Luka 10:38–42

Faatotonugalemuina o o Tatou Olaga ia Iesu Keriso

Ina ua aoao atu Iesu i le fale o Mareta, sa tulai mai se avanoa mo Ia e aoao atu ai e uiga i le taua o le avea o Ana aoaoga ma se faamuamua i o tatou olaga. O lenei lesona e mafai ona fesoasoani ia te oe e aoao ai ia iloa filifiliga ma gaoioiga o le a fesoasoani ia te oe ia avea Iesu Keriso ma Lana talalelei ma totonugalemu o lou olaga.

Sauniuniga a le tamaitiiti aoga: Valaaulia tamaiti aoga e fai se lisi o gaoioiga sa latou faia i se aso se tasi ae lei faia lenei lesona, ma aumai a latou lisi i le vasega.

Gaoioiga e Mafai ona Fai e Aoao Mai Ai

Mea e faamuamua

Fuafua e aumai i le vasega se koneteina ma ni maa o ituaiga eseese. Ia mautinoa e tele atu maa e aumai nai lo mea e ofi i le koneteina. Valaaulia se tamaitiiti aoga e taumafai e tuu ni maa se tele i totonu o le koneteina. Fai atu le fesili lenei: “Afai o nei maa e faatusa i gaoioiga atonu e mafai ona tatou faia i se aso, e mafai faapefea e lenei lesona faatino ona faatusatusa i o tatou olaga?”

O aso taitasi tatou te faia ai le tele o faaiuga e uiga i le auala e faaaoga ai o tatou taimi.

Na aoao mai Peresitene Dallin H. Oaks o le Au Peresitene Sili:

O le toatele o i tatou ua tele atu mea ua faamoemoeina mai ia i tatou nai lo mea e mafai ona tatou faia. … Tatou te feagai ma le tele o filifiliga i mea o le a tatou faia i o tatou taimi ma isi punaoa.

(Dallin H. Oaks, “Lelei, Lelei Tele, Lelei Silisili,” Ensign po o le Liahona, Nov. 2007, 104)

Afai e maea e tamaiti aoga le gaoioiga fautuaina o sauniuniga, valaaulia i latou e vaai i le lisi na latou fatuina.

Mafaufau po o fea o faamatalaga nei e faamatala ai oe (e mafai ona e filifili ni faamatalaga e sili atu ma le tasi).

1. Ou te fatuina se taimi mo gaoioiga faaleagaga ma faaletino.

2. Ou te fia mulimuli i le Faaola ae e masani ona ou lagonaina le pisi tele i isi galuega.

3. E totonugalemu lou olaga ia Iesu Keriso.

4. Ou te le manao e faaavanoa se taimi e faalatalata atili atu ai ia Iesu Keriso.

I lenei lesona, o le a e aoao ai e uiga i se faamaumauga i tusitusiga paia o loo aoao mai ai le taua o le tuu o Iesu Keriso i le totonugalemu o o tatou olaga. Ia taulai atu i uunaiga mai le Agaga Paia lea e mafai ona fesoasoani e te malamalama ai i le auala e avea ai Iesu Keriso ma au faamuamua aupito maualuga.

Ua aoao e le Faaola Maria ma Mareta

Ina ua malaga atu le Faaola i Petania, sa asiasi atu o Ia i le fale o se tamaitai e igoa ia Mareta, o se soo faamaoni ma faatuatua.

Faitau le Luka 10: 38–42, taulai atu i mea ua e aoaoina mai le faataitaiga ma upu a le Faaola. Atonu e aoga le iloa o le upu tiga o lona uiga o le popole po o le mamafatu.

• O le a le mea ua aoao mai e lenei tala ia te i tatou e uiga ia Iesu Keriso ma Lona finagalo mo i tatou?

• O le a le auala na talafeagai ai le filifiliga a Maria mo lenei tulaga?

O se tasi o upumoni e mafai ona tatou aoao mai i lenei tala o le o filifiliga tatou te latalata atili atu ai ia Iesu Keriso e tatau ona tuu i ai le faamuamua aupito maualuga i o tatou olaga.

• Aisea e te manatu ai e finagalo le Tama Faalelagi ia tatou tuu Lona Alo o Iesu Keriso i le totonugalemu o o tatou olaga?

E ui lava atonu na auauna atu Maria i isi, ae sa ia filifili e aoao mai ia Iesu Keriso, o le mea aupito sili lea ona taua sa mafai ona ia faia i lena taimi (tagai Luka 10:42).

