Mareko 2:1–12

Ua Faamalolo e Iesu se Tagata Ma’i Supa

O Iesu Keriso o loo silasila atu i se tagata o loo taoto i luga o le eleele i Ona luma. Ua aui le tagata i se palanikeke ma o loo mafatia mai le ma’i supa. Sa tuutuu ifo i lalo le tagata ma’i e uo i se avanoa i le taualuga ma le faamoemoe ia faamaloloina. Ua faaalia mai ia Keriso o lo o faaloloa atu Ona aao i le tagata. O loo iai ni isi aposetolo po o soo o lo o faatasi ma Keriso.

Sa faaalia e Iesu Lona mana e faamalolo ai tagata i le faaletino ma le faaleagaga ina ua ia faamaloloina se tagata ma’i supa (pipili) ma faamagalo i ana agasala. E mafai e lenei lesona ona fesoasoani e faatupulaia lou malamalama e faapea, e mafai e le Faaola ona faamalolo ituaiga faaletonu uma.

Sauniuniga a le tagata aoga: Valaaulia tagata aoga e mafaufau i se taimi na maua ai e se isi latou te masani se faamanuiaga sa manaomia mai le Atua. Na faapefea ona aafia isi tagata, e pei o uo ma tagata o le aiga, mai i le faamanuiaga sa maua e lea tagata? Talosaga i tagata o le vasega e mafaufau po o a mea na latou aoaoina e ala i lo latou vaai atu i mea na faia e le Faaola mo lena tagata.

Gaoioiga e Ono Mafai Ona Aoao Ai

O le a se mea atonu e te naunau e te faia?

Mo le ata faataitai lenei, mafaufau e faaopoopo ni faamatalaga auiliili ina ia faateleina le gauai atu o tagata o le vasega. O auiliiliga nei e mafai ona aofia ai pe o le a le ma’i, o le a le vave e tatau ona fai ai le togafitiga, pe o a mea e moomia mo togafitiga.

Vaai faalemafaufau e faapea o loo tigaina se tasi e te alofa iai i se ma’i e ono maliu ai, o loo manaomia ai togafitiga faapitoa ma ua na o le tasi lava le fomai e mafai ona laveaiina o ia. O le a se mea e te naunau e fai ina ia maua ai se fesoasoani? O le a sau mea e fai pe afai ua leai se avanoa e vaaia ai le fomai pe e nofo foi le fomai i se isi atunuu?

E ono naunau tagata e faia soo se mea ina ia maua ai le faamalologa mo i latou lava po o e ua pele ia i latou. E ui ina mafai e tagata ua i ai le tomai ma le poto faapitoa ona togafitia ma’i faaletino, e i ai faaletonu faaleagaga ua na o Iesu Keriso e mafai ona Ia faamaloloina atoatoa. Lisi i totonu o lau api talaaga mo suesuega po o a nisi o nei ma’i ua e talitonu ua aofia ai.

A o e suesue i lenei lesona, mafaufau loloto pe faapefea ona e fesoasoani i tagata e pele ia te oe ma oe foi, ona o atu ia Keriso ina ia maua le fesoasoani ua na o Ia lava e mafai ona tuuina mai.

“O se tasi o ma’i supa’”

O se tomai e mafai ona fesoasoani e te aoao atili ai ao e suesue i talatusia o tusitusiga paia, o le faitau lea mai i le vaaiga patino a tagata eseese i totonu o le tala. A o e faatinoina lea tulaga, fai ma malolo ina ia taumafai e te mafaufau po o le a se mea o ono lagonaina po o mafaufauina e lena tagata i vaega eseese o le tala.

Ina ia faataitai lenei tomai suesue, filifili se tasi o tagata nei e te taulai iai a o e suesue i lenei tala ia Iesu a o aoao atu i Kapanaumi:

Ina ia fesoasoani i tagata o le vasega e aoao mai i le tele o ituaiga manatu, mafaufau e vaevae i latou i ni vaega taitoatolu ma ia tofu tagata taitoatasi o le vaega ma se tagata o le tala e taulai i ai.

O se tagata pipili (o le “ma’i supa” e pei ona faaaoga i le tala lenei o lona uiga ua pipili)
O se tasi o tagata e toafa na fataina le tagata supa
O se tasi o tagata i totonu o le fale o loo faalogologo ia Iesu

Faitau i le Mareko 2:1–3, ma vaai faalemafaufau faapea o oe o le tagata ua e filifilia e taulai i ai.

Mafaufau e valaaulia tagata o le vasega e tali fesili nei i totonu o a latou vaega taitoatolu.

