Mataio 18; Luka 10

Vaaiga Aoao

Na aoao mai Iesu Keriso e alolofa ma popole o Ia ma lo tatou Tama Faalelagi mo tagata uma. Sa Ia aoao mai ni faataoto se lua e mafai ona fesoasoani tatou te malamalama ai i lo Laua alolofa ma aoao ai e faia i isi e pei ona La faia. O le faataoto i le auauna lē loto faamagalo ua faamanatu mai ai ia i tatou ia alofa mutimutivale i isi, e pei lava ona alofa mutimutivale le Atua ia i tatou. O le faataoto i le Samaria agalelei e mafai ona fesoasoani ia i tatou e mulimuli ai i le faataitaiga a le Faaola o le alofa atu i se tuaoi. Sa Ia aoao atu foi ia Mareta ma Maria e uiga i le taua o le faatotonugalemuina o o tatou olaga ia te Ia.

Sauni e Aoao Atu

O nei faamatalaga e aoga mo faiaoga ia latou iloa ai po o a ni mea e tatau ona saunia ae lei amata lesona taitasi.

Mataio 18:11–14

Faamoemoega o le lesona: O lenei lesona ua fuafuaina e fesoasoani e te lagona ai o le Tama Faalelagi ma Iesu Keriso e agaalofa ma naunau e laveai agaga uma ua leiloloa.

Sauniuniga a le tamaitiiti aoga: Valaaulia tamaiti aoga e o mai saunia i le vasega e faasoa mai tala o tusitusiga paia o loo faaalia mai ai le alofa o le Atua mo i latou ua leiloloa faaleagaga.

Vitio: “E Finagalo le Faaola e Faamagalo Atu” (5:49) po o “Mataupu Faavae o le Filemu: Salamo ” (2:57)

Fautuaga mo aoaoga faavitio: Ina ia amata le lesona, mafaufau e faaaoga se metotia o sailiiliga i luga o upega tafailagi e valaaulia ai tamaiti aoga e tali atu i le fesili e uiga i lagona o le Tama Faalelagi ma Iesu Keriso ia i latou o e ua agasala.

Mataio 18:21–35

Faamoemoega o le lesona: O lenei lesona e mafai ona fesoasoani i tamaiti aoga ia avea atili e pei o le Tama Faalelagi ma Iesu Keriso ao latou taumafai e faamagalo i isi.

Sauniuniga a le tamaitiiti aoga: I se fuaitau o atamai faapitoa o aoaoga faavae na fetalai mai ai le Alii, “A o outou ua poloaiina ia outou faamagalo atu i tagata uma” ( Mataupu Faavae ma Feagaiga 64:10). Valaaulia tamaiti aoga e manatunatu pe aisea ua poloaiina ai i tatou e Iesu Keriso ia faamagalo le tasi i le isi. Atonu e aoga foi le valaaulia o tamaiti aoga e faitau i le Mataupu Faavae ma Feagaiga 64:9–11 ma ia manatunatu i le feau a le Alii o i na fuaiupu.

Vitio: “O lo Tatou Ala o Tiute” (11:10; matamata mai le taimi 2:16 seia oo i le 3:25)

Fautuaga mo aoaoga faavitio: I le amataina o le lesona, mafaufau e faaali atu le mau o loo mulimuli mai mo tamaiti aoga e mafaufau loloto i ai: “O A’u, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma” ( Mataupu Faavae ma Feagaiga 64:10). A maea ona mafaufau loloto tamaiti aoga, valaaulia i latou e faasoa pe aisea ua avea ai lenei poloaiga ma faamanuiaga i o latou olaga. Fesili foi ia i latou e faasoa pe aisea e faigata ai ona tausia i nisi o taimi.

Luka 10:25–37

Faamoemoega o le lesona: O lenei lesona ua faamoemoe e fesoasoani i tamaiti aoga ia mulimuli i le faataitaiga a le Faaola o le alofa atu i le lua te tuaoi.

Sauniuniga a le tamaitiiti aoga: Valaaulia tamaiti aoga e faitau i le Luka 10:30–35, ma sue po o fea latou te vaai ai ia Iesu Keriso i lenei faataoto. Fai foi i ai e sue po o fea latou te vaai ai ia i latou lava i lenei faataoto.

Vitio: “Faataoto o le Samaria Agalelei” (5:11)

Fautuaga mo aoaoga faavitio: I le taimi o le vaega o le lesona lea e talanoaina ai e tamaiti aoga fesili e faatatau i le alofa atu i o tatou tuaoi i nofoaga eseese, mafaufau e faaaoga potu e vaevae i ai. Atofa atu i vaega taitasi se tasi o nofoaga o loo lisiina i le lesona, ma tuu atu i vaega le taimi e talanoaina ai fesili e tolu a o latou mafaufau e uiga i le nofoaga na atofa atu ia i latou.

Luka 10:38–42

Faamoemoega o le lesona: O lenei lesona e mafai ona fesoasoani i tamaiti aoga e faailoa mai filifiliga ma gaoioiga e fesoasoani ia i latou e fai ai Iesu Keriso ma totonugalemu o o latou olaga.

Sauniuniga a le tamaitiiti aoga: Valaaulia tamaiti aoga e fai se lisi o gaoioiga sa latou faatinoina i se aso se tasi ae lei faia le lesona, ma aumai a latou lisi i le vasega.

Anomea o le lesona faitino: O se apa ma maa e eseese o latou lapopoa e mafai ona ofi i ai.

Iloiloga o le Atamai i Aoaoga Faavae 6Faamoemoega o le lesona: Tuu le avanoa i tamaiti aoga ina ia faaloloto lo latou malamalama e uiga, ma faamatala upumoni e uiga i se tasi pe sili atu o fuaitau o mau i le atamai i aoaoga faavae mai le Feagaiga Fou.

Faamatalaga: O le lesona o se fuaitau o le atamai i aoaoga faavae atonu e manaomia ona aoao atu e suitulaga i lenei lesona toefaamanatu. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona o fuaitau o aoaoga faavae autu taitasi o le a aoaoina a o faaauau taualumaga o le seminare.

Sauniuniga a le tamaitiiti aoga: Valaaulia tamaiti aoga e faailoa mai se tomai po o se metotia o le suesueina o tusitusiga paia e aoga lelei mo i latou ma mafaufau pe aisea e aoga ai lenei tomai po o le metotia ia i latou.

Pepa tufa: Sauni e faaali atu le lisi o fuaitau o mau i le atamai i aoaoga faavae ma o latou fasifuaiupu o mau autu talafeagai po o le tufa atu o pepa tufa i tamaiti aoga.
Anomea: Ia mautinoa ua i ai i tamaiti aoga ni mea e tusitusi ai ma api faamaumau suesuega po o ni fasi pepa e faaaoga i gaioioiga o le lesona.

Fautuaga mo aoaoga faavitio: E mafai e tamaiti aoga ona fatu se itulau upega tafailagi o le “Fuiaupu i luga o lea Fuaiupu” po o se faatusa vaaia o se fuaitau o mau mo le atamai i aoaoga faavae. Ona mafai lea e tamaiti aoga ona faasoa atu lau [screen] e faaali ma faamatala atu la latou fatufatuga i le vasega.