« Mau mana’o nō te tupura’a i te rahi i roto i te mau tuha’a ato’a o te orara’a », Fa’ahotura’a i te ta’ata iho : Buka arata’i nā te mau tamari’i (2019)
« Mau mana’o nō te tupura’a i te rahi i roto i te mau tuha’a ato’a o te orara’a », Fa’ahotura’a i te ta’ata iho : Buka arata’i nā te mau tamari’i
Mau mana’o nō te tupura’a i te rahi i roto i te mau tuha’a ato’a o te orara’a
Tei roto i te mau ’api i muri nei te mau mana’o e nāhea ’oe ’ia pe’e i te Fa’aora ’e ’ia tupu i te rahi i roto i te mau tuha’a ato’a o tō ’oe orara’a. ’Aita e tītauhia ia ’oe ’ia fa’a’ohipa i te reira—te mau mana’o maita’i roa a’e, ’o tō ’oe iho ïa ! ’A pure nō ni’a i te mea tā ’oe e nehenehe e rave i teienei.
E ’ite mai ’oe i te tahi atu ā mau mana’o i ni’a i te ChildrenandYouth.ChurchofJesusChrist.org.
Mau mana’o nō te tupura’a i te rahi i te pae vārua
E aha tō ’oe mau mana’o ?
Tai’o i te Buka a Moromona i te mau mahana ato’a
’A ha’amātau i te tai’ora’a i te mau mahana ato’a, noa atu ē ’o te tahi ’īrava noa.
Fa’aineine nō te haere i te hiero
Ha’api’i mai ’e ’a ora i « Tā’u mau parau tumu o te ’evanelia » (’api 63), ’e ’a ani ia vetahi ’ē ’ia nā reira ato’a.
Ha’api’i mai i te mau hīro’a fa’aro’o
’A tāmau ’ā’au i te mau hīro’a fa’aro’o (’api 62), ’e ’a ha’api’i mai ē, e aha tō rātou aura’a.
Ha’amaita’i i tā ’oe mau pure
Hou ’oe ’a pure ai, ’a feruri i te mau mea tā ’oe i māuruuru ’e te mau mea tā ’oe e hina’aro i te tauturu.
Ha’amāuruuru i te Metua i te ao ra nō tō ’oe mau ha’amaita’ira’a
’A pāpa’i e toru ’ohipa tā ’oe e māuruuru nei. ’A tāmata i te pāpa’i e toru ’ohipa ’āpī i te mahana tāta’itahi.
Ha’amo’a i te mahana sābati
’A fa’aoti e aha tā ’oe e ha’amata i te rave ’aore rā, e fa’aea i te rave nō te fa’ariro i te sābati ’ei mahana ta’a ’ē.
Tāvini i te hō’ē ta’ata
’A ’imi i te mau rāve’a nō te tauturu i te hō’ē ta’ata i roto i tō ’oe ’utuāfare, i te fare ha’api’ira’a, ’aore rā, i te fare purera’a.
Rave i te ’ā’amu ’utuāfare
’A pāpa’i i te hō’ē rata i te hō’ē metua rū’au, te hō’ē metua vahine fēti’i (tatie), ’aore rā te hō’ē metua tāne fēti’i (tonton). ’A ani ia rātou ’ia fa’ati’a mai ia ’oe i te hō’ē ’ā’amu ’a vai ai rātou i tō ’oe fāito matahiti.
Fa’a’ite i te ’evanelia
’A paraparau i te ’evanelia i te hō’ē hoa. ’A ani i tō ’oe hoa ’ia haere mai i te purera’a ’aore rā, i te hō’ē ’ohipara’a.
Ha’api’i i te ’evanelia
’A ha’api’i i tā ’oe ’ā’amu pāpa’ira’a mo’a au roa a’e i tō ’oe ’utuāfare. ’A ha’uti teata ta’ata ora ’aore rā, ’a pāpa’i hōho’a nō te tauturu ia ’oe ’ia ha’api’i.
’A hīmene i te hō’ē hīmene nō te Paraimere
’A hīmene ’e te hō’ē melo o te ’utuāfare. ’A hi’o e nāhea te fa’aro’ora’a i te pehe maita’i i te fa’atupu i roto ia ’oe.
Mau mana’o nō te tupura’a i te rahi i te pae tōtiare
E aha tō ’oe mau mana’o ?
Ha’api’i mai nō ni’a i te ’utuāfare
’A tai’o « Te ’utuāfare : E poro’i i tō te ao nei », ’e ’a paraparau i tō ’oe mau metua nō ni’a i te mea tā ’oe i ha’api’i mai.
Fa’a’ite i te here i tō ’oe ’utuāfare
’A rave i te hō’ē ’ohipa maita’i nō te mau ta’ata i roto i tō ’oe ’utuāfare.
’A fa’aō mai i te tahi atu mau ta’ata
’A imi i te mau rāve’a nō te pārahi i pīha’i iho ’aore rā, nō te tāvini i te hō’ē ta’ata ’o tē mana’o ra ’ua vaiihohia ’oia i te hiti ’aore rā e hina’aro ’ia fa’ahoa ’oe iāna.
