Luka 10:25–37

O Le Samaria Agalelei

Ina ua fesili se aoao tulafono ia Iesu, “O ai foi le tagata ma te tuaoi?” (Luka 10:29), na tali atu le Faaola i le faataoto i le Samaria agalelei. E mafai ona fesoasoani lenei lesona ia te oe e mulimuli ai i le faataitaiga a Iesu e alofa i lē lua te tuaoi.

O le faailogaina ma le tusia o faamatalaga i totonu o tusitusiga paia. Na valaaulia e Elder Richard G. Scott o le Korama a Aposetolo e Toasefululua (1928–2015) le au talavou ia “faailoga mau taua … ma ia toe alu soo i ai e faitau” (“Mo Le Filemu i le Aiga,” Ensign po o le Liahona, Me 2013, 30). Saili ni avanoa e valaaulia ai tamaiti aoga e faailoga ma tusi ni faamatalaga i totonu o a latou tusitusiga paia. Uunai i latou ia faia i se auala e latou te malamalama ai nai lo o le faatonuina o i latou e fai i ni auala faapitoa.

Sauniuniga a le tamaitiiti aoga: Valaaulia tamaiti aoga e faitau i le Luka 10:30–35, ma saili po o fea latou te vaai ai ia Iesu Keriso i totonu o lea faataoto. Talosaga i ai e latou te saili foi po o fea latou te vaai ai ia i latou lava i totonu o le faataoto.

Gaoioiga e Mafai ona Fai e Aoao Mai Ai

E ono aoga mo tamaiti aoga le faia o ni vasega e sili atu ma le tasi e suesue ai i le faataoto o le Samaria agalelei.

O loo i ai gaoioiga faaopoopo e aoao ai i totonu o le vaega o le “Gaoioiga Faaopoopo e Aoao Ai” o le lesona.

Mo le gaoioiga o loo mulimuli mai, valaaulia tamaiti aoga e faamaumau a latou tali i fesili nei i totonu o a latou api faamaumau suesuega. Mafaufau e faasoa sou aafiaga patino ma valaaulia nisi e ofo e faasoa mai foi o latou aafiaga.

O le fesoasoani atu ia i latou e manaomia le fesoasoani

Mafaufau i se taimi na fesoasoani atu ai se isi ia te oe a o e manaomia se fesoasoani.

• Aisea ua e manatu na fesoasoani atu ai lea tagata ia te oe?

• Na faapeī ou lagona ona o le mea na faia e lenei tagata?

Manatunatu pe mata o le a le faigofie e te ono fesoasoani ai i se isi o loo manaomia le fesoasoani ma pe aisea e te ono fesoasoani ai pe e te le ono fesoasoani ai foi ia i latou. A o e suesue, saili mo upumoni o e aoaoina e uiga ia Iesu Keriso e mafai ona faatupulaia ai lou naunautaiga e fesoasoani ia i latou o loo manaomia le fesoasoani.

O se faataoto

I se tasi aso a o aoao atu Iesu Keriso, na fesili se aoao tulafono ia te Ia po o a mea e manaomia ona ia faia ina ia maua ai le ola e faavavau. Na aoao atu le Faaola ina ia maua le ola e faavavau, e tatau ona tatou alolofa i le Atua ma o tatou loto atoa ma ia alolofa atu i e tatou te tuaoi ia pei o i tatou lava ia i tatou (tagai i le Luka 10:27). Ona toe fai lea o le isi fesili a le aoao tulafono.

Faitau i le Luka 10:29, ma mafaufau e faailoga le fesili a le aoao tulafono sa fai atu ia Iesu.

• E faapefea ona e tali atu i le fesili a le aoao tulafono?

