Eb’ lix Raqalil li Paab’aal

1 Laaʼo naqapaabʼ li Dios, li Junelik Yuwaʼbʼej, ut li Jesukristo, li Ralal, ut li Santil Musiqʼej.

2 Laaʼo naqapaabʼ naq ebʼ li winq teʼkʼeheʼq xtojbʼa-maak xbʼaan tzʼaqal lix maakebʼ aʼan, ut moko xbʼaan ta li qʼetok aatin re laj Adan.

3 Laaʼo naqapaabʼ naq saʼ xkʼabʼaʼ lix tojbʼal rix li maak xbʼaan li Kristo, chixjunilebʼ li winq nekeʼru chi koleʼk, rikʼin abʼink chiru li chaqʼrabʼ ut kʼojobʼanbʼil kʼanjel re li Evangelio.

4 Laaʼo naqapaabʼ naq li xbʼeen raqal chi naʼlebʼ ut kʼojobʼanbʼil kʼanjel re li Evangelio aʼanebʼ: xbʼeen, Xpaabʼankil li Qaawaʼ Jesukristo; xkabʼ, Li jalbʼa-kʼaʼuxlej; rox, Li kubʼihaʼ chi subʼbʼil choqʼ re risinkil li maak; xkaa, Xkʼeebʼal li uqʼej choqʼ re li maatan re li Santil Musiqʼej.

5 Laaʼo naqapaabʼ naq jun li winq tento taabʼoqeʼq xbʼaan li Dios, rikʼin profeetil aatin, ut rikʼin xkʼeebʼal li uqʼej xbʼaanebʼ li kʼeebʼilebʼ xwankil, re tixjultika li Evangelio ut tixkʼanjela li kʼojobʼanbʼil kʼanjel li wan chi saʼ.

6 Laaʼo naqapaabʼ li Iglees joʼ chanru ajwiʼ naq kʼuubʼanbʼil chaq najter, aʼan rikʼinebʼ li apostol, li profeet, laj kʼaakʼalenel, laj tzolonel, laj osobʼtesinel, ut xkomonebʼ chik.

7 Laaʼo naqapaabʼ naq wan li maatan re li jalanil aatinobʼaal, li profeetil aatin, li kʼutbʼesink, li kʼutbʼesinbʼil matkʼ, li kʼirtesink, xkʼutbʼal xyaalal li jalanil aatinobʼaal, ut xkomonebʼ chik.

8 Laaʼo naqapaabʼ naq li Santil Hu aʼan raatin li Dios aʼ yaal joʼ jaltesinbʼil ru chi tiik; naqapaabʼ ajwiʼ naq lix Hu laj Mormon aʼan raatin li Dios.

9 Laaʼo naqapaabʼ chixjunil li ak xkʼutbʼesi li Dios, chixjunil li naxkʼutbʼesi anajwan, ut naqapaabʼ naq toj tixkʼutbʼesi kʼiila naʼlebʼ li xninqalebʼ ru ut ninqebʼ xwankil chirix lix Awaʼbʼejihom li Dios.

10 Laaʼo naqapaabʼ naq taachʼutubʼamanq Israel chi yaal, ut naq teʼkʼojobʼamanq wiʼchik li Lajeebʼ Teepal; naq Sion (li Akʼ Jerusalen) taakabʼlamanq saʼ xbʼeen li nimla chʼochʼ America; naq li Kristo ajwiʼ taaʼawaʼbʼejinq saʼ xbʼeen li ruchichʼochʼ, ut naq li ruchichʼochʼ taaʼakʼobʼresiiq ru ut tixkʼul lix choxahil loqʼal.

11 Laaʼo naqaye naq wan li qakʼulubʼ xloqʼoninkil li Nimajwal Dios joʼ chanru naxtaqla tzʼaqal li reekʼobʼaal li qachʼool, ut naqakʼe xkʼulubʼebʼ chixjunil li winq chixbʼaanunkil chi joʼkan, maakʼaʼ naxye chanru, bʼar, ut kʼaʼru nekeʼxloqʼoni.

12 Laaʼo naqapaabʼ naq naʼajman wank rubʼel xwankilebʼ li rey, li awaʼbʼej, laj taqlanel, ut laj kʼanjenel re poopol, joʼ ajwiʼ xpaabʼankil, roxloqʼinkil, ut xwaklesinkil li chaqʼrabʼ.

13 Laaʼo naqapaabʼ naq tento naq maakʼaʼaq qabʼalaqʼ, yaalaqo, saqaq ru qachʼool, aj kʼehonelaqo, chaabʼilaq qayuʼam, ut naq taqabʼaanu li chaabʼilal re chixjunilebʼ li winq; chi yaal naru naqaye naq naqataaqe lix yehom laj Pablo—Chixjunil naqapaabʼ, chixjunil naqayoʼoni, ak xqakuy naabʼal li kʼaʼaq re ru, ut naqaj ruhank chixkuybʼal chixjunil li kʼaʼaq re ru. Wi wan kʼaʼruhaq li saq ru, li chaqʼal ru, li chaabʼil esil yeebʼil chirix malaj nimajel ru, naqasikʼ li kʼaʼaq re ru aʼin.

Laj Jose Smith.