Ha’api’i mai nō ni’a i te tahi atu peu tumu
’A tai’o nō ni’a i te tahi atu peu tumu, ’a paraparau i te mau ta’ata nō te tahi atu mau fenua, ’aore rā, ’a haere i roto i te hō’ē ’ōro’a fa’ahanahanara’a peu tumu fātata mai ia ’oe.
Tāvini i tō ’oe mau ta’ata tupu
’A rave i te hō’ē ’ohipa ’e tō ’oe mau metua ’aore rā, tō ’oe feiā fa’atere, i roto i tō ’oe ’oire nō te tauturu i te ta’ata nava’i ’ore.
Ha’api’i mai i te tātarahapa ’e i te fa’a’ore i te hapa
’A ha’uti teata ta’ata ora i te tahi mau huru orara’a i reira te hō’ē ta’ata e hina’aro ai e tātarahapa ’e ’aore rā, e fa’a’ore i te hapa. ’A ha’api’ipi’i nāhea ’ia fa’a’ite i tō ’oe mau mana’o ’e nāhea ’ia pāhono.
Ha’api’i mai nō ni’a i tō ’oe ’oire
Haere e hi’o i te hō’ē fare muto’i, te fare nō te feiā tūpohe auahi, ’aore rā, te tahi atu mau pū ’ohipara’a a te ’oire. ’A ha’api’i mai nō ni’a i te ’ohipa tā rātou e rave, ’e ’a ha’amāuruuru ia rātou nō tā rātou tāvinira’a.
Ha’amātau i te hō’ē hoa ’āpī
’A fa’a’ite ia ’oe iho i te hō’ē ta’ata ’āpī, ’e ’a ani i te reira ta’ata ’ia ha’uti ’e ’o ’oe.
Parau i te mau parau maita’i
’A ha’api’ipi’i ia ’oe ’ia fa’a’ohipa i te mau ta’o ana’e ’o te fa’atupu i te ’oa’oa i roto i te hō’ē ta’ata, ’eiahā ra te ’oto. ’A paraparau nō ni’a i te mau mea tā ’oe e nehenehe e parau mai te mea ē, e parau te hō’ē ta’ata i te mau parau au ’ore i ni’a ia ’oe.
Ha’avī i tō ’outou huru
’A ha’api’ipi’i i te tāmarū ia ’oe ’ia tae mai te riri. ’Ei hi’ora’a, ’a huti hōhonu i te aho, ’a tai’o e tae atu i te 10, ’aore rā, ’a feruri ē, tei roto ’oe i te vāhi au-roa-hia a’e.
’A fāri’i pōpou ia vetahi ’ē
’A fa’a’ite ia ’oe iho i te hō’ē ta’ata ’āpī i roto i tā ’oe fare ha’api’ira’a, i roto i te vāhi e fa’aeahia ra e ’oe, ’aore rā, i roto i tā ’oe pāroita ’aore rā, ’āma’a. ’A tauturu i te reira ta’ata ’ia fārerei i te tahi atu mau ta’ata.
Mau mana’o nō te tupura’a i te rahi i te pae tino
E aha tō ’oe mau mana’o ?
Ha’api’i i te tunu i te mā’a
Tauturu i te fa’aineine i te hō’ē mā’a ’aore rā, te hō’ē mā’a ’amu’amu maita’i. ’A fa’a’ite i te reira i tō ’oe ’utuāfare ’aore rā, i te mau hoa.
’A ha’apūai i tō ’oe tino
’A rave tāmau i te hō’ē ’ohipa nō te fa’aha’uti i tō ’oe tino, mai te ’ohipa tū’aro, te ’ori, te fa’a’eta’etara’a tino, ’aore rā, te ha’utira’a i rāpae’au.
Fa’a’ite i te fa’atura i tō ’oe tino
’A tāpe’a mā noa i tō ’oe tino i te mau mahana ato’a. Hopu tāmau i te pape. Purūmu i tō ’oe niho ’e ’a ’atu’atu i tō ’oe rouru i te mahana tāta’itahi.
’Atu’atu i tō ’oe fare
’A rave i te hō’ē ’ohipa nō te fa’ariro i tō ’oe fare ’ei vāhi maita’i roa nō te ora, mai te tāmāra’a, te fa’a’una’unara’a, ’aore rā, te ’ohipara’a i roto i te ’āua.
’Atu’atu i te mau mea i fatuhia e ’oe
’A ani i tō ’oe nā metua ’ia ha’api’i ia ’oe nāhea ’ia tātā’i ’aore rā, ’ia ’atu’atu i te mau tauiha’a e fa’a’ohipahia e ’oe.
Ha’api’i i te hō’ē ’ite ’āpī nō te ano’ite
’A pāpa’i hōho’a, ’a pēni, ’aore rā, ’a fa’ata’a poto noa i te hō’ē hōho’a, ’e ’a hōro’a atu i te reira i te hō’ē ta’ata tā ’oe i here.