O a ni luitau, pe afai o iai, ua e manatu sa ono feagai ma lena tagata?
O a ni mea ua e vaai faalemafaufau e faapea na vaaia, faalogoina, mafaufauina ma lagonaina e lena tagata?
Mata o le a se mea na ono faamoemoe iai lena tagata na te mauaina mai i lona taimi ma Iesu Keriso?

Faitau i le Mareko 2:4, ma vaavaai mo mea na fai e i latou na fataina le tagata ma’i ina ia faalatalata atu ai o ia ia Iesu Keriso. Atonu foi e te manao e matamata le vitio “Jesus Forgives Sins and Heals a Man Stricken with Palsy,” o loo maua i le ChurchofJesusChrist.org, mai le faailo taimi 0:00 i le 1:07.

0:10

Valaaulia ni tagata aoga se toatolu pe sili atu, ia tasi mo tagata taitoatasi i totonu o le tala, latou te tali leotele maia fesili nei.

O a ni mea ua e manatu na mafaufauina ma lagonaina e le tagata sa e filifilia i lenei vaega o le tala? Aisea?
O le a se mea o e manatu na latou faamoemoe e faia pe fetalai mai ai Iesu?

Faitau i le Mareko 2:5 e saili po o le a le fetalaiga a Iesu na fetalai atu ai i le tagata.

Valaaulia tagata aoga e tali le fesili lenei i a latou vaega taitoatolu.

Aisea e ono faateia ai le tagata sa e taulai i ai i upu a le Faaola i le fuaiupu 5?

O nisi o tagata sa iai i lenei faatasiga sa latou fesiligia le pule a le Faaola e faamagalo ai agasala. Faitau i le Mareko 2:6–12, ma saili po o le a le mea na fai e le Faaola e faailoa atu ai Lana pule e faamagalo ai. O le faaupuga “Atalii o le tagata” i le fuaiupu 10 o loo faasino ia Iesu Keriso o le Atalii o le “Tagata Paia,” o le Atua le Tama (tagai i le Mose 6:57). Atonu foi e te manao e faaauau le matamataina i le vitio “Jesus Forgives Sins and Heals a Man Stricken with Palsy” mai le faailo taimi 1:07 i le 2:57.

0:10

Mafaufau i le tagata sa e taulai iai i lenei tala. E faapefea ona e vaai faalemafaufau i lenei tagata o tali atu i fetalaiga ma mea na fai e le Faaola?
O le a se mea na e aoaoina e uiga i le Faaola a o e taulai i se tagata patino i le tala?

O le mana o Iesu Keriso e faamalolo ai

O se tasi o upumoni e mafai ona e faailoa a o e suesue i lenei tala o le E i ai le mana o Iesu Keriso e faamalolo ai tatou faaletino ma faaleagaga.

Sa molimau mai Peresitene Dieter F. Uchtdorf, a o iai i le Au Peresitene Sili, i le mana o le Faaola e faamalolo ai ma’i faaleagaga.

O nisi taimi e oo mai ma’i faaleagaga ona o se taunuuga o le agasala po o manuaga tau lagona. …

E oo lava i manu’aga faaleagaga loloto—ioe, e oo lava i na mea e ono foliga mai e le matogafitia —e mafai lava ona faamaloloina.

A’u uo pele, o le mana faamalolo o Iesu Keriso o loo iai pea i o tatou aso.

O le aao faamalolo o le Faaola e mafai ona suia ai olaga i o tatou aso e pei lava ona sa Ia faia i Ona aso. Afai e tau lava ina o tatou maua le faatuatua, e mafai ona Ia uuina o tatou lima, faatumu o tatou loto i le malamalama ma le faamalologa faalelagi, ma fetalai mai ia i tatou upu faamanuia, “Ina tu ia i luga, ave ia lou moega, ma ia e savali” [ Ioane 5:8 ].

(Dieter F. Uchtdorf, “O E Tauaveina le Malamalama Faalelagi,” Ensign po o le Liahona, Nov. 2017, 78)

O a ni faataitaiga o manua faaleagaga e mafai ona faamalolo e le Faaola?

Mafaufau e tusi i luga o le laupapa Ua na o Iesu Keriso e mafai ona faaamalolo atoatoa ______ma valaaulia tagata aoga e faatumu le avanoa.

E faapefea ona manuia lou olaga i le iloa ai e mafai ona Ia faamalolo manuaga faaleagaga?

Mafaufau lololoto i fesili nei e uiga i lenei upumoni. Mafaufau e tusi ou mafaufauga i totonu o lau api talaaga mo suesuega.

