Mataio 18:21–35

O le Faataoto i le Auauna Le Loto Faamagalo

Scenes from an outdoor market, money changer’s table with coin trays. Outtakes include coins in pan of a balance scale, clay lamps that are lit on a ledge, and some chickens.

I le tali atu i se fesili a Peteru na fai e uiga i le faamagalo atu, na aoao atu ai e Iesu Keriso le faataoto i le auauna le loto faamagalo. E mafai e lenei lesona ona fesoasoani ia te oe e avea atili ai e faapei o le Tama Faalelagi ma Iesu Keriso a o e taumafai e faamagalo atu i isi.

O le faasoaina o tala ma faamaumauga moni. Ina ia fesoasoani e faatupulaia le fiafia o tamaiti aoga i se lesona, mafaufau e faasoa atu tala po o faamaumauga moni mai olaga o perofeta ma talafaasolopito o le Ekalesia faapea foi ma saunoaga i konafesi aoao, mekasini a le Ekalesia, po o lou lava olaga. E mafai ona faatupulaia e nei tala le faatuatua o tamaiti aoga i le talalelei a Iesu Keriso, i le fesoasoani atu lea ia i latou e malamalama i le talalelei e ala i aafiaga o isi tagata.

Sauniuniga a le tamaitiiti aoga: I se fuaitau o mau mo le atamai i aoaoga faavae, o loo fetalai ai le Alii, “O outou ua poloaiina ia faamagalo atu i tagata uma” ( Mataupu Faavae ma Feagaiga 64:10). Valaaulia tamaiti aoga e manatunatu pe aisea e poloaiina ai tatou e Iesu Keriso ia faamagalo le tasi i le isi. Atonu e aoga foi le valaauliaina o tamaiti aoga e faitau i le Mataupu Faavae ma Feagaiga 64:9–11 ma ia manatunatu i le feau a le Alii o i na fuaiupu.

Gaoioiga e Mafai ona Fai e Aoao Mai Ai

I le faagasologa o lenei lesona, ia e nofouta i tamaiti aoga atonu o tauivi e faamagalo i se isi na faamanualia i latou. Mafaufau e faaaoga nisi o faamatalaga o loo maua i le vaega o “Tala ma Faamatalaga o Talaaga” atonu e fesoasoani ai i tamaiti aoga o loo feagai ma ia tulaga.

“E mafai ona e faamagaloina a’u?”

I le taimi o le Taua Lona Lua o le Lalolagi, na puapuagatia ai se tina sa igoa ia Corrie ten Boom i masina e tele i totonu o se tolauapiga o faasalaga a le vaega o le Nazi i le laueleele o Ravensbrück, i Siamani. Sa maliu lona uso matua o Betsie iina. Ina ua maea le taua, na saunoa Corrie i se faapotopotoga o tagata e uiga i le faamagaloga a le Atua. Na faamatala mai e Epikopo Keith B. McMullin, sa iai i le Au Epikopo Pule Faamalumalu, le mea na tupu ina ua maea lana tautalaga. A o e faitauina, mafaufau i auala na mafai ona filifilia e Corrie e tali atu ai.

Sa alu atu se tamaloa ia te ia. Sa ia iloaina o ia, o se tasi o leoleo aupito saua sa i ai i le tolauapiga. “Sa e ta’ua Ravensbrück i lau tautalaga,” o lana tala lea. “Sa ou leoleo ai iina. … Peitai, talu mai lena taimi, … ua avea au ma Kerisiano.” Na ia faamatala e faapea, sa ia sailia le faamagaloga mai le Atua mo mea leaga sa ia faia. Na ia faaloaloa atu lona lima ma fesili atu, “Pe mafai ona e faamagalo mai ia te au?” [Corrie ten Boom, Tramp for the Lord (1974), 56].

(Keith B. McMullin, “O Lo Tatou Ala o Tiute,” Ensign po o le Liahona, Me 2010, 13)

O a ni manatu atonu na i ai i le mafaufau a Corrie i lena taimi?
Aisea e ono faafaigata ai le faamagalo atu i isi?

