Toe Iloiloga o le Atamai Faapitoa i Aoaoga Faavae 2

Tauloto Mau Faasino ma Faaupuga Autu o Tusitusiga Paia

O le manatuaina o fuaitau o tusitusiga paia atoa ma mea latou te aoaoina mai e fesoasoani ia te oe i le tele o auala. O lenei lesona ua faamoemoeina e fesoasoani ia te oe e tauloto ai mau faasino o tusitusiga paia ma faaupugu autu o tusitusiga paia mo nisi o fuaitau o atamai faapitoa i aoaoga faavae mo le Feagaiga Fou.

Tapenaga mo tagata o le vasega: Valaaulia tagata o le vasega e mafaufau loloto pe faapefea ona fesoasoani i o latou olaga le iloa o mau faasino o tusitusiga paia ma mea latou te aoaoina mai.

Gaoioiga Talafeagai mo Aoaoga.

E ono manaomia ona aoaoina se lesona tau fuaitau o atamai faapitoa i aoaoga faavae e suitulaga ai i lenei lesona toe iloilo. Feutagai atu ma le kalena o faasologa faatulagaina o lesona ua saunia e le taitai faatonu po o le taitai faamaopoopo o le eria po o le pitonuu e faamautinoa ai o le a aoaoina lesona taitasi tau fuaitau o atamai faapitoa i aoaoga faavae a o faagasolo seminare.

O le faaaogaina o tusitusiga paia e faasoaina atu ai le talalelei

Valaaulia tagata o le vasega e faasoa i malamalamaga na maua mai i le gaoioiga tau tapenaga mo tagata o le vasega i lenei vaega o le lesona.

Faaata i lou mafaufau o na e te lua felafolafoa’i ma lau uo o Sylvia e faatatau i talitonuga faalelotu. E auai atu o ia i se ekalesia Kerisiano faalenuu ma e toaga e suesue ma aoao i le Tusi Paia. Ua fesili atu Sylvia ia te oe po o a ou talitonuga e uiga ia Iesu Keriso, papatisoga, ma le perisitua.

E faapei lou mautinoa e tali atu ai i fesili a Sylvia? Aisea?
E mafai faapefea ona fesoasoani i lenei tulaga le iloa ai o fuaitau o atamai faapitoa i aoaoga faavae ma a latou faaupuga autu?
O a ni tulaga sa feagai ma oe na ono aoga ai pe ana e iloa lelei le faaaogaina o fuaitau o tusitusiga paia?

O lenei lesona e mafai ona fesoasoani ia te oe e tapenapena ai mo tulaga faapenei ma manatunatu ai i upu moni o loo aoaoina mai e fuaitau o tusitusiga paia mo atamai faapitoa i aoaoga faavae o le a mulimuli mai nei. Mafaufau e makaina nei fuaitau ma a latou faaupuga autu pe afai e lē i maea ona e faia.

Mafaufau i manaoga o tagata o le vasega i le fuafuaina pe fia fuaitau o atamai faapitoa i aoaoga faavae e faamamafaina i lenei lesona. Faaali atu le siata o le a mulimuli mai nei ina ia mafai ona faasino i ai tagata o le vasega seia maea ona faia a latou pepa tauloto.

Mau Faasino o Tusitusiga Paia	Faaupuga Autu o Tusitusiga Paia
Luka 2:10–12	“Aua o le aso nei ua fanau ai i le aai o Tavita, lo outou Faaola, o le Alii o Keriso.”
Ioane 3:5	“Afai e le fanau se tasi i le vai ma le Agaga, e le mafai ona sao o ia i le malo o le Atua.”
Ioane 3:16	“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.”
Mataio 5:14–16	“Ia faapea ona pupula atu lo outou malamalama i luma o tagata.”
Mataio 11:28-30	“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
Mataio 16:15–19	Na fetalai Iesu, “Ou te avatu foi ia te oe ki o le malo o le lagi.”
Ioane 7:17	“Ai se tasi e fia fai lona finagalo, e iloa ai e ia le mataupu.”
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Ioane 17:3	“O le ola e faavavau foi lenei, ia latou iloa oe le Atua moni e toatasi, ma Iesu Keriso.”
Luka 24:36–39	“Aua o le agaga e leai sona aano ma ni ivi, pei o a’u nei ua outou vaavaai i ai.”

