Матай 20:1–16
Усан үзмийн талбайд ажиллагсдын сургаалт зүйрлэл
Петр “Бид бүхнийг орхиод Таныг дагасан. Тэгээд бид юу хүртэх вэ?” (Матай 19:27) хэмээн асуусан. Аврагч энэ асуултад усан үзмийн талбайд ажиллагсдын сургаалт зүйрлэлээр хариулжээ. Энэ сургаалт зүйрлэл нь амьдралаа Түүнд зориулахыг сонгосон бүх хүн гэрээний замаар хэзээ алхаж эхэлснээс үл хамааран амлагдсан шагналыг хүлээн авахыг заадаг. Энэ хичээл нь Есүс Христийн Цагаатгалаараа дамжуулан өгдөг адислалуудыг хүлээн авах итгэл найдварыг мэдрэхэд тусална.
Судрын ойлгоход хэцүү хэсгүүдийг төсөөлөн бодох. Суралцагчид судрын зарим ойлгоход хэцүү хэсгийг жүжиглэн тоглож эсвэл өөр бусад аргаар төсөөлөн бодвол илүү сайн ойлгож болох юм. Ийн үйлдэх нь сударт гарч буй үйл явдал, хүмүүс болон мэдээллийг илүү бүрэн дүүрэн боловсруулан хүлээн авахад суралцагчдад тусална.
Суралцагчийн бэлтгэл: Суралцагчдыг бага байхдаа сайн мэдээг заалгасны ачаар Их Эзэнээс хүлээн авсан адислалуудынхаа жагсаалтыг гаргахад урь. Эсвэл тэд амьдралдаа сайн мэдээг заалгаж байгаагүйгээсээ болж хүмүүсийн алдаж болох боломжуудын жагсаалтыг гаргаж болох юм. Өөрсдийн гаргасан жагсаалтаасаа олж мэдэж болох зүйлсийн талаар эргэцүүлэн бодохыг суралцагчдаас хүс.
Боломжит суралцах үйл ажиллагаа
Доорх жишээг ашиглахын оронд энэ үйл ажиллагааг анги бүрийн хэрэгцээ шаардлага, хэмжээнд тохируулан өөрчлөн ашиглах талаар бодож үз.
Хүссэн хэдэн суралцагчийг босож зогсоод, хоёр гартаа судраа эсвэл өөр ном бариад, гараа 2 минутын турш урагш сунган хөдөлгөөнгүй барихад урь. Байрлалаа хоёр минутын турш барьж чадвал шагнал (жижиг чихэр гэх мэт) өгнө гэж амла. 30 секунд тутамд бусад суралцагчийг уг байрлалаар зогсоход урь. Гэхдээ тэдэнд ямар нэг шагнал амлах хэрэггүй. Эхний 2 минутаас 30-хан секунд үлдэх үед үлдсэн бүх суралцагчийг энэ байрлалаар босож зогсоход урь. 2 минут дуусахад бүх суралцагчид гараа буулга гэж хэл. Хамгийн сүүлд оролцсоноос эхлэн бүх суралцагчид эхний хүнд амласан шагналыг бүтнээр нь өг.
Энэ үйл ажиллагаа ямар санагдсаныг суралцагчдаас асуу. Хэрэв эхлээд оролцсон суралцагчид шударга бус хандлаа гэж гомдолловол яагаад ийн бодож байгааг нь асуу.
Дараах жишээг төсөөл.
Мэрисол ээж, эмээ, өвөө нартайгаа хамт саяхан Сүмд нэгджээ. Үүнээс хойш удалгүй өвөө нь нас барав. Өвөө нь сайн мэдээг амьдралдаа хожуу хүлээн авсан ч өөрийнхтэй нь адил адислалуудыг авах болов уу гэж Мэрисол бодох болжээ.
-
Та Мэрисолд юу гэж хэлэх вэ?
Аврагч төлөөлөгчдөдөө Өөрийг нь дагахаар сонгосон бүх хүнд санаа тавьдаг болохоо харуулсан сургаалт зүйрлэлийг заасан. Энэ хичээлийн туршид, Аврагч бидэнд юу өгөхийг хүсдэгийг илүү сайн ойлгоход туслах үнэнүүдийг хайхдаа Ариун Сүнсний өдөөлтийг эрэлхийл.
