Mateo 13:3–8, 18–23

Ang Sambingay sa Magpupugas

Nagtudlo si Jesus og sambingay mahitungod sa tawo nga nagpugas og mga binhi. Kini nga mga binhi nahulog sa lain-laing mga matang sa yuta, nga miresulta sa lain-laing mga sangpotanan. Sama niini, gidawat ang pulong sa Dios sa lain-laing mga paagi sa mga tawo nga nakadungog niini. Makatabang kini nga leksiyon sa pag-andam sa imong kasingkasing sa pagdawat ug pag-amuma sa pulong sa Dios.

Paggamit og mga butang ug mga hulagway. Ang mga butang ug mga hulagway makatabang sa mga estudyante sa paghanduraw sa mga tawo, mga lugar, mga panghitabo, mga butang, ug mga simbolo diha sa mga kasulatan. Pananglitan, imbes nga mag-istoryahanay lamang mahitungod sa mga butang diha sa mga kasulatan, dapita ang mga estudyante nga idrowing kini.

Pag-andam sa estudyante: Dapita ang mga estudyante nga pamalandongan kini nga pangutana gikan sa outline karong semanaha sa Dali, Sunod Kanako—Alang sa mga Indibidwal ug mga Pamilya: “Ngano man nga usahay ang atong kasingkasing modawat sa kamatuoran, apan usahay matintal kita nga mosupak niini?” (“Marso 20–26. Mateo 13; Lucas 8; 13: ‘Ang may mga Dalunggan nga Makadungog, Kinahanglan Siya Magpatalinghog’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023).

Posible nga mga Kalihokan sa Pagkat-on

Andama ang imong kaugalingon sa pagpaminaw sa pulong sa Dios

Ikonsiderar ang pagsugod sa klase pinaagi sa pagdapit sa pipila ka estudyante nga ipaambit ang ilang mga tubag sa pangutana nga gidapit sila nga pamalandongan para sa pag-andam para sa klase.

Pagtagana og panahon aron susihon kon unsa ka kaandam nga modawat sa pulong sa Dios. Gamita kini nga sukdanan sa kada usa sa mosunod nga mga pamahayag:

Kanunay—Usahay—Panagsa

Ipakita ang mga pamahayag o basaha kini og hinay aron ang mga estudyante adunay panahon nga maghunahuna sa ilang personal nga pagdawat sa pulong sa Dios. Hilom nga pamalandongan sa mga estudyante ang ilang mga tubag, dili motubag og kusog.

Nagtuon ko sa mga kasulatan uban sa tinguha nga makakat-on ug mousbaw.

Naningkamot ko sa paghatag og pagtagad sa impluwensya sa Espiritu sa akong kinabuhi ug sundon ang mga direksyon nga gihatag kanako.

Naminaw ako ug mosunod sa tambag nga gitanyag sa Ginoo pinaagi sa Iyang mga propeta ug apostoles.

Nagtinguha ako nga palig-onon ang akong personal nga pagpamatuod kang Jesukristo ug sa Iyang ebanghelyo.

Karon nga nasusi na nimo ang imong pamatasan mahitungod sa pulong sa Dios, andam na ka nga tun-an ang sambingay sa magpupugas. Niini nga sambingay, gilatid sa Ginoo ang pipila sa posibleng problema nga makapugong sa mga binhi sa pagtubo, paggamot, ug pagpamunga. Sama sa tanan Niyang mga sambingay, migamit ang Ginoo og pamilyar nga mga elemento aron itudlo ang espirituhanong mga leksiyon.

Gamita ang mosunod nga upat ka lakang nga sundanan aron tun-an ang sambingay sa magpupugas. Bisan pa kon giunsa nimo pagtubag ang mga pamahayag sa ibabaw, gidisenyo kini nga leksiyon aron tabangan ka sa pag-andam sa imong kasingkasing sa pagdawat sa mga panalangin nga gustong ihatag sa Ginoo kanimo. Samtang nagtuon ka, pangita og mga paagi aron makabaton og makahuluganong kasinatian uban sa pulong sa Dios.

