Maтай 5:1–12

Ерөөлийн үгс

Аврагч Уулан дээрх номлолынхоо эхэнд, хүмүүс хэрхэн аз жаргалтай байж адислагдаж болох талаар заасан. Ерөнхийлөгч Харолд Б.Лий (1899–1973) эдгээр сургаал нь “үнэндээ төгс төгөлдөр амьдралыг цогцлуулах томьёо юм” хэмээн хэлжээ (Teachings of Presidents of the Church: Harold B. Lee [2000], 200). Энэ хичээл танд Христийнхтэй адил зан чанаруудыг тодорхойлж, аз жаргал, төгс төгөлдрийг эрэлхийлэхдээ тэдгээрийг хөгжүүлэх төлөвлөгөө гаргахад тусална.

Семинарын зорилго. Семинарын зорилго нь өсвөр үеийнхэн болон залуучуудад Есүс Христийн сургаал, Цагаатгалыг ойлгон; үүнд найдаж, Ариун сүмийн адислалуудыг хүлээн авахад зохистой байж мөн өөрсдийгөө, гэр бүлээ болон бусдыг Тэнгэр дэх Эцэгтэйгээ хамт байх мөнх амьдралд бэлтгэхэд нь туслахад оршино. Та хичээлдээ бэлдэхдээ өдөр бүр энэ зорилгод хүрэхэд хэрхэн тусалж болох талаар залбирч, тодорхойл.

Суралцагчийн бэлтгэл: Матай 5:1–12 -оос илүү дэлгэрэнгүй мэдэхийг хүсэж буй нэг зан чанараа сонгоход суралцагчдыг урь. Энэ нь юу гэсэн утгатай болохыг судлан, уг зан чанар хэрхэн аз жаргал руу хөтлөх тухай бодохыг тэднээс хүс.

Боломжит суралцах үйл ажиллагаа

Аз жаргалыг нэмэгдүүлэх

Дараах асуултуудыг хичээл орохоос өмнө самбарт бичиж болох юм.

• Та хэзээ хамгийн их аз жаргалтай байсан бэ?

• Аз жаргал тань хэр удаан үргэлжилсэн бэ? Энэ нь яагаад удаан үргэлжилсэн эсвэл үргэлжлээгүй гэж бодож байна вэ?

Аврагч тохинууллаа эхлэхдээ Галилын тэнгисийн ойролцоо номлолоо айлдсан. Энэ номлолыг ихэвчлэн Уулан дээрх номлол гэж нэрлэдэг ба Матай 5–7 -д цэдэглэсэн байдаг. Их Эзэн нифайчууд дээр зочлохдоо үүнтэй адил номлолыг айлдсан ( 3 Нифай 12–14 -ийг үзнэ үү).

Матай 5:1–12 -ыг Ерөөлт үгс гэдгээр нь мэдэх бөгөөд энэ нь “адислагдсан” эсвэл “аз жаргалтай” гэсэн утгатай латин үгээс гаралтай ( Матай 5:3 , зүүлт тайлбар a). Эдгээр шүлэгт Есүс энэ болон ирэх амьдралд жинхэнэ аз жаргалд хүргэх Өөрт нь болон Эцэгт нь байдаг зан чанаруудыг тодорхойлсон. Эдгээр зан чанарыг хөгжүүлэх нь таныг Тэнгэрлэг Эцэг, Есүс Христ хоёртой илүү адил болоход тусална.

Матай 5:1–12 -ыг уншаад, Аврагчийн заасан зан чанаруудыг болон эдгээр зан чанар тус бүрд амласан адислалуудыг олж, тэмдэглэ.

Эсвэл “Sermon on the Mount: The Beatitudes” видео бичлэгийг 0:00-оос 1:15 цагийн код хүртэл үзээд, Аврагчийн заасан зан чанаруудын тухай сонсож болох юм. Энэ видео бичлэг ChurchofJesusChrist.org дээр байгаа.

