Luka 7:36–50

“Aua Ua Alofa Tele Mai O Ia”

atatusi o le fafine o loo soloina aao o Iesu

Sa taumafa Iesu i le fale o se Faresaio e igoa ia Simona. Sa ulufale atu se fafine sa manatu Simona o “se [tagata] agasala” ma “faasisina ifo e ia loimata i vae [o le Faaola],” ua soloi ai i lona lava lauulu, “ua sogi foi i ona vae, ma ua faauuina i le suauu manogi” (Luka 7:37–39). I le tali atu ai i mafaufauga o Simona, na faasoa atu ai e le Faaola se faataoto e uiga i le faamagaloga ma le alofa. O lenei lesona ua faamoemoe e fesoasoani ia mafai ona e faatinoina lou faatuatua ia Iesu Keriso ma salamo mai au agasala.

Mafaufau loloto. Valaaulia tagata o le vasega e mafaufau loloto i mea ua latou aoaoina. O le uiga o le mafaufau loloto o lou manatu loloto i se mea ma e mafai ona faaleleia atili e ala i le tatalo. A o aoao tagata o le vasega e mafaufau loloto, e tele ina faaalia e le Agaga le mea moni ia i latou ma aoao atu iai auala e mafai ona avea atili ai e faapei o Iesu Keriso.

Sauniuniga a le tagata o le vasega: Valaaulia tagata o le vasega e faitau i le Luka 7:36–50 ma o mai sauniuni e faasoa mai a latou tali i fesili nei o loo maua i le Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2023: “Manatunatu loloto pe o faapefea ona faapei oe o le fafine o loo faamatalaina i le Luka 7:36–50 . O le a se taimi na e lagonaina ai le agamalu ma le alofa mutimutivale lea na faaalia e le Faaola i le fafine? O le a se mea e te aoaoina mai lana faataitaiga i le faatuatua, alofa, ma le loto maualalo?” (“Fepuari 27–Mati 5. Mataio 8; Mareko 2–4; Luka 7: ‘Ua E Ola I Lou Faatuatua’”).

Gaoioiga e Ono Mafai Ona Aoao Ai

O le itu o loo tatou agai atu i ai

Faaali atu le ata lenei ma fesili o loo avatu faatasi ai.

O loo faaali atu ai ni ata faafasilaau o ni tagata se toalua, o le tasi o loo agai atu ia Keriso, o le isi e alu ese mai ia Keriso

O le a se mea o loo e maitauina e uiga i tagata o loo i lenei ata?
O le a se mea o tau faaatata mai e lo latou mamao mai le Faaola ma le itu o loo latou faasasaga i ai e uiga i lo latou sootaga ma Ia?

Mafaufau mo sina taimi puupuu po o fea e te faatulagaina ai oe i totonu o lenei ata ma po o le a foi le itu o le a e faasaga i ai.Sa faamatala mai e Elder Larry R. Lawrence, a o avea ma se tasi o Fitugafulu:

E silafia e le Tama Faalelagi o tatou gafatiaga paia. E olioli o Ia i taimi uma tatou te faia ai se laa agai i luma. Ia te Ia, o le itu tatou te agai i ai e sili atu ona tāua nai lo le tatou saoasaoa.

(Larry R. Lawrence, “Se A se Mea e Toe Ou Te Lei Faia?,” Ensign po o le Liahona, Nov. 2015, 35)

Aisea e te manatu ai e sili ona taua le itu faaleagaga ua tatou faasaga atu iai nai lo o le tatou saosaoa?

E lagona e le Alii le olioli tele pe a tatou faia ni taumafaiga e salamo ai (tagai i le Luka 15:7 ; Mataupu Faavae ma Feagaiga 18:13). O se tasi o auala e faamatala ai le salamo o le liliu ese lea mai le agasala ae liliu atu agai i le Atua (tagai i le Taiala i Tusitusiga Paia, “ Salamo,” scriptures.ChurchofJesusChrist.org). A o e suesue, matau totoa i musumusuga a le Agaga Paia e mafai ona fesoasoani atu e te liliu ese ai mai le agasala ae agai atu i le Faaola.

Ua taumafa Iesu i le fale o Simona le Faresaio

Valaaulia tagata aoga e mafaufau i a latou tali i fesili sa talosagaina i latou e mafaufau loloto i ai o se vaega o le gaoioiga o le sauniuniga a le tagata o le vasega.

Luka 7 o loo i ai se tala ia Iesu na fai sana taumafataga i le fale o se Faresaio e igoa ia Simona. A o faatasi Iesu ma Simona, sa alu atu se fafine ua iloga o se tagata agasala ia te Ia (tagai i le Luka 7:37, 39).

Faitau i le Luka 7:36–39, ma sue po o le a le mea na tupu ina ua alu atu le fafine ia Iesu i le taimi o lenei tausamiga.

