Mataio 6:19–34

“Ia Outou Muai Saili le Malo o le Atua”

I se vaega o le Lauga i luga o le Mauga, sa aoao atu ai e Iesu Keriso Ona soo ia “muai … saili [e atiae] le malo o le Atua” (Mataio 6:33) . I lenei lesona, o le a e maua ai se avanoa e mafaufau loloto ai ma faasoa atu i le taua o le faamuamua o le Atua i lou olaga.

Sauniuniga a le tagata aoga: Valaaulia tagata o le vasega e manatunatu loloto pe faapefea ona latou faasoa atu i isi le taua ma faamanuiaga e maua i le faamuamua ai o le Atua i o latou olaga.

Gaoioiga e Ono Mafai Ona Aoao Ai

Ua aoao e le Faaola ona soo e “saili … muamua le malo o le Atua”

Faitau faataitaiga o faatatauga moni faale-olaga ua tuuina atu i lalo.

• O se tama talavou i Kalefonia, ISA, o se tagata e talenia i le faasee galu, ae ua faatulagaina le seminare i le taimi tonu o loo fai ai toleniga a le au faasee galu a lana aoga maualuga.

• Ua valaaulia se tamaitai talavou i Pasila e avea ma se tasi o malo faaaloalogia ma le aloaia i le faamanatuina o le aso fanau o lana uo i le atoaga lea o le 15 o ona tausaga, ae e moomia ona ia faia se ofu e lē talafeagai ma ona tulaga faatauaina.

• O se tama talavou i Niu Sila e talenia i le lakapi ma o loo ua faasalalau e na te maua se ofo tinoitupe e taalo ai faapolofesa, ae ua i ai o ia i le matua e auauna ai i se misiona talai.

O faataitaiga nei o tulaga e mafai ona filifili ai le autalavou ina ia faamuamua le Atua i o latou olaga, e ui e lē faigofie.

• O a ni fesili po o ni popolega o ono i ai i talavou i tulaga faapenei e uiga i le faamuamua ai o le Atua i o latou olaga?

• O a ni fesili po o ni popolega o ono iai ia te oe ma au uo e uiga i le faamuamua ai o le Atua i o outou olaga?

A o e suesue i lenei lesona, ole atu i le Alii e fesoasoani ia te oe e talanoaina ou popolega ma ia lagona le taua o lou faamuamuaina o Ia. Suesue se tasi o vaega o fuaiupu nei. Saili le taiala a le Agaga Paia e fesoasoani ia te oe e saili ma malamalama i upu moni sa aoao mai e le Faaola e mafai ona fesoasoani ia te oe e faamuamua le Atua i lou olaga.

E mafai ona filifili e tagata o le vasega po o fea le vaega o fuaiupu e suesue iai, pe mafai foi ona tuuina atu ia i latou le Filifiliga A po o le Filifiliga E. E ono faigofie pe a faaali filifiliga nei i luga o le laupapa.

Filifiliga A: Mataio 6:19–24. I fuaiupu nei, sa faaaoga e le Faaola le upu oa e faauiga i mea tatou te faatauaina tele, ma le mata e fai ma faatusa o a tatou vaaiga mamao ma taulaiga i le olaga. O lo o faamanino mai e le Faaliliuga a Iosefa Samita le aoaoga a le Alii i le fuaiupu 22, “Afai e taulai tasi o tatou mata i le mamalu o le Atua, e faatumuina lou tino atoa i le malamalama” (Faaliliuga a Iosefa Samita, Mataio 6:22 [i le Mataio 6:22, vaefaamatalaga e]; tagai foi Mataupu Faavae ma Feagaiga 88:67). Ma le isi, e ono mafai foi ona aoga le maitau o le upu mamone e faasino lea i mea faalelalolagi po o oa (tagai i le Mataio 6:24, vaefaamataaga u).

