Mataio 8; Mareko 2–4; Luka 7

Vaaiga Aoao

Na faatino e Iesu lona mana ma le alofa tele e ala i vavega na Ia faia, e aofia ai le toe faatuina mai le oti o le tama a se fafine ua oti lana tane atoa ma le faamaloloina o se tagata sa ma’i i le supa. Na faapea foi ona ia faafilemuina se afa i luga o le Vai o Kalilaia ma faamagaloina agasala a le fafine sa faaalia lona loto faafetai i le mulumuluina ma le uuina i le suauu manogi o Ona vae.

Ia Sauni e Aoao Atu

O faamatalaga nei e tuuina atu ai i faiaoga ia manatu i mea e ono manaomia ona vave saunia mo lesona taitasi.

Mataio 8; Luka 7:11–17

Faamoemoega mo le lesona: O lenei lesona o le a fesoasoani i tagata o le vasega ina ia faamalosia ai lo latou faatuatua i le mana o Iesu Keriso e faia ai vavega i o tatou aso ma i totonu o o latou olaga.

Tapenaga mo tagata o le vasega: Valaaulia tagata o le vasega e fesili i tagata o o latou aiga po o uo po o a ni mea na tutupu i o latou olaga ma i totonu o le Ekalesia ua latou manatu o ni vavega. Faamanatu ia i latou e ui ina foliga maoae nisi vavega, ae o isi e faaleiloa lelei.

Vitio: “Fafine o Naina ua oti lana tane” (2:22)

Fautuaga mo aoaoga e faaaoga ai fesootaiga Faa-Vitio: Mafaufau e faataape tagata o le vasega i totonu o potu fesootai laiti e maua ai o latou avanoa e faasoa ai nisi o vavega na latou saunia e faasoa ane i le gaoioiga tau tapenaga mo tagata o le vasega.

Mareko 2:1–12

Faamoemoega mo le lesona: O le a fesoasoani lenei lesona i tagata o le vasega ina ia faatupulaia ai lo latou malamalama e uiga i le mafai ai e le Faaola ona faamalolo i ituaiga faaletonu uma.

Tapenaga mo tagata o le vasega: Valaaulia tagata o le vasega e mafaufau i se taimi na maua ai e se isi latou te masani ai se faamanuiaga moomia mai le Faaola. Na faapefea e le faamanuiaga o lenei tagata ona aafia ai isi tagata, e pei o uo ma tagata o aiga? Talosaga i tagata o le vasega e mafaufau po o a mea na latou aoaoina e ala i lo latou vaai atu o ni mea na faia e le Faaola mo lena tagata.

Vitio: “ Ua Faamagaloina e Iesu Agasala ma Faamalolo le Tagata na maua i le Supa” (2:57)

Luka 7:36–50

Faamoemoega mo le lesona: O le a fesoasoani lenei lesona i tagata o le vasega e faatino lo latou faatuatua ia Iesu Keriso ma salamo i a latou agasala.

Tapenaga mo tagata o le vasega: Valaaulia tagata o le vasega e faitau i le Luka 7:36–50 ma mafaufau e uiga i fesili nei mai le Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023: “Mafaufau loloto pe faapefea ona faatusa oe i le fafine o loo faamatala mai i le Luka 7:36–50. O le a se taimi na e lagonaina ai le agamalu ma le alofa mutimutivale lea na faaalia e le Faaola i le fafine? O le a se mea e te aoaoina mai lana faataitaiga i le faatuatua, alofa, ma le loto maulalo?” (“Fepuari 27–Mati 5. Mataio 8; Mareko 2–4; Luka 7: ‘Ua E Ola I Lou Faatuatua’”).

Ata: Sauni e faaali faalautele le ata mai le amataga o le lesona.

