Mataio 16:13–18

“O Oe o le Keriso”

Na fesili Iesu i Ona soo pe se a se manatu o isi tagata ia te Ia ma po o le a foi se talitonuga a Aposetolo latou lava e uiga ia te Ia. Ua tali Peteru e ala i lana molimau o Iesu o le Keriso, lea sa ia mauaina e ala i se faaaliga e ala mai i le Agaga Paia. E mafai ona fesoasoani lenei lesona e te malamalama ai ma lagona le taua o le mauaina o se molimau ia Iesu Keriso mai le Tama Faalelagi e ala mai i le Agaga Paia.

Sauniuniga a tamaiti aoga: Valaaulia tamaiti aoga e o mai saunia pe faapefea ona latou talia le fesili lenei: E faapefea e se molimau ia Iesu Keriso ona faia se suiga i se olaga o se isi?

Galuega Faatino e Mafai ona Fai e Aoao Mai Ai

Talatalanoa ma le Faaola

Mafaufau pe valaaulia tamaiti aoga e faaata i o latou mafaufau ua maua e i latou ma ni nai latou uo mamae se avanoa e talatalanoa ai ma le Faaola. Ona mafai lea ona latou talia fesili o lo o mulimuli mai i ni paga po o ni vaega laiti.

O le a sou manatu pe faapeī se talanoaga ma le Faaola?
A Ia fesiligia oe po o a mafaufauga po o tala a tagata o taimi nei e fai e uiga ia te Ia, o le a sau tala e fai?

Faitau i le Mataio 16:13–14 e vaai ai pe na faapefea ona tali e Ona soo se fesili e tali tutusa.

Faitau ma faailoga le fesili e sosoo ai, ma patino lava a le Faaola, o loo maua i le Mataio 16:15 . Tusi i totonu o lau api faamaumau suesuega pe faapefea ona e tali pe ana fai na fai atu e le Faaola lenei fesili ia te oe.

A o faaauau ona e suesue i lenei lesona, mafaufau i mea ua e faia po o mea e mafai ona e faia ia maua ai pe faamalosia ai foi lau molimau e faatatau i le Faaola.

O loo faamaumauina i tusitusiga paia na o le tali a le Aposetolo o Peteru i le fesili a le Faaola.

Faitau i le Mataio 16:16, ma faailoga pe na faapefea ona tali atu Peteru.

O le a le uiga o Iesu o “le Keriso”?
O le a le uiga o le o Ia o “le Alo o le Atua soifua?”

A e manaomia se fesoasoani e tali ai nei fesili, tagai i le “ Iesu Keriso ” i le Taiala i Tusitusiga Paia po o le “ O Lē ua Faauuina ” i le Bible Dictionary.

Mafaufau e faailoga le Mataio 16:17 e manatua ai le fetalaiga a le Faaola ia Peteru “amuia” o ia ona o lana molimau.

Toe iloilo ata faataitai nei, ma matau auala e mafai ai ona fai ma faamanuiaga le i ai o se molimau ia Iesu Keriso i ia ata faataitai.

Mafaufau e kopi i luga o le laupapa ata faataitai nei. Ia faaeteete i tamaiti aoga o ono feagai ma nei tulaga po o ni tulaga tali tutusa i le taimi nei.

Sa e tauivi ma se tulaga po o se gasegase na faatapulaa ai au gaoioiga faaletino
Sa avea oe o se mauoa tele pe o se mativa tele
Sa e lagona le lē amanaia pe peiseai e lē o taliaina oe
Sa maliu se tasi e pele ia te oe

E faapefea ona ono suia au tali i nei tulaga pe ana fai e lei i ai sau molimau ia Iesu Keriso?
O a ni aafiaga na ia te oe po o se isi e te iloa na aoga ai se molimau ia Iesu Keriso?

Mafaufau pe fai ni fesili tulitatao. O nisi faataitaiga e mafai ona faapea “O le a se mea ua e aoaoina e uiga i le Faaola mai lena aafiaga?” po o le “O le a le mea na e faia i le taimi o lena aafiaga na mafai ai ona fesoasoani lau molimau ia Iesu Keriso ia te oe? Aisea na aoga ai na gaoioiga?”

