Mareko 9:14–29

“Le Alii e, Ua Ou Faatuatua; Ia E Fesoasoani Mai i Lo’u Le Faatuatua”

Na afio ifo Iesu Keriso i se vaega o tagata na fesiligia Ona soo ona sa le mafai e le au soo ona tuliesea se agaga amioleaga mai se atalii o se tasi tagata. Ina ua uma ona aoao atu i lenei tama e uiga i le faatuatua, sa faamalolo e Iesu Keriso le atalii. O lenei lesona o le a fesoasoani ia te oe e suesue ai lou faatuatua i le Alii ma saili faaaliga e uiga i le auala e mafai ona e faamalosia ai.

Sauniuniga a le tamaitiiti aoga: Valaaulia tamaiti aoga e mafaufau e uiga i aafiaga na faamalosia ai lo latou faatuatua ia Iesu Keriso. E mafai foi ona latou fesili atu i isi tagata e uiga i o latou lava aafiaga e faatupulaia ai le faatuatua.

Gaoioiga e Mafai ona Fai e Aoao Mai Ai

Luitau i le faatuatua

Vaai faalemafaufau i le feagai ai ma luitau nei:

Mafaufau e faaali atu tulaga nei po o isi tulaga e sili ona talafeagai i tamaiti aoga.

Lē lagonaina le taliaina i le EkalesiaAtuatuvaleO se tagata o le aiga ua tuua le EkalesiaO le maliu o se uo

• E mafai faapefea e nei aafiaga ona aafia ai le talitonuga ma le faalagolago o se tasi ia Iesu Keriso?

• O a nisi aafiaga e ono tofotofoina ai le faatuatua o se talavou ia Keriso?

• O a ni aafiaga na e maua pe na maua foi e isi na faaalia ai ia te oe le taua o le malosi o le faatuatua ia Iesu Keriso i taimi o faigata?

Mafaufau e tuuina atu le iloiloga lenei o le tagata lava ia o se tufaaga pe faaali atu foi i tamaiti aoga e faaaoga a o latou tusia a latou tali i a latou api faamaumau suesuega.

Faamaea le iloiloga lenei a le tagata lava ia:

Gaoioiga o Uiga Faaalia: Faatuatua

Filifili le numera e sili ona faamatalaina ai le tele o taimi e faatatau ai faamatalaga taitasi ia te oe. Ia manatua o le tuputupu ae faaleagaga o se faagasologa faifai malie ma e leai se tasi e atoatoa.

1 = e le tupu lava; 2 = o nisi taimi; 3 = e masani lava; 4 = toetoe lava o taimi uma; 5 = o taimi uma lava

________ 1. Ou te talitonu ia Iesu Keriso ma talia o Ia o lo’u Faaola. ( 2 Nifae 25:29)________ 2. O loo ia te a’u le faatuatua e tatau ai e fesoasoani ai e faia ai mea lelei i lo’u olaga po o olaga o isi. ( Eteru12:12)________ 3. Ua lava lou faatuatua i le Faaola e talia ai Lona finagalo ma faia soo se mea e poloai mai ai o Ia. ( 1 Nifae 3:7)

• Toe mafaufau i vaega ia e te malosi ai. O a ni aafiaga na fesoasoani ia te oe e te malosi ai i nei vaega?

• O fea o vaega e te manaomia ona faamalosia?

“Ia e alofa mai ia te i matou”

Ina ua mavae Lona aafiaga ma Peteru, Iakopo, ma Ioane i luga o le Mauga o Liua, sa afio ifo Iesu i se tagata sa manao e faamalolo lona atalii mai se agaga leaga.

Mafaufau e faitau le Mareko 9: 14–22 ma le 23–27 o se vasega, valaaulia se tamaitiiti aoga se toatasi e faitau upu a le Faaola, o le isi e faitau upu a le tama, ma le isi e faitau le vaega o totoe o le mau o se faamatalaupu. (Atonu e fesoasoani le atofa atu o nei vaega ma valaaulia tamaiti o le vasega e sue a latou laina a o lei amataina le vasega.) E mafai foi e tamaiti aoga ona faaaoga lenei auala e faitau ai i ni vaega taitoatolu.

I le avea ai ma se isi auala e faitau ai nei fuaiupu, mafaufau e faaali le vitio o Elder Jeffrey R. Holland o loo toe faamatalaina lenei tala i “Le Alii e, Ua Ou Faatuatua,” o loo maua i le ChurchofJesusChrist.org, mai le taimi faatulaga 0:00 i le 3:33.

Faitau le Mareko 9:14-22, vaavaai mo le tulaga faigata na feagai ma lenei tama ma le atalii.

