“Ch’ol 3: Tzolok 4—Xtaaqenkil li Jesukristo chiru chixjunil li qayu’am,” Jultika Lin Evangelio: Jun tenq’anel hu re xwotzb’al lix evangelio li Jesukristo (2023)
“Ch’ol 3: Tzolok 4,” Jultika Lin Evangelio
Ch’ol 3: Tzolok 4
Xtaaqenkil li Jesukristo chiru chixjunil li qayu’am
Xk’utb’al li tzolok a’in
Li kub’iha’ naxk’e qayo’onihom ut xsahil qach’ool. Naq nakub’e qaha’, naqak’ut naq naqaj xtaaqenkil li Dios ut xk’amb’al li b’e li nawulak sa’ li junelik yu’am. Naqaye naq tookanaaq jo’ xtzolom li Jesukristo chiru chixjunil li qayu’am.
Li tzolok a’in naxch’olob’ k’a’ru naqayeechi’i xb’aanunkil chirix naq nakub’e qaha’. Tusub’anb’il li tzolok rik’ineb’ li na’leb’ ain:
Tenq’aheb’ li kristiaan chixk’eeb’al reetal naq li na’leb’ ut li taqlahom li nakak’ut chiruheb’, a’an ajwi’ li te’xyeechi’i xb’aanunkil chirix naq neke’xk’ul li kub’iha’. K’ut chiruheb’ naq li na’leb’ sa’ li tzolok a’in tixtenq’aheb’ chi chalk rikʼin li Kristo ut chi “tzʼaqonk saʼ lix kolbʼa-ibʼ” (Omni 1:26; chiʼilmanq ajwiʼ 1 Nefi 15:14).
Wiib oxib’ sut texwulaq rik’ineb’ re naq teek’uteb’ li na’leb’ a’in chi ch’inqil. Sa’ li tzolok, ink’a’ raj texbayq numenaq 30 k’asal. Li jwal us, a’an li tzolok chi junpaat, chi kok’ aj xsa’, ut chi k’osb’il ru li na’leb’.
Taak’uub’ aawib’ chirix li k’a’ru taak’ut, jo’q’e taak’ut, ut jarub’ k’asal taanumsi chixk’utb’al. Tz’il rix b’ar wan li k’a’ru aajel ru choq’ reheb’ li ani nakatzol, ut sik’ aab’eresinkil rik’in li Santil Musiq’ej. Kanab’anb’ilat chixk’utb’al li k’a’ru na’ajman re naq li kristiaan te’xkawresi rib’ chi us choq’ re li kub’iha’ ut li k’ojob’aak choq’ komon sa’ li Iglees.
Wan naq li hu a’in naxye tz’aqal li k’a’ru taab’oqeb’ li kristiaan chixb’aanunkil. Sik’ aamusiq’ankil re naq taanaw k’a’ru taab’oqeb’ chixb’aanunkil, ut jo’q’e taab’oqeb’. Tz’il rix toj b’ar nawulak xnawomeb’. Tenq’aheb’ chixyu’aminkil li evangelio chi ch’inqil.
Xk’ulb’al lix k’ab’a’ li Jesukristo sa’ qab’een
Naq nakub’e qaha’, noko’ok sa’ aatin ut naqaye naq taqataaqe li Jesukristo “chi anchal li rajom qachʼool.” Naqak’ut ajwi’ naq “wan qach’ool chixk’ulb’al sa’ qab’een lix k’ab’a’ li Kristo” (2 Nefi 31:13; chi’ilmanq ajwi’ Tzol’leb’ ut Sumwank 20:37).
Xk’ulb’al sa’ qab’een lix k’ab’a’ li Jesukristo naraj naxye naq naqajultika li Jesus ut naqayal qaq’e chixtaaqenkil chiru chixjunil li qayu’am. Naqakanab’ lix saqen li Jesus chi k’utunk chiqu re naq li qas qiitz’in te’ril. Naqanaw naq reho li Kristo, ut naqak’e li Jesus xb’een xb’een sa’ li qayu’am.
Sa’ li aatin tz’iib’anb’il arin taq’a, taawil xch’olob’ankil wiib’ chi na’leb’ li naqab’aanu re xjultikankil ut xtaaqenkil li Jesukristo.
