pjesë. Lexoji vargjet dhe bëj një vizatim të thjeshtë të asaj që përshkruhet.

Drawings of a bird with a seed, the sun shining on a plant, thorns growing around a plant, a wheat plant.

Bëj krahasime shpirtërore

Lexo shpjegimet e Jezusit për shëmbëlltyrën në vargjet e mëposhtme. Shkruaje çdo krahasim që bëri Ai afër vizatimeve të tua.

Nxënësit mund të punojnë individualisht, në dyshe ose në grupe të vogla. Nëse punojnë në grupe, ndajini vargjet midis anëtarëve të grupit dhe kërkojuni nxënësve t’ia raportojnë grupit të vet atë që gjejnë.

Zbulo mësime të vyera

Për të zbuluar mësime të vyera, mund të jetë e dobishme të bësh pyetje që e lejojnë Frymën e Shenjtë të të mësojë ty personalisht. Përveç pyetjeve të mëposhtme, mendo për pyetje të tjera që mund t’i bësh.

Çfarë mund të dëshirojë Shpëtimtari që të mësoj nga kjo shëmbëlltyrë?
Pse Shpëtimtari do të donte ta njihja zemrën time?

Mund dhe të përfytyrosh se si mund të zbatohet shëmbëlltyra në jetën reale. Për shembull, përpiqu të përfytyrosh se si veprimet e një personi, zemra e të cilit është si gurishtë, apo tokë me ferra, mund të jenë ndryshe nga veprimet e një personi, zemra e të cilit është si tokë e mirë. Ndërsa mendon për këto veprime, merr parasysh t’i shkruash disa prej tyre afër secilit prej vizatimeve të tua.

Nxënësve mund t’u kërkohet të japin disa shembuj të veprimeve që shkruan. Nëse nxënësit kanë vështirësi për të menduar për shembuj, mund të jenë të dobishëm skenarët në pjesën “Veprimtari Plotësuese të të Mësuarit”.

Çfarë sugjerimesh mund t’i japësh dikujt që e ka zemrën të ngurtë, gurishtë apo me ferra?

Përcakto zbatimin në planin personal

Mendo për gjendjen e zemrës tënde dhe se cilat nga katër llojet e tokës të përshkruajnë ty më së miri. Nëse gjendja shpirtërore e zemrës tënde nuk është aktualisht ajo që ti dëshiron, dije se mund ta ndryshosh.

Bazuar në atë që ke mësuar sot, gjej një çast për të përsiatur mbi atë që mund të bësh për ta përmirësuar gjendjen e zemrës tënde.

Çfarë do të bësh për ta ftuar fjalën e Perëndisë në zemrën tënde?
Çfarë veprimesh do të ndërmarrësh për ta përmirësuar gjendjen e zemrës tënde?
Për cilat pengesa do t’i kërkosh Zotit ndihmë për t’i kapërcyer?

Jepuni nxënësve mundësinë për të treguar atë që mësuan sot për Zotin dhe dëshirën e Tij që fjala e Tij të rritet në zemrat tona.

Komente dhe Informacion për Rrethanat

Presidenti Dallin H. Ouks, i Presidencës së Parë, dha një bisedë në konferencën e përgjithshme mbi shëmbëlltyrën e mbjellësit. Pyetjet e mëposhtme kanë marrë përgjigje duke përdorur shpjegimet e tij.

Çfarë janë farat që “ra[në] përgjatë rrugës”? (Shih Mateu 13:4, 19 .)

“Farat që ‘ra[në] gjatë rrugës’ ( Marku 4:4) nuk e arritën tokën e vdekshme, ku ndofta mund të rriteshin. Ato janë si mësimet që i paraqiten një zemre të ngurtësuar ose të papërgatitur.”

(Dallin H. Ouks, “Shëmbëlltyra e Mbjellësit”, Ensign ose Liahona, maj 2015, f. 32.)

Çfarë gjërash mund të ndikojnë që zemra e dikujt të jetë në “gurishte”? (Shih Mateu 13:5, 20–21 .)

“Të rinj, … ja tek është një shembull specifik. Nëse po shpërndahen emblemat e sakramentit dhe ju po shkruani mesazhe, ose po pëshpëritni, apo po luani lojëra kompjuterike, ose po bëni çfarëdo gjëje tjetër që t’i mohoni vetes ushqimin e domosdoshëm shpirtëror, ju po i dobësoni rrënjët tuaja shpirtërore dhe po e çoni veten drejt gurishtes.”

(Dallin H. Ouks, “Shëmbëlltyra e Mbjellësit”, Ensign ose Liahona, maj 2015, f. 33.)