• O le a sou manatu i lagona o le tama ina ua le mafai e soo o le Faaola ona faamalolo lona atalii?

Ia faaeteete i le fesili atu i tamaiti aoga e tali mai i le fesili e sosoo ai. Atonu o le a patino naua tali mo le faasoa mai.

• O anafea na e, po o se tasi e te iloa na i ai se mafuaaga e fai atu ai i le Alii, “Ia e alofa mai ia te i matou, ma fesoasoani mai ia i matou”?

• O le a se mea ua e iloa mai ou aafiaga e uiga i le naunautaiga o le Alii e faaali atu le agaalofa?

• Aisea e mafai ai e Iesu Keriso ona i ai le mutimuti alofa mo i tatou taitoatasi?

Faitau le Mareko 9:23–27 e vaai po o le a le mea na sosoo ai. Mafaufau e faailoga soo se upu, fasifuaitau, po o upumoni e te lagona e taua ona manatua.

• O le a le mea na tau atu e le Faaola i lenei tama pe a ia ole atu mo se fesoasoani?

• O le a se mea e tulaga ese ia te oe e uiga i le tali a le tama i le Faaola i le fuaiupu 24 ?

• O a ni aafiaga na e oo i ai e fesoasoani ia te oe e fai atu ai, “Le Alii e, ua ou faatuatua”?

Na faamamafa mai e Elder Jeffrey R. Holland o le Korama o Aposetolo e Toasefululua le taua o upumoni e mafai ona tatou aoao mai lenei tala:

O le taimi e feagai ai ma luitau o le faatuatua, sa faamautu muamua e le tama lona malosi ma ona ia faailoa atu ai lea o ona tapulaa. O lana uluai tautinoga lava o lona ioeina e aunoa ma se faatuai: “Le Alii e, ua ou faatuatua.” Ou te fia fai atu ia i latou uma o ē moomoo ia tele atu se faatuatua, ia manatua lenei tama! I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua e manumalo ai, tusa lava pe itiiti lena faatuatua. … Pipiimau i mea ua uma ona outou iloa ma tutu malosi seia oo mai le malamalama sili atu. …

… A oo mai le le mautonu po o faigata, aua e te fefe e fesili mo se fesoasoani. … O le a auina mai e le Atua le fesoasoani mai itu uma e lua o le veli e faamalosia ai lo tatou talitonuga.

(Jeffrey R Holland, “Le Alii e, Ua Ou Faatuatua,” Ensign po o le Liahona, Me 2013, 93–94)

• O le a se mea e mafai ona tatou aoao mai i lenei tala faaletusi paia ma aoaoga a Elder Holland?

O se tasi o upumoni ua tatou aoao mai i lenei tala o le a o tatou filifili e talitonu i le Tama Faalelagi ma saili atu mo Lana fesoasoani e ala i le tatalo, o le a Ia fesoasoani mai ia i tatou e faamalosia lo tatou faatuatua ia Iesu Keriso.

• O le a sou manatu i le uiga o le “taofi mau i le faatuatua ua e manumalo ai” ma “taofi mau i mea ua e iloa”?

O se tasi o auala e “taofi mau ai i le faatuatua ua e manumalo ai” ma “taofi mau i mea uma ua e iloa” o le manatua lea ma faalagolago i aafiaga na muamua atu na faamalosia ai lou faatuatua. O Elder Neil L. Andersen o le Korama o Aposetolo a le Toasefululua, na faamatalaina nei aafiaga:

Faatasi ai ma le taitaiga toafilemu ua tatou maua mai le Agaga Paia, mai lea taimi i lea taimi, ua faamautinoa mamana ma patino mai e le Atua ia i tatou taitoatasi e faapea na te silafia i tatou ma e alofa ia i tatou ma o loo Ia faamanuiaina patino ma le manino i tatou. …

… Pe a oo ina faapouliuliga e faigata faaletagata, masalosalo, po o le lotovaivai lo tatou ala, … o le[nei] manatuga musuia faaleagaga … e pei o maa susulu e fesoasoani e faamalamalamaina le ala i luma, faamautinoa mai ia i tatou e silafia i tatou e le Atua, e alofa ia i tatou, ma ua auina mai Lona Alo, o Iesu Keriso, e fesoasoani ia i tatou e toe foi atu i le aiga.

(Neil L. Andersen, “O Manatuaga Musuia Faaleagaga,” Ensign po o le Liahona, Me 2020, 19, 21)

I lau api faamaumau suesuega po o luga o se fasi pepa, kopi le ata o se tasi o ou lima. I le ogatotonu o lenei ata, tusi ai le fasifuaitau “Le Alii e, ou te talitonu” e faatusa i le taofimau i mea ua uma ona e silafia. Faataamilo i lenei fasifuaitau, lisi ai ni mafuaaga pupuu e te iloa pe talitonu ai “O le Atua e iloa [oe], alofa ia te [oe], ma na auina mai Lona Alo, o Iesu Keriso, e fesoasoani ia te [oe] e toe foi atu ai i lou aiga.”