Na tali atu Iesu i le fesili a le aoao tulafono i le faamatalaina o se faataoto ua lauiloa o le faataoto i le Samaria agalelei. A o e suesue i lenei faataoto, ia e manatua o tagata Samaria ma tagata Iutaia e tele ina inosia e le tasi le isi ma e taufai alofia uma mai le fegalegaleaiga o le tasi i le isi. O se tasi mafuaaga e ala ai ona le taliaina tagata Samaria e tagata Iutaia, ona o tagata Samaria e i ai pito Iutaia toe i ai ma pito nuu ese i o latou tupuaga ma ua latou faafefiloi talitonuga faalelotu o nei tupuaga e lua.

O le vaaia o le Faaola i totonu o le faataoto

Faitau i le faataoto o le Samaria agalelei i le Luka 10:30–35 . Atonu e te manao e matamata i le vitio “Faataoto o le Samaria Agalelei” (5:11) a o e mulimuli ai i au tusitusiga paia. O loo maua lenei vitio i le ChurchofJesusChrist.org.

A o e suesue i lenei faataoto, mafaufau i auala ua fai ai le Samaria ma faatusa o Iesu Keriso.

Mafaufau e faaali faalauaitele se ata o Iesu Keriso a o lei faia le fesili lenei:

• O a mea e mafai ona tatou aoaoina e uiga ia Iesu Keriso mai lenei faataoto? (Mafaufau e lisi au tali i lenei fesili i lau api faamaumau suesuega.)

Ua aoao mai Elder Neil L. Andersen o le Korama o Aposetolo e Toasefululua:

O le Faaola o lo tatou Samaria Agalelei, na auina mai “e faamalolo i e loto momomo” [ Luka 4:18 ; tagai foi i le Isaia 61:1 ]. E afio mai o Ia ia i tatou pe a laaloa isi mai ia i tatou. Ma le agaalofa, e tuu e Ia Lana uu faamalolo i luga o ō tatou manu’a ma fusifusia. Na te tauave i tatou. Na te tausia i tatou.

(Neil L. Andersen, “Manu’a,” Ensign po o le Liahona, Nov. 2018, 85)

• O a ni faataitaiga i totonu o tusitusiga paia o faia e le Faaola ia mea ua faamatalaina mai e Elder Andersen?

• O le a se taimi na faapei ai le Faaola o le Samaria agalelei mo oe?

Mafaufau e faasoa sau aafiaga patino na e mataulia ai le agaalofa ma le naunautai o le Faaola e fesoasoani ia i latou uma o loo faamanualia faaleagaga.

O le mulimulitaia o le faataitaiga a Iesu Keriso

Ina ua maea ona faamatalaina le faataoto o le Samaria agalelei, na fesili Iesu Keriso, le faiaoga sili, i le aoao tulafono po o a mea ua ia aoaoina ma na ia valaauliaina le aoao tulafono ia faapea ona ia fai. Faitau i le Luka 10:36–37, ma saili mo le valaaulia a le Faaola i le aoao tulafono.

• E mafai faapefea ona e faaaogaina le valaaulia a le Faaola i lou olaga?

• O a mea o aoao atu e lenei valaaulia ia te oe e uiga i lagona o le Faaola mo fanau uma a le Tama Faalelagi?

O loo tele avanoa mo i tatou e mulimuli ai i le fautuaga a le Faaola ia “alu, ma ia e faapea ona fai” ( Luka 10:37) i tulaga eseese e tele tatou te i ai, e pei i le aiga, i le aoga, i luga o upega tafailagi, i totonu o a tatou uarota po o paranesi, ma i le faatasi ai ma tagata ese.

Mafaufau e vaevae le vasega i ni vaega laiti e talanoaina ai fesili nei. Tofi vaega taitasi i le tasi pe sili o tulaga o loo lisiina atu i le parakalafa talu ai e taulai i ai a o latou taliina nei fesili.

• O a ni auala faapitoa e mafai ona e mulimulitaia ai le faataitaiga a le Faaola ina ia faaalia le alofa i le lua te tuaoi i lenei tulaga?

• O a ni mea e ono faafaigata ai ona faaalia le alofa i le lua te tuaoi i lenei tulaga?

