Te mau hīro’a fa’aro’o

1 Tē ti’aturi nei mātou i te Atua, te Metua Mure ’Ore, ’e i tāna Tamaiti ia Iesu Mesia, ’e i te Vārua Maita’i ho’i.

2 Tē ti’aturi nei mātou ē, e fa’autu’ahia te ta’ata nō tāna iho mau hara, ’eiaha rā nō tō Adamu ’ōfatira’a i te ture.

3 Tē ti’aturi nei mātou ē, nā roto i te tāra’ehara a te Mesia e ti’a ai i te ta’ata ato’a ’ia fa’aorahia, nā roto i te ha’apa’ora’a i te mau ture ’e te mau ’ōro’a o te ’evanelia.

4 Tē ti’aturi nei mātou ē, ’o teie te mau parau tumu mātāmua ’e te mau ’ōro’a mātāmua o te ’evanelia : te mātāmua ra, ’o te fa’aro’o ïa i te Fatu ra ia Iesu Mesia ; te piti ra, ’o te tātarahapara’a ïa ; te toru ra, ’o te bāpetizo-utuhi-ra’a ïa ’ia matara te hara ; te maha ra, ’o te tu’ura’a rima ïa nō te hōro’ara’a o te Vārua Maita’i.

5 Tē ti’aturi nei mātou ē, hou te ta’ata e a’o ai i te ’evanelia ’e hou ’oia e fa’atere ai i te mau ’ōro’a nō te reira, e mea ti’a iāna ’ia mā’itihia e te Atua nā roto i te tohu ’e te tu’ura’a rima e te feiā i ha’amanahia.

6 Tē ti’aturi nei mātou i te tu’ura’a o te mau tōro’a i roto i te ’Ēkālesia nei, mai te tu’uhia mai i roto i te ’Ēkālesia i mūta’a ihora; ’oia ho’i, te mau ’āpōsetolo, te mau peropheta, te mau tīa’i, te mau ha’api’i, te mau ha’api’i ’evanelia, ’e te tahi atu ā mau tōro’a.

7 Tē ti’aturi nei mātou i teie mau hōro’ara’a, ’oia ho’i, te paraura’a i te mau reo ’e’ē, te tohu, te heheura’a, te mau ’ōrama, te fa’aorara’a i te ma’i, te ’īritira’a i te mau reo ’e’ē, ’e te tahi atu ā mau hōro’ara’a.

8 Tē ti’aturi nei mātou ē, ’o te Bibilia ra ’o te parau ïa a te Atua, ’ia ti’a te ’īritira’ahia ; ’e tē ti’aturi ato’a nei mātou ē, te Buka a Moromona ra, ’o te parau ïa a te Atua.

9 Tē ti’aturi nei mātou i te mau mea ato’a i heheuhia mai e te Atua, te mau mea ato’a o tāna e heheu mai nei i teienei, ’e tē ti’aturi nei ho’i mātou ē, e heheu mai ā ’oia e rave rahi atu ā mau mea maita’i ’e te faufa’a rahi nō tōna ra bāsileia.

10 Tē ti’aturi nei mātou ē, e ha’aputuputuhia ’Īsera’ela ’e e fa’aho’ihia mai nā ’ōpū tino ’ahuru ; e fa’ati’ahia Ziona (’oia ho’i te Ierusalema ’āpī ) i ni’a i te fenua Amerika ; e pārahi tino mai ho’i te Mesia ’ei ari’i i ni’a iho i te fenua nei ; ’e e fa’a’āpīhia ho’i te fenua nei ’e e fāri’i ’oia i tōna hananaha pāradaiso.

11 Tē ti’aturi nei mātou ē, e ti’ara’a tō mātou ’ia ha’amori i te Atua Mana-hope mai te au i tō mātou iho hina’aro, ’e e ti’ara’a ho’i tō te mau ta’ata ato’a ’ia ha’amori rātou noa atu te huru, te vāhi ’e te mea tā rātou i hina’aro.

12 Tē ti’aturi nei mātou ē, e mea ti’a ïa ’ia auraro i te mau ari’i, te mau peresideni, te mau fa’atere hau, ’e te mau ha’avā, ’e ’ia ha’apa’o, ’ia fa’atura, ’e ’ia pāturu i te mau ture o te fenua.

13 Tē ti’aturi nei mātou ē, e mea ti’a i te ta’ata ’ia ora ma te parau-ti’a, ma te ha’avare ’ore, ma te vi’ivi’i ’ore, ma te ’ā’au maita’i, ma te ha’apa’o maita’i ’e ma te hāmani maita’i i te mau ta’ata ato’a. Tē pe’e nei ho’i mātou i te a’ora’a a Paulo : Tē ti’aturi nei mātou ē tē tīa’i nei ho’i i te mau mea ato’a. E mai te mea tē vai atu ra te mau mea maita’i, te mau mea fa’ahiahia, te mau mea ro’o maita’i, ’e te mau mea poupouhia ra, e tītau ïa mātou i te reira.

Iosepha Semita