Filifiliga E: Mataio 6:25–34. Ua faamalamalama mai e le Faaliliuga a Iosefa Samita o fuaiupu nei o loo fetalai ai le Alii i Ana Aposetolo e uiga i o latou tiutetauve e “o atu … i le lalolagi … ma aoao atu i tagata uma” (Faaliliuga a Iosefa Samita, Mataio 6:25–26 [i le faaopoopoga i le Tusi Paia]). Sa patino lava faatonuga a le Alii i le Au Aposetolo e Toasefululua i lea taimi, ae o le mataupu faavae sa Ia aoao atu e faatatau lava foi ia i tatou. Maitau faataitaiga o auala e tausia lelei ai e le Atua Ana foafoaga, e aofia ai ma tatou. A o e suesue, mataitu le fuaiupu 33: o le Faaliliuga a Iosefa Samita o lenei fuaiupu e amataina faapea, “O le mea lea, aua nei saili i mea o lenei lalolagi ae ia outou muai saili e atinae le malo o le Atua” (Faaliliuga a Iosefa Samita, Mataio 6:38 [i le Faaopoopoga mo le Tusi Paia]).

• A o e faitauina upu a le Faaola ma vaalaulia le taitaiga a le Agaga Paia, o le a se mea na e maua e anoa ia te oe? Aisea na anoa ai?

Valaaulia ni nai tagata aoga e faasoa mai mea na latou mauaina. Mafaufau pe tusi i luga o le laupapa soo se mataupu faavae latou te ta’ua. Afai e lē faigofie ona faasoa mai e tagata aoga mataupu faavae, mafaufau pe fesili iai, “E faapefea ona e aoteleina se tasi o upu moni sa aoao atu e le Faaola?”

Sa aoao mai e le Faaola mataupu faavae moni i fuaiupu nei, e aofia ai e lē mafai ona tatou auauna i le Atua atoa ma mamone (po o le faalelalolagi) ma afai tatou te muai saili e atinae le malo o le Atua, ona Ia faamanuia lea o i tatou e tusa ma mea Na te silafia tatou te manaomia.

• O a mea e te iloa e uiga i le Tama Faalelagi ma Iesu Keriso e faaosofia ai lou manao e faamuamua i Laua i lou olaga?

Tagata talavou o e faamuamua le Atua

Afai e mafai, matamata se tasi o vitio nei o talavou ua faamuamuaina le Atua. E fetaui lelei vitio ma tulaga o lo o i le amataga o le lesona. (E maua vitio uma i le ChurchofJesusChrist.org.)

“No Regrets” (5:38): o le alii talavou sa faaseegalu.

“Virtuous Young Women” (3:50): sa talosagaina le tamaitai talavou e fai sona ofu e le talafeagai.

“Your Day for a Mission” (3:31): o le alii talavou sa taalo lakapi.

• O le a se mea na e fiafia ai i le vitio? O le a se mea sa e aoaoina e uiga i le faamuamua ai o le Atua?

• O le a se taimi na e faamuamua ai le Atua i lou olaga?

• O a ni faamanuiaga na e vaaia ona o se taunuuga o lau filifiliga?

Uunaiaina o isi e faamuamua le Atua

Faaaoga sina taimi e te mafaufau ai pe faaapefea ona faatatau ia te oe ia aoaoga a le Faaola ia faamuamua le Atua i lou olaga. Faaauau ona saili mo musumusuga a le Agaga Paia a o e faamaeaina lenei lesona.

Mafaufau e faapea ua valaaulia lau korama po o lau vasega e le au peresitene o le siteki po o le itu e fai se vitio e fesoasoani ai i talavou o lau eria ia faaosofia le manao e faamuamua le Atua i o latou olaga. Ua fuafuaina e le au peresitene e faaali le vitio i se faatasiga a le au tavalou.