Si mund t’i njohim “ferrat” e jetës? (Shih Mateu 13:7, 22 .)

“Ne u dorëzohemi ‘kënaqësive të kësaj jete’ [ Lluka 8:14 ] 1) kur krijojmë varësi, e cila dobëson dhuratën e çmuar të lirisë së zgjedhjes nga Perëndia; 2) kur ne mashtrohemi nga argëtimet e parëndësishme, që na largojnë nga gjërat me rëndësi të përjetshme; dhe 3) kur kemi një mendësi se bekimet na takojnë me të drejtë, gjë që e dobëson rritjen vetjake të nevojshme për të na kualifikuar për fatin tonë të përjetshëm.

Ne mposhtemi nga ‘shqetësimet … e kësaj jete’ [ Lluka 8:14 ] kur shtangemi nga frika për të ardhmen, e cila e pengon ecjen tonë përpara me besim, duke i mirëbesuar Perëndisë dhe premtimeve të Tij.”

(Dallin H. Ouks, “Shëmbëlltyra e Mbjellësit”, Ensign ose Liahona, maj 2015, f. 34.)

Çfarë duhet për të nxjerrë fruta nga “tok[a] e mirë”? (Shih Mateu 13:8, 23 .)

“Ne e kemi farën e fjalës së ungjillit. Është në dorën e secilit prej nesh që të vendosë përparësi dhe të bëjë gjërat që e bëjnë tokën tonë të mirë dhe të korrën tonë të bollshme. Ne duhet të kërkojmë që të jemi të rrënjosur dhe të kthyer në besim me vendosmëri tek ungjilli i Jezu Krishtit (shih Kolosianëve 2:6–7). Ne e arrijmë këtë kthim në besim me anë të lutjes, me anë të leximit të shkrimeve të shenjta, me anë të shërbimit dhe me anë të marrjes së sakramentit rregullisht që gjithnjë të kemi Shpirtin e Tij me ne.”

(Dallin H. Ouks, “Shëmbëlltyra e Mbjellësit”, Ensign ose Liahona, maj 2015, f. 35.)

Veprimtari Plotësuese të të Mësuarit

Shqyrto tokën para mbjelljes

Ndajini nxënësit në grupe të vogla dhe jepini secilit grup një enë të vogël të mbushur me llojin e tokës të përshkruar në shëmbëlltyrën e mbjellësit. Ftojini nxënësit ta shqyrtojnë tokën dhe të diskutojnë se çfarë do të bëjnë për ta bërë atë ideale për mbjelljen e një fare. Nxënësve mund t’u kërkohet ta studiojnë shëmbëlltyrën duke kërkuar se çfarë mund të përfaqësojë shpirtërisht ajo lloj toke dhe të diskutojnë me grupin e vet se çfarë mund të mësojnë nga kjo.

Shëmbëlltyra në jetën reale

Merrni parasysh të përdorni skenarët e mëposhtëm për t’i ndihmuar nxënësit të përcaktojnë llojet e tokës ose gjendjet e zemrës. Nxënësit mund të ofrojnë sugjerime për ta ndihmuar personin në secilin skenar të afrohet më pranë Shpëtimtarit dhe të lejojë që Fjala e Perëndisë të rritet në zemrën e tij.

Skoti u njoh me ungjillin e rivendosur nga miqtë e tij dhe u pagëzua shpejt pas kësaj. Megjithatë, disa muaj pasi iu bashkua Kishës, disa njerëz filluan ta ngacmonin për bindjet e tij të reja. Skoti ndjeu se nuk mund ta përballonte vëmendjen negative nga të tjerët.

Xhili është mirë në shkollë, luan në teatër dhe i pëlqen puna që bën. Për shkak të përgjegjësive në shkollë dhe në punë, Xhili ka zgjedhur t’i anashkalojë aktivitetet e Kishës dhe nuk është regjistruar në seminar këtë vit. Ajo me të vërtetë dëshiron të përqendrohet në arsimin e saj dhe në karrierën e ardhshme.

Bërja e krahasimeve duke përdorur Librin e Mormonit

Ftojini nxënësit të lexojnë krahasimin nga Alma të fjalës së Perëndisë me një farë (shih Alma 32:26–43). Ata mund të studiojnë gjithashtu ëndrrën e Lehit për pemën e jetës dhe të krahasojnë çdo grup të përshkruar në vegim me llojet e tokës në shëmbëlltyrën e mbjellësit (shih 1 Nefi 8:19–34). Nxënësit mund të tregojnë se si këto rrëfime të Librit të Mormonit e shtojnë kuptueshmërinë e tyre për mësimet e Shpëtimtarit në shëmbëlltyrën e mbjellësit.