“Ch’ol 3: Li b’oqok re xk’ulb’al li kub’iha’ ut li k’ojob’aak choq’ komon,” Jultika Lin Evangelio: Jun tenq’anel hu re xwotzb’al lix evangelio li Jesukristo (2023)

“Li b’oqok re xk’ulb’al li kub’iha’ ut li k’ojob’aak choq’ komon,” Jultika Lin Evangelio

Chʼol 3

Li b’oqok re xk’ulb’al li kub’iha’ ut li k’ojob’aak choq’ komon

Jalam-uuch

Come into the Fold of God (Ok saʼ lix korral li Dios), xb’aan laj Walter Rane

Xch’olob’ankil li na’leb’

Chiqajunilo ralal xk’ajolo li qaChoxahil Yuwa’. Koochal sa’ ruchich’och’ re tooruuq chi tzolok, chi k’iik, ut chi wulak jo’ chanru li qaChoxahil Yuwa’ re naq chi jo’kan tooruuq chi sutq’iik rik’in (chi’ilmanq Moises 1:39). Ink’a’ naru toowulaq jo’ chanru a’an ut ink’a’ naru toosutq’iiq rik’in chi maak’a’ li choxahil tenq’. Li qaChoxahil Yuwa’ kixtaqla li Jesukristo, li Ralal, re xtojb’al qix ut re xtoqb’al lix b’ak’leb’ li kamk (chi’ilmanq 3 Nefi 27:13–22).

Naru naqak’ul lix wankilal aj tojol-ix li Kristo rik’in xk’anjelankil li qapaab’aal chirix li Kristo choq’ re li jalb’a-k’a’uxlej, xkub’sinkil qaha’, xk’ulb’al li maatan re li Santil Musiq’ej naq nokok’ojob’aak choq’ komon, ut rik’in li kuyuk toj sa’ roso’jik. Xpaab’ankil li sumwank re li kub’iha’, a’an xb’een li naqab’aanu sa’ xb’ak’b’al qib’ rik’in li Dios re naq li Santil Musiq’ej tooxsantob’resi, tooxkawob’resi, ut tooxchaab’ilob’resi. Naq naqak’ul chi jo’kan, a’an li yo’laak wi’chik sa’ musiq’ej nayeeman re. (Chi’ilmanq 2 Nefi 31:7, 13–14, 20–21; Mosiah 5:1–7; 18; 27:24; 3 Nefi 27:20; Jwan 3:5.)

Li yo’laak wi’chik sa’ musiq’ej natikla naq nakub’e qaha’ rik’in ha’ ut rik’in li Musiq’ej. Li kub’iha’, a’an jun li k’anjel re sahil ch’oolejil. Naq nakub’e qaha’ chi yot’b’il qach’ool ut chi tuulan qamusiq’, naqatikib’ jun ak’ yu’am li tenq’anb’il xb’aan xwankilal li Dios. Chirix naq nakub’e qaha’ ut nokok’ojob’aak choq’ komon sa’ li Iglees, naru nokokawob’resiik rajlal rik’in xk’ulb’al li loq’laj wa’ak chi k’ulub’ejo. (Chi’ilmanq 2 Nefi 31:13; Mosiah 18:7–16; Moroni 6:2; Tzol’leb’ ut Sumwank 20:37.)

Xk’eeb’al li b’oqok

Chi b’eresinb’ilat xb’aan li Musiq’ej, b’oqeb’ li kristiaan chi kub’eek xha’ ut chi k’ojob’aak choq’ komon sa’ li Iglees. Naru xb’oqb’aleb’ yalaq jo’q’e, maak’a’ naxye k’a’ru li na’leb’ yookat chixk’utb’al sa’ li tzolok.

K’ut li tzol’leb’ re li kub’iha’, ut tenq’aheb’ li kristiaan chixtawb’al ru lix tzol’leb’ li Kristo (chi’ilmanq tzolok 3). K’ut naq aajel ru ut naq wan nimla sahilal rik’in li sumwank re li kub’iha’, xk’ulb’al li risinkil li qamaak, ut xk’ulb’al li maatan re li Santil Musiq’ej sa’ li k’ojob’aak choq’ komon.