E mafai ona fuafua taitoatasi e tagata aoga le vitio pe fai i ni vaega toalaiti. Afai o le fuafuaina o se vitio e lē talafeagai mo au tagata aoga, e mafai ona latou fuafua se lauga po o se lesona e uiga i le faamuamua o le Atua i o latou olaga.

Fatufatu se otootoga auiliili mo lau vitio. (E lē manaomia ona pue se vitio; e na ona faataatia o se fuafuaga.) Ia aofia i lau auivi faataatia mea nei:

• Se upu moni e tasi pe sili atu sa aoao mai e le Faaola i le Mataio 6 ma faamatala pe faapefea ona fesoasoani lea upumoni i talavou e faamuamua le Atua i o latou olaga.

• O se faataitaiga faanei ona po o se isi o loo faamuamua le Atua i lona olaga. E mafai ona faaaoga sou lava aafiaga patino po o se aafiaga o se tasi e te iloa. Tusi se aotelega faigofie o le faataitaiga.

Ia aofia ai foi se tasi pe sili atu o mea nei i lau otootoga:

• Se saunoaga mai se taitai o le Ekalesia

• Ata po o mea vaaia e te ono faaaogaina ma le taimi e faaaoga ai

• O lau molimau patino

A uma ua lava se taimi, ona valaaulia lea o ni tagata aoga e faasoa mai i le vasega mea latou te faaaogaina i la latou vitio. A o latou faasoa, mafaufau pe fai iai fesili tulitatao e pei o nei: “Aisea na e filifili ai e taulai i lena fasifuaitau po o upu moni?” “Aisea na e filifili ai e faaaoga lena tala po o lena aafiaga?” “Aisea e te manatu ai e mafai ona fesoasoani lena mea i le autalavou i nei aso?”

Mafaufau e toe faasino i popolega po o fesili a tagata aoga na faasoa mai i le amataga o le lesona. Fesili i tagata aoga, “E mafai faafepea ona fesoasoani mea ua e aoao iai e taulima ai nei popolega?”

Atonu e te manao e faasoa lau fuafuaga faataatia mo se vitio ma lou aiga ma uo. O se taimi lelei e fai ai lenei mea o le taimi e talanoaina ai lenei autu ma lou aiga i la outou suesuega o le Sau, Mulimuli Mai ia te Au .

Afai o ia te oe le tomai, mafaufau e fai lau vitio ma faasoa atu i isi.

Manatu ma Talaaga o Faamatalaga

O a faamanuiaga tatou te maua pe a tatou faamuamua le Atua i o tatou olaga?

Sa aoao mai Peresitene Ezra Taft Benson (1899–1994):

E tatau ona tatou tuu le Atua e faamuamua i isi mea uma i o tatou olaga. …

Pe a tatou faamuamua le Atua, o le a tulaga lelei isi mea uma pe toulu ese foi mai o tatou olaga. O lo tatou alofa mo le Alii o le a pulea ai faatinoga o lo tatou gaualofa, o mea o loo manaomia e faaalu ai o tatou taimi, o mea tatou te fiafia i ai o lo o tatou tulituliloaina, ma le faatulagaga tonu o mea e ao ona tatou faamuamua.

(Ezra Taft Benson, “O le Poloaiga Sili—Alofa i le Alii,” Ensign, Me 1988, 4)

Na aoao mai Peresitene Russell M. Nelson:

O e naunau e avea le Atua ma aafiaga sili ona taua i lou olaga? …

Mafaufau pe mafai faapefea ona faamanuiaina oe i se na agaga naunau. …

Afai e i ai ni au fesili faamaoni e uiga i le talalelei po o le Ekalesia, a o e filifili ai e faamuamua le Atua, o le a taitaiina atu oe e maua ma malamalama i upumoni atoatoa e faavavau ia o le a taialaina lou olaga ma fesoasoani ia e tumau mausali ai i luga o le ala o feagaiga.