Kon gipaila-ila kini nga sundanan sa miaging leksiyon, ikonsiderar ang paghangyo sa mga estudyante nga hinumdoman ang kada usa sa mga lakang, ug isulat kini sa pisara.

Pangitaa ang importante nga mga detalye.
Pagbuhat og espirituhanong mga pagkompara.
Pagdiskobre og importante nga mga leksiyon.
Pagtuki og personal nga paggamit.

Pangitaa ang importante nga mga detalye

Para sa mosunod nga kalihokan, ang mga estudyante mahimong magbuhat nga magkapares. Ang usa ka estudyante sa kada pares mahimong mobasa sa unang han-ay sa mga bersikulo samtang tukion sa laing estudyante ang importante nga mga detalye. Unya mahimong magdrowing ang kada usa og hulagway diha sa ilang mga journal sa pagtuon. Ang mga estudyante mahimong magbayloay og mga tahas ug balikon ang proseso para sa uban pang mga han-ay sa mga bersikulo.

Ang usa ka paagi sa paghanduraw sa importante nga mga detalye mao ang pagdrowing sa kada bahin sa sambingay. Bahina ang panid sa imong journal sa pagtuon sa upat ka seksiyon. Basaha ang mga bersikulo ug pagbuhat og simpleng drowing bahin sa kon unsa ang gihulagway.

Drawings of a bird with a seed, the sun shining on a plant, thorns growing around a plant, a wheat plant.

Pagbuhat og espirituhanong mga pagkompara

Basaha ang mga pagpasabot ni Jesus bahin sa sambingay diha sa mosunod nga mga bersikulo. Isulat ang bisan unsang mga pagkompara nga Iyang gibuhat tapad sa imong mga drowing.

Ang mga estudyante mahimong magbuhat nga nag-inusara, magkapares, o diha sa gagmay nga mga grupo. Kon magbuhat sila diha sa mga grupo, bahina ang mga bersikulo sa mga sakop sa grupo ug hangyoa ang mga estudyante nga i-report sa ilang grupo kon unsa ang ilang nakit-an.

Pagdiskobre og importante nga mga leksiyon

Aron makadiskobre og importante nga mga leksiyon, makatabang kon magsukna og mga pangutana nga magtugot sa Espiritu Santo nga motudlo kanimo sa personal nga paagi. Agig dugang sa mosunod nga mga pangutana, paghunahuna og uban pa nga mahimo nimong ipangutana.

Unsa kaha ang gusto sa Dios nga akong makat-onan gikan niini nga sambingay?
Ngano man nga gusto sa Manluluwas nga akong mahibaloan kon sama sa unsa ang akong kasingkasing?

Mahimo usab nimong hunahunaon kon sa unsang paagi lagmit nga magamit sa tinuod nga kinabuhi ang sambingay. Pananglitan, sulayi sa paghunahuna kon sa unsang paagi nga ang mga aksiyon sa usa ka tawo kansang kasingkasing sama sa batoon o tunokon nga yuta lagmit nga lahi sa mga aksiyon sa usa ka tawo kansang kasingkasing sama sa maayong yuta. Samtang naghunahuna ka niini nga mga aksiyon, ikonsiderar ang pagsulat sa pipila niini tapad sa kada usa sa imong mga drowing.

Mahimong hangyoon ang mga estudyante nga maghatag og pipila ka pananglitan sa mga aksiyon nga ilang gisulat. Kon naglisod ang mga estudyante sa paghunahuna og mga pananglitan, lagmit nga makatabang ang mga sitwasyon sa seksiyon nga “Dugang nga mga Kalihokan sa Pagkat-on”.

Unsa nga mga sugyot ang matanyag nimo sa usa ka tawo nga ang kasingkasing gahi, batoon, o tunukon?