O i ai ni manuaga faaleagaga i lou olaga e manaomia ona faamaloloina?
E mafai faapefea ona e sailia le mana faamalolo o Iesu Keriso?
E iai se isi o e iloa o loo manaomia le mana faamalolo o Iesu Keriso? O le a se mea e mafai ona e faia e fesoasoani ai ia i latou ina ia mauaina?

Molimau atu i le alofa o Iesu Keriso mo i tatou taitoatasi ma Lona mana e faamalolo ai i tatou.

Faasoa mai mea ua e aoaoina

A o e suesue i isi tala i tusitusiga paia i lenei tausaga, mafaufau e faaaoga le tomai o le taulai ai i tagata faapitoa. E ono fesoasoani le faitau faafia o se fuaitau, ma manatunatu loloto i taimi uma e te faitau i ai i ni mea na ono aoaoina e tagata eseese i totonu o le tala.

Mafaufau faapea ua manao le tagata na e taulai iai a o e suesue i lenei tala e faamatala i sana uo mea sa ia molimauina ma lagonaina i lena aso. Faaalu se taimi e tusi ai i totonu o lau api talaaga mo suesuega pe na faapeī lou vaai faalemafaufau ia i latou o faamatalaina auiliili le aafiaga. Ia aofia ai ma mea ua e manatu na latou aoaoina ma lagonaina e uiga ia Iesu Keriso.

Manatu ma Talaaga o Faamatalaga

Pe mafai e lo’u faatuatua ona faatosinaina e pele ia te au?

Na aoao mai Elder Chi Hong (Sam) Wong o le Fitugafulu:

Sei ou faasoa atu ia te outou se tasi o oa natia o loo maua i lenei tala faaletusi paia. O loo i ai i le fuaiupu e 5: “Ua silafia e Iesu lo latou faatuatua” (ua faaopoopoina le faamamafa). Ou te lē i maitauina lenei mea i le tuanai—lo latou faatuatua. O le a aafia foi i le tuufaatasiga o o tatou faatuatua le soifua laulelei o isi.

O ai na tagata ia na ta’ua e Iesu? E mafai ona aofia ai le toafa o e na fataina le tagata supa, o le tagata supa lava ia, tagata o e na tatalo mo ia, ma i latou o e na i ai iina na faalogologo i le talaiga a Iesu ma vivii lemu i o latou loto mo le vavega o le a vave ona oo mai. E mafai foi ona aofia ai se toalua, se matua, se atalii po o se afafine, se faifeautalai, se peresitene o le korama, se peresitene o le Aualofa, se epikopo, ma se uo o nofo mamao. E mafai ona tatou fesoasoani uma o le tasi i le isi. E tatau ona tatou auai ma le naunautai e le aunoa e saili ina ia laveai mai i latou e i ai manaoga.

(Chi Hong [Sam] Wong, “Laveai i le Lotogatasi,” Ensign po o le Liahona Nov. 2014, 16)

O le a le mea na faamaonia e Iesu i le au tusiupu e ala i le faamaloloina faaletino o le tagata?

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua:

Na silafia uma e Iesu ma “aoao o le tulafono” sa iai i lena taimi e leai se tasi ua na o le Atua e mafai ona faamagaloina agasala. E tusa ai ma lena, e avea o se molimau patino ma le maoa’e sa ia te ia le mana o le Atua, … sa faia ai e Iesu le mea e lē mafai e se tagata taufaasese ona faia—sa ia faamaonia lona mana faalelagi e ala i le faamaloloina o le tagata ua faamagaloina. I lana fesili, “Pe moomia le mana sili atu e faamagalo ai agasala nai lo le mana e fai atu ai i le ma’i e tulai ma savali?” e na o le tasi lava le tali! E faapei ona tasi i latou; o lē e mafai ona faatinoina le tasi, e mafai ona faatinoina le isi.

(Bruce R. McConkie, Doctrinal New Testament Commentary [1973], 1:177–78)

Gaoioiga Faaopoopo e Aoao Ai

Aumaia o isi i le Faaola

Valaaulia tagata aoga e mulimuli i faataitaiga a tagata e toafa sa naunau e aumai le tagata supa ia Keriso. Valaaulia i latou e mafaufau i ni tagata patino latou te alolofa i ai o loo manaomia le fesoasoani e o mai i le Faaola ma faia se fuafuaga e fesoasoani ai ia i latou. E latou te ono mafaufau pe faaaofia ai isi tagata i la latou fuafuaga, e pei lava ona fesoasoani tagata e toatele i le tagata supa. O le saunoaga a Elder Wong i le vaega o “Tala ma Faamatalaga o Talaaga” o lenei lesona (po o lana saunoaga atoa) e mafai ona fesoasoani i tagata aoga e malamalama ai i le taua o e tuufaatasia o lo latou faatuatua ma isi.