“Ch’ol 3: Xtzolb’al ut xk’utb’al lix evangelio li Jesukristo,” Jultika Lin Evangelio: Jun tenq’anel hu re xwotzb’al lix evangelio li Jesukristo (2023)
“Xtzolb’al ut xk’utb’al lix evangelio li Jesukristo,” Jultika Lin Evangelio
Chʼol 3
Xtzolb’al ut xk’utb’al lix evangelio li Jesukristo
Sa’ li ch’ol a’in wankeb’ li tzol’leb’, li na’leb’, ut li taqlahom li jwal aajeleb’ ru sa’ lix evangelio li Jesukristo. Li yo’yookil profeet ut apostol neke’xye naq a’aneb’ a’in li na’leb’ li taatzol ut taak’ut. Ch’olob’anb’ileb’ arin choq’ aawe re naq tatruuq chixtenq’ankileb’ laa was aawiitz’in chixtawb’al ru lix tzol’leb’ li Kristo.
Li xb’een raqal sa’ li ch’ol a’in na’aatinak chirix xb’oqob’aleb’ li kristiaan chixk’ulb’al li kub’iha’. Sa’ rela’ li ch’ol wankeb’ li kaahib’ chi jolomil na’leb’ a’in:
Tzol li aatin sa’ li loq’laj hu chirixeb’ li na’leb’ a’in, jo’ ajwi’ lix ch’olob’ankil sa’ li hu a’in. Naq nakab’aanu chi jo’kan, li Musiq’ej tixk’ut chawu naq yaaleb’ li na’leb’ a’in. Chi jo’kan, taanaw k’a’ru taaye ut k’a’ru taab’aanu re xtenq’ankileb’ laa was aawiitz’in chixnawb’al li yaal sa’ xch’ool. (Chi’ilmanq Tzol’leb’ ut Sumwank 84:85.)
Naq laa was aawiitz’in neke’xb’aanu li k’a’ru b’oqb’ileb’ xb’aan li Kolonel chixb’aanunkil, timil timil te’ok chixnawb’al ru li Kolonel. Naq yookat chixtzolb’aleb’, junelik wanq k’a’ru taab’oqeb’ chixb’aanunkil, ut taatenq’aheb’ ajwi’ chixb’aanunkil. Naq neke’xb’aanu li b’oqb’ileb’ chixb’aanunkil, neke’ok chixyu’aminkil lix evangelio li Jesukristo ut chixkawresinkil rib’ choq’ re li sumwank rik’in li Dios.
K’ut chiruheb’ chixjunil li jolomil na’leb’ naq maji’ neke’kub’e xha’, jo’ ajwi’ chirix. Sa’ li wiib’ sut a’an, li misioneer neke’xk’am xb’e li k’utuk. Wi naru, eb’ li misioneer re teep malaj jalaneb’ chik li komon neke’tz’aqon ajwi’. Chi’ilmanq ch’ol 10 ut 13 re xtawb’al li na’leb’ chirix roksinkileb’ li komon sa’ li k’utuk.
Xkawresinkil aawib’ choq’ re li k’utuk
Naq yookat chixkawresinkil aawib’ re xtzolb’al jun laa was aawiitz’in, taawil li aatin tz’iib’anb’il chirix a’an sa’ li aplicacion re Jultika Lin Evangelio. K’uub’ jun li tzolok chirix li k’a’ru aajel ru sa’ xyu’am. Tz’il rix b’ar wan li k’a’ru tento raj tixnaw ut taareek’a naq yookex chi k’utuk. Li Musiq’ej tixk’e ruuchinihom laa k’anjel wi taayal aaq’e chixkawresinkil aawib’.
Naq laa’at ut laa wochb’een yookex chixkawresinkil eerib’ choq’ re li k’utuk, tz’ilomaq rixeb’ li patz’om a’in ut tijonqex re xpatz’b’al eena’leb’.
