Mataio 18:11–14

O Le Alofa Mutimutivale o le Tama Faalelagi ma Iesu Keriso

Na aoao mai e Iesu Keriso e i ai le alofa ma le popolega o ia te Ia ma lo tatou Tama Faalelagi mo tagata uma. O loo faamoemoeina lenei lesona ia fesoasoani ia te oe e lagona o le Tama Faalelagi ma Iesu Keriso e agaalofa ma naunau ia laveaiina agaga uma ua leiloloa.

O le taulai atu i uiga auaumama ma amioga o le Faaola. Faaaoga tusitusiga paia e le na mo le aoao atu o mea na faia e Iesu Keriso ae ia faamamafa ai foi Ona uiga ma amioga paia. O le a faapea ona valaauliaina ai le Agaga Paia e molimau mai ia te Ia, ma fesoasoani ai i tamaiti aoga e malamalama atili e uiga ia te Ia ma naunau ia avea e faapei o Ia.

Sauniuniga a le tamaitiiti aoga: Valaaulia tamaiti aoga e o mai saunia i le vasega e faasoa i tala o tusitusiga paia o loo faaalia mai ai le alofa o le Atua mo i latou o leiloloa faaleagaga.

Gaoioiga e Mafai ona Fai e Aoao Mai Ai

O le natura o le Tama Faalelagi ma Iesu Keriso

Ina ia fesoasoani i tamaiti aoga e lagona le mafanafana e tali faamaoni ai le fesili lenei, mafaufau e valaaulia i latou e tusi i luga o se fasi pepa laitiiti le numera o le tali ua latou filifilia (e aunoa ma le tusia o o latou igoa). Mafaufau e ao fasi pepa ma faasoa tali ma le vasega.

• O fea o faamatalaga nei ua e manatu e sili ona faamatalaina ai lagona o le Tama Faalelagi ma Iesu Keriso e faatatau ia i latou ua agasala?

1. E faalefiafia i Laua e faamagalo i tagata agasala, ae La te faia pe afai tatou te salamo faamaoni.

2. E sili atu ia i Laua ona tatou salamo ina ia mafai ai ona La faamagaloina i tatou, ae La te fiafia i soo se filifiliga tatou te faia.

3. E La te lagonaina le olioli tele e faamagalo i tagata agasala ua salamo.

• E mafai faapefea e le malamalamaaga o se tagata i le natura o le Tama Faalelagi ma Iesu Keriso ona aafia ai a latou filifiliga?

A o e suesueina lenei lesona, mafaufau i mea e te aoaoina e uiga i le natura o le Tama Faalelagi ma Iesu Keriso ma pe faapefea ona aafia lou olaga i le iloa o nei mea. Ina ua maea ona aoao atu i Ona soo le matuia o le agasala o le faatiga po o le faaleaga o fanau a le Atua, na faaalia e le Faaola Lona naunau ma le alofa mutimutivale e laveaiina “le mea na leiloa, ma valaau i tagata agasala ia salamo” ( Faaliliuga a Iosefa Samita, Mataio 18:11 [i le Mataio 18:11, vaefaamatalagai]).

Faitau i le Mataio 18:11–14, ma saili po o a lagona o le Tama Faalelagi ma Iesu Keriso e uiga ia i latou ua leiloloa faaleagaga.

• O a ni upu po o ni fasifuaiupu mai nei fuaiupu e fesoasoani ia te oe e malamalama atili ai i le natura o le Tama Faalelagi ma Iesu Keriso?

• O a auala eseese e fai ma mea e leiloloa faaleagaga ai tagata?

O le tasi o upumoni e mafai ona tatou aoaoina mai nei fuaiupu e faapea e agaalofa le Tama Faalelagi ma Iesu Keriso ma naunau ina ia laveaiina i latou ua leiloloa faaleagaga.

Sa faamatala mai e Peresitene Dieter F. Uchtdorf, a o i ai i le Au Peresitene Sili:

I le faagasologa o seneturi, o lenei faataoto [o le mamoe na leiloa] ua masani lava ona faauigaina o se valaau ia faatino mo i tatou le toe faafoi mai o le mamoe ua leiloa ma aapa atu ia i latou o loo leiloloa. E ui lava ina mautinoa le talafeagai ma le lelei o lenei mea, ae ou te tuufesili lava pe o i ai se isi mea i talaatu.

Pe talafeagai ea ona e faapea o le faamoemoega o Iesu, muamua ma le sili, o le aoao atu lea e uiga i le galuega a le Leoleo Mamoe Lelei?

Pe talafeagai ea le faapea sa Ia molimau mai e uiga i le alofa o le Atua mo Ana fanau le usiusitai? …

E le afaina pe na faapefea ona e leiloa—pe na e leiloa ona o au lava filifiliga le lelei pe ona o ni tulaga na le mafai ona e puleaina. …

Ona e alofa o Ia ia te oe, o le a Ia saili ai ia te oe. O le a Ia faafuata ia te oe ma le olioli. Ma a o Ia aumaia oe i le aiga, o le a Ia faapea atu i tagata uma, “Ia tatou olioli ia ma a’u; aua ua ou maua la’u mamoe na leiloa” [ Luka 15:6 ].