Molimau

Faaata i lou mafaufau sa faapea atu se isi ia te oe, “E lelei na i ai se molimau a Peteru, ae sa faatasi o ia ma le Faaola i aso uma. E faapefea ona ou mauaina se molimau ia Iesu Keriso pe a ou lē faatasi ma Ia i se taimi lava e tasi?” A o e suesue i lenei vaega o le lesona, mafaufau pe faapefea ona e tali atu i ai.

Faitau i le Mataio 16:17, ma vaavaai mo se upu moni e uiga pe faapefea ona tatou mauaina se molimau ia Iesu Keriso. (Maitau: O le uiga o le “Pāiona” o le “alo o Iona.”)

O le a se upu moni na e mauaina e uiga i le ala e maua ai se molimau ia Iesu Keriso?

Tusi le upu moni lenei o loo faamamafaina, i luga o le laupapa e faaali atu ai mo le toega o le lesona. Ia e nofouta i tagata aoga o ono lagonaina e leai se latou molimau ia Iesu Keriso. Saili mo musumusuga a le Agaga Paia a o e faamautinoaina pe o le a le auala sili e talanoaina ai lenei mataupu.

Atonu ua e matauliaina se upu moni e tali tutusa ma lenei: o se molimau ia Iesu Keriso e ala mai faaaliga mai le Tama Faalelagi.

Aisea e taua ai ona iloa o le Tama Faalelagi o le punavai o faaaliga?
Aisea e ono manao ai le Tama Faalelagi e faaali mai ia i tatou upu moni e uiga ia Iesu Keriso?

O lenei molimau ia Iesu Keriso mai le Tama ua faaalia e ala mai i le Agaga Paia (tagai i le 1 Korinito 12:3). Na aoao mai Peresitene Russell M. Nelson:

O le upu moni aupito sili ona taua o le a molimau atu e le Agaga Paia ia te oe e faapea o Iesu o le Keriso, le Alo o le Atua soifua.

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 96)

Ia manatua o se molimau ia Iesu Keriso e patino lava ma e eseese mo i tatou uma taitoatasi.

I totonu o lau api faamaumau suesuega, tusi i lalo po o fea o faamatalaga nei e sili ona faamatalaina ou lagona:

Ua ou mauaina se molimau ia Iesu Keriso e ala mai i le Agaga Paia ae ua ou manao ia malosi atili.
Ua ou lagona ou te lei mauaina se molimau ia Iesu Keriso e ala mai i le Agaga Paia.
O lau molimau ia Iesu Keriso o loo malosi i le malosi ua ou manao ai.
Ou te lē malamalama pe aisea o le a ou manao ai i se molimau ia Iesu Keriso.

Ia maitau le mea o e i ai ma lau molimau ia Iesu Keriso a o e faia se tasi pe sili atu o gaoioiga nei. O se tasi o auala e tatou te mauaina ai faaaliga mai le Agaga Paia e ala mai i mafaufauga ma lagona. Ia e nofouta i ou mafaufauga ma lagona o loo fesoasoani ia te oe e manao ai, maua ai, pe faamalosia ai lou molimau ia Iesu Keriso.

Faaali atu filifiliga ma faatonuga nei mo tagata aoga e filifili mai ai.

Gaoioiga A: O a ni mea e mafai ona tatou faia e maua ai pe faamalosia ai o tatou molimau ia Iesu Keriso?

Fai se lisi o nisi o gaoioiga ua e manatu ma lagona e mafai ona e faia e maua ai pe faatupulaia ai lau molimau ia Iesu Keriso. Ina ia faaopoopo ai i lau lisi, mafaufau i aafiaga a Peteru ma le Faaola i le Feagaiga Fou. Mo ni faataitaiga, toe iloilo le Luka 5:1–11 ma le Mataio 14:22–33 . Mataulia filifiliga na faia e Peteru i na aafiaga sa ono aafia ai lana molimau ia Iesu Keriso. Saili mo le taitaiga a le Agaga Paia a o e tusia i lalo pe faapefea ona e faia ni filifiliga e tali tutusa. Mafaufau pe faapefea ona faaalia mai e aafiaga a Peteru le taua o le i ai o se molimau ia Iesu Keriso.