Усан үзмийн талбайд ажиллагсад
Ажиллагсдын бүлэг бүрийн ажиллаж эхлэх цаг, тохиролцсон хөлс, ажилласан цаг, төлсөн хөлс зэрэг мэдээллийг бичих хоосон зай үлдээсэн нэг хүснэгтийг самбарт зурах талаар бодож үз. Суралцагчдыг хүснэгтийг гүйцээж бөглөхөд урь.
Та энэ сургаалт зүйрлэлийг судлахдаа, Шинэ Гэрээний цаг үед ажлын энгийн өдөр өглөө эрт эхлээд, орой дуусдаг буюу ойролцоогоор 12 цаг үргэлжилдэг байсныг мэдвэл зохино. Эдгээр шүлэгт орсон зоос гэдэг үг нь ажилчдад бүтэн өдрийн ажлын хөлсийг өгөхдөө голчлон ашигладаг байсан Ромын мөнгөний нэгж буюу денарыг хэлж байгаа юм.
Матай 20:1–7 -г уншаад, усан үзмийн талбайн эзэн ажилчдаа хэрхэн хөлсөлдөг байсныг олж мэд.Та ChurchofJesusChrist.org дээрх “Laborers in the Vineyard” видеоны цагийн код 00:00-1:33 хүртэл үзэж болох юм.
Арван хоёр Төлөөлөгчийн Чуулгын ахлагч Жэффри Р. Холланд ийн тайлбарласан.
Аврагчийн амьдарч байсан цаг үед, дундаж нэг гэр бүл нэг өдрийн цалингаараа хоол хүнс авахаас өөр юу ч авч хүрдэггүй байв. Хэрвээ тэд ажиллаагүй, загас бариагүй, мал хариулаагүй эсвэл худалдаа хийж чадаагүй бол идэх хоолгүй байна гэсэн үг.
(Жэффри Р.Холланд, “Талбайд хөдөлмөрлөгсөд,” Ensign, May 2012, 31 эсвэл 2012 оны 4-р сарын Ерөнхий чуулган, 32)
Сургаалт зүйрлэлийг ажилчдын бүлэг тус бүрийн харах өөр өөр өнцгөөс дүн шинжилгээ хийхэд суралцагчдад тусал.
-
Усан үзмийн талбайн эзэн болон ажилчид хэнийг төлөөлж байна гэж та бодож байна вэ?
-
Тухайн өдөр хөлслөгдсөн анхны ажилчдын нэг байсан бол танд ямар санагдах байсан гэж та бодож байна вэ?
-
Цаг явах тусам хөлслөгдөхөө хүлээж буй ажилчдад ямар бодол, мэдрэмж төрж байсан гэж та бодож байна вэ?
Матай 20:8–16 -г уншаад, бүх ажилчны хувьд энэ өдөр хэрхэн дууссан болохыг олж мэд.Та ChurchofJesusChrist.org дээрх “Laborers in the Vineyard” видеоны цагийн код 1:34-өөс 3:00 хүртэл үзэж болох юм.
Энэ сургаалт зүйрлэлд өгүүлснээр, усан үзмийн талбайн эзэнд хөлслөгдөх гэдэг нь Тэнгэрлэг Эцэг, Есүс Христ хоёртой байгуулсан гэрээг бэлгэдсэн байж болохыг мэдэх нь тустай байж болно. Ажлын хөлс гэдгээр мөнх амийн адислалуудыг бэлгэдэж байж болно.
Усан үзмийн талбайн эзний харуулсан тэнгэрлэг зан чанаруудыг таньж мэдэхэд нь суралцагчдад туслахын тулд дараах асуултууд (эсвэл бусад асуулт)-ын заримыг эсвэл бүгдийг асуу.
-
Та хамгийн эхэнд эсвэл хамгийн сүүлд хөлслөгдсөн хүмүүсийн нэг байсан бол усан үзмийн талбайн эзний талаар юу гэж бодох байсан бэ?
-
Усан үзмийн талбайн эзэн бүх ажилчинд хайр, халамжаа ямар арга замаар харуулсан бэ?
-
Усан үзмийн талбайн эзэн Тэнгэрлэг Эцэг эсвэл Есүс Христийг төлөөлж байгааг ойлгосноор та түүнээс ямар тэнгэрлэг зан чанаруудыг олж харсан бэ?
-
Та энэ сургаалт зүйрлэлээс ямар сургамж олж авч болох вэ?