Pagtuki og personal nga paggamit

Hunahunaa ang kahimtang sa imong kaugalingong kasingkasing ug unsa sa upat ka matang sa yuta ang labing naghulagway kanimo. Kon ang espirituhanong kahimtang sa imong kasingkasing dili ang kasamtangang gusto nimo, hibaloi nga mahimo kang mag-usab.

Base sa imong nakat-onan karon, pagtagana og minuto aron pamalandongan kon unsa ang imong mabuhat aron mapausbaw ang kahimtang sa imong kasingkasing.

Unsa ang imong buhaton aron dapiton ang pulong sa Dios nganha sa imong kasingkasing?
Unsa nga mga aksiyon ang imong buhaton aron mapausbaw ang kahimtang sa imong kasingkasing?
Unsa nga mga babag ang ihangyo nimo sa Ginoo nga tabangan ka sa pagbuntog?

Hatagi ang mga estudyante og oportunidad aron ipaambit ang ilang nakat-onan karon mahitungod sa Ginoo ug sa Iyang tinguha nga motubo ang Iyang pulong sa atong kasingkasing.

Komentaryo ug Background nga Impormasyon

Si Presidente Dallin H. Oaks sa Unang Kapangulohan mihatag og pakigpulong sa kinatibuk-ang komperensiya bahin sa sambingay sa magpupugas. Gitubagan ang mosunod nga mga pangutana gamit ang iyang mga pagpasabot.

Unsa ang mga binhi nga “nahulog sa daplin sa dalan”? (tan-awa sa Mateo 13:4, 19)

Ang mga binhi nga “nahulog sa daplin sa dalan” ( Marcos 4:4) wala makaabot sa mortal nga yuta diin kini posible unta nga motubo. Kini sama sa mga pagtulon-an nga gipresentar ngadto sa usa ka kasingkasing nga gahi o dili andam.

(Dallin H. Oaks, “Ang Sambingay sa Magpupugas,” Liahona, Mayo 2015, 32)

Unsa kaha ang hinungdan nga ang kasingkasing sa usa ka tawo mabutang sa “yuta nga batoon”? (tan-awa sa Mateo 13:5, 20–21)

Mga kabatan-onan, … ania ang piho nga ehemplo. Kon ang sakramento gipaambit ug kamo nag-text o naghinunghungay o nagdula og mga video game o nagbuhat og bisan unsa nga makapugong nga madawat ninyo ang espirituhanong pagkaon, inyong gipahuyang ang inyong espirituhanong mga gamot ug nagpadulong ngadto sa kabatoan.

(DallinH. Oaks, “Ang Sambingay sa Magpupugas,” Liahona, Mayo 2015, 33)

Sa unsang paagi kaha nato mailhan ang “mga tunok” sa kinabuhi? (tan-awa sa Mateo 13:7, 22)

Mitahan kita sa “mga kalipayan niini nga kinabuhi” [ Lucas 8:14 ] (1) kon kita maadik, nga mopaluya sa bililhong gasa sa Dios nga kabubut-on; (2) kon kita malingla sa ginagmay nga pagbalda, nga mopalayo nato sa mga butang nga mahinungdanon sa kahangturan; ug (3) kon kita adunay mentalidad nga kinahanglan kitang makaangkon [entitlement], nga mopaluya sa personal nga paglambo nga mopasarang nato para sa mahangturong kapalaran.

Mabuntog kita sa “mga kabalaka … dinhi sa kinabuhi” [ Lucas 8:14 ] kon kita maparalisar tungod sa kabalaka sa umaabot, nga mopugong sa atong pagpadayon diha sa pagtuo, pagsalig sa Dios ug sa Iyang mga saad.