Gaoioiga E: Na faapefea ona maua e se isi e te faatuatuaina la latou molimau ia Iesu Keriso?

Vili, lafo se feau tusitusi, pe imeli i se matua, se tagata o le aiga, po o se uo faatuatuaina. Talosagaina i latou e faasoa pe faapefea ona latou mauaina a latou molimau ia Iesu Keriso ma pe aisea e taua ai ia i latou. Fesili i ai e uiga i gaoioiga na latou lagonaina sa sili ona aoga mo le faatupulaia o lena molimau. Ia e nofouta i manatu ua e lagonaina e faatatau pe faapefea ona e mulimulitaia a latou faataitaiga.

Gaoioiga I: O fea e mafai ona ou aoao atili ai e uiga i le mauaina o se molimau ia Iesu Keriso e ala mai i le Agaga Paia?

Matamata le “Increase Your Testimony” (4:59) po o le “The Hope of God’s Light” (6:46), e maua i le ChurchofJesusChrist.org, pe faitau pe matamata i se vaega o le saunoaga “Fausia se Olo o le Faaleagaga ma le Puipuiga,” a Elder Ronald A. Rasband o le Korama a Aposetolo e Toasefululua (Ensign po o le Liahona, Me 2019, 107–10), ma vaavaai mo malamalamaga pe faapefea ma pe aisea e saili ai se molimau e ala mai i le Agaga Paia.

4:59

6:46

O a mea na e manatu i ai ma lagonaina a o e faitauina le saunoaga pe matamata i le vitio?
O fea se isi mea e mafai ona e saili ai mo nisi aafiaga ma faamatalaga i molimau ia Iesu Keriso e ala mai i le Agaga Paia?
Aisea e taua ai ona faaauau pea ona faatupulaia pe faamalosia lau molimau ia Iesu Keriso ma Lana talalelei fuataiina?

Valaaulia tagata aoga e faasoa puupuu i mea ua latou mauaina ma le vasega pe o ni paga po o vaega toalaiti.

Mafaufau i se isi e ono aoga i ai mea ua e aoaoina. Tusi se tusi puupuu ia i latou e faamatala ai mea ua e aoaoina e ono aoga mo i latou. Mafaufau pe faasoa atu lau molimau ia Iesu Keriso ma pe faapefea ona e mauaina lena molimau.

A maea ona faia lau tusi, malolo ma faalogologo mo ni musumusuga mai le Agaga Paia i mea e tatau ona e faia e maua ai pe faamalosia ai lau molimau ia Iesu Keriso. Tusi i lalo ni ou manatu o i ai i totonu o lau api faamaumau suesuega, ma fai se fuafuaga e faatino ai.

A i ai se taimi, uunai tagata aoga o loo loto i ai e faasoa i a latou tusi ma le vasega, e aofia ai pe faapefea ona latou mauaina a latou molimau ia Iesu Keriso. Uunai i latou e faatino ni manatu ua latou mauaina.

Manatu ma Faamatalaga o Talaaga

E mafai faapefea ona ou maua se molimau ia Iesu Keriso?

Matamata le“The Power of a Personal Testimony,” o loo maua i le ChurchofJesusChrist.org, mai le taimi 9:27 e oo i le 13:19.

2:3

E mafai faapefea ona ou faamalosia lau molimau ia Iesu Keriso?

