Li na’leb’ re chaab’ilo’k sa’ jalan jalanq xcha’alil li yu’am

Sa’eb’ li perel a’in taataweb’ li na’leb’ re chan ru naru nakataaqe li Kolonel ut nakatchaab’ilo’ sa’ chixjunil xcha’alil laa yu’am. Moko tento ta taawoksi chixjunil—maare wankeb’ xkomon chik aana’leb’ jwal chaab’ileb’. Tijon chirix li k’a’ru naru tatk’anjelaq wi’ anajwan.

Naru nakataweb’ xkomon aana’leb’ sa’ ChildrenandYouth.ChurchofJesusChrist.org.

Li na’leb’ re chaab’ilo’k sa’ musiq’ej

B’ar wankeb’ laa na’leb’?

Il ru lix Hu laj Mormon rajlal kutan

K’aytesi aawib’ chi ilok ru hu rajlal kutan, us ta junjunq ajwi’ kok’ raqal taawil ru.

Kawresi aawib’ re xik sa’ li santil ochoch

Tzol ut yu’ami “Eb’ lix tusulal li wank re li evangelio” (perel 63), ut k’e xb’oqb’aleb’ laa komon chixb’aanunkil ajwi’ a’an.

Tzolebʼ lix Raqalil li Paabʼaal

Kanab’eb’ sa’ laa k’a’uxl Eb’ lix Raqalil li Paab’aal (perel 62), ut tzol k’a’ru naraj neke’xye.

Chaab’ilob’resiheb’ laa tij

Rub’elaj naq tattijoq, k’oxla k’a’ru li nakab’antioxi ut k’a’ru li nakawaj wi’ ru aatenq’.

B’antioxin chiru li qaChoxahil Yuwa’ xb’aaneb’ laa wosob’tesihom

Tz’iib’a oxib’ li k’a’aq re ru nakab’antioxi. Yal xtz’iib’ankil oxib’ li k’a’aq re ru rajlal kutan.

K’uula xsantilal li hilob’aal kutan

Sik’ ru k’a’ru taatikib’ xb’aanunkil malaj k’a’ru taakanab’ xb’aanunkil re naq chaab’il kutanaq li hilob’aal kutan choq’ aawe.

K’anjelak chiru anihaq

Sik’ chan ru naru nakatenq’a anihaq sa’ laa junkab’al, sa’ li eskweel, malaj sa’ li iglees.

B’aanu li k’anjel re li resilal li junkab’al

Tz’iib’a junaq li hu choq’ re laa mama’ malaj laa wech alal. Patz’ reheb’ naq te’xseraq’i junaq li esil chirix naq wankeb’ chaq re laa chihab’ laa’at.

Wotz li evangelio

Aatinan rik’in junaq aawamiiw chirix li evangelio. K’e xb’oqb’al laa wamiiw sa’ li iglees malaj sa’ junaq li ch’ina k’anjel.

K’ut li evangelio

K’ut li esil jwal nawulak chawu sa’eb’ li loq’laj hu chiru laa junkab’al. K’utb’esi malaj yiib’eb’ jalam-uuch li tate’xtenq’a chi k’utuk.

B’icha jun reheb’ lix b’ich li kok’al

B’ichan rik’in junaq li komon sa’ laa junkab’al. K’e reetal k’a’ru naxk’e chaweek’a li chaab’il son.

Li na’leb’ re chaab’ilok’ sa’ li komonil wank

B’ar wankeb’ laa na’leb’?

Tzolon chirix laa junkab’al

Il ru “Li Junkab’al: Jun Jek’inb’il Aatin choq’ re li Ruchich’och’,” ut aatinaheb’ laa na’ aayuwa’ chirix li k’a’ru xatzol.

K’ut laa rahom chiru laa junkab’al

B’aanu k’a’ruhaq chaab’il choq’ reheb’ li komon sa’ laa junkab’al.

Kanab’eb’ jalan chik li kristiaan chi okenk

Taw chan ru naru nakanumsi hoonal rik’in anihaq nareek’a naq xjunes wan malaj k’anjelan chiru anihaq naraj ru junaq ramiiw.