Их Эзэний нигүүлсэл
Арван хоёр Төлөөлөгчийн Чуулгын ахлагч Жэффри Р. Холланд энэ сургаалт зүйрлэлээс Их Эзэний талаар олж мэдэж болох чухал үнэнүүдийг хуваалцсан. Та ChurchofJesusChrist.org дээрх “Талбайд хөдөлмөрлөгсөд” видеоны цагийн код 10:02-оос 11:42 хүртэл үзэж эсвэл дараах бичвэрийг уншиж болох юм.
Бусад сургаалт зүйрлэлийн адил энэхүү [талбайд хөдөлмөрлөгсдийн] сургаалт зүйрлэл яг үнэндээ ажилчид эсвэл ажлын хөлсний тухай биш бөгөөд бусад сургаалт зүйрлэл ч гэсэн хонь, ямааны тухай биш байдаг. Энэ нь Бурханы сайн сайхан, Түүний тэвчээр, уучлал, Их Эзэн Есүс Христийн Цагаатгалын тухай түүх юм. Энэ нь өгөөмөр байдал, нинжин сэтгэлийн тухай түүх. Энэ нь ач ивээлийн тухай түүх юм. Бурханы хувьд хамгийн их таалагддаг нэг зүйл бол ач ивээлийг үзүүлэх явдал бөгөөд ялангуяа үүнийг хүлээн авах эрхгүй хэмээн өөрсдийгөө голж байгаа хүмүүст ач ивээл үзүүлэх явдал гэж миний олон жилийн өмнө сонсож байсан нэгэн бодлыг энэ нь бататгадаг.
Энэхүү сургаалт зүйрлэлийн нэг хэсэг болох уучлан өршөө гэсэн зааврыг энэхүү цуглаанд ирсэн олон хүнээс хэн нь сонсох хэрэгтэй байсныг би мэдэхгүй, гэхдээ дэндүү оройтчихсон гэж бодож байсан ч, өчнөөн олон боломжоо алдсан гэж бодож байсан ч, би чинь олон алдаа гаргасан шүү дээ гэж бодож байсан ч, ямар нэг авьяас чадваргүй эсвэл гэр орон, гэр бүл, Бурханаасаа хэчнээн их холдчихсон мэт санагдаж байсан ч тэнгэрлэг хайрын хүрэх хязгаарын цаад талд та нар гараагүй шүү гэдгийг би та нарт гэрчилж байна. Христийн Цагаатгалын хязгааргүй гэрэл гэрэлтүүлж чадахааргүй тийм гүнзгий ангал руу та нар орно гэж байхгүй юм шүү.
(Жэффри Р.Холланд “Талбайд хөдөлмөрлөгсөд,” Ensign, May 2012, 32–33 эсвэл 2012 оны 4-р сарын Ерөнхий чуулган, 34)
-
Ахлагч Холланд Тэнгэрлэг Эцэг, Есүс Христ хоёрын талаар таны аль хэдийн үнэн гэдгийг нь мэдэх юуг заасан талаар бод. Энэ нь үнэн болохыг та хэрхэн олж мэдсэн бэ?
-
Өнөөдөр олж мэдсэн зүйлийнхээ ачаар, танд Тэнгэрлэг Эцэг, Есүс Христ хоёрын талаар өөр ямар бодол эсвэл мэдрэмж нэмж төрж байна вэ?
-
Таны олж мэдсэн зүйл өдөр тутмын амьдралд тань хэрхэн нөлөөлөх вэ?
Есүс Христийн нигүүлсэл, Түүн дээр ирсэн бүх хүнийг адислах Түүний хүслийг гэрчил. Хувийн туршлагаа хуваалц эсвэл Түүний нигүүлсэл, ач ивээлийг хэрхэн мэдэрснээ зохих ёсоор хуваалцахыг суралцагчдаас хүсэж болно.
Тайлбар ба нөхцөл байдлын талаарх мэдээлэл
Их Эзэний талбайд ажиллахын зорилго юу вэ?
Тэргүүн Зөвлөлийн ерөнхийлөгч Даллин Х. Өүкс ийн заасан.
Эцсийн шүүлтээр өгөх Эзэний шагнал нь бид хэр удаан талбайд ажилласан гэдэгт үндэслэхгүй. Бид цаг харж ажилласнаар тэнгэрлэг шагналыг хүртэхгүй. Юу чухал вэ гэвэл, Их Эзэний ажлын байранд ажилласан хөдөлмөр биднийг өөр хүн болгодогт оршино. Бидний заримын хувьд үүнд бусдаас илүү их цаг зарцуулах шаардлага гардаг. Эцэст нь хөдөлмөрлөснөөр хэн болсон гэдэг нь чухал юм.