Pe a e feagai ma faaosoosoga—e tusa lava pe oo mai le faaosoosoga i le taimi ua e lēlavā ai pe lagonaina le tuuatoatasi pe malamalama sese foi—mafaufau i le lototele e mafai ona e aoina mai a o e filifili e faamuamua le Atua i lou olaga ma a o e aioi atu ia te Ia e faamalosia oe. …

… A o e filifili e tuu le Atua e faamuamua i o outou olaga, o le a outou iloa mo outou lava o lo tatou Atua o “se Atua o vavega” [ Mamona 9:11 ].

(Russell M. Nelson, “Ia Faamuamua le Atua,” Ensign po o le Liahona, Nov. 2020, 94, 95)

O le a le uiga o le fetalaiga a le Faaola ina ua Ia fetalai, “Aua tou te manatu i lou ola” ma le “O lea aua tou te mafaufau i le aso a taeao”? (Mataio 6:25, 34)

“O le fasifuaitau faaEleni lea na faaliliuina i le ‘aua nei popole’ i le Mataio 6:25, 34 o le Lomiga a King James, o lona uiga ia aua nei fā’atu tele pe popolevale” (Tusi Lesona a le Tagata Aoga o le Feagaiga Fou [tusi lesona a le Ofisa o Aoga a le Ekalesia, 2014], 29).

O le a le uiga o le fetalaiga a le Faaola ina ua Ia fetalai, “Ua lava e oo i le aso e leaga ai”? (Mataio 6:34)

O le faauigaga o lenei fasifuaitau ia “Aua nei nono mai faafitauli mai le aso a taeao–o lo o lava faalavelave o feagai ma oe i le aso lenei” (Tusilesona a le Tagata Aoga o le Feagaiga Fou, 29).

O le a le kupita? (Mataio 6:27)

O le kupita “o se fua masani lea o le umi i tagata Eperu; o le fua lea e amata mai i le tulilima e oo atu i le tumutumu o tamatamailima … [pe a ma le] 21½ inisi i le taimi a lo tatou Alii” (Bible Dictionary, “ Kupita ”).

Gaioioga Faaopoopo e Aoao Ai

Nofouta i perofeta pepelo

Mafaufau e talosaga i tagata aoga e faasoa mai ni faataitaiga o manatu e masani ona talia e le lalolagi ae feteenai ma le fuafuaga a le Tama Faalelagi. Faamatala atu faapea o perofeta pepelo o tagata po o vaega latou te faalauiloa manatu e feteenai ma le fuafuaga a le Tama Faalelagi ma o loo taumafai e faaumatia le faatuatuaga ma molimau ia Iesu Keriso. Faitau i le Mataio 7:15–20 ma talanoa i aoaoga a le Faaola i le iloatinoina o perofeta pepelo ma pe aisea e taua ai aoaoga nei i o tatou aso. E ono aoga le faamatalaga lenei a Peresitene Dallin H.Oaks o le Au Peresitene Sili:

“E manao Satani e faasese o tatou mafaufauga pe taitai ese mai i tatou mai mataupu taua. … Na tuuina mai e le Faaola … ia te i tatou lenei suega e fesoasoani ai ia tatou filifili le upumoni mai aoaoga eseese e ono faafenumiai ai i tatou: “O le a outou iloa i latou i o latou fua,” na Ia a’oa’o mai ai ( 3 Nifae 14:16). … O le mea lea, e tatau ai ona tatou vaavaai i taunuuga—“o fua”—o mataupu faavae ua a’oa’o mai ma tagata o loo a’oa’oina mai. O le tali aupito sili lena i le tele o le tetee tatou te faalogo i ai e faasaga i le Ekalesia ma ana aoaoga faavae ma aiaiga faavae ma le taitaiga. Mulimuli i le suega ua a’oa’o mai e le Faaola. Vaavaai i fua—o taunuuga.

(Dallin H. Oaks, “O Le Perisitua Mekisateko ma Ki,” Ensign po o le Liahona, Me 2020, 71).