Ha’api’i mai i te hō’ē ’ite ’āpī nō te pehe
Ha’api’i mai nāhea ’ia hīmene i te hō’ē hīmene, ’ia fa’ata’i i te hō’ē mauiha’a ’upa’upa, ’aore rā, ’ia arata’i i te hīmene. ’A pūpū ’ia fa’a’ite i tō ’oe ’ite i roto i te pō ’utuāfare ’aore rā, i roto i te tahi atu ’ohipara’a.
Ha’apa’o i te parau pa’ari
’A tai’o Te Parau Ha’api’ira’a ’e te mau Parau Fafau 89 nō te hi’o e aha tā te Metua i te ao ra e fafau mai nei mai te mea ē, e ha’apa’o ’oe i te parau pa’ari. ’A fa’aoti nāhea ’oe i te ora maita’i a’e i te reira.
’Ia ’oa’oa i te taime i rāpae
’A hāhaere ’aore rā haere nā ni’a i te mou’a ’e te ’utuāfare ’aore rā, te mau hoa nō te māta’ita’i i te ao nei e hā’ati ra ia ’oe.
Fa’a’ite i tō ’oe mau tāreni
’A fa’a’ite i te hō’ē o tō ’oe mau tāreni i te hō’ē ta’ata vai ’ōtahi noa.
Fa’aineine nō te mau taime rū
’A fa’aineine i te hō’ē fa’anahora’a ’e tō ’oe nā metua ’aore rā, te feiā fa’atere nō te ’ohipa e ti’a ’ia rave i roto i te taime rū.
Mau mana’o nō te tupura’a i te rahi i te pae ferurira’a
E aha tō ’oe mau mana’o ?
Ha’api’i mai nō ni’a i te tuha’a ’ahuru
Ha’api’i mai nō te aha e mea faufa’a ’ia aufau i te tuha’a ’ahuru. ’A hōro’a hō’ē ’ahuru i ni’a i te hānere o tā ’oe moni ’āpī i te Fatu ra.
Ha’amaita’i i tō ’oe mau ’ite nō te tai’ora’a.
’A tai’o i te hō’ē buka nō ni’a i te hō’ē tumu parau ’āpī, ’aore rā, ’a tai’o i te hō’ē buka roa a’e i tei mātarohia e ’oe i te tai’o.
Ha’api’i mai nāhea ’ia vai pāruruhia i ni’a i te ’itenati
Hāmani i te hō’ē tāpura ture nō tō ’oe ’utuāfare nō te fa’a’ohipara’a i te ’itenati ’aore rā, i te mau rāve’a ’āfa’ifa’i.
Ha’api’i mai i te tahi mea ’āpī
’A mā’iti i te hō’ē mea i auhia e ’oe, ’e ’a ha’api’i mai i te mau mea ato’a e roa’a ia ’oe nō ni’a i te reira.
’A haere ’aore rā, ’a māta’ita’i i te mau ’ohipa nō te peu tumu o te fenua
’A haere e māta’ita’i i te hō’ē fare manaha ’aore rā, i te hō’ē ’ohipa nō te peu tumu i roto i tō ’oe fenua. ’A paraparau i tō ’oe mau hoa ’aore rā, i tō ’oe ’utuāfare nō ni’a i te hō’ē mea ’āpī tā ’oe i ha’api’i mai.
’A ha’api’i mai nō ni’a i te mau ’ohipa rau
Haere e fārerei i te hō’ē ta’ata tā ’oe i mātau i tāna vāhi ’ohipara’a nō te ha’api’i mai e aha tā rātou e rave nei, ’e e aha te huru te terera’a ’ohipa.
Ha’api’i mai nō ni’a i te mau ta’ata tā ’oe e ha’afa’ahiahia nei
’O te hō’ē paha ta’ata tā ’oe i mātau ’aore rā, hō’ē ta’ata nō roto mai i te ’ā’amu ’aore rā, nō roto i te mau pāpa’ira’a mo’a. ’A fa’aoti nāhea ’oe e nehenehe ai e riro rahi atu mai ia rātou.
Ha’api’i mai nāhea ’ia rave i te mau mā’itira’a maita’i
E hōpe’ara’a tō te mau mā’itira’a ato’a, ’oia ho’i, te mau mea e tupu mai ’ei hōpe’ara’a nō te ’ohipa tā ’oe e rave. Hāmani i te hō’ē tāpura nō te tahi mau mā’itira’a ’e tō rātou mau hōpe’ara’a.
Ha’amaita’i i tō ’oe ha’amana’ora’a
’A tāmau ’ā’au i te hō’ē pāpa’ira’a mo’a, hō’ē pehepehe, ’aore rā, hō’ē hīmene auhia e ’oe.
Ha’api’i i te hō’ē reo ’āpī
Ha’api’i mai ’ia parau ē, ’ia ora na ’e te tahi atu mau ta’o tumu i roto i te tahi atu reo. ’A fa’a’ohipa ’e te tahi ta’ata e paraparau ra i te reira reo, mai te mea e nehenehe.
Pāpa’i i te hō’ē ’ā’amu
’A pāpa’i i te hō’ē ’ā’amu nō ni’a i tō ’oe orara’a ’aore rā, nō ni’a i te hō’ē melo o tō ’oe ’utuāfare.