Li tijok chi kok’ aj xsa’
Naru taqab’aanu li tijok yal rik’in jun ch’ina aatinak rik’in li Dios sa’ qach’ool. Naq nokotijok, naqate li qaam re naq too’aatinaq chi tz’aqal yaal rik’in li Dios. Naqaye li qarahom choq’ re ut naqab’antioxi li qosob’tesinkil. Naqatz’aama ajwi’ li qatenq’ankil, xkolb’al qix, ut qab’eresinkil. Naq raqe’k re li qatij, us raj xk’eeb’al jun k’amokaq li hoonal choq’ re li ab’ink.
Li Jesus kixye, “Junelik tento textijoq chiru li Yuwaʼbʼej saʼ lin kʼabʼaʼ” (3 Nefi 18:19, tiqb’il xkawil li aatin; chi’ilmanq ajwi’ Moises 5:8). Naq nokotijok sa’ xk’ab’a’ li Jesukristo, naqajultika li Jesus jo’ ajwi’ li qaChoxahil Yuwa’.
Li Jesus kixk’ut chiqu chan ru naq tootijoq. Naru naqatzol naab’al chirix li tijok rik’in xtz’ilb’aleb’ rix lix tij li Kolonel sa’ li loq’laj hu (chi’ilmanq Mateo 6:9–13; Jwan 17).
Naq yooko chi tijok, naru taqab’aanu a’in:
-
Xtikib’ankil rik’in xpatz’b’al xk’ab’a’ li qaChoxahil Yuwa’.
-
Xyeeb’al k’a’ru naqeek’a sa’ qach’ool, maare a’an xb’antioxinkil li qosob’tesinkil.
-
Xyeeb’al li qapatz’om, xsik’b’al li qab’eresinkil, ut xtz’aamankil li qosob’tesinkil.
-
Xraqb’al rik’in xyeeb’al, “Sa’ xk’ab’a’ li Jesukristo, amen.”
Li loq’laj hu nokoxtij naq tootijoq eq’la ut ewu. A’b’anan, naru nokotijok yalaq jo’q’e ut yalaq b’ar. Ma yooko chi tijok qajunes malaj sa’ junkab’al, li wiq’laak naru tooxtenq’a chixb’aanunkil rik’in oxloq’ink. Tento naq junelik wanq jun li tij sa’ qach’ool. (Chi’ilmanq Alma 34:27; 37:36–37; 3 Nefi 17:13; 19:16.)
Tento tootijoq chi anchal li qach’ool ut chi anchal li qak’a’uxl. Ink’a’ raj juntaq’eet li aatin taqaye junelik.
Rik’in paab’aal nokotijok, chi anchal qach’ool, ut wan sa’ qach’ool xpaab’ankil li taak’utmanq chiqu sa’ xsumenkil li qatij. Naq naqab’aanu chi jo’kan, li Dios tooxb’eresi ut tooxtenq’a chi ok sa’ li k’a’ru chaab’il. Jwal nach’ wi’chik taqeek’a li Dios qik’in. Tixk’e li yaal sa’ qak’a’uxl, ut wanq li qana’leb’. Toorosob’tesi rik’in tuqtuukilal, kawilal, ut xk’ojob’ankil qach’ool.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Tijok”
-
Temas del Evangelio: “Oración”
Xtzolb’aleb’ li loq’laj hu
Laj Nefi kixye, “Chetzeka xsahil li raatin li Kristo, xbʼaan naq kʼehomaq reetal, li raatin li Kristo tixye eere chixjunil li kʼaʼaq re ru tento teebʼaanu” (2 Nefi 32:3; chi’ilmanq ajwi’ 31:20).
Tz’aqal aajel ru xtzolb’aleb’ li loq’laj hu re xjultikankil ut xtaaqenkil li Jesukristo. Sa’ li loq’laj hu nokotzolok chirix lix yu’am, lix k’anjel, ut lix na’leb’ li Jesus. Nokotzolok ajwi’ chirixeb’ lix yeechi’ihom. Naq naqileb’ li loq’laj hu, naqak’ul lix rahom a’an. Nanimob’resiik li qaam, naniman li qapaab’aal, ut nasaqeno’ li qak’a’uxl. Jwal naqanaw wi’chik naq yaal lix k’anjel li Jesus.