-
K’a’ru taqab’oq li qas qiitz’in chixb’aanunkil re naq taanimanq xpaab’aal chirix li Jesukristo, ut re naq taaxik chi uub’ej sa’ li evangelio? Li k’a’ru nakab’oq chixb’aanunkil, a’an li natenq’an re chixjalb’al xk’a’uxl ut chixk’ulb’al “xwankil laj Tojol-ix” (Helaman 5:11). K’oxla b’ar wan sa’ lix yu’am, ut tz’il rix li k’a’ru aajel ru choq’ re. Aran, taak’oxla k’a’ru taab’oq chixb’aanunkil.
-
K’a’ru na’leb’ tento tixnaw re naq taaraj xb’aanunkil li naqab’oq chixb’aanunkil? Tijonqex re naq teenaw b’ar wan li na’leb’ li taatenq’anq re chixnawb’al k’a’ut naq aajel ru li nekeb’oq chixb’aanunkil.
-
Chan ru taqatenq’a chixtawb’al ru li na’leb’? Re xkawresinkil aawib’ choq’ re li k’utuk, tus ut k’os ru li na’leb’ taak’ut sa’ li tzolok 1 4. Sik’ b’ar wankeb’ li patz’om, li aatin re li loq’laj hu, li seraq’, li jalam-uuch, ut k’a’aq chik re ru li taatenq’anq re chixtawb’al ru li na’leb’ taak’ut. Chi’ilmanq ch’ol 10 re xtawb’al li na’leb’ chirix xkawresinkil aawib’ choq’ re li k’utuk chi chaab’il.
-
K’a’ru naxyeechi’i li Dios reheb’ li ani neke’xb’aanu li k’a’ru b’oqb’ileb’ chixb’aanunkil? Naq yookat chixtzolb’al li tzol’leb’, k’e reetal b’ar wan li osob’tesink yeechi’inb’il xb’aan li Dios. Naq yookat chi k’utuk, yeechi’i ajwi’ li osob’tesink ut ch’olob’ xyaalal.
-
Ani reheb’ li komon taaruuq taatz’aqonq? Sa’ li ch’utam rajlal xamaan re xk’uub’ankil li k’anjel rik’ineb’ li komon, k’e reetal aniheb’ li komon te’ruuq chetenq’ankil chixtzolb’al ut chixtenq’ankil li kristiaan a’an. Naq maji’ texk’utuq, aatinan rik’ineb’ li komon chirix li te’xb’aanu sa’ li tzolok. Chi’ilmanq ch’ol 10.
-
K’a’ru taqab’aanu re naq li kristiaan toj te’xb’aanu li xe’xye, us ta ak xoo’el sa’ rochoch? Aatinan sa’ junpaat rik’ineb’ wulaj wulaj re xtenq’ankileb’ chixb’aanunkil li xe’xye. Sik’ chan ru naq eb’ li komon naru te’xtenq’a chixtenq’ankil chixb’aanunkil li ke’xye. Maare a’an rilb’al jun ch’ol sa’ lix Hu laj Mormon malaj sa’ jalan chik li loq’laj hu. Wi wan ani ink’a’ xb’aanu li k’a’ru xye, maare maji’ taak’e junaq chik xb’oqb’al, re naq xb’een wa taatenq’a rik’in li maji’ xb’aanu. Chi’ilmanq ch’ol 11.
-
Wi naxye jun sut chik naq tixb’aanu, chan ru taqatenq’a chi jwal us wi’chik sa’ li jun sut chik? Chirix naq nakab’aanu junaq li tzolok rik’in, tz’il rix k’a’ru naxk’ul xb’aan li tzolok. Ma yoo chi nimank xpaab’aal chirix li Kristo? Ma yoo chireek’ankil li Musiq’ej? Ma yoo chixjalb’al xk’a’uxl ut chixb’aanunkil li xye naq tixb’aanu? Ma yoo chi tijok, chirilb’al lix Hu laj Mormon, ut chi wulak sa’ li iglees? K’uub’ chan ru taatenq’a.