• Afai o loo faafaigata i se tagata ona faaalia le alofa i le la te tuaoi i lenei tulaga, o a mea e mafai ona e aoao i ai e uiga ia Iesu Keriso e ono fesoasoani i ai?

A maea le felafolafoaiga a tamaiti aoga, valaaulia nisi e ofo mai vaega taitasi e faasoa nisi o a latou tali.

Valaaulia tamaiti aoga e mafaufau i mea na latou aoaoina mai lenei lesona. Mafaufau e tuu ia i latou se taimi e tusi ai o latou mafaufauga ma aafiaga i a latou api faamaumau suesuega. Mafaufau e tuu se avanoa i tamaiti aoga e faasoa mai ai i mea ua musuia i latou e fai ona o mea ua latou aoaoina i lenei aso.

• O le a se mea ua musuia oe e fai ona o se taunuuga o mea na e suesue i ai i lenei aso?

Tala ma Faamatalaga o Talaaga

E faapefea ona faatusaina le faataoto o le Samaria agalelei i a tatou faigamalaga i lenei olaga?

Na aoao mai Elder Gerrit W. Gong o le Korama o Aposetolo e Toasefululua e faapea:

I luga o o tatou auala pefupefua i Ieriko, e faasalaveia i tatou e puapuaga o le olaga, faamanu’alia, ma tuua ai ma le tiga.

E ui e ao ina tatou fesoasoani le tasi i le isi, ae tele taimi tatou te ui ese atu ai i le isi ituala, po o le a lava le mafuaaga.

Ae peitai, faatasi ai ma le agaalofa, ua tulai le Samaria Agalelei ma fusifusi o tatou manu’a i le uaina ma le suauu. O faatusa o le faamanatuga ma isi sauniga, o le uaina ma le suauu e faasino atu ai i tatou i le faamalologa faaleagaga ia Iesu Keriso. Na tuuina e le Samaria Agalelei i tatou i luga o Lana lava asini po o le, i nisi tala o tioata felanuai, ua ia ave i tatou i luga o Ona tau’au. Ua ia aumaia i tatou i le faletalimalo, lea e mafai ona faatusa i Lana Ekalesia. I le Faletalimalo, na fai atu ai le Samaria Agalelei, “Tausi ia te ia; … ou te taui atu ia te oe pe a ou toe sau” [ Luka 10:35 ]. Ua folafola mai e le Samaria Agalelei, o se faatusa o lo tatou Faaola, lenei taimi o le nofotupu ma le mamalu.

(Gerrit W. Gong, “Avanoa i le Faletalimalo,” Liahona, Me 2021, 24–25)

Aisea na faaaoga ai e le Faaola se tagata Samaria ae le o se tagata Iutaia e fai ma le na fesoasoani i le tagata manu’a?

Na aoao mai Peresitene M. Russell Ballard o le Korama o Aposetolo e Toasefululua:

Sa matua malosi le feainai i le va o tagata Iutaia ma tagata Samaria i le taimi o Keriso. I lalo o tulaga masani, e alofia e nei vaega e lua fesootaiga o le tasi ma le isi. E avea pea lenei faataoto lelei ma aoaoga pe ana faapea na laveaiina le tagata na faamanualia e tagata faomea e se uso a tagata Iutaia.

O lona faamoemoe e faaaogaina tagata Iutaia ma tagata Samaria o loo manino ona aoao mai ai faapea o i tatou uma lava o tuaoi, ma e tatau ona tatou alolofa, faatauaina, faaaloalogia, ma auauna atu le tasi i le isi e ui i ni o tatou feeseeseaiga loloto—e aofia ai eseesega faalelotu, faaupufai, ma faaleaganuu.

(M. Russell Ballard, “Aoaoga Faavae o le Faaaofia,” Ensign po o le Liahona, Nov. 2001, 36)

O a mea e tatau ona ou fai pe a oo mai avanoa e fesoasoani ai i isi i taimi le talafeagai?