Nai lo le tusiina o ata o o latou lima, e mafai e tamaiti aoga ona tusia i a latou api faamaumau mafuaaga latou te talitonu ai i le Tama Faalelagi ma Iesu Keriso. Atonu e aofia ai aafiaga faaleagaga na latou aafia ai. Mafaufau e valaaulia tamaiti aoga e faasoa mai mea na latou tusia, pe a talafeagai, ma a latou tali i le fesili lenei.

• E mafai faapefea e le manatuaina o aafiaga ua uma ona tuuina atu e le Atua ia te oe ma lesona ua uma ona Ia aoaoina ai oe ona fesoasoani e faamalosia oe i taimi faigata?

Mafaufau loloto i mea o le a e faia, pe faaauau pea ona fai, e valaaulia ni aafiaga e fesoasoani ia te oe e iloa ai e silafia oe e le Atua ma e alofa ia te oe.

Mafaufau e faaiu i le tuuina atu o le molimau, po o le valaaulia o se tamaitiiti aoga e molimau mai, i le auala e faamalosia ai e le Faaola i tatou i a tatou tauiviga ma tauia soo se taumafaiga faamaoni e faalagolago ia te Ia.

Tala ma Faamatalaga o Talaaga

Mareko 9:29. O le a le uiga o le fetalaiga a le Faaola ina ua Ia fetalai, “E le mafai ona o mai o lea ituaiga i se mea, tau lava o le tatalo ma le anapogi”?

O le anapogi ma le tatalo e mafai ona valaaulia ai le mana faaleagaga sili atu mai le Alii. O nisi luitau, e pei o le taimi na taumafai ai le au Aposetolo e tuliesea le agaga leaga, atonu e manaomia ai lena mana sili atu. Na aoao mai Peresitene Russell M. Nelson, “O le mana lelei o le tatalo e mafai ona faateleina e ala i le anapogi … pe a talafeagai ai ma se manaoga faapitoa” (“O Le Mana Toafilemu o le Tatalo,” Ensign po o le Liahona, Me, 2003, 7).

O fea e mafai ona ou aoao atili ai e uiga i le faatuatua ma le masalosalo?

O Elder Jeffrey R. Holland o le Korama o Aposetolo e Toasefululua, na aoao mai nisi upumoni e uiga i le faamalosia o le faatuatua ma le taulimaina o masalosaloga. Ina ia faalogo i nisi o nei upumoni faaopoopo, mafaufau e matamata le vitio “Le Alii e, Ua Ou Faatuatua” mai le taimi faatulagaina 5:57 seia oo i le 10:28.

Gaoioiga Faaopoopo e Aoao Mai Ai

O se isi auala e mafai ona amata ai le lesona

Nai lo le talanoaina o tulaga o loo lisiina i le amataga o le lesona, mafaufau e faaali le amataga o le vitio “Faith Journey: When Parents Get Divorced” mai le taimi faatulagaina 0:00 i le 0:20 po o le vitio “Faith Crisis: What Do We Do When We Feel Nothing?” mai le taimi faatulagaina 0:00 i le 2:15. O nei vitio o loo maua i le ChurchofJesusChrist.org. I se taimi mulimuli ane, e mafai e tamaiti aoga ona faauma le matamataina o le vitio a o lei faamaeaina le gaoioiga o le kopiina o lima.

Tatalo ma anapogi

O le isi auala e uunaia ai tamaiti aoga e faamalosia lo latou faatuatua ia Iesu Keriso e mafai ona maua i le Mareko 9:28–29 . Na faasino mai e le Faaola i le fuaiupu 29 ua le mafai e Ona soo ona tuliesea le tiapolo ona o le leai o so latou faatuatua. Mafaufau e valaaulia tamaiti aoga e suesue nei fuaiupu ma vaavaai mo se mataupu faavae e pei o lea: E mafai ona faateleina lo tatou faatuatua ia Iesu Keriso e ala i le tatalo ma le anapogi. E mafai ona talanoaina e tamaiti aoga pe aisea e tuuina mai ai e le Alii nisi o faamanuiaga ona o se taunuuga o le tatalo ma le anapogi. O le faamatalaga e uiga i le tatalo ma le anapogi i le vaega “Faamatalaga o Faatalatalanoaga ma Talaaga” e mafai foi ona faaaoga o se vaega o lenei talanoaga.