Iloilo Lou Aoaoina 2

Mataio 3–7; Luka 3–6; Mareko 1; Ioane 2–4

O lenei lesona ua faamoemoe e fesoasoani atu ia oe e iloilo sini ua e faatuina, mea o loo e aoao iai, ma le tuputupu a’e patino na e iloa i le taimi o au suesuega o le Feagaiga Fou i lenei tausaga.

Sauniuniga a le tagata aoga: Valaaulia tagata o le vasega e mafaufau ia latou taumafaiga e tetee atu ma manumalo i faaosoosoga e ala i le faatuatua ia Iesu Keriso.

Gaoioiga e Ono Mafai Ona Aoao Ai

Mulimuli ia Iesu Keriso

O mea o loo e aoaoina mai le Feagaiga Fou i totonu o seminare ua faamoemoe e fesoasoani ia te oe e faalatalata atoatoa atili ai ia Iesu Keriso ma fai ma Ona soo, po o se e mulimuli atu ia te Ia. Fai se tasi o gaoioiga nei e tolu, ma saili mo faamanuiaga e maua pe a tatou mulimuli i le Faaola e ala i le faatinoina o Ana aoaoga. Ona tali ai lea o fesili e lua o mulimuli mai.

Filifili po o fea o nei gaoioiga e tolu o le a aupito sili ona aoga mo le vasega, ma valaaulia tagata o le vasega ia latou faia lena gaoioiga. Ia mautinoa e lava se taimi mo le vaega o totoe o le lesona.

1. Usu pe faalogologo i le pese Peraimeri “Tagata Poto ma le Tagata Valea” (Tusipese a Tamaiti, 281), ma faitau le Mataio 7:24–27 .

2. I luga o se fasi pepa po o i totonu o lau api talaaga mo suesuega, tusi se ata faatusa faigofie o aoaoga a le Faaola i le Mataio 7:24–27 .

3. I le faaaogaina ai o poloka po o ipu inu, fau se fale po o se fatufatuga faigofie i luga o se faavae malosi, e pei o le fola po o se kesi po o se laulau. Ona fau ai lea o se isi fatufatuga faigofie i luga o se faavae e lē malosi tele, e pei o se moega, se ie afu ua uma ona gaugau, po o se aluga. Faaaoga ou lima e oomi ai i lalo le atufola i autafa o fatufatuga taitasi, ma vaavaai po o le a le mea e tupu. Faitau i le Mataio 7:24–27, ma saili mo mea e tai tutusa ai lenei gaoioiga ma le faataoto a le Faaola.

• O le a se mea na e aoaoina mai i lenei gaoioiga?

• O a faamanuiaga tatou te maua pe a tatou faatinoina aoaoga a le Faaola?

Mafaufau i le tuputupu a’e ua e mauaina ina o e suesue ma galue e faaaoga aoaoga a le Faaola mai le Feagaiga Fou i lenei tausaga. Tali se tasi pe sili atu foi o fesili nei:

• O a ni aoaoga a Iesu Keriso ua e suesue i ai e aupito anoa tele mo oe?

• O a ni auala ua e latalata atili ai i le Faaola a o e suesue i Ana afioga?

• O a ni aoaoga na e suesue iai i lenei tausaga ua mafai ona e faaaogaina i lou olaga? O a faamanuiaga na e mauaina o se taunuuga [o na aoaoga]?

O lenei lesona o le a fesoasoani atu e iloilo ai ni auala o e fausia ai lou olaga i luga o le papa o Iesu Keriso ina ia mafai ai ona e talitalia luitau e ono oo mai.

O le toega o lenei lesona e iai ni sootaga ma lesona nei:

• Mataio 3:1–12; Mareko 1:1–8

• Luka 3:7–14

• Mataio 4:1–11, Vaega 1

• Mataio 4:1–11, Vaega 2

• Ioane 3:1–8

• Mataio 6:1–18

Afai e iai ni fetuunaiga na fai i nei lesona, pe e lē i aoaoina nei lesona, e ono manaomia ona fetuunai gaoioiga nei.

Faamalamalama atu le taua o le salamo, papatisoga, ma le faamauga

Mafaufau e valaaulia ni tagata aoga e fai le gaoioiga lenei o se tala e faatino taitoalua pe fai i vaega toalaiti.

E mafai e le gaoioiga lenei ona fesoasoani ia te oe e iloilo pe faapeī lou malamalama ma le mafai ona e faamatalaina mataupu faavae a le Faaola o le salamo, papatisoga, ma le faamauga. Mafaufau i faamatalaga e lua nei, ma tusi se tali mo faamatalaga taitasi e fesoasoani ai e foia le popolega ua faamatala mai. Faaaoga se mau e tasi pe sili atu mai au suesuega lata mai. E ono fesoasoani mau faasino o loo i totonu o puipui. Pule oe pe faaaofia ai ni au aafiaga patino po o molimau.

1. O a’u o se tagata e fai lava si o’u lelei. Aisea e tatau ai ona ou popole i le salamo pe afai ou te lē o faia ni agasala matuia? (Tagai i le Mataio 3:1–8 ; Luka 3:7–14 .)

2. Ou te talitonu ia Iesu Keriso, ae ou te lē manatu e manaomia ona ou papatiso ma faamauina a’u ina ia toe foi ai e mau faatasi ma le Atua. (Tagai i le Mareko 1:1–9 ; Ioane 3:5 ; 2 Nifae 31:5–12, 17–18 .)

A o faasoa mai tali a tagata aoga, iloilo pe o le a le lelei o lo latou malamalama i le mataupu faavae o le salamo, papatisoga, ma le faamauga. Afai e tatau ai, talosaga i tagata aoga o loo foliga mai e malamalama lelei i le aoaoga faavae e faasoa mai a latou faamatalaga, ma mau faasino na latou faaaogaina, ma le vasega atoa.