Li k’utuk jo’ naxye laa ch’ool chi b’eresinb’il xb’aan li Musiq’ej
Re chixjunileb’ li elder ut li hermana, li Xb’eenil Awa’b’ejil ut lix Molameb’ li Kab’laju chi Apostol ke’xye:
“Naq nak’utman li evangelio li k’ojob’anb’il wi’chik, naqaj naq li Musiq’ej tixb’eresiheb’ li misioneer jo’ ajwi’ li yookeb’ chi tzole’k. Tz’aqal yaal naq aajel ru xtzolb’aleb’ li na’leb li te’k’utmanq, a’b’an me’k’ute’ a’an yal jo’ naq wankeb’ chi tz’iib’anb’il. Tento naq li misioneer taa’aatinaq sa’ tz’aqal raatin jo’ b’eresinb’il xb’aan li Musiq’ej. Ink’a’ raj tixye li aatin yal k’uulanb’il sa’ xk’a’uxl. Tixye b’an li k’a’ru na’alan sa’ xch’ool. Naru naxjal xtusb’aleb’ li na’leb’ sa’ li tzolok re naq tixk’ut li k’a’ru musiq’anb’il choq’ re jun li kristiaan. Naq yoo chixyeeb’al li na’leb’ li naxnaw xjunes rib’ ut naxye sa’ tz’aqal li raatin, na’ajman ajwi’ naq tixye naq naxnaw chi tz’aqal yaal.”
Xk’utb’al li k’a’ru aajel ru choq’ re jun li kristiaan
Kanab’anb’ilat chixk’utb’al li na’leb’ jo’ chanru na’ajman re naq li kristiaan te’xkawresi rib’ chi us choq’ re li kub’iha’ ut li k’ojob’aak choq’ komon sa’ li Iglees. Li tzolok taak’e, jo’q’e taak’e, ut jo’ najtil li hoonal taanumsi re xk’utb’al, a’an b’aanunb’il a’ yaal jo’ na’ajman choq’ re jun li kristiaan ut jo’ chan ru nakatxb’eresi li Musiq’ej. Qayehaq naq maare yookat chixtzolb’al li ani maawa’ aj Kristiano. Aran, maare taatikib’ li tzolok rik’in xtenq’ankil chixnawb’al ru li qaChoxahil Yuwa’ ut li na’leb’ kixk’uub’ choq’ qe (chi’ilmanq “Xtzolb’al li ani maawa’ aj Kristiano” sa’ li ch’ol 10).
Kanab’ li Musiq’ej chatenq’ankil re naq taanaw k’a’ru taab’oqeb’ li kristiaan chixb’aanunkil, ut jo’q’e taab’oqeb’ chixb’aanunkil. Wi nakasik’ ru chi us li taab’oqeb’ chixb’aanunkil, ut wi nakab’oqeb’ sa’ li hoonal na’ajman ru, naru te’q’unb’esiiq xch’ool chixb’aanunkil li k’a’ru taakawresinq xpaab’aaleb’. Li te’xb’aanu naru tixk’ameb’ sa’ jun li nimla jalaak sa’ xch’ooleb’ (chi’ilmanq Mosiah 5:2; Alma 5:12–14).
K’ut li na’leb’ li saqen ru, li ink’a’ ch’a’aj, ut li ink’a’ nab’ay xch’olob’ankil. Us naq li tzolok ink’a’ tixq’ax ru 30 k’asal, ut naru ajwi’ xb’aanunkil chiru yal 5 k’asal.
Wanq naq wiib’ oxib’ sut texch’utlaaq re xtzolb’al chixjunileb’ li na’leb’ sa’ jun ajwi’ li tzolok. Jwal te’xtaw wi’chik ru li na’leb’ wi ink’a’ nab’ay xch’olob’ankil, wi nakak’ut chi kok’ aj xsa’, ut wi yal junjunq li na’leb’ nakak’ut sa’ jun li tzolok.
Xtzolb’aleb’ li loq’laj hu
K’a’ru li taqlanb’ilat chixk’utb’al?
K’a’ut naq aajel ru xtzolb’al li na’leb’ sa’eb’ li tzolok?