« Hō’ē hōho’a nō te tupura’a i te rahi », Fa’ahotura’a i te ta’ata iho : Buka arata’i nā te feiā ’āpī (2019)

« Hō’ē hōho’a nō te tupura’a i te rahi », Fa’ahotura’a i te ta’ata iho : Buka arata’i nā te feiā ’āpī

Hō’ē hōho’a nō te tupura’a i te rahi

E tuha’a faufa’a rahi te tupura’a i te rahi nō te fa’anahora’a a tō tātou Metua i te Ao ra. Nō te tauturu ia ’oe, e hōro’a te Metua i te Ao ra i te arata’ira’a ia ’oe nā roto i te Vārua Maita’i, te mau pāpa’ira’a mo’a ’e te mau peropheta ora. E ha’api’i mai ’oe nā roto i tō ’oe mau ’itera’a rau, i te taime ihoā rā e tūru’i ’oe i ni’a ia Iesu Mesia ’e tāna tāra’ehara. Teie te hō’ē hōho’a nō te tauturu ia ’oe ’ia ora i te ’evanelia i roto i te mau tuha’a ato’a o tō ’oe orara’a.

’Ite mai i te mea e tītauhia ’oe e ’ohipa.

Hōho’a

feiā ’āpī e pure ra ’e e ’imi ra

Fa’anaho e nāhea ’oe i te rave i te reira.

Hōho’a

feiā ’āpī ’e te hōho’a fenua

’Ohipa i ni’a i tā ’oe fa’anahora’a ma te fa’aro’o.

Hōho’a

feiā ’āpī e rave ra i te ’ohipa tāvinira’a

Feruri i ni’a i te mea tā ’oe i ’apo mai.

Hōho’a

feiā ’āpī e feruri ra

’Ite mai

Tō ’oe mau hina’aro, mau hōro’a ’e mau tārēni

Hōho’a

mau ta’ata e rave ra i te mau fa’a’oa’oara’a

’Ua hōro’a te Metua i te Ao ra ia ’oe i te mau hōro’a, te mau tārēni ’e te mau ’aravihi. ’Ua hina’aro ’oia ’ia ’ite mai ’oe ’e ’ia fa’ahotu i te reira ’ia maita’i a’e ’oe, ’e vetahi ’ē ’e ’oia ato’a te ao nei. Nāhea ’oe i te ha’amaita’i ’e ’ia tupu i te rahi ?

Tāmata i te ui i te mau uira’a mai teie :

E aha tō’u mana’o nō te mea tā’u e ti’a ’ia ha’api’i mai ’aore rā e taui i roto i tō’u orara’a ?
E aha te mau tārēni ’e te mau ’aravihi tā’u e hina’aro ’ia ’āpī mai ?
E aha te mau peu pae vārua tā’u e hina’aro e fa’ahotu ’aore rā e ha’amaita’i ?
E nāhea vau i te ha’apa’o i te mau fafaura’a tā’u i rave i tō’u bāpetizora’a ?
’O vai tā’u e nehenehe e tāvini atu ?

E pāhono mai te Metua i te Ao ra i teie mau uira’a ’ia tūru’i ’oe i ni’a iāna. ’A pure. ’A mā’imi i te mau pāpa’ira’a mo’a ’e te mau parau a te mau peropheta ora. ’A tai’o i tō ’oe ha’amaita’ira’a patereareha, mai te mea tē vai ra. ’A ha’api’i mai ’ia ’ite i te mau ’āehuehu ’e te mau mana’o nō ’ō mai i te Vārua Maita’i. Nāna e tauturu mai ia ’oe ’ia ’ite e aha te mea faufa’a roa a’e nō ’oe i teienei. Mai te mea ’aita ’oe i pāpū e aha tē rave, hi’o i te mau ’api 58–63.

Fa’anaho

Nō te ha’amaita’i

Hōho’a

mau ta’ata i roto i te ’oire

’Ia oti ’oe i te fa’aoti e aha te mea tā ’oe e ’ohipa atu, ’a fa’anaho i hō’ē rāve’a nō te ’ite mai e nāhea ’oe i te rave i te reira. I roto i tā ’oe fa’anahora’a tē vai ra te mau ta’ahira’a ta’a ’ē ’aore rā mau ’ohipa, ’aore rā te mau rāve’a nō te fa’ahotu i te hō’ē peu ’aore rā te hō’ē ’aravihi o te ta’ata iho.