Faitau i le Mataio 18:21–22 e vaai ai pe sa faapefea ona tali atu Iesu i se fesili a Peteru na fai e uiga i le faamagalo atu.

E faapefea ona e faamatalaina mea na aoao atu e Iesu ia Peteru?
Aisea ua e manatu ua poloaiina ai e le Alii i tatou ia avea ma tagata loto faamagalo?

E ui ina tele mataupu faavae taua e fesootai i le faamagalo atu, o loo taulai lenei lesona i o tatou naunautaiga e faamagalo atu i isi e pei ona faamagaloina e Iesu Keriso i tatou. E fua i tali a tamaiti aoga i le fesili o le a sosoo ai, mafaufau e fetuunai le lesona ina ia taulimaina o latou manaoga.

O a ni fesili o ia te oe e uiga i le poloaiga a le Faaola mo i tatou e faamagalo atu i isi?

Mafaufau loloto i ou lagona e uiga i le faamagalo atu. O i ai se isi na faafaigata ia te oe ona faamagalo? I lau api talaaga o suesuega, tusi i lalo pe faapefea ona faamanuiaina lou olaga pe a mafai ona e faamagalo i latou na faatiga ia te oe. Mafaufau foi e faamaumau pe mata o le a se suiga i lou olaga pe ana e le taumafai e faamagalo atu i isi.A o e suesue i se faataoto na faasoaina e le Alii ia Peteru, saili pe faapefea e le naunautaiga o le Alii e faamagalo i tatou ona faamalosia lou gafatia e faamagalo atu i isi.

O le faataoto i le auauna le loto faamagalo

Faitau i le Mataio 18:23–27, ma saili po o le a le faiga e le tupu i le faataoto o tagata o loo aitalafu ia te ia. E taua le iloa o le 10,000 taleni o se aitalafu e le mafai ona toe totogiina. E 250,000 tausaga e manaomia ona faigaluega ai se tagata faigaluega mativa i aso o Iesu e maua ai lena aofaiga tupe (tagai i le Jay A. Parry ma Donald W. Parry, Malamalamaaga i Faataoto a Iesu Keriso [2006], 95).

Aisea ua e manatu e faaaogaina ai e Iesu Keriso se aitalafu e le mafai ona toe totogiina e aoao atu ai lenei faataoto?

Faitau le vaega o totoe o le faataoto i le Mataio 18:28–35, ma saili le ala tatou te tausia ai e le tasi le isi ma pe aisea. E aoga ona e iloa o le 100 tenari e tusa ma le “totogi mo le tolu masina a se tagata faigaluega mativa” ( fuaiupu 28, vaefaamatalagaa).

O le a se mea ua e aoaoina e uiga i le faamagalo atu mai lenei faataoto?
Aisea e taua ai ona tatou malamalama i le tele o le alofa mutimutivale e tuuina mai e le Faaola mo i tatou?

O se tasi o upumoni e mafai ona tatou aoaoina mai le faataoto e faapea e mafai ona tatou mulimuli i le faataitaiga a Iesu Keriso i le faamagalo atu i isi e pei ona Ia faamagaloina i tatou.

Na toe faamatala mai e le Alii le taua o le faamagalo atu i isi i lo tatou tisipenisione. Faitau i le Mataupu Faavae ma Feagaiga 64:9–11, ma saili mo aoaoga a le Alii e uiga i le faamagalo atu.

E fua i mea ua e aoaoina i lenei aso, aisea ua e manatu ai ua moomia i tatou e le Alii e faamagalo atu i tagata uma?

E mafai ona fesoasoani mai Iesu Keriso ia tatou faamagalo atu i isi

O nisi o taimi e ono faafaigata ai ona faamagalo atu i isi. Ae faatasi ai ma le fesoasoani a le Faaola, e mafai ai mea uma lava.

A o e faitau i le faaiuga o le tala a Epikopo McMullin e uiga i le faafesagai ai o Corrie ma lē sa leoleo, saili pe na faapefea ona foai atu e le Faaola le malosi ia te ia e faamagalo atu ai.