Эдгээр шүлгээс бид Христийнхтэй адил зан чанарыг хөгжүүлснээр илүү их аз жаргалыг олж авдаг гэх зарчмыг тодорхойлж болно.

• Аврагчийн замнасан амьдрал яагаад Түүний аз жаргалд нөлөөлсөн гэж та бодож байна вэ?

Хэрэв суралцагчдыг хичээлээс өмнө аль нэгэн зан чанарын талаар судлахад урьсан бол сурч мэдсэн зүйлээ хуваалцахад урь. Зан чанаруудын талаар судлахдаа ямар ямар эх сурвалж ашигласныг нь суралцагчдаас асуу.

Дараах зан чанаруудаас нэг эсвэл хэд хэдийг судал. Уг зан чанарыг хөгжүүлж, амлагдсан адислалыг хүлээн авах нь аз жаргалтай болоход тань хэрхэн туслахыг эргэцүүлэн бод.

Суралцагчдад дараах асуултуудыг тараах материал болгон өг. Энэхүү тараах материалыг дараа нь амархан олж ашиглаж болох газар байршуулахад суралцагчдыг урамшуул.

Ерөөлийн үгс
Эшлэл	Зан чанар
Матай 5:3; 3 Нифай 12:3	Сүнсэндээ ядуу байх. Даруу байх эсвэл “Их Эзэнээс хамааралтай гэдгээ талархан хүлээн зөвшөөрөх буюу Түүний дэмжлэг туслалцаа байнга хэрэгтэй болохыг ойлгох явдал юм. Даруу байдал гэж бидний авьяас билиг, ур чадвар Бурханаас ирсэн бэлэг болохыг хүлээн зөвшөөрөхийг хэлнэ” (Gospel Topics, “Humility,” topics.ChurchofJesusChrist.org).
Maтай 5:4	Гашуудах. Энэ нь ямар нэг зүйлийн талаар зовж шаналж, үүнийгээ илэрхийлэхийг хэлнэ. Хүн өөрт нь болон бусдад тулгарсан мөнх бус амьдралд тулгарсан сорилтод гашуудаж болно. Үүнтэй адил, хүн бас нүглийн шаналлаас болж гашуудаж болно.
Матай 5:5	Номхон дөлгөөн байх. “Хүлцэнгүй байдал бол ‘Бурханаас сүрдэн эмээдэг, зөв шударга, даруу төлөв, үг сонсдог, мөн зовлон бэрхшээлтэй тулгарахад тэвчээртэй’ хүмүүсийн шинж юм [Судруудын удирдамж, ‘Номхон дөлгөөн, номхон дөлгөөн байдал,’ scriptures.ChurchofJesusChrist.org]. Ийм хүмүүс Есүс Христийг дагах хүсэлтэй байх ба тэдний зан байдал тайван, номхон дөлгөөн байдаг” (Үлиссэс Соарэс, “Хүлцэнгүй даруу мөн зүрх сэтгэлдээ номхон байгтун,” Ensign, Nov. 2013, 9 эсвэл 2013 оны 10-р сарын Ерөнхий чуулган, 9).
Матай 5:6; 3 Нифай 12:6	Зөв шударгын төлөө өлсөж, цангах. Бурханы тааллыг таньж мэдэн, үүний дагуу үйлдэх агуу хүсэлтэй байх.
Матай 5:7	Өршөөнгүй байх. “Бусдын дутагдлыг мэдэж байсан ч энэрэнгүй, хүндэтгэлтэй, уучлахад бэлэн, зөөлөн бөгөөд тэвчээртэй” байх (Gospel Topics, “Өршөөл,” topics.ChurchofJesusChrist.org).
Maтай 5:8	Зүрхэндээ цэвэр ариун байх. “Их Эзэнийг хайрладаг, Түүнийг дагаж, зарлигуудыг нь сахихыг эрэлхийлдэг, журамт амьдралаар амьдрахыг хичээн, эцсээ хүртэл үнэнч хэвээр үлддэг хүмүүсийн нэг байхыг хэлнэ. Зүрхэндээ цэвэр ариун хүмүүс нь ёс суртахуунгүй хүсэл, үйлдлээс өөрсдийгөө хол байлгахын тулд бодол санаагаа хянадаг хүмүүс юм” (Sheldon F. Child, “Words of Jesus: Chastity,” Ensign эсвэл Liahona, Jan. 2003, 44).
Maтай 5:9	Амар тайвныг тогтоогч байх. “Хүмүүс ялгаатай талыг нь олж хараад байдаг бол нийтлэг зүйлийг нь олоход тэдэнд туслах” явдал юм (Хэнри Б.Айринг, “Санваарт суралцахуй,” Ensign, May 2011, 63 эсвэл 2011 оны 4-р сарын Ерөнхий чуулган, 67).
Матай 5:10–12	Зөв байдлын төлөө хавчигдах. Үүнийхээ төлөө доромжлуулж, доог тохуу болсон ч Есүс Христийг болон Түүний сургаалыг дагаж, хамгаалахад бэлэн байх.

