Mataio 16:18–19; Mataio 17:1–7

“O Ki o le Malo”

Christ surrounded by light as He is transfigured. Moses and Elias stand with Him. The three figures are standing behind a tree, and large colorful clouds are visible in the background. Peter, James and John sit on rocks in the foreground as they watch.

A o i ai le Faaola ma Ona soo i le laueleele o Kaisareia Filipo, na Ia folafola atu e avatu ia Peteru “ki o le malo o le lagi” (Mataio 16:19). Ina ua mavae aso e ono, na maliu atu ai lea o Iesu ma Peteru, Iakopo, ma Ioane i se mauga, ona “liua ai lea o Ia i o latou luma” (Mataio 17:2) a o i ai Mose ma Elaia (Elia) ia i latou. Na aoao mai e perofeta o Aso e Gata Ai, sa mauaina e Peteru, Iakopo, ma Ioane ki sa folafolaina o le perisitua i le taimi o le Liua o Iesu. E mafai ona fesoasoani lenei lesona e te malamalama ai i le uiga o ki o le perisitua ma lo latou taua i le ata o le faaolataga a le Atua.

Sauniuniga a le tamaitiiti aoga: Valaaulia tamaiti aoga e mafaufau i se ki latou te faaaogaina ma ia o mai sauniuni e faasoa po o le a le mea e faaaoga ai le ki, aisea e taua ai, ma po o le a le mea e tupu pe a leiloa. A latou mananao ai, e mafai ona aumai e tamaiti aoga a latou ki i le vasega.

Gaoioiga e Mafai ona Fai e Aoao Mai Ai

“O fea o i ai ki?”

Na aoao mai Elder Gary E. Stevenson o le Korama a Aposetolo e Toasefululua, e uiga i le taua o ki. Matamata i le vitio “O Fea o I Ai Ki?” mai le taimi faatulaga 0:00 i le 1:01, pe faitau i le faamatalaga lenei.

A o goto malie ifo le la o le tauafiafi o se taumalulu i le mauga faasee ua matua ufitia e le kiona, sa ma’ati’ati le ea o le mauga malulu i o matou alafau ma isu, sa pei lava o se leoleo auala saua o loo faatonuina i matou ia sue a matou taavale ma loli sa tutu i le paka o le mataaga. O iina, i le saogalemu o a matou taavale, o le a le pine ae faamafanafanaina ai o matou tamatamai lima ma tamatamai vae maluluina. O le pa’o o le kiona aisā i a matou laa taitasi na faamautu mai ai ua matua’i malulu lava.

Sa fiafia le matou aiga i se aso na faatumulia i ni mea mālie i le faaseega i le kiona, a o lea ua taunuu mai i se faaiuga o se ea ua aisā. Ina ua taunuu atu i le taavale, sa ou tago ifo i le taga o lo’u pulupulu e sue le ki, ona sue lea ma le isi taga ma le isi taga. “O fea o i ai ki?” Sa faatalitali ma le naunautai tagata uma mo ki! Ua uma ona fafaga le maa, ma vaega uma—e aofia ai le ea faamafanafana—ua saunia uma, ae a aunoa ma ki, e le mafai ona tatala faitotoa; a aunoa ma ki, o le a le mafai ona fafaga e le afi le uila i le taavale.

(Gary E. Stevenson, “O Fea o I Ai Ki ma le Pule o le Perisitua?,” Ensign po o le Liahona, Me 2016, 29)

E faapefea ona faailoa mai e lenei aafiaga le taua o ki?

Valaaulia tamaiti aoga e tali i fesili mai le gaioioiga o sauniuniga a tamaiti aoga.

Mafaufau i soo se ki e te faaaogaina i lou olaga. Aisea e taua ai i latou? O le a le mea e tupu pe a faapea ua leiloloa?

Ki o le perisitua

O le faatagata lea o le Aposetolo o Peteru na mamanuina e Bertel Thorvaldsen (1770–1844). Maitau le mea o loo umia e Peteru i lona lima. O ki nei o faatusa o le mana ma le pule na folafolaina e le Faaola ia Peteru.

Faitau i le Mataio 16:18–19 , ma saili mo tali i fesili nei:

O le a le mea na folafolaina e le Faaola e tuu atu ia Peteru?
O le a le mea e tuu atu e Peteru i le mana na te fai?
O a mea o aoao atu e nei fuaiupu ia te oe e uiga i le Faaola ma auala e Na te pulea ai Lana Ekalesia?

O se tasi o upumoni e mafai ona tatou maua mai le Mataio 16:18–19 o le e faatuatuaina e Iesu Keriso ki o Lona malo i perofeta ma aposetolo e taitaia Lana galuega i le lalolagi. E ui ina sa tuuina atu muamua e le Faaola i Aposetolo Lana pule o le perisitua (tagai i le Mataio 10:1–8), “o ki o le malo o le lagi” ( Mataio 16:19) o ki ia o Lana perisitua.