Atonu e te manao e matamata le vitio “O lo Tatou Ala o Tiute,” o loo maua i le ChurchofJesusChrist.org, mai le taimi faatulagaina o le 2:16 i le 3:26.

2:3

“Atonu e le’i tele ni sekone na tulai ai o ia iina–o lona lima o loo faaloaloa atu—ae ia te au lava ia sa foliga mai e tele ni itula a o ou tauivi ma le mea aupito sili ona faigata sa tatau ona ou fai.

“… O le savali faapea e faamagaloina e le Atua, e i ai se … tuutuuga: tatou te faamagalo atu ia i latou na agaleaga mai ia i tatou. …

“… ‘Fesoasoani mai ia te a’u!’ Sa ou tatalo le leoa ai. ‘E mafai ona sii lo’u lima. Na pau lena o le mea e mafai ona ou fai. E aumai e oe le lagona.’

“… Ma le musua, ma le le mafaufau i ai, sa ou tuu faamalosi atu lo’u lima i le lima sa faaloaloa mai ia te au. A o ou faia o lea, na iai se mea ofoofogia na tupu. O le āu tafe na amata i lo’u tauau, ma puna vave a’e ai i lo’u lima, ma sosolo atu ai i o ma’ua lima ua soofaatasi. Ona foliga mai ai lea ua lilofia lo’u tagata atoa i lenei mafanafana faamalolo, ma aumaia ai loimata i o’u mata.

“‘Ua ou faamagalo ia te oe, tuagane!’ Sa ou tagi. ‘Ma lo’u loto atoa.’

“Mo se taimi umi sa ma taufai uumau e le tasi le lima o le isi, o lē sa leoleo ma lē sa pagota. Sa ou le iloaina lava le loloto o le alofa o le Atua, nai lo i lena taimi” [Corrie ten Boom, Tramp for the Lord (1974), 54–55].

(Keith B. McMullin, “O Lo Tatou Ala o Tiute,” Ensign po o le Liahona, Me 2010, 13)

O le a se mea na e aoaoina mai le aafiaga a Corrie e mafai ona fesoasoani ia te oe e faamagalo atu ai pe a oo ina faigata?
O a mea ua e aoaoina mai lou lava olaga, olaga o isi, ma tusitusiga paia e uiga i le ala e faamagalo atu ai i isi pe a oo ina faigata?

O se tasi mea e mafai ona fesoasoani ia i tatou a o tatou suesue i tusitusiga paia, o le aoao mai lea ma saili e atiae uiga o Iesu Keriso. O le Mataio 18:21–35 o se tasi o fuaitau o mau e tele o loo faaalia mai ai le natura loto faamagalo o le Faaola faapea le faamasinogatonu a le Atua pe a tatou le filifili e faamagalo atu. Mafaufau po o a mea e mafai ona e faia ia e avea ai e faapei o se tagata loto faamagalo tele e pei o Iesu Keriso. O le a faapefea ona e valaauliaina le Faaola e fesoasoani ia te oe?

Tala ma Faamatalaga o Talaaga

Mataio 18:24 . E fia le aofaiga i tupe o le 10,000 taleni?

Na aoao mai Elder Jeffrey R. Holland o le Korama o Aposetolo e Toasefululua:

2:3

O loo i ai sina eseesega o manatu a le au atamamai e faatatau i le tau o le tupe o loo ta’ua i i—ma ia faamagalo le vaega e faasino i mea tautupe a le I.S.—ae i le faafaigofieina o le matematika, afai o le aitalafu laitiiti sa lei faamagaloina e 100 taleni, po o le $100 i le tatou tupe i le taimi nei, o lona uiga o le aitalafu 10,000 taleni sa faamagalo fua e tai latalata atu i le $1 piliona—pe sili atu!