Naq maji’ nakak’e xb’oqb’aleb’, k’e reetal ma neke’xtaw ru li na’leb’ xak’ut jo’ ajwi’ li sumwank re li kub’iha’, re naq kawresinb’ilaqeb’ xk’a’uxl chixsumenkil li b’oqok a’an. Naq noko’ok sa’ li sumwank re li kub’iha’, naqaye chiru li Dios:

Naq wan qach’ool chixk’ulb’al sa’ qab’een lix k’ab’a’ li Kristo.
Naq taqapaab’ lix taqlahom li Dios.
Naq took’anjelaq chiru li Dios ut li qas qiitz’in.
Naq tookuyuq toj sa’ roso’jik. (Chi’ilmanq tzolok 4.)

Naru taach’olob’ chi jo’ka’in:

“Naq nakub’e qaha’, ‘naqakʼut xyaalal chiru [li Dios] naq okenaqo saʼ jun sumwank rikʼin aʼan, naq tookʼanjelaq chiru ut taqapaabʼ lix taqlahom.’ Naq noko’ok sa’ li sumwank a’in, li Dios naxye naq ‘tixhoy lix Musiqʼ chi numtajenaq wiʼchik saʼ qabʼeen’ (Mosiah 18:10).”

Tento naq taaye li b’oqok chi saqen ru. Maare taaye:

“Ma taataaqe li Jesukristo rik’in xk’ulb’al li kub’iha’ rik’in li ani wan xwankil chixb’aanunkil? Laa’o tatqatenq’a chixkawresinkil aawib’ choq’ re li kub’iha’. Naqak’oxla naq truuq taakawresi aawib’ choq’ re li kutan [fecha]. Ma taakawresi aawib’ re taakub’eeq aaha’ sa’ li kutan a’an?”

Ye resil li nimla osob’tesink te’xk’ul rik’in li kub’iha’ ut rik’in xpaab’ankil li sumwank a’an. Ye lix nawom aachʼool chirixeb’ li osob’tesink a’an.

Ch’olob’ naq li kub’iha’ ut li k’ojob’aak choq’ komon ink’a’ neke’xraq li qab’e. Neke’xk’am b’an li qab’e b’ar wi’ wan li qayo’onihom, lix sahil qach’ool, ut lix wankilal li Dios chi jwal nim wi’chik sa’ qayu’am (chi’ilmanq Mosiah 27:25–26). Chirix naq jun li kristiaan nakub’e xha’ ut nak’ojob’aak choq’ komon, naru taaroyb’eni xsantob’resinkil xb’aan li Santil Musiq’ej naq naxik chi uub’ej sa’ xb’ehil li sumwank.

Wi naru, b’oqeb’ li ani yookat chixtzolb’al chirilb’al jun li k’anjel re kub’iha’ ut jun li ch’utam re loq’laj wa’ak b’ar wi’ jun li kristiaan taak’ojob’aaq choq’ komon.

Li naru tatxtenq’a chixb’oqb’al li kristiaan chi kub’eek xha’

Maare teeril li aatin sa’ loq’laj hu chirix xkub’sinkil xha’ li Jesus (chi’ilmanq Mateo 3:13–17). Naru ajwi’ nakak’ut li video re li Santil Hu li naxk’ut xkub’sinkil xha’ li Kolonel malaj li video re lix Hu laj Mormon li naxk’uteb’ lix tzolom li Kolonel naq yookeb’ chi kub’sink ha’.

Naru ajwi’ nakawil li raatin laj Nefi chirix xkub’sinkil xha’ li Jesus (chi’ilmanq 2 Nefi 31:4–12). Rilb’aleb’ li seraq’ chirix lix kub’iha’ li Jesukristo naru tixkawob’resiheb’ li yookeb’ chi tzolok.

Xtzolb’aleb’ li loq’laj hu

Tz’ileb’ rix li raqal a’in re li loq’laj hu:

Tz’iib’a chi k’osb’il ru li na’leb’ xataw.