Na aoao mai Peresitene M. Russell Ballard, le Sui Peresitene o le Korama o Aposetolo e Toasefululua:

O avanoa e auauna atu ai i isi i ni ala anoa, e pei ona tatou osifeagaiga ai e fai, e seāseā ona oo mai i ni taimi talafeagai Ae e leai se mana faaleagaga i le ola i mea faigofie. E oo mai le mana a o tausia a tatou feagaiga.

(M. Russell Ballard, “E Pei o se Afi Mu Tele,” Ensign, Me 1999, 86)

Na faamanatu mai e Peresitene Thomas S. Monson (1927–2018):

Aua lava nei avea le foiaina o se faafitauli ma mea sili atu ona taua nai lo se tagata e tatau ona e alofa i ai.

(Thomas S. Monson, “Mauaina o le Olioli i le Faigamalaga,” Ensign po o le Liahona, Nov. 2008, 86)

Gaoioiga Faaopoopo e Aoao Mai Ai

O faatusatusaga o le faataoto o le Samaria agalelei ma le ata o le faaolataga

Valaaulia tamaiti aoga e faitau i le Luka 10:30–35, ma saili pe faapefea ona fai ma faatusa o le ata o le faaolataga le faataoto o le Samaria agalelei. O nisi o faatusa e aofia ai mea nei:

O le alu ifo mai Ierusalema: o le tuua o le muai olaga ae oo mai i le lalolagi

O se tasi tagata: o tatou

O le Samaria: o Iesu Keriso

O le faigamalaga i luga o le auala i Ieriko: o lenei faigamalaga faaletino

Valaaulia tamaiti aoga e talanoaina po o a lesona o loo aoao mai e le faataoto e uiga i le olaga faaletino ma le toe foi atu i le Tama. Fai ni fesili tulitatao e pei o nei: O a nisi auala e faamanualia faaleagaga ai i tatou a o tatou i ai i le lalolagi? O le a ni ou lagona a o fusifusia e le Faaola ou manua?

Mo nisi manatu i auala e mafai ai ona fai ma faatusa lenei faataoto i le ata o le faaolataga, tagai i le John W. Welch, “O Le Samaria Agalelei: O Faatusa Faagaloina,” Ensign, Fep. 2007, 40–47.

O le suesueina o le faataoto mai le vaaiga o le faitaulaga ma le sa Levi

Mafaufau e valaaulia tamaiti aoga e suesue i le faataoto mai le vaaiga o le faitaulaga ma le sa Levi. Valaaulia i latou e mafaufau po o a ni mafuaaga talafeagai na le afe ane ai le faitaulaga ma le sa Levi e fesoasoani i le tagata o loo manaomia le fesoasoani.

Fai i tamaiti aoga e faatusa nei mafuaaga talafeagai i a latou lava tali i avanoa e auauna atu ai. Valaaulia tamaiti aoga e manatunatu pe faapefea ona latou foia a latou lava papupuni e alofa ma auauna atu ai i e latou te tuaoi.

O le aoaoina a o tatou o mai i le faletalimalo a le Alii (Ekalesia)

Na faatusaina e Elder Gerrit W. Gong o le Korama o Aposetolo e Toasefululua le faletalimalo mai le faataoto o le Samaria agalelei ma le Ekalesia a le Alii (tagai i le “Avanoa i le Faletalimalo,” Liahona, Me 2021, 24–25). Na ia fautuaina e mafai ona tatou aoaoina lesona taua e uiga ia i tatou ma ia Iesu Keriso a o tatou o mai i Lona faletalimalo. Mafaufau e filifili ma valaaulia ni tamaiti aoga e suesue i vaega o lenei saunoaga ina ia aoao atili ai pe faapefea ona latou fesoasoani ia lagonaina e isi le faamalologa o loo ofoina mai e le Faaola i le valaauliaina o i latou e o mai i Lana Ekalesia.