Na tuuina mai e Peresitene Jean B. Bingham, Peresitene Aoao o le Aualofa, malamalamaga nei:

Pe o fausia a tatou molimau i le faavae papa o Iesu Keriso ma Lana talalelei? A oo ina luluti mai afa o le olaga i o tatou luga, pe tatou te fitivale ea e sue i se tusi pe faapefea ona fai po o se tusitusiga i luga o upega tafailagi mo se fesoasoani? O le faaavanoa o se taimi e fausia ai ma faamalosia lo tatou iloa ma molimau ia Iesu Keriso o le a selesele mai ai vaegatofi mauoa i taimi o tofotofoga ma faigata. O le faitauina o tusitusiga paia i aso taitasi ma le manatunatu loloto i upu a perofeta soifua, punouai i tatalo anoa faaletagata lava ia, ai ma inu ma le naunautai i le faamanatuga i vaiaso taitasi, tuuina atu o le auaunaga e faapei ona faia e le Faaola—o nei gaioiga faigofie taitasi e avea ma se poloka e fai se fausaga mo se olaga fiafia.

(Jean B. Bingham, “Ina Ia Atoa Lo Outou Olioli,” Ensign po o le Liahona, Nov. 2017, 87)

O le a le taua o le ola i se molimau ia Iesu Keriso?

Na faamalamalama mai e Elder Quentin L. Cook o le Korama a Aposetolo e Toasefululua:

O le vaega 76 o le Mataupu Faavae ma Feagaiga ua faamanino mai ai e faapea o le “totoa i le molimau ia Iesu” [ Mataupu Faavae ma Feagaiga 76:79 ] o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e o i le malo terasitila e maualalo ifo. Ina ia totoa, e manaomia ona tatou tepa taulai atu i le mana o Iesu Keriso ma Lana taulaga togiola e faatoilalo ai le oti ma, e ala i le salamo, e faamama ai i tatou mai agasala, ma e manaomia ona tatou mulimuli i le mataupu faavae a Keriso. Tatou te manaomia foi le malamalama ma le poto e uiga i le soifuaga ma aoaoga a le Faaola e taiala ai i tatou i luga o le ala o osiga feagaiga, e aofia ai sauniga paia o le malumalu. E tatau ona tatou mausali ia Keriso, taumamafa i Ona fetalaiga, ma tumau e oo i le iuga.

(Quentin L. Cook, “Totoa i le Molimau ia Iesu,” Ensign po o le Liahona, Nov. 2016, 43)

E faapefea ona molimau Aposetolo i aso nei ia Iesu Keriso?

Matamata i le “Living Apostles Testify of Jesus Christ” (2:16) po o isi vitio o loo i le ChurchofJesusChrist.org/prophets-and-apostles/what-are-the-prophets-testimonies e vaai ai i ni isi o faataitaiga.

NaN:NaN

O le a le papa na fetalai Iesu o le a Ia ati ae ai i luga Lana Ekalesia?

A o aoaoina e le Faaola ia Peteru e uiga i faaaliga, sa Ia faaaogaina se faiga malie i le igoa o Peteru, e fetalai atu ai ia Simona, “O Peteru oe [Petros], o luga o lenei papa [petra] ou te ati ae ai foi lau ekalesia” ( Mataio 16:18). O le upu Eleni petros o lona uiga o se papa po o se maa laitiiti e taatia ese. O le upu Eleni petra e mafai foi ona faauigaina “o se maa,” ae e mafai foi ona faasino i se palapala malo, papamaa, po o se papa tele. Mai nei upu tatou te aoao ai e lē o i luga o Peteru o se tagata o le a fausia ai le Ekalesia, ae o luga o papamaa o faaaliga.

Galuega Faatino Faaopoopo e Aoao Ai

O se molimau ia Iesu Keriso e lē mauaina uma i se taimi e tasi

Mafaufau pe valaaulia tagata aoga e faitau le tala i le tagata tauaso na faamaloloina o si mea itiiti i le taimi i le Mareko 8:22–26 ma ia mafaufau pe faapefea ona faaalia mai e lenei tala tatou te “vaai” i le Faaola ma Lona aao o si mea itiiti i le taimi. E tele ona masani ona faapea le mauaina o faaaliga (tagai i le 2 Nifae 28:30 ma le Alema 12:9–11).