(Dieter F. Uchtdorf, “O Le A Ia Tuu Oe i Luga o Ona Tauau ma Ave Oe i le Aiga,” Ensign po o le Liahona, Me 2016, 102)

• Aisea ua e manatu ai ua finagalo Iesu Keriso ia tatou iloa le agaalofa o Ia ma lo tatou Tama Faalelagi?

• E mafai faapefea e le malamalama i le La natura agaalofa ona fesoasoani i tulaga o loo i ai lou olaga i le taimi nei?

O faamaoniga o le natura agaalofa o le Tama Faalelagi ma Iesu Keriso

E tele auala e fesoasoani ai i tamaiti aoga ia iloa faamaoniga o le alofa mutimutivale ma le agaga faamagalo o le Atua. Filifili auala e sili ona talafeagai mo tamaiti aoga. O le a mulimuli mai nisi auala e ono mafai ona fesoasoani.

O se tasi auala e mafai ona tatou faamalosia ai a tatou molimau i mataupu autu o le talalelei o le sailia lea o faataitaiga moni i le olaga o loo faaalia mai ai lo latou faamaoni. A o e vaaia faamaoniga o mataupu faavae o le talalelei i soifuaga o isi, e mafai ona fesoasoani le Agaga Paia ia te oe e lagonaina le faamoemoe ma le talitonuga o le a faamanuiaina foi lou olaga e nei mataupu faavae. E mafai ona fesoasoani fautuaga nei ia e vaaia ai faataitaiga moni i le olaga o le upumoni ua faapea e agaalofa le Tama Faalelagi ma Iesu Keriso ma naunau ia laveaiina i latou ua leiloloa faaleagaga.

Mo le gaoioiga lenei, mafaufau e valaaulia le vasega e galulue i ni vaega laiti. A maea ona suesueina e tamaiti aoga ia mau, e mafai e se tamaitiiti aoga mai vaega taitasi ona tusi i luga o le laupapa faataitaiga na latou maua. Afai na auai tamaiti aoga i le gaoioiga o le sauniuniga a le tamaitiitiiti aoga, e mafai ona valaaulia i latou e faaaoga nisi o mau na latou maua o se vaega o lenei gaoioiga.

Saili imau mo faamaumauga o loo faaalia mai le agaga faamagalo ma le agaalofa o le Tama Faalelagi ma Iesu Keriso. A e manaomia se fesoasoani, mafaufau e suesue i se tasi pe lua o tala faatusi paia nei: Ioane 8:1–11 ; Alema 36:6–21 .

Filifili nisi o faataitaiga na tusia e tamaiti aoga i luga o le laupapa, ma talatalanoa faatasi i ai ma le vasega atoa. Fesoasoani i tamaiti aoga ia iloa e pei lava ona faaalia e le Atua le alofa mutimutivale i tagata i aso anamua, o le a Ia faaalia foi le alofa mutimutivale ia i tatou.

Ona faaaoga lea o se tasi o vitio nei e faailoa atili ai le natura alofa mutimutivale o le Tama Faalelagi ma Iesu Keriso.

Atonu foi e te manao e matamata i se tasi pe lua o vitio nei: “E Finagalo le Faaola e Faamagalo” (5:50) ma “Mataupu Faavae o le Filemu: Salamo #PrinceofPeace” (2:57), o loo maua i le ChurchofJesusChrist.org. O loo faaalia e nei vitio faataitaiga o le aapa atu o Iesu Keriso ma le agaalofa ma le faamagalo ia i latou ua leiloloa faaleagaga i o tatou aso.

• O le a se mea o e lagona e finagalo le Alii ia e aoaoina mai faataitaiga na e filifilia?

• O a auala na e mataulia ai le faaalia e le Faaola o le alofa mutimutivale ma le sailia o i latou sa leiloloa?

O le sailia o faataitaiga o mataupu faavae o le talalelei i lou lava olaga ma i olaga o tagata e te iloa e mafai ona avea o se auala aupito mamana lea e fesoasoani ai ia te oe e lagona le moni o i latou.

Afai o valaaulia tamaiti aoga e faasoa faaleotele i mea nei, uunai i latou ia aua nei faasoa mai ni igoa po o auiliiliga patino tele.

E aunoa ai ma le taua mai o auiliiliga patino po o igoa, faamatala le olaga o se isi o e iloa o loo faamaonia ai le agaalofa o le Tama Faalelagi ma Iesu Keriso ma lo la sailia o i latou ua leiloloa i o tatou aso.Mafaufau loloto pe faapefea e nei faataitaiga ona faamalosia lau molimau i le natura agaalofa o le Tama Faalelagi ma Iesu Keriso. Mafaufau pe aisea e taua ai ona e iloa lenei mea e uiga ia i Laua.

Tala ma Faamatalaga o Talaaga

O ai o loo faatusa i le mamoe na se ese i le Mataio 18:12–13 ?