(Dallin H. Oaks, “The Challenge to Become,” Ensign, Nov. 2000, 34)
Арван хоёр Төлөөлөгчийн Чуулгын ахлагч Жэффри Р. Холланд ийн заасан.
Би Бурханы хайрын шинэчлэх хүч, Түүний ач ивээлийн гайхамшгийг гэрчилж байна. Тэрээр олж авах итгэлд тань санаа зовдог, харин итгэлийг олж авах цаг хугацааны төлөө санаа зовдоггүй.
Хэрэв та нар гэрээ байгуулсан бол түүнийгээ сахь. Хэрвээ гэрээ байгуулаагүй байгаа бол гэрээ байгуул. Хэрвээ чи гэрээ байгуулчхаад, сахиж чадаагүй бол наманчлаад, залруул. Талбайн Эзэн цаг хугацаа байна гэж хэлж байгаа цагт хэзээ ч оройтохгүй гэсэн үг юм шүү. … Бүү хойшлуул. Оройтох нь байна.
(Жэффри Р.Холланд, “Талбайд хөдөлмөрлөгсөд,” Ensign May 2012, 33 эсвэл 2012 оны 4-р сарын Ерөнхий чуулган, 34)
Нэмэлт суралцах үйл ажиллагаа
Ахлагч Холландын хэлсэн “Талбайд хөдөлмөрлөгсөд” үг
Суралцагчдын хэрэгцээ шаардлагаас хамааран дараах зүйлсийг заахад ахлагч Холландын хэлсэн “Талбайд хөдөлмөрлөгсөд” үгийг ашиглаж болно (Ensign, May 2012, 31–33 эсвэл 2012 оны 4-р сарын Ерөнхий чуулган, 32–34).
-
Атаа жөтөө, хор шарыг ялан дийлэх (түүний хэлсэн үгийн 2–8-р догол мөрийг эсвэл уг видеоны цагийн код 0:23-аас 7:08 хүртэл үзнэ үү)
-
Урам хугарч байсан явдлуудаа ардаа орхин, итгэлтэйгээр урагш алхах талаар (9–11-р догол мөрийг эсвэл уг видеоны цагийн код 7:08-аас 9:57 хүртэл үзнэ үү)
Лук 18:1–8, 35–43 . Шударга бус шүүгчийн тухай болон сохор гуйлгачныг эдгээсэн талаарх сургаалт зүйрлэл
Энэ хоёр цэдгийг хамтад нь эсвэл тус тусад нь зааж болно. Аль аль нь хэрэв бид Тэнгэрлэг Эцэгт өдөр тутам чин сэтгэлээсээ тууштай залбирч, Есүс Христэд итгэх итгэлээ хэрэгжүүлж чадвал Тэдний нигүүлслийг хүлээн авч чадна гэсэн зарчмыг харуулдаг.
Шударга бус шүүгчийн сургаалт зүйрлэлд ( Лук 18:1–8 -ыг үзнэ үү) нэг шүүгч нэгэн бэлэвсэн эмэгтэйг хайхрахгүй байснаа, гуйгаад амар заяаг нь үзүүлэхгүй болохоор туслахаар шийдсэн тухай гардаг. Аврагч “Өөрт нь хандан өдөр шөнөгүй хашхирах Өөрийн сонгосон хүмүүсээ” ( Лук 18:7) Бурхан сонсож, хариулт өгөх нь тодорхой гэдгийг онцлохын тулд энэ сургаалт зүйрлэлийг заасан.
Үүнтэй адилхан үнэнийг Их Эзэнээс тусламж хүссэн сохор гуйлгачны амьдралаар хэрхэн дүрслэн харуулсан бэ? ( Лук 18:35–43 -ыг үзнэ үү).
-
Энэ зарчмын дагуу амьдрах нь өдөр тутмын амьдралд тань ямар арга замаар тусалж болох вэ?
-
Хариулт нь бидний хүссэн цаг, итгэж найдсан арга замаар ирэхгүй ч гэсэн Тэнгэрлэг Эцэг хариулахад бэлэн гэдгээ хэрхэн илэрхийлсэн бэ?