Fautuaga mo aoaoga e faaaoga ai fesootaiga pueata i luga o upega tafailagi: A o faitauina fuaiupu i le Luka 7, faatulaga le vaega vaaia o lau masini i le “Vaai Faalautele” ina ia mafai ai ona e vaai atu i le vasega atoa i le taimi e tasi. Valaaulia le tagata aoga na faitauina le fuaiupu talu ai e tusi lima i se itu faapito pe a maea. Po o ai le tagata aoga ua tusi faasino i ai i luga o le vaega vaaia o lau masini, e mafai ona talosagaina ia e faitau le fuaiupu o le a sosoo.

Mataio 8:23–27; Mareko 4:35–41

Faamoemoe mo le lesona: O le a fesoasoani lenei lesona i tagata aoga ina ia taliaina le filemu ma le toa a le Faaola a o latou fetaiai ma tauiviga.

Tapenaga mo tagata aoga: Valaaulia tagata aoga e faamaea le faatinoga o loo i le “Mataio 8:23–27; Mareko 4:35–41: E i ai le mana o Iesu Keriso e aumai ai le filemu a o agi afa o le olaga,” o loo maua i le Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023. Valaaulia tagata aoga e o mai sauniuni e faasoa i o latou malamalamaga. E mafai ona latou talosagaina tagata o o latou aiga ma uo e auai ma i latou i lenei faatinoga.

Meafaitino mo tagata aoga: Faamautinoa o i ai ni mea tusitusi a tagata aoga ma se api faamaumau suesuega po o se fasi pepa e faaaoga a o fai le faatinoga tau vaai faalemafaufau.

Fautuaga mo aoaoga e faaaoga ai fesootaiga pueata i luga o upega tafailagi: Valaaulia tagata aoga e tuu i luma o le mea pue ata, ata na latou tusia ina ia mafai ona vaai le isi i ata tusia a le isi. Valaaulia ni nai tagata aoga e faamatala i le vasega ata na latou tusia.

Toe Iloiloga o le Atamai Faapitoa i Aoaoga Faavae 2

Faamoemoe mo le lesona: O le a fesoasoani lenei lesona i tagata aoga e taulotoina ai mau faasino o tusitusiga paia ma faaupuga autu o tusitusiga paia mo nisi o fuaitau o atamai faapitoa i aoaoga faavae mo le Feagaiga Fou.

Matau: E ono manaomia ona aoaoina se lesona tau fuaitau o atamai faapitoa i aoaoga faavae nai lo lenei lesona toe iloilo. Fai ma faasino i le faasologa faatulagaina o lesona ua saunia e le taitai faatonu po o le taitai faamaopoopo o le eria po o le pitonuu e faamautinoa ai o le a aoaoina lesona taitasi tau fuaitau o atamai faapitoa i aoaoga faavae a o faagasolo seminare.

Tapenaga mo tagata aoga: Valaaulia tagata aoga e mafaufau loloto pe faapefea ona fesoasoani i latou olaga le iloa o mau faasino o tusitusiga paia ma mea latou te aoaoina mai.

Pepa tufa: Sauni e faaali faalautele le lisi o fuaitau o atamai faapitoa i aoaoga faavae ma a latou faaupuga autu o tusitusiga paia o loo aufaatasi i ai, pe tuu i totonu o se pepa tufa mo tagata aoga.
Meafaitino mo tagata aoga: Faamautinoa o i ai ni mea tusitusi a tagata aoga, se api faamaumau suesuega, ma se fasi pepa e faaaoga i le faatinoga tau pepa tauloto.

Fautuaga mo aoaoga e faaaoga ai fesootaiga pueata i luga o upega tafailagi:Mafaufau pe faaaoga taaloga e fai i luga o upega tafailagi o loo mafai ona auai faatasi i ai tagata aoga. E tele meafaigaluega eseese i luga o upega tafailagi e mafai ona faaaoga e faafetaui ai le faaupuga autu ma le mau faasino o tusitusiga paia, pe mafai ona fai e tagata aoga faatinoga tau faatumu-avanoa.