Sa faamatala mai e Peresitene Dallin H. Oaks, le auala tatou te feagai uma ai ma filifiliga faapea:

E le faapea o se mea e lelei ua le lava lea ma mafuaaga e fai ai. O le aofaiga o mea lelei e mafai ona tatou faia, e sili mamao atu i lo le taimi e maua e faataunuu ai. O nisi mea e sili atu i le na o le lelei, ma e i ai mea e tatau ai ona ave i ai le faamuamaua i o tatou olaga.

(Dallin H. Oaks, “Lelei, Lelei Tele, Lelei Silisili,” Ensign po o le Liahona, Nov. 2007, 104)

Mafaufau e fatuina se siata e lua koluma i luga o le laupapa ma faaautu Itiiti le Taua ma Tele le Taua.Ona tusi lea o tali a tamaiti aoga i fesili nei i lalo o le koluma talafeagai.

• O a nisi o mea e itiiti le taua i lou olaga e mafai ona faalavelaveina ai oe mai ia Iesu Keriso?

• O a nisi o filifiliga e mafai ona e faia o le a aumai faalatalata atili atu ai oe ia Iesu Keriso?

• O le a se mea e mafai ona fesoasoani ia te oe i le faia o filifiliga aupito sili ona taua e ave i ai lau faamuamua?

Afai e faaaoga le gaoioiga o maa i le lesona, e mafai ona valaaulia tamaiti aoga e tusi i luga o maa nisi o gaoioiga o loo lisiina i luga o le laupapa. E mafai ona latou tusia gaoioiga e faalatalata atili atu ai i latou ia Iesu Keriso i luga o maa tetele ma gaoioiga e le taua tele i luga o maa feoloolo pe laiti. Ona mafai lea e tamaiti aoga ona faataitai le tuuina muamua o maa lapopoa i totonu o le koneteina, ma faaauau ai pea i maa laiti seia oo ina le toe i ai se avanoa i le koneteina.

• O a faamanuiaga ua e mauaina e ala i le faia o taumafaiga e faatotonugalemu lou olaga ia Iesu Keriso?

Fai se fuafuaga

Afai ua uma ona fatuina e nisi o tagata aoga se lisi o a latou gaoioiga i aso taitasi e tapena ai mo le vasega, ia fetuunai nei faatonuga ia talafeagai.

Fai se lisi o au gaoioiga masani i aso taitasi, ma fuafua po o a gaoioiga o loo fesoasoani ia te oe e latalata atili atu ai i le Faaola. Mafaufau i soo se mea e mafai ona e faaopoopo pe aveesea e tusa ai ma mea sa e aoaoina ma lagonaina i le aso. Fai se fuafuaga patino mo mea o le a e faia e faatotonugalemu atoatoa ai lou olaga i le Faaola.

Mafaufau e valaaulia ni volenitia e faasoa mai a latou fuafuaga. Vaavaai mo ni auala e faamalo atu ai i tamaiti aoga i mea na latou faia e taulai atu ai i le Faaola. Faasoa atu le molimau e uiga i faamanuiaga e oo mai mai le faatotonugalemuina o o tatou olaga i le Faaola.

Tala ma Faamatalaga o Talaaga

E faapefea ona taumafai Satani e taofia i tatou mai le faaaogaina ma le atamai o o tatou taimi?

Sa saunoa Peresitene Steven W. Owen, sa avea muamua ma Peresitene Aoao o Alii Talavou:

O le a taumafai le fili e faatosina oe e faapea e le manaomia le fafagaina faaleagaga, po o le taufaasese atili, faapea e mafai ona faatali. O ia o le matai o faalavefau ma le pogai o le faatuutuu. O le a ia aumaia ni mea i lou taulaiga e foliga e faanatinati ae, o le mea moni, e le taua lava ia mea. Atonu o le a ia “faaatuatuvale oe i mea e tele” ma o le a e le amanaiaina ai le “mea e tasi [lea] e manaomia” [ Luka 10:41–42 ].