I le avea ai ma se aitalafu patino, o se numera tele naua lena—tatou te matua le malamalama lava i ai. (E leai se tasi e faia se faatau tele faapena!) Ae, mo le faamoemoega o lenei faataoto, e tatau ona le malamalama i ai; e tatau ona sili atu ma lo tatou gafatia e malamalama i ai, le faia o se tala e sili atu ma lo tatou gafatia e totogiina. O le mafuaaga ona e le o se tala lenei e faatatau i ni auauna se toalua na fefinauai i le Feagaiga Fou. O se tala e faatatau ia i tatou, o le aiga pa’ū o le tagata—o tagata aitalafu faaletino, solitulafono, ma o pagota uma. O i tatou uma o ni tagata aitalafu, ma o le i’uga o le faafalepuipuiina o i tatou uma taitoatasi. O iina o le a tatou tumau ai pe a na le seanoa le alofa tunoa o lo tatou Tupu lea na faasaolotoina i tatou ona e alofa o Ia ia i tatou ma o loo “liuliu mai Lona agaalofa ia te i tatou” [ Mataupu Faavae ma Feagaiga 121:4 ].

(Jeffrey R. Holland, “Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 41)

O le lagonaina o le tiga ona o le mea na faia ia te au o lona uiga ou te lei faamagaloina lava se isi?

Na aoao mai Elder Jeffrey R. Holland o le Korama o Aposetolo e Toasefululua:

Peitai, e taua mo nisi o outou o loo ola i le tiga moni e matau mea sa le’i fetalai ai [Iesu Keriso]. Sa le’i fetalai mai o Ia, “E le faatagaina ona outou lagonaina le tiga moni po o le faanoanoa moni mai aafiaga matuitui na e oo i ai ona o le isi tagata.”

(Jeffrey R. Holland, “O le Galuega o le Faaleleiga,” Ensign po o le Liahona, Nov. 2018, 79)

Na aoao mai e Elder David E. Sorensen o le Fitugafulu se upumoni taua e uiga i le poloaiga e faamagalo atu.

Ou te fia faamanino atu, o le faamagaloga o agasala, e le tatau ona fenumiai ma le faapalepale i le amioleaga. … E ui lava e tatau ona tatou faamagalo atu i se tuaoi e faatiga mai ia te i tatou, ae e tatau lava ona tatou galulue i se auala lelei e puipuia mai ai lena tiga ina ia le toe tupu.

(David E. Sorensen, “O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 12)

E faapefea e le faamagalo atu i isi ona tuusaoloto ai i tatou?

Matamata i le vitio “Mataupu Faavae o le Filemu: Faamagalo Atu” (1:49), o loo maua i le ChurchofJesusChrist.org, e aoao ai e uiga i le filemu na lagona e se tina ina ua faamagalo atu i lona tama ina ua tuanai le tele o tausaga o tetea ona matua.

2:3

O le a le uiga o le fetalaiga a le Faaola i le taimi na Ia fetalai ai ia Peteru e faamagalo atu i isi “seia fitugafulu ni fitu”? ( Mataio 18:22)

Na faamalamalama mai e Elder Lynn G. Robbins, sa i ai i le Au Peresitene o Fitugafulu:

Na fetalai tonu atu le Faaola ia Peteru e aua ne’i faitauina—ia aua ne’i faatuina ni tapulaa i le faamagalo atu. …

Sa manino lava, sa le’i faatuina e le Faaola se tapulaa maualuga o le 490. O le a talitutusa lena mea ma le faapea atu o le taumafa i le faamanatuga e tapulaa i le 490, ma a oo loa i le taimi lona 491, ona faamautu mai lea e se suetusi faalelagi ma faapea mai, “Ou te faamalulu atu, ae ua uma nei le aoga o lau pepa salamo—mai lenei taimi e agai i luma, ua e alu nei na o oe.”

Sa faaaoga e le Alii le matematika o le faafitugafulu e fai ma faatusa o Lana Togiola e le i’u, o Lona alofa e le faatuaoia, ma Lona alofa tunoa e le faatapulaaina. “Ioe, ma o le tele o taimi e salamo ai loʼu nuu Ou te faamagalo ai i latou ia latou solitulafono faasaga mai ia te aʼu” [ Mosaea 26:30 ; ua faaopoopoina faamamafa].

(Lynn G. Robbins, “Seia Fitugafulu ni Fitu,” Ensign po o le Liahona, Me 2018, 23)