Tāmata i te ui i te mau uira’a mai teie :

Nō te aha e mea faufa’a te reira nō’u ?
Nāhea te reira i te tauturu iā’u ’ia riro hau atu mai ia Iesu Mesia te huru ?
E aha te mau ’ohipa tā’u e nehenehe e rave nō te rave i te reira ?
E ti’a ānei iā’u ’ia vāhi i teie mau ’ohipa ’ei mau ta’ahira’a iti ri’i ?
E aha te mau fa’anahora’a tā’u e nehenehe e rave i teienei nō te upo’oti’a i ni’a i te mau tāmatara’a tā’u e fa’aruru nei ?

’A pure nō ni’a i tā ’oe fa’anahora’a ’e ’a ha’apa’o maita’i i te mau ’āehuehu ’e te mau mana’o ’o tā ’oe e fāri’i. E nehenehe ’oe e ani i te tauturu a te Vārua Maita’i, tō ’oe ’utuāfare ’e tō ’oe feiā fa’atere.

Rave

’Ia tupu i te rahi ma te fa’aro’o

Hōho’a

mau ta’ata e rave ra i te mau fa’a’oa’oara’a

Pe’e i tā ’oe fa’anahora’a ! ’A rave i te mau fa’aha’amana’ora’a nō te tauturu ia ’oe ’ia vai rōtahi noa. Pāpa’i i te hō’ē parau ha’amana’o, tu’u i te hō’ē oe fa’aara ’aore rā ani i te hō’ē ta’ata ’ia ’ohipa nā muri ia ’oe. I te tahi taime, mea pa’ari ri’i i te ravera’a i tā ’oe fa’anahora’a. I te tahi taime, e’ita ’oe e manuia. ’Eiaha e fifi ! E tauturu te hāroaroara’a i te mea e haere maita’i ’e te mea ’aita e haere maita’i i tō ’oe tupura’a i te rahi.

Mai te mea e mau ri’i ’oe, tāmata i te ui i teie mau uira’a :

E aha te mau mea i tere maita’i ? Nō te aha ?
E aha te mau mea ’aita i tere maita’i ? Nō te aha ho’i ?
E aha atu ā tā’u e nehenehe e tāmata ?
I hea e nehenehe ai e noa’a mai te tahi atu ā mau mana’o ?
E ti’a ānei iā’u ’ia tātuha’a i tā’u fā ’ei ta’ahira’a na’ina’i ?
E aha tā’u i ’apo mai nā roto mai i te mau taupupura’a ?

Nō te rave maita’i i te hō’ē ’ohipa, tītauhia te fa’a’ohipara’a ’e te fa’a’oroma’i. E ani i te tauturu i tō ’oe ’utuāfare, te mau hoa ’aore rā te feiā fa’atere. ’Ua mātau te Fa’aora ia ’oe ’e te mau tāmatara’a tā ’oe e fa’aruru nei. E tauturu mai ’oia ia ’oe ’ia rave i te mau ’ohipa pa’ari. ’A pure nō te tauturu ’e te arata’ira’a.

Feruri

Nō ni’a i te mea tā’u i ’apo mai

Hōho’a

mau ta’ata e ta’uma ra i ni’a i te ’ē’a pa’umara’a

’A feruri hōhonu i ni’a i tā ’oe mau fā ’e te mau fa’anahora’a ’a ’ohipa ai ’oe i ni’a i te reira ’e i te taime ato’a e fa’aoti ai ’oe. E aha tā ’oe e ’āehuehu ra ? E aha tā ’oe i ’apo mai ? E tauturu te pāpa’ira’a i te mau māna’o ’e te mau horuhorura’a ia ’oe ’āraua’e.

Tāmata i te ui i te mau uira’a mai teie :

Nāhea vau i te tupura’a i te rahi ?
Nāhea vau i te fa’a’ohipa i te mea tā’u i ’apohia mai nō te tāvini ia vetahi ’ē ?
Nāhea tā’u mau ’ohipa i te tauturura’a iā’u ’ia ha’afātata atu ā i te Fa’aora ?
Nāhea vau i te tāmau ā i te tupu i te rahi i roto i teie tuha’a ?

’Ia fa’aoti ’oe i te ’ohipara’a i ni’a i te hō’ē fā ’aore rā i te hō’ē fa’anahora’a, ’a ha’amāuruuru i te Metua i te Ao ra ’e tae noa atu i te feiā tei tauturu mai ia ’oe. ’A feruri i ni’a i te ti’ara’a o te Fa’aora i roto i tō ’oe orara’a i te taime e rave ’oe i te ’ōro’a mo’a. ’A feruri ’e ’a pure nō ni’a i te ’ohipa tā ’oe e rave i muri iho.