Tzolon chirix jalan chik na’leb’ re wank

Ilon ru hu chirix jalan chik na’leb’ re wank, aatinan rik’ineb’ kristiaan jalan chik xtenamiteb’, malaj ayu sa’ junaq ninq’e nach’ wankwat wi’ neke’xb’aanu laj jalan tenamit.

K’anjelan chiruheb’ laa wech kab’al

Aawochb’eeneb’ laa na’ aayuwa’ malaj laa jolominel, b’aanu junaq k’anjel sa’ laa k’aleb’aal re xtenq’ankileb’ li kristiaan wankeb’ rajom ru.

Tzol xpatz’b’al xkuyb’al aamaak ut kuyun maak

K’utb’esiheb’ li hoonal b’ar wi’ naq anihaq naraj ru xpatz’b’al xkuyb’al xmaak malaj kuyuk maak. K’utb’esi chan ru naru nakawotz laa week’ahom ut chan ru xk’ulub’ankil ajwi’ a’an.

Tzolon chirix laa k’aleb’aal

Ula’ani junaq rochochil aj k’aak’alehom tenamit, rochochil aj chupul xam, malaj junaq chik na’ajej b’ar wi’ neke’tenq’an. Tzolon chirix li neke’xb’aanu, ut b’antioxi reheb’ li k’anjel neke’xb’aanu.

Sik’ junaq aawamiiw

Ch’olob’ chiru anihaq anihat laa’at ut b’oq chi b’atz’unk aawik’in.

Oksiheb’ li chaab’il aatin

Yal roksinkileb’ ka’ajwi’ li chaab’il aatin li te’xk’e xsahil xch’ool anihaq ut ink’a’ te’xrahob’tesi xch’ool. Aatinan chirix k’a’ru naru nakaye wi anihaq tatraatina rik’ineb’ yib’ aj aatin.

Oksi chi us laa k’a’uxleb’aal

Yal xsahob’resinkil aach’ool naq yooq aajosq’il. Qayehaq, musiq’an chi nim, ajlan toj sa’ lajeeb’, malaj k’oxla naq wankat sa’ junaq na’ajej nawulak chawu.

K’e xsahileb’ xch’ool jalaneb’ chik li kristiaan

Ch’olob’ anihat laa’at chiru anihaq sa’ laa eskweel, sa’ li na’ajej wankat wi’, sa’ laa teep malaj laa uq’ej. Tenq’a li kristiaan a’an chixnawb’aleb’ ru jalaneb’ chik kristiaan.

Li na’leb’ re k’iik sa’ tib’elej

B’ar wankeb’ laa na’leb’?

Tzol k’uub’ank tzakemq

Tenq’an chixk’uub’ankil junaq chaab’il xtib’el wa. Wotz rik’ineb’ laa junkab’al malaj laa wamiiw.

Kawob’resi laa tib’el

K’aytesi aawib’ chireek’asinkil laa tib’el rajlal, jo’eb’ li b’atz’unk, li xajok, li eek’asink tib’elej, malaj li b’atz’unk chirix kab’l.

Oxloq’i laa junxaqalil

Saqaq laa junxaqalil rajlal kutan. Atin chi kok’ aj xsa’. Ch’aj li ruuch aawe ut t’e laa wismal rajlal kutan.

K’aak’ale laa wochoch

B’aanu k’a’ruhaq re naq laa wochoch a’anaq jun chaab’il na’ajej re wank, jo’ li mesok, utz’u’ujink, malaj k’alek.

Chawilaqeb’ li k’a’aq re ru wankeb’ aawe

Patz’ reheb’ laa na’ aayuwa’ chan ru xyiib’ankileb’ malaj rilb’aleb’ li k’a’aq re ru nakawoksiheb’.

Tzol junaq aaseeb’al re b’onok malaj xyiib’ankil jalam-uuch

Yiib’ malaj b’on junaq jalam-uuch, ut k’e re anihaq nakara.