Na faamatala mai e Isaia, “O i tatouuma ua sē i tatou e pei o mamoe; ua taitasi ma faasaga i lona lava ala” ( Isaia 53:6 ; ua faaopoopoina le faamamafa). O lea la, o le mamoe na leiloa o loo manaomia ona laveaiina e le Leoleo Mamoe Lelei o loo fai ma faatusa o i tatou uma taitasi.

O le a se lagona o le Tama Faalelagi e uiga ia i latou o loo taumafai e mulimuli ia te Ia ae peitai o loo agasala pea lava pea?

Sa fesoasoani Peresitene Dieter F. Uchtdorf, a o i ai i le Au Peresitene Sili, e tali le fesili lea. Atonu e te manao e matamata i le vitio “O Faalagiga e Fa,” o loo maua i le ChurchofJesusChrist.org, mai le taimi faatulagaina o le 3:07 seia oo i le 4:49.

//media.ldscdn.org/webvtt/general-conference/april-2013-general-conference/2013-04-3040-president-dieter-f-uchtdorf-en.vtt

Ua tatou vaai uma i se tamaitiiti laitiiti o aoao e savali. O si tamai laa lava ma tautevateva. E pau o ia. Pe tatou te otegiaina ea se taumafaiga faapena? E leai. O ai se tamā e faasalaina se tamaitiiti laitiiti ona o le tau pau? Tatou te faamalosiau, tatou te patipatia, ma tatou te viia, aua o tamai laa uma, e avea atili ai le tamaitiiti e pei o ona matua.

O lenei, uso e, e faatusa atu i le atoatoa o le Atua, o i tatou o tagata faaletino ua le ese lava i tatou ma tamaiti laiti e tautevateva. Ae e finagalo lo tatou Tama Faalelagi agaalofa ia tatou avea atili e faapei o Ia, ma, uso pele e, e tatau foi ona avea lena ma a tatou sini e faavavau. E silafia e le Atua tatou te oo atu iina e le i se taimi vave ae e ala i ni laa taitasi i le taimi.

Ou te le talitonu i se Atua e na te faatulagaina ni tulafono ma ni poloaiga ona faatalitali lea mo i tatou ia toilalo ina ia mafai ona Ia faasalaina i tatou. Ou te talitonu i se Tama Faalelagi e agalelei ma agaalofa ma o lē e olioli i a tatou taumafaiga uma ia tutu maualuga ma savavali agai atu ia te Ia. E tusa lava foi pe tatou te tevateva, na te fautuaina i tatou e aua le faavaivai—aua le fiu pe sosola ese mai o tatou tiutetauve atofaina o auaunaga—ae ia lototetele, maua lo tatou faatuatua, ma taumafai pea.

(Dieter F. Uchtdorf, “O Faalagiga e Fa,” Ensign po o le Liahona, Me 2013, 58)

Ona e agaalofa tele le Atua, e manaomia ea ona tatou taumafai e tausi i Ana poloaiga ina ia laveaiina i tatou?

Sa aoao mai Peresitene Dallin H. Oaks o le Au Peresitene Sili:

O nisi e faapei e faatauaina le alofa o le Atua ona o le latou faamoemoe o le tele naua ma le lē faatuaoia o Lona alofa o le a tuusaunoa ai ma le alofa mutimutivale o i latou mai le usitaia o Ana tulafono. …

Afai e malamalama se tagata i aoaoga a Iesu, o le a le mafai e ia ona faaiu faapea e talitonu lo tatou Tama Faalelagi alofa po o Lona Alo paia faapea o Lo La’ua alofa e faaleaogaina ai a La’ua poloaiga. …

Na aoao mai Iesu, “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le lagi” ( Mataio 7:21).

(Dallin H. Oaks, “O Le Alofa ma le Tulafono,” Ensign po o le Liahona, Nov. 2009, 26, 28)

Gaoioiga Faaopoopo e Aoao Ai

Mataio 18:1 . “O ai ea e sili i le malo o le lagi?”

Tusi le fesili o i luga nei i luga o le laupapa, ma valaaulia tamaiti aoga e mafaufau i auala eseese e mafai ai ona tali lenei fesili. Ona valaaulia ai lea o i latou e mafaufau i mea na fai e le Faaola i le Mataio 18:2 ae lei Ona faaleoa lana tali i le fesili. Fesili i tamaiti aoga po o a mea e mafai ona latou aoaoina mai le tali lē faaleoa a le Faaola i le fesili.

Valaaulia tamaiti aoga e faitau i le Mataio 18:3–4 ma talatalanoa i uiga faaKeriso o tamaiti. O a mea e masani ona tatou vaaia i tamaiti e mafai ona faamanatuina mai ia i tatou Iesu Keriso? E mafai faapefea e lo tatou faapei o se tamaitiiti ona saunia atili ai i tatou e ulufale atu i le malo o le lagi? Mafaufau e valaaulia tamaiti aoga e faafesootai i le Mataio 18:1–4 ma le Mosaea 3:19 ma ia talatalanoa po o a malamalamaga faaopoopo e maua mai lenei fuaiupu.

Valaaulia i latou e galulue ma le agaga tatalo e atiae se uiga faaKeriso ua latou vaaia e ala i le faataitaiga a tamaiti.