Дэлхийнхэн аз жаргалыг ямар ямар байдлаар тодорхойлдог талаар авч хэлэлцэж болох юм. Үүнийг Их Эзэний арга замаар аз жаргалд хүрэхтэй харьцуул. Ерөөлийн үгсийн дагуу амьдрах нь дэлхийнхний арга замаар амьдрахаас өөр байж болох ч Бурханы арга замаар мөнхийн аз жаргалд хэрхэн хөтлөх тухай авч хэлэлц.

• Аврагч судруудад болон амьдралд тань эдгээр зан чанарын аль нэгийг эсвэл хэд хэдийг хэрхэн үлгэрлэн харуулсан бэ?

• Сонгосон нэг юм уу хэд хэдэн зан чанараа хөгжүүлэх нь хэрхэн аз жаргалыг тань өсгөн нэмэгдүүлнэ гэж та бодож байна вэ? Яагаад?

Өөрт байгаа Христийнхтэй адил зан чанаруудыг тодорхойлох

Дараах судалгааг бөглөөрэй. Энэ нь өөрийн харуулдаг, илүү бүрэн гүйцэд хөгжүүлэх боломжтой зан чанаруудаа танин мэдэхэд тань туслах зорилготой.

Дараах Христийнхтэй адил зан чанар болгоны хажууд 1–5 хүртэлх тоог бичнэ үү (1 нь “тийм ч сайн хөгжөөгүй,” 5 нь “маш сайн хөгжсөн” гэсэн утгатай).

__ Би сүнсэндээ ядуу.__ Би бусдыг гашуудах үед зовлон шаналлыг нь мэдэрдэг бас нүгэл үйлдэхдээ бурханлагаар харуусдаг.__ Би номхон дөлгөөн.__ Би зөв шударгын төлөө өлсөж, цангадаг.__ Би өршөөнгүй.__ Би зүрхэндээ цэвэр, ариун.__ Би амар тайвныг тогтоогч.__ Итгэл үнэмшлийнхээ төлөө хавчигдсан ч би итгэлдээ үнэнч хэвээр үлддэг.

Та амжилттай хөгжүүлж байгаа зан чанаруудаа тодорхойлоод, Түүнд болон Есүс Христтэй адилхан болохын тулд гаргаж буй ахиц дэвшилдээ Бурханд таларх. Та илүү бүрэн дүүрэн хөгжүүлэхийг хүсэж буй зан чанарынхаа талаар бодож, тэднийг хөгжүүлэхэд туслахыг Бурханаас хүс.