Naqak’oxla ut naqataaqe li Jesus rik’in xyu’aminkil li raatin. Tento taqileb’ li loq’laj hu wulaj wulaj, ut jwal tqil wi’chik lix Hu laj Mormon.
Sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan wankeb’ kaahib’ li loq’laj hu: li Santil Hu, lix Hu laj Mormon, li Tzol’leb’ ut Sumwank, ut li Q’ol Nim Xtz’aq jo’ loq’laj hu. “Ebʼ li xaqabʼanbʼil hu” nayeeman ajwiʼ rehebʼ.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Loqʼlaj hu (ebʼ li)”
-
Temas del Evangelio: “Escrituras”
Xpaab’ankileb’ lix taqlahom li Dios
K’e reetal: Jalan jalanq li naru taab’aanu re xk’utb’aleb’ li taqlahom a’in. Maare taab’aanu wiib’ oxib’ li tzolok re xk’utb’aleb’ chixjunil. Malaj maare taak’ut junjunq reheb’ sa’ li oxib’ chi tzolok li ak teeb’aanu. Junelik taak’ut b’ar wankeb’ xna’aj sa’ li sumwank re li kub’iha’ ut sa’ li k’uub’anb’il na’leb’ re li kolb’a-ib’.
Naq nakub’e qaha’, noko’ok sa’ sumwank rik’in li Dios naq “taqapaab’ lix taqlahom” (Mosiah 18:10; Alma 7:15).
Li Dios naxk’eheb’ li taqlahom xb’aan naq nokoxra. Naraj li k’a’ru chaab’il choq’ qe, anajwan ut chi junelik. Rik’in naq a’an li qaChoxahil Yuwa’, naxnaw k’a’ru na’ajman choq’ re xkawilal li qamusiq’ ut li qatib’el. Naxnaw ajwi’ k’a’ru tixk’e xsahil qach’ool chi tz’aqal. Li junjunq chi taqlahom, a’an jun choxahil maatan li k’eeb’il re qab’eresinkil, re xkolb’al qix, ut re qatenq’ankil chi k’iik.
Jun rajom li qayu’am sa’ ruchich’och’, a’an li tzolok ut li k’iik rik’in roksinkil xtaql li qach’ool chi chaab’il (chi’ilmanq Abraham 3:25). Xpaab’ankileb’ lix taqlahom li Dios—ut xjalb’al qak’a’uxl naq nokosach—nokoxtenq’a chixb’eresinkil qib’ sa’ li ch’a’ajkilal re li yu’am a’in.
Eb’ lix taqlahom li Dios, a’aneb’ jun xyo’leb’aal li qakawilal ut li qosob’tesinkil (chi’ilmanq Tzol’leb’ ut Sumwank 82:8–9). Naq naqapaab’eb’ li taqlahom, naqak’e reetal naq ink’a’ nokohe’xt’ilob’resi chi moko nokohe’xram. Li tz’aqal ach’ab’aak natawman sa’ xpaab’ankileb’ li taqlahom. Li ab’ink, a’an jun xyo’leb’aal li qakawilal, ut naxk’e li saqen ut li qanawom rik’in li Santil Musiq’ej. Naxk’e xsahil qach’ool ut nokoxtenq’a chixtawb’al tz’aqal li qawankilal jo’ ralal xk’ajol li Dios.
Li Dios naxyeechi’i qosob’tesinkil naq naqapaab’eb’ lix taqlahom. Wan li osob’tesiik li naqak’ul ka’ajwi’ rik’in xpaab’ankil junaq li taqlahom choq’ re. Li osob’tesiik jwal nim, a’an li tuqtuukilal saʼ li yu’am aʼin ut li junelik yuʼam saʼ li ruchichʼochʼ chal re. (Chi’ilmanq Mosiah 2:41; Alma 7:16; Tzol’leb’ ut Sumwank 14:7; 59:23; 93:28; 130:20–21.)