Pepa tauloto

Fetuunai faatonuga o le a mulimuli mai nei e faatatau i fuaitau o atamai faapitoa i aoaoga faavae o le a suesueina i lenei lesona. O tagata aoga o loo mauaina masini faaneionapo pe faaeletonika e mafai ona latou faaaogaina se polokalame faatekinolosi po o se isi polokalame e foafoa ai ni pepa i luga o a latou masini. A leai, tufa ni fasi pepa i tagata aoga taitoatasi mo lenei faatinoga.

O faatonuga o le a mulimuli mai nei ua faatatau i luga o lou filifilia e aoao i mau faasino se ono ma a latou faaupuga autu. Afai ua e filifili e aoao i ni mau faasino e sili atu ma le ono, e mafai lea ona e fetuunaia le faatinoga i se auala e mafai ai ona e foafoaina se numera o pepa e lava.

Vaevae se itu atoa e tasi o se fasi pepa i ni vaega tuusao se lua ma tusi ni pusa se tolu e tutusa uma le tetele i totonu o vaega tusao uma taitasi. Liliu le pepa ma toe fai le mea e tasi i lena itu. Filifili se tasi o auala o le a mulimuli mai nei e foafoa ai ni pepa tauloto e mafai ona fesoasoani ia te oe e taulotoina nei mau faasino o tusitusiga paia ma faaupuga autu.

Filifiliga A: Pepa tauloto e faaaoga ai ata

I se itu e tasi o le pepa, tusi se mau faasino o tusitusiga paia ua e filifilia i totonu o se pusa.
Liliu le pepa i le isi itu. I le pusa lava e tasi o loo i le itu agai, tusi se ata faigofie e mafai ona fesoasoani ia te oe e manatua ai le faaupuga autu o tusitusiga paia mo lena mau faasino. Mo se faataitaiga, mo le Mataio 5:14–16 e mafai ona e tusia se mea e faapea o le a mulimuli mai nei e fesoasoani ai ia te oe e manatua le faaupuga autu “Ia faapea ona pupula atu lo outou malamalama i luma o tagata.”

Toe fai uma nei laasaga mo fuaitau o atamai faapitoa i aoaoga faavae taitasi ua e filifilia mo lenei lesona.

Filifiliga B: Pepa tauloto e faaaoga ai mau faasino ma faaupuga autu

I totonu o lau api faamaumau suesuega, toe tusi uma fuaitau o atamai faapitoa i aoaoga faavae taitasi ua e filifilia i se auala e fesoasoani atili ai ia te oe e malamalama i le feau o le fuaitau. Mo se faataitaiga, e mafai ona e toe tusia le Ioane 3:5 ia faapea: “Na faamatalaina e Iesu e lē mafai ona e ulufaleina le malo o i le lagi e aunoa ma le faia o lau papatisoga ma le taliaina o le meaalofa o le Agaga Paia.”

I se tasi itu o le pepa, tusi se mau faasino o tusitusiga paia i totonu o pusa taitasi.
Liliu le pepa i le isi itu, ma tusi le faaupuga autu o tusitusiga paia (o loo faaalia faalautele i luga o le siata) i le pusa o loo i ai le mau faasino talafeagai i le itu agai. Fai lenei mea mo pusa uma taitasi.

Tipi ese vaega taitasi e fai ma pepa laiti, ma faaaoga i latou e tauloto ai nei mau faasino o tusitusiga paia ma faaupuga autu. Mafaufau pe saili mai i tagata o lou aiga ma uo se fesoasoani mo le faia o nei tauloto.

Vaevae taitoalua tagata aoga e amata taulotoina fuaitau ma faaupuga e faaaoga ai pepa tauloto. Ia lava se taimi e tuu i tagata aoga mo lenei faatinoga. Mafaufau pe talosagaina tagata aoga e fai ma suisui tai minute a latou paga. Faamanatu ia i latou le tala faatusa ia Sylvia, ma tuu ia i latou se taimi e tali ai i fesili o le a mulimuli mai nei.

O a fuaitau ma faaupuga autu ua e lagona e aupito sili ona aoga mo Sylvia, ma aisea?
O a ni upu moni e uiga i le Faaola e mafai ona e faasoa ia te ia e faaaoga ai nei fuaitau?
O a ni auala e mafai ona fesoasoani ai ia te oe le taulotoina o mau faasino ma upu moni mai tusitusiga paia?