Valaaulia tamaiti aoga e faasoa i mea ua uma ona latou iloa e uiga i le perisitua ma ki o le perisitua. E mafai ona fesoasoani fesili nei.

E faapefea ona e faamatalaina le eseesega o le perisitua ma ki o le perisitua? O a ni auala ua e manatu sa faamanuiaina pe o loo faamanuiaina ai oe e le Faaola e ala i ki o le perisitua?

Faalogologo ma le toto’a i tali a tamaiti aoga. Pe a manaomia, mafaufau e faaaoga nisi pe o faamatalaga uma nei e fesoasoani ai i tamaiti aoga ina ia malamalama manino i le perisitua ma ki o le perisitua ma auala e faamanuiaina ai tatou e le Faaola e ala mai i nei ki.

O faamatalaga nei e mafai ona fesoasoani ia te oe e malamalama atili ai i le perisitua ma ki o le perisitua:

O le perisitua “o le pule lea ma le mana ua tuuina mai e le Atua i tagata e galulue ai i mea uma lava mo le faaolataga o tagata.”

(O Le Taiala i Tusitusiga Paia, “ Perisitua,” scriptures.ChurchofJesusChrist.org)

Faatasi ai ma isi mea, o loo tuu mai e le perisitua le avanoa tatou te maua ai faamanuiaga o le Togiola o Iesu Keriso e ala i sauniga faaola e pei o papatisoga, faamauga ma le taliaina o le meaalofa o le Agaga Paia, le faamanatuga, faatasi ai ma le faaeega paia ma le faamauina i le malumalu.

O ki o le perisitua o le pule lea e taitai ai le faaaogaina o le perisitua e fai ma sui o fanau a le Atua. O le faaaogaina o le pule uma o le perisitua i le Ekalesia e taitaia e i latou o ē umia ki o le perisitua. …

O Iesu Keriso e umiaina ki uma o le perisitua. I lalo o Lana taitaiga, e tuuina atu ai ki o le perisitua i alii e faaaoga i valaauga patino mo le faataunuuina o le galuega a le Atua.

(Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.4.1, 3.4.1.1).

O le Mauga o Liua ma le Malumalu o Katelani

I le mavae ai o aso e ono talu ona folafolaina le tuuina atu o ki o le perisitua ia Peteru, sa vaalaulia e Iesu ia Peteru, Iakopo, ma Ioane e faatasi ma Ia mo se aafiaga faavavega i luga o le mea na mulimuli ane ua lauiloa o le Mauga o Liua. O se mea matagofie, i le 1836, na i ai se aafiaga tali tutusa a Iosefa Samita ma Oliva Kaotui i totonu o le Malumalu o Katelani.

Mafaufau e faaaoga le gaoioiga lenei e fesoasoani ai i tamaiti aoga e aoao atili e uiga i nei mea paia. O lenei gaoioiga e mafai ona faia taitoatasi, taitoalua, pe i ni vaega laiti.

I luga o se fasi pepa pe i totonu o lau api faamaumau suesuega, tusi se laina e vaeluaina ai le itulau. Tusi se ata o se mauga i le itu tauagavale o le itulau ma se malumalu i le itu taumatau. Tusi le “ Mataio 17:1–7 ” i le pito i luga o lau mauga ma le “ Mataupu Faavae ma Feagaiga 110:1–2, 11–16 ” i luga o lau malumalu. Faitau i faamaumauga o tusitusiga paia, ma lisi i lalo igoa o tagata sa i ai pe sa lagonaina o latou leo i taimi na tutupu ai na mea taitasi. I lalo ifo o nei igoa, tusi se aotelega e tasi pe lua fuaiupu o mea na tutupu i nei faamaumauga taitasi.

Valaaulia ni tamaiti aoga o loo loto i ai e faasoa mai a latou ata ma aotelega.

O a ni mea na e aoaoina mai le suesueina o nei faamaumauga?

E ono fai ma fesoasoani le iloa e pei ona faamatalaina mai i le Bible Dictionary e faapea “a o iai i luga o le mauga, na tuuina atu ai e le Faaola, Mose, ma Elaia (Elia) ki na folafolaina mai o le perisitua ia Peteru, Iakopo, ma Ioane [History of the Church 3:387], sa mafai ai e nei au uso ona faaauau ai pea le galuega o le malo i le lalolagi ina ua mavae ona maliu ese Iesu. Mulimuli ane na tuuina atu ai nei ki i le Toasefululua uma” (Bible Dictionary, “ Transfiguration, Mount of ”).