O le a se mea na e maitauina e uiga ia Simona? e uiga i le fafine?

Na silafia e Iesu mafaufauga o Simona ma faasoa atu i ai se faataoto. Faitau i le Luka 7:40–43, ma saili po o le a le mea na aoao e le Faaola ia Simona e ala i lenei faataoto. E ono fesoasoani le iloa o le tenari e tasi o le aofaiga lea o le totogi e maua e le tagata galue i se aso e tasi (tagai i le fuaiupu 41, vaefaamatalaga a).

O le a se mea atonu sa fesoasoani ai lenei faataoto ia Simona ia malamalama e uiga i lona lava manaomia o le faamagaloga?

I taimi o le Faaola sa o se agaifanua mo lē o talimalo ona faamamalu ana malo faaaloalogia e ala i le faia o faatinoga agalelei e pei o le sogi atu ia i latou e faafeiloai ai, tuuina atu o vai mo i latou e mulumulu ai o latou vae, ma le uuina o o latou ulu i le suauu (tagai i le James E. Talmage, O Iesu le Keriso[1916], 261). E pei ona tusia i le Luka 7:44–46, sa ta’u atu e le Faaola sa lēi faatinoina e Simona nei faaaloaloga mo Iesu, a o le fafine lea sa ia faatinoina galuega i tala atu o tulaga masani e faaali ai lona alofa ma lona agaga faafetai mo Ia.

O le a se mea e te manatu na malamalama ai lenei fafine e uiga ia Iesu atonu sa lē i malamalama i ai Simona?
O le a se faamaoniga ua e vaaia e faapea ua salamo le fafine, pe ua fulitua mai ana agasala ma liliu atu i le Faaola?

Faitau i le Luka 7:47–50, ma vaavaai pe aisea na faamagalo ai e le Alii lenei fafine i ana agasala.

O a ni manatu po o ni lagona na ia te oe e uiga i le Faaola a o e suesue i lenei tala?
O a ni upumoni ua e aoaoina mai lenei tala?

E tele upu moni eseese e mafai ona maua e tagata aoga mai lenei tala, e aofia ai ma nei: A o faamagaloina a tatou agasala, o le a loloto lo tatou alofa i le Faaola. A faatino lo tatou faatuatua ia Iesu Keriso ma salamo i a tatou agasala, o le a tatou maua Lana faamagaloga.

Na faasoa mai e Elder Dale G. Renlund o le Korama a Aposetolo e Toasefululua ni aoaoga e faatatau i le tala o loo tusia i le Luka 7. Matamata i le vitio “That I Might Draw All Men unto Me” (13:39) mai le faailo taimi 4:22 seia oo i le 5:03, pe faitau i le tusiga lenei.

media.ldscdn.org/webvtt/general-conference/april-2016-general-conference/2016-04-1070-dale-g-renlund-eng.vtt

O le tele o lo tatou latalata atu ia Iesu Keriso i mafaufauga ma faamoemoega o o tatou loto, o le tele foi lena o lo tatou talisapaia o Lona puapuagatia ta’umamaina, o le faateleina foi lena o lo tatou lotofaafetai mo le alofa tunoa ma le faamagaloga, ma o le faateleina foi lena o lo tatou mananao atili ia salamo ma avea e faapei o Ia. O lo tatou mamao aiai mai le Tama Faalelagi ma Iesu Keriso e taua, ae o le itu o loo tatou agai i ai e matua sili atu ona taua. E sili atu le fiafia o le Atua i tagata agasala ua salamo o e o loo taumafai ia faalatalata atili atu ia te Ia nai lo tagata faafia-amiotonu, tagata sailiili masei o e, e pei o le au Faresaio ma tusiupu anamua, e le iloa lo latou matua manaomia tele ona salamo.

(Dale G. Renlund, “Ina Ia Mafai Ona Ou Aumai o Tagata Uma Ia te A’u,” Ensign po o le Liahona, Me 2016, 40)

O a ni upu po o ni fasifuaitau i lenei faamatalaga e faaleleia atili ai lou malamalama i mea na e faatoa suesue i ai i le Luka 7?
O a ni aafiaga na fesoasoani e faasilia ai lou alofa ma lou agaga faafetai mo le Faaola ma le alofa mutimutivale ua Ia ofoina mai?

Fai se fuafuaga

Tuu se taimi i tagata aoga e tali mai ai i fesili nei i totonu o a latou api talaaga mo suesuega.

Manatua o le salamo e lē o se mea e tupu faatasi pe mo na o agasala matuia. O le salamo o se faagasologa, ma tatou te salamo i soo se taimi tatou te taumafai e faalatalata atili i le Alii ma liliu ese mai le amio leaga.