Судалгааг бөглөж дуусаад, зан чанаруудыг хөгжүүлэхэд гаргасан ахицаа тунгаан бодох хангалттай цагийг суралцагчдад олго. Энэ нь тэдэнд өөрсдийгөө илүү үнэн зөв харж, Тэнгэрлэг Эцэгтэй харилцах харилцаагаа бэхжүүлэхэд тусална.

Хэрэв танд яг ямар зан чанарыг амжилттай хөгжүүлж байгаагаа эсвэл алин дээр нь илүү сайн ажиллах хэрэгтэйгээ тодорхойлоход хэцүү байвал эцэг эх, итгэл даасан өөр хүмүүстэй ярилцах нь тустай байж болно. Христийнхтэй адил ямар зан чанаруудыг тэд олж хардаг мөн ямар зан чанарыг нь илүү сайн хөгжүүлэх хэрэгтэйг тодорхойлохыг тэднээс хүс.

Христийнхтэй адил зан чанаруудыг хөгжүүлэхэд Аврагчийн гүйцэтгэх үүрэг

Христийнхтэй адил зан чанаруудыг хөгжүүлэхэд Аврагчийн тусламж бидэнд зайлшгүй хэрэгтэй. Арван хоёр Төлөөлөгчийн Чуулгын ахлагч Дийтр Ф. Угдорф ийн тайлбарласан.

Христийнхтэй адил зан чанарууд бол Бурханы бэлэг юм. Тэдгээрийг Түүний туслалцаагүйгээр хөгжүүлж чадахгүй. Бид бүгдэд хэрэгтэй энэ тусламжийг Есүс Христийн Цагаатгалаар дамжуулан бидэнд үнэгүй өгсөн билээ. Есүс Христэд болон Түүний Цагаатгалд итгэнэ гэдэг нь Түүний хязгааргүй хүч, оюун билиг, хайранд найдах буюу Түүнд төгс байдлаар итгэл хүлээлгэхийг хэлнэ. Биднийг сонгох эрхээ зөв шударга ашиглах үед Христийнхтэй адил зан чанарууд бидний амьдралд ирдэг. Есүс Христэд итгэх итгэл үйлдэхэд хүргэдэг. Бид Христэд итгэх итгэлтэй байсан цагт Их Эзэний зарлигуудыг дагах учир шалтгааныг бүрэн дүүрэн ойлгохгүй ч гэсэн Түүнд итгэж найддаг. Бид Аврагчтай илүү адил болохыг эрэлхийлэхдээ өөрсдийн амьдралыг тогтмол дахин үнэлж цэгнэн, үнэн наманчлалын замаар дамжуулан Есүс Христийн ач гавьяа болон Цагаатгалын адислалууд дээр тулгуурлах хэрэгтэй.

(Dieter F. Uchtdorf, “Christlike Attributes—the Wind beneath Our Wings,” Ensign эсвэл Liahona, Nov. 2005, 102–103)

• Христийнхтэй адил зан чанарыг хөгжүүлэхэд туслах юуг та энэ мэдэгдлээс олж харсан бэ?

Төлөвлөгөө гаргах

Тэнгэрлэг Эцэг, Есүс Христ хоёртой илүү адил болоход чиглэсэн төлөвлөгөө гарга. Үүнд өөрт тань тусална гэж үзэж буй өдөр тутам хийх тодорхой үйлдлүүдийг оруул. Аврагчийн тусламжийг эрэлхийлэхээ бүү март. Гаргаж буй хүчин чармайлтад тань тусламж дэмжлэг үзүүлэхийг итгэл даасан гэр бүлийн гишүүнээсээ эсвэл найзаасаа хүсэж болно. Та мөн үйлдэх төлөвлөгөөгөө Өсвөр насныханд зориулсан удирдамжид эсвэл судлах тэмдэглэлдээ бичиж тэмдэглэж болно.

Тайлбар ба нөхцөл байдлын талаарх мэдээлэл

Аврагч Уулан дээрх номлолоороо Өөрийн зан чанарын тухай бидэнд хэрхэн заасан бэ?