Na faamatala mai e Elder Stevenson le taua o ki o le perisitua. Faaauau ona matamata le vitio “O fea o iai Ki?” mai le taimi faatulagaina 1:01, i le 2:51, pe faitau le faamatalaga lenei.

O le tele o lo’u mafaufau i lea aafiaga, o le tele foi lea o le loloto o lea aafiaga ia te a’u. Ou te maofa i le alofa o le Tama Faalelagi mo Ana fanau. Ou te tu ma ofo i le asiasiga faalelagi ma faaaliga faalelagi o le faavavau na faaee atu e le Atua ia Iosefa Samita. Ma sa faapitoa, ona tumu lo’u loto i le lotofaafetai lofituina mo le toefuataiga mai o le pule o le perisitua ma ki o le perisitua. Ana leai lenei toefuataiga, semanu e loka i tatou i fafo mai le auala lea e mafai ai ona momoli atu ai i tatou i la tatou faigamalaga i le aiga i ni matua faalelagi alolofa. O le faatinoga o sauniga uma o le faaolataga o loo i ai lo tatou ala o feagaiga e toe foi atu ai i le afioaga o lo tatou Tama o i le Lagi e manaomia ai le pule tatau e ala i ki o le perisitua.

(Gary E. Stevenson, “O Fea o I Ai Ki ma le Pule o le Perisitua?,” Ensign po o le Liahona, Me 2016, 29)

Iloilo po o a ou lagona i le toefuataina e le Faaola o ki o le perisitua ma pe faapefea ona aafia ai lou olaga i nei ki. Saili le taitaiga a le Agaga Paia ia e malamalama ai i lo latou taua. Atonu o le a fesoasoani fesili nei.

Aisea o e loto faafetai ai mo ki o le perisitua a le Alii i le lalolagi?
Afai e fesili se isi e le masani i ki o le perisitua ia te oe pe aisea e taua ai i latou, e faapefea ona e tali i ai?
O a ni punavai paia e mafai ona fesoasoani i lea tagata e aoao atili ai e uiga i le taua o ki o le perisitua?

Tala ma Faamatalaga o Talaaga

O le a le uiga o le upu liua ?

O loo faauigaina e le O Le Taiala i Tusitusiga Paia le liua “o se tulaga lea e oo i tagata o e ua suia i se taimi lē tumau i foliga ma le natura—o lona uiga, ua siitia i se tulaga maualuga ae faaleagaga—ina ia mafai ai ona latou lavātia le faatasi ai ma le mamalu o tagata faalelagi” (“ Liua,” scriptures.ChurchofJesusChrist.org).

O fea e mafai ona ou aoao atili ai e uiga i le Liua o Iesu Keriso?

Iloilo le mataupu 23 o le Jesus the Christ, tusia e James E. Talmage, o loo maua i le ChurchofJesusChrist.org.

Mataio 16:19. O le a le mana na folafolaina e Iesu Keriso mo Peteru?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

Sa tatau ona umia e Peteru le mana o faamauga, o lena pule o loo i ai le mana e fusifusia pe faamauina ai i le lalolagi po o le tatalaina i le lalolagi ma faapena foi ona faia i le lagi. O na ki e umia e le Peresitene o le Ekalesia—e le perofeta, tagatavaai, ma talifaaaliga. O lena mana faamauina paia o loo i ai i le Ekalesia i le taimi nei. E leai se mea e tusa ma le paia sili o mafaufauga o i latou e iloaina le taua tele o lenei pule. E leai se mea e sili atu ona malupuipuia. E toaitiiti lava ni alii e umiaina lenei mana o faamauga i luga o le fogaeleele i soo se taimi lava—i malumalu taitasi o loo i ai ni au uso ua uma ona tuuina atu i ai le mana o faamauga. E leai se tasi e mafai ona mauaina sei vagana mai le perofeta, tagatavaai, ma talifaaaliga ma o le Peresitene o Le Ekalesia a Iesu Keriso o le Au Paia o Aso e Gata Ai.

(Boyd K. Packer, “O Le Malumalu Paia,” Ensign po o le Liahona, Oke. 2010, 34)

O ai le “Elaia” na faaali atu ia Iosefa Samita ma Oliva Kaotui i le Malumalu o Katelani?

E le o tele ni mea o iloa e uiga i le perofeta e igoa ia Elaia sa “tuu mai le tisipenisione o le talalelei a Aperaamo” ia Iosefa Samita ma Oliva Kaotui i le Malumalu o Katelani ( Mataupu Faavae ma Feagaiga 110:12). O le igoa Elaia sa faaaogaina i tusitusiga paia e fai ma se igoa taua e tuuina atu i tagata taitoatasi o loo i ai misiona faapitoa.