Iloilo lou mafai ona e tetee atu ai ma faatoilalo le leaga e ala i le faatuatua ia Iesu Keriso

E lata mai nei na e suesue ai e uiga i le tetee atu o le Faaola i faaosoosoga ma na ia te oe se avanoa e faataatia ai se fuafuaga ina ia mulimulitai i Lana faataitaiga ma faalagolago ia te Ia a o e feagai ma ou lava faaosoosoga. (E ono fesoasoani le toe iloilo o le Mataio 4:1–11 ma mea na e tusia i totonu o lau api talaaga mo suesuega mo lena lesona.)

Ina ia fesoasoani atu ia te oe e iloilo pe faapefea ona e faaaogaina mea ua e aoaoina, faaaoga ni nai minute e te manatunatu loloto ai i au taumafaiga e mulimulitai i le faataitaiga a le Faaola ma faalagolago ia te Ia ina ia tetee atu ai i faaosoosoga. (E mafai ona aofia ai mau sa e taumafai e manatua pe taulotoina.) Mafaufau e uiga i mea ua e aoaoina mai lou aafiaga a o e mafaufau i le tala faatusa lenei:

Mafaufau faapea e i ai sau uo sa faafaigata ona tetee le faaosoosoga e matamata i ponokalafi. Sa ia taumafai e aveese le faaosoosoga i le lē faaaogaina lea o le initoneti i taimi e na o ia ai ma le lē tuua o lana telefoni i totonu o lona potu i le po. Na manuia ana taumafaiga i ni nai aso ae mulimuli ane ua toe gauai i faaosoosoga. Sa matuai le fiafia o ia ia te ia lava ma na mafai ona ia toe alo ese mai ponokalafi mo ni aso se tele a o lē i oo ina toe gauai atu foi i ai. Ua ia manaomia ni manatu faaopoopo ma le fesoasoani e faalagolago i le mana o le Faaola e tetee ai i lenei faaosoosoga.

Mafaufau pe fai faatasi le gaoioiga lenei ma le vasega atoa. Talosaga i se tagata aoga e faasoa mai se tala latou te fai atu e fesoasoani ai i lenei uo. Ona valaaulia ai lea o lena tagata aoga e filifili se isi tagata aoga i le vasega e faasoa mai se manatu e ono fai ma fesoasoani. E mafai ona faaauau e tagata aoga ona filifili e le tasi le isi e faasoa ane, pe mafai foi ona sii mai lima o tagata pe a fia auai. Afai e manaomia, faasoa ma le vasega se tala e ono tali mai ai le uo po o se lagona e ono lagonaina.

E aunoa ma le faasoa mai o ni au lava faaosoosoga faapitoa, tusi se tusi puupuu mo lau uo. Ia aofia ai le lua pe sili atu o faamatalaga nei i lau tali:

• o se mea na e faia e liliu atu ai i le Alii na fesoasoani ia te oe e faatoilalo le faaosoosoga

• o se mea ua e iloa e uiga ia Iesu Keriso e mafai ona fesoasoani i lau uo e lagona ai le alofagia ma ia uunaia ai e faaauau ona tetee i faaosoosoga

• o se mea e te fautuaina lau uo e fai ina ia mulimulitai ai i le faataitaiga a le Faaola ma faalagolago ia te Ia e tetee ai faaosoosoga

• o a ni manuia ma ni luitau e ono feagai ma lau uo a o agai atu i luma ma ni fautuaga pe faapefea ona faalagolago i le Alii a o ia feagai ai ma ia mea

Mafaufau pe faapefea e lenei gaoioiga ona fesoasoani ia te oe lava ia. O le a se mea e te manao e faaauau ona fai e tetee ma faatoilalo ai faaosoosoga faatasi ma le malosi ia Iesu Keriso? Afai ua e lagonaina le lotovaivai po o le lē mautonu, mafaufau pe tatalo e uiga i ou popolega ma lagona. E ono mafai foi ma fesoasoani lou talanoa ma se matua po o se epikopo. Aua nei mou le faamoemoe a o e galue e atinae lou olaga i luga o le Faaola ma Ana aoaoga.

Manatunatu i lou manao e tapuai faamaoni ma mulimuli i le Atua

O le mataupu faavae mulimuli e tasi e te mafaufau loloto iai o lou naunautaiga e tapuai ma le loto faamaoni i le Atua ma mulimuli ia Iesu Keriso. I se lesona talu ai, na e aoao ai afai tatou te faatinoina gaoioiga amiotonu e faamalie ai le Tama Faalelagi, e Na te aumai faaaliali le taui ia te i tatou (tagai i le Mataio 6:1–6; 16–18). A o e suesue i lenei mea moni, atonu na e faatumuina se siata e tai foliga faapenei:

O a ni galuega lelei se tolu na e faia i le vaiaso talu ai? (Lisi le tasi i laina taitasi.)	O a ni mafuaaga na e faia ai?	O a ni ou lagona ina ua uma ona e faia nei “galuega lelei”?

Mafaufau pe faaopoopo i le siata ni au galuega lelei se tasi pe lua ua e faia talu mai lena lesona ma tali fesili tulitatao nei i totonu o le siata. Manatunatu loloto pe na mafai ona e taulai ma le loto faamaoni atili i le Atua.

• Afai o loo lagona e se isi le faigata ona latou faia galuega lelei e faamalie ai le Atua, o le a se fautuaga e te tuuina atu ia i latou?

Faalogologo ma le toto’a i tali a tagata aoga. Mulimuli i taiala a le Agaga Paia e faaopoopo ai fautuaga, aafiaga, ma molimau.