Li Dios nokorosob’tesi sa’ musiq’ej jo’ ajwi’ sa’ li qayu’am. Wan naq tento taqakuy royb’eninkil li qosob’tesinkil, ut taqapaab’ naq taachalq jo’q’e naraj li Dios (chi’ilmanq Mosiah 7:33; Tzol’leb’ ut Sumwank 88:68). Wan ajwi’ li qosob’tesinkil li ch’a’aj rilb’al wi ink’a’ naqatz’il rix chi musiq’ejil. Kama’an naqak’ul naq yal na’ok li ch’ina usilal sa’ qab’e.
Wan naq ink’a’ naqanaw naq xqak’ul li qosob’tesinkil toj reetal naq ak xnume’. Wan ajwi’ li qosob’tesinkil li maji’ taqak’ul sa’ li yu’am a’in. Maak’a’ naxye jo’q’e malaj chan ru taachalq li qosob’tesinkil, naru naqanaw chi yaal naq taachalq wi taqayal qaq’e chixyu’aminkil lix evangelio li Jesukristo (chi’ilmanq Tzol’leb’ ut Sumwank 82:10).
Li Dios naxraheb’ chixjunileb’ li ralal xk’ajol chi tz’aqal re ru. Wan xkuyum chirix li qamajelal, ut naxkuy qamaak naq naqajal qak’a’uxl.
Li wiib’ xnimal ru taqlahom
Naq eb’ aj Fariseo ke’xpatz’ re li Jesus, “K’a’ru li taqlahom q’axal nim?” li Jesus kixye, “Taara li Qaawa’ laa Dios chi anchal laa ch’ool, chi anchal laa waam, ut chi anchal laa k’a’uxl.”
Toja’ naq li Jesus kixye naq xkab’ li xnimal ru taqlahom chanchan li xb’een: “Taara laa was aawiitzʼin joʼ naq nakara aawibʼ laaʼat” (Mateo 22:36–39). “Maak’a’ chik junaq chaq’rab’ q’axal nim xwankil chiruheb’ a’in” (Markos 12:31).
Jo’ musiq’ejil ralal xk’ajol li Dios, k’a’jo’ li qaseeb’al chi rahok. A’an jun li qamaatan li naqak’ul jo’ riyajil li Dios. Xyu’aminkileb’ li wiib’ xnimal ru taqlahom—a’an xraab’al li Dios xb’een xb’een ut xraab’al ajwi’ li qas qiitz’in—a’an tz’aqal li neke’xb’aanu lix tzolom li Jesukristo.
Xraab’al li Dios
K’iila paay ru xk’utb’al li qarahom choq’ re li Dios. Naru naqapaab’eb’ lix taqlahom (chi’ilmanq Jwan 14:15, 21). Naru naqak’e a’an xb’een xb’een sa’ li qayu’am, ut taqajal li qajom rik’in li rajom a’an. Naru naqajayali li qajom, li qak’oxlahom, ut li qaam rik’in li Dios (chi’ilmanq Alma 37:36). Naru naqab’antioxi li qosob’tesinkil wulaj wulaj—ut naru naqawotz li k’a’ru wan qe rik’ineb’ li qas qiitz’in (chi’ilmanq Mosiah 2:21–24; 4:16–21). Naq naqatenq’aheb’ li qas qiitz’in ut nokotijok chirixeb’, naru taqak’ut ut taqakawresi li qarahom choq’ re li Dios.
Chanchan ajwi’ li naqak’ul rik’in chixjunileb’ li taqlahom, li taqlahom re xraab’al li Dios nokoxtenq’a. Li k’a’ru naqara, a’an li taqasik’. Li k’a’ru naqasik’, a’an li taqak’oxla ut li taqab’aanu. Ut li k’a’ru naqak’oxla ut naqab’aanu, a’an ajwi’ laa’o—ut naxye anihaqo chaq.
Xraab’aleb’ li qas qiitz’in
Xraab’aleb’ li qas qiitz’in nayo’la sa’ xraab’al li Dios. Li Kolonel kixk’ut naab’al li naru xb’aanunkil re xraab’aleb’ li qas qiitz’in (chi’ilmanq, jo’ eetalil, Lukas 10:25–37 ut Mateo 25:31–46). Naqasik’eb’ ut naqak’e xna’ajeb’ sa’ li qach’ool ut