Ерөнхийлөгч Харолд Б.Лий (1899–1973) ийн заасан.

Христ хүн төрөлхтний нүглийг цагаатгахын зэрэгцээ Бурханы хуулийн өмнө болон Эцэгийн өмнө дуулгавартай байх төгс жишгийг дэлхийд үлгэрлэн үзүүлэхээр ирсэн юм. Багш Уулан дээрх номлолдоо төгс төгөлдөр зан чанарынхаа талаар зарим зүйлийг илчилсэн … бөгөөд ингэснээр амьдралын маань тойм зургийг өгсөн билээ.

(Teachings of Presidents of the Church: Harold B. Lee [2000], 199–200)

Зөв шударгын төлөө цангадаг хүмүүс дүүргэгдэх болно гэдэг нь юу гэсэн утгатай вэ?

Аврагч Америкт айлчлан, Уулан дээрх номлолоо айлдахдаа зөв шударгын төлөө өлсөж мөн цангадаг хүмүүс “Ариун Сүнсээр дүүргэгдэх” ( 3 Нифай 12:6) тухай хэлсэн.

Христийнхтэй адил ямар ямар зан чанар байдаг вэ?

ChurchofJesusChrist.org дээрх “Christlike Attributes” (2:53) видео бичлэгийг үзэж болох юм. Энэхүү видео бичлэгт Аврагчийн эзэмшсэн бөгөөд амьдралынхаа туршид үлгэрлэн харуулсан олон зан чанарыг тодорхойлдог.

//media.ldscdn.org/webvtt/youth/2014-youth-activity-resources/2014-01-001-christlike-attributes-eng.vtt

Нэмэлт суралцах үйл ажиллагаа

Суралцагчдыг заахад урих

Суралцагчдыг аль нэг Ерөөлийн үгсийн тухай хэлэх үг бэлдэхэд урьж болно. (Үүнийг ангийнхаа нэг суралцагчтай хамт хийж болно.) Суралцагчдыг хэлэх үгээ бэлдсэний дараа хэдэн суралцагчийг үгээ ангийнхантайгаа хуваалцахад урь. Хэрэв суралцагчид ангийнхаа нэг суралцагчтай хамт ажилласан бол бэлдсэн үгээ хамтдаа хуваалцаж болно.

Ерөөлийн үгс ба төгс төгөлдөр байдал

Ерөөлийн үгсийн талаар ерөнхийлөгч Харолд Б. Лий (1899–1973) “Багшийн эдгээр мэдэгдэл … үнэндээ төгс төгөлдөр амьдралыг цогцлуулах томьёо юм” хэмээн заасан (Teachings of Presidents of the Church: Harold Б. Lee [2000], 200).

Ерөөлийн үгсийн дагуу амьдрах нь ямар ямар арга замаар бидэнд Тэнгэрлэг Эцэг, Есүс Христ хоёрын адил төгс төгөлдөр болоход туслах талаар авч хэлэлцэхэд суралцагчдыг урь ( Матай 5:48 ; 3 Нифай 12:48 -ыг үзнэ үү).

Ерөөлийн үгсийн бусад хувилбар

Суралцагчдыг Лук 6:20–26 -г болон 3 Нифай 12:1–12 -ыг уншаад, эдгээр шүлгээс олж авсан нэмэлт ойлголтоо авч хэлэлцэхэд урь.

Тэмдэглэл дээрх дасгал ажил

Суралцагчдыг судлах тэмдэглэлдээ дараахтай адил гарчгийг бичихэд урь. Үүнд:

“ Матай 5–7 : Би …-ийг хийснээр Тэнгэрлэг Эцэг, Есүс Христ хоёртой илүү адил болж чадна”

Уулан дээрх номлолыг судлах явцад төрсөн бодол санаа, сэтгэгдлээ дээрх гарчгийн доор нэмж бичихэд урамшуул.