Tzol xtoch’b’al junaq k’anjeleb’aal re son

Tzol xb’ichankil junaq li son, xtoch’b’al junaq k’anjeleb’aal re son, malaj xb’eresinkil li b’ich. Yeechi’i roksinkil laa seeb’al sa’ li q’ojyin re junkab’al malaj junaq chik ch’ina k’anjel.

Yu’ami li Aatin re Chaab’il Na’leb’

Il ru Tzol’leb’ ut Sumwank 89 re rilb’al k’a’ru naxyeechi’i li qaChoxahil Yuwa’ wi nakayu’ami li Aatin re Chaab’il Na’leb’. K’e reetal chan ru nakayu’ami chi us a’an.

Yal xsahil li hoonal re wank chirix kab’l

Elen chi b’eek malaj b’een chaq rochb’een laa junkab’al malaj aawamiiw re rilb’al li ruchich’och’ wankat wi’.

Wotzeb’ laa seeb’al

Wotz junaq reheb’ laa seeb’al re junaq kristiaan wan xjunes.

Kawresi aawib’ re junaq ch’a’ajkilal nachal sa’ junpaat

Yiib’ junaq k’uub’anb’il na’leb’ aawochb’eeneb’ laa na’ aayuwa’ malaj laa jolominel re k’a’ru naru nakab’aanu sa’ junaq ch’a’ajkilal nachal sa’ junpaat.

Li na’leb’ re xchaab’ilob’resinkil li k’a’uxleb’aal

B’ar wankeb’ laa na’leb’?

Tzolon chirix li lajetqil

Tzol k’a’ut naq aajel ru xtojb’al li lajetqil. K’e re li Qaawa’ lix lajetq raqal li tumin nakak’ul.

Chaab’ilob’resi li ilok ru hu nakab’aanu

Il ru junaq li ak’ hu malaj il ru junaq li hu nim chi us chiru li ak nakawil ru.

Tzol chan ru naru nakatwan chi kolb’il aawix sa’ internet

Yiib’ jun xtusulal chan ru naq laa junkab’al neke’roksi li internet malaj eb’ li aplicación.

Tzol junaq ak’il na’leb’

Sik’ ru k’a’ruhaq taawaj raj xtzolb’al ut tzol chixjunil li k’a’ru nakatru chirix a’an.

Ayu sa’ malaj ileb’ li k’anjel chirix jalan chik na’leb’ re wank

Ula’ani junaq li museo malaj junaq k’anjel chirix jalan chik na’leb’ re wank nach’ wankat wi’. Aatinan rik’ineb’ laa wamiiw malaj laa junkab’al chirix k’a’ruhaq ak’ toj xatzol.

Tzolon chirix jalan jalanq li trab’aaj

Ula’ani anihaq nakanaw ru sa’ lix trab’aaj re naq taatzol k’a’ru naxb’aanu ut chan ru naq neke’k’anjelak li k’a’aq re ru.

Tzolon chirixeb’ li kristiaan nakawoxloq’iheb’

Maare a’an junaq kristiaan nakanaw ru malaj anihaq nakanaw resil malaj anihaq sa’eb’ li loq’laj hu. K’e reetal chan ru naru nakatwulak jo’eb’ a’an.

Tzol chan ru naru nakasik’ ru li chaab’il junelik

Chixjunil li nakasik’ ru naxk’am chaq k’a’ruhaq, li nak’ulman sa’ xk’ab’a’ li k’a’ru nakab’aanu. Yiib’ junaq xtusulal ut li k’a’ru nachal xb’aan a’an.

Chaab’ilob’resi laa wulul

Kanab’ sa’ laa k’a’uxl junaq raqal nawulak chawu sa’eb’ li loq’laj hu, jun utz’u’ujinb’il aatin, malaj junaq son nawulak chawu.

Tzol junaq chik ak’ aatinob’aal

Tzol xyeeb’al ma sa aach’ool ut jalan chik kok’ aatin sa’ junaq chik aatinob’aal. Aatinan rik’in anihaq naxnaw li aatinob’aal a’an, wi naru.

Tz’iib’a junaq seraq’

Tz’iib’a junaq seraq’ chirix laa yu’am malaj chirix junaq komon sa’ laa junkab’al.