(Steven W. Owen, “Ia Faatuatua, Ae Le o Le Le Faatuatua,” Ensign po o le Liahona, Nov. 2019, 13)

Na saunoa Elder Richard G. Scott (1928–2015) o le Korama o Aposetolo e Toasefululua:

Pe o i ai ea le tele naua o mea mananaia, ma fiafia e fai po o tele foi ni luitau o loo fetaomi mai i ou luga, lea ua faigata ai ona taulai atu i mea e taua? A oo ina fetaomi mai mea o le lalolagi, o le tele o mea sese uma lava ua ave i ai le faamuamua aupito maualuga. Ona faigofie lea ona galo le faamoemoega autu o le olaga. Ua ia Satani se meafaigaluega mamana e faaaoga faasaga i tagata lelei. O le faalavefau lea. O le a ia tuu atu i tagata lelei e faatumu le olaga i “mea lelei” ina ia leai se avanoa mo mea taua. Pe ua saisaitia oe ma le le mafaufau i ai i lena mailei?

(Richard G. Scott, “Muamua Mea Muamua,” Ensign, Me 2001, 7)

O a nisi o tulaga lamatia o le faamasinoina o filifiliga a se isi tagata?

Sa saunoa Peresitene Bonnie D. Parkin, sa avea muamua ma Peresitene Aoao o le Aualofa:

I totonu o le talosaga a Mareta mo se fesoasoani sa i ai se faamasinoga e le leoa ae manino: “O a’u e sa’o; e sese o ia.”

Pe tatou te faamasino ea le tasi i le isi? Pe tatou te faitioina ea le tasi ma le isi mo filifiliga faaletagata, ma le manatu ua sili atu lo tatou iloa, ae o le mea moni e seāseā ona tatou malamalama i le tulaga patino o isi po o musumusuga faaletagata? … O ia ituaiga faamasinoga … e faoa mai ia i tatou mea lelei, lena alofa mama o Keriso.

E aveesea mai foi le tatou vaai i lena vaega lelei pe a tatou faatusatusaina i tatou lava i isi. E manaia atu lona lauulu, o o’u vae e lapopoa, e sili atu ona talenia lana fanau, pe sili atu ona fua tele lana togalaau—uso e, tou te silafia le mea e tatau ona fai. E le mafai lava ona tatou faia lena mea. E le mafai ona tatou faatagaina i tatou lava e lagona le le atoatoa e ala i le taulai atu i mea e le o i tatou nai lo o ai i tatou!

(Bonnie D. Parkin, “Filifiliaina o le Alofa Mama: O Lea Mea Lelei,” Ensign po o le Liahona, Nov. 2003, 105)

E mafai faapefea ona ou filifili i le va o filifiliga e lua e le leaga tele?

Sa saunoa Peresitene Dallin H. Oaks o le Au Peresitene Sili:

A o tatou manatunatu i filifiliga eseese, e tatau ona tatou manatua e le lava le na ona lelei o se mea. O nisi filifiliga e lelei tele, ae o isi e silisili ona lelei. …

Mafaufau pe faapefea ona tatou faaaoga o tatou taimi i filifiliga tatou te faia i le matamata i le televise, taaalo i taaloga faavitio, evaeva i le Initoneti, po o le faitauina o tusi po o mekasini. E moni e lelei le matamata i faafiafiaga e lelei po o le mauaina o faamatalaga e fiafia i ai. Ae le o mea uma o lena ituaiga e aoga i le vaega o lo tatou olaga tatou te faaaluina ina ia maua ai. O nisi mea e lelei tele, ae o isi e silisili ona lelei. …

… E ao ona tatou tuuese nisi o mea lelei ina ia filifili ai mea e lelei tele pe sili atu ona lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.

(Dallin H. Oaks, “Lelei, Lelei Tele, Lelei Silisili,” Ensign po o le Liahona, Nov. 2007, 104–5, 107)

Gaoioiga Faaopoopo e Aoao Ai

Saili masei i filifiliga a isi

Na faasa’o e le Faaola ia Mareta ina ua ia saili masei i mea na fai e Maria. Fuafua e fesoasoani i tamaiti aoga ia malamalama e le tatau ona tatou tuuina atu i isi o tatou lava manatu e uiga i le mulimuli i le Alii (tagai i le “O a nisi o tulaga matautia o le faamasinoina o filifiliga a isi?” i le vaega “Faamatalaga o Tala ma Talaaga”).

E mafai ona faatomua atu lenei gaoioiga e ala i le fai atu o se tasi o fesili nei: Pe na faitioina ea oe ona o se filifiliga na e faia? Faamata e mafai e ni tagata se toalua ona filifili ni gaoioiga eseese e taliaina uma e le Alii?