(Dallin H. Oaks, “Ang Sambingay sa Magpupugas,” Liahona, Mayo 2015, 34–35)

Unsa kaha ang kinahanglanon aron makabunga sa “maayong yuta”? (tan-awa sa Mateo 13:8, 23)

Kita adunay binhi sa pulong sa ebanghelyo. Depende na sa matag usa kanato sa pagpahimutang sa atong mga prayoridad ug sa pagbuhat sa mga butang nga makahimo sa atong yuta nga maayo ug sa atong ani nga daghan. Kinahanglan kitang magtinguha nga lig-ong makagamot ug makabig sa ebanghelyo ni Jesukristo (tan-awa sa Mga Taga-Colosas 2:6–7). Atong makab-ot kining pagkakabig pinaagi sa pag-ampo, pagbasa sa kasulatan, pagserbisyo, ug regular nga pag-ambit sa sakrament aron kanunay nga makabaton sa Iyang Espiritu uban kanato.

(DallinH. Oaks, “Ang Sambingay sa Magpupugas,” Liahona, Mayo 2015, 35)

Dugang nga mga Kalihokan sa Pagkat-on

Susiha ang yuta sa dili pa magtanom

Bahina ang mga estudyante diha sa gagmay nga mga grupo, ug hatagi ang kada grupo og gamay nga sudlanan nga puno sa usa ka matang sa yuta nga gihulagway sa sambingay sa magpupugas. Dapita ang mga estudyante nga susihon ang yuta ug hisgotan kon unsa ang ilang buhaton aron mahimo kining maayo para sa pagtanom og binhi. Mahimong hangyoon ang mga estudyante nga tun-an ang sambingay nga mangita kon unsa ang lagmit nga espirituhanong girepresentar niana nga matang sa yuta ug hisgotan sa ilang grupo kon unsa ang ilang makat-onan gikan niana.

Ang sambingay sa tinuod nga kinabuhi

Ikonsiderar ang paggamit sa mga mosunod nga sitwasyon aron tabangan ang mga estudyante sa pag-ila sa mga matang sa yuta, o mga kahimtang sa kasingkasing. Ang mga estudyante mahimong magtanyag og mga sugyot aron tabangan ang tawo sa kada sitwasyon nga mas mahiduol sa Manluluwas ug tugotan nga motubo ang pulong sa Dios sa ilang kasingkasing.

Gipaila-ila si Scott sa iyang mga higala ngadto sa gipahiuli nga ebanghelyo ug nabunyagan dayon pagkahuman niadto. Pero, paglabay sa pipila ka buwan pagkahuman sa iyang pagpasakop sa Simbahan, nagsugod ang pipila ka tawo sa pagsungog kaniya sa iyang bag-ong gituohan. Wala gibati ni Scott nga makontrol niya ang negatibong atensyon gikan sa ubang tawo.

Maayo ang pag-eskuwela ni Jill, miapil siya sa usa ka dula, ug gusto niya ang iyang trabaho. Tungod sa iyang mga responsibilidad sa eskuwelahan ug trabaho, gipili ni Jill nga dili buhaton ang mga kalihokan sa Simbahan ug wala siya nagpa-enroll sa seminary karong tuiga. Gusto gayod niya nga magpokus sa iyang edukasyon ug trabaho sa umaabot.

Pagbuhat og mga pagkompara gamit ang Basahon ni Mormon

Dapita ang mga estudyante nga basahon ang pagkompara ni Alma sa pulong sa Dios ngadto sa usa ka binhi (tan-awa sa Alma 32:26–43). Mahimo usab nilang tun-an ang damgo ni Lehi mahitungod sa kahoy sa kinabuhi ug ikompara ang kada grupo nga gihulagway diha sa panan-awon gamit ang mga matang sa yuta diha sa sambingay sa magpupugas (tan-awa sa 1 Nephi 8:19–34). Mahimong ipaambit sa mga estudyante kon sa unsang paagi nakadugang kining mga asoy sa Basahon ni Mormon sa ilang pagsabot sa mga pagtulon-an sa Manluluwas diha sa sambingay sa magpupugas.