Toe vaai i le ata o le Faaola ma le atatusi o le faatagata faafasilaau, ma mafaufau e uiga i lau mafutaga ma Iesu Keriso ma le itu o loo e agai i ai. Faataatia se fuafuaga e faaloloto atili ai lou alofa mo le Faaola e ala i lou salamo i aso uma. Faamaea le galuega lenei i se laupepa e ese mai ina ia mafai ai ona e teuina patino mo oe lava. E ono maua sou avanoa e tulitatao ai lenei aafiaga i se lesona i se taimi o i luma.

O le lesona “Iloilo Lou Aoaoina” e sosoo mai ma lesona o le Mataio 8–13; Mareko 2–5; ma le Luka 7, 9, 11 e faasino i lenei fuafuaga faataatia ma e valaaulia ai tagata aoga e tomanatu i lo latou alualu i luma.

O le a le mea e tasi e te tatau ona e taofia le faia ina ia e latalata atu ai i le Faaola? O le a faapefea ona e taofia?
O le a le mea e tasi e tatau ona amata ona e faia ina ia e latalata atili atu ai i le Faaola? Faapefea ona e amataina?

Manatu ma Talaaga o Faamatalaga

O ai e sili ona ou foliga i ai i lenei tala: Simona po o le fafine?

Sa saunoa mai Peresitene Dieter F. Uchtdorf, a o i ai i le Au Peresitene Sili:

19:13

O ai o nei tagata e toalua e sili ona tatou soo i ai?

O pei tatou o Simona? Pe o tatou to’a ea ma lagolelei i a tatou galuega lelei, i le faalagolago i lo tatou lava amiotonu? Pe masalo foi o fai sina o tatou le lavā onosai ia i latou e le o ola ai e tusa ma o tatou tulaga faatonuina? O tatou i ai ea i se tulaga otometi o faatinoga, faatino e aunoa ma le mafaufau i ai, auai i a tatou fonotaga, tau tulimoe i vasega o Mataupu Faavae o le Talalelei, ma atonu o fai ma siaki a tatou telefoni feaveai i taimi o sauniga faamanatuga?

Pe o pei i tatou o lenei fafine, o le sa manatu sa matua leiloa atoa ma leai se faamoemoe ona o le agasala?

Pe tatou te alofa tele ea?

O tatou malamalama ea i lo tatou nofoaitalafu ai i le Tama Faalelagi ma aioi atu ma o tatou loto atoa mo le alofa tunoa o le Atua?

A tatou tootutuli e tatalo, pe ina ia toe tautau atu ai na o vaega sili ona iloga o lo tatou lava amiotonu, po o le tautau atu o tatou faaletonu, aioi atu mo le alofa mutimutivale o le Atua, ma maligi loimata o le loto faafetai mo le fuafuaga ofoofogia o le togiolaina?

O le faaolataga e le mafai ona faatauina i le tau o le usiusitai; ae e faatauina i le toto o le Alo o le Atua [tagai i le Galuega 20:28 ].

(Dieter F. Uchtdorf, “O le Meaalofa o le Alofatunoa,” Ensign po o le Liahona, Me 2015, 109)

Aisea e taua ai le salamo i aso uma?

Na faamatala mai e Peresitene Russell M. Nelson:

E leai se mea e sili atu ona saoloto, sili atu ona malualii, pe sili atu ona tāua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e lē o se mea e faatasi ona tupu; ae o se faagasologa. O le autu lea i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.

(Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu” Ensign po o le Liahona, Me 2019, 67).

Gaoioiga Faaopoopo e Aoao Ai

Sui sauniuniga a le tagata aoga ma le amataga o le lesona

A o lē i amata aoaoina le lesona, mafaufau e valaaulia tagata aoga e mafaufau po o le a se mea e aupito sili ona agalelei sa faia e se isi mo i latou. Valaaulia i latou e mafaufau po o a ni o latou lagona e faatatau i lenei tagata ma se mea na latou faia latou te faaalia ai lo latou agaga faafetai. E mafai foi ona latou talosaga i tagata o o latou aiga ma uo e faasoa mai mea sa tutupu foi ia i latou. E mafai ona faasoa e tagata aoga nei aafiaga i le amataga o le lesona e fesoasoani ai ia i latou ia lagona le taua o lenei upumoni e faapea a o faamagaloina a tatou agasala, o le a loloto atili lo tatou alofa i le Faaola..

Mau e faaloloto ai le malamalama o tagata aoga

Ina ia fesoasoani i tagata aoga ia malamalama lelei i le upumoni e faapea a o faamagaloina a tatou agasala, o le a loloto atili lo tatou alofa mo le Faaola, e mafai ona talosagaina i latou e suesue i nisi pe suesue uma i mau nei: Roma 2:4 ; Roma 5:8 ; 1 Ioane 4:19 ; Enosa 1:1–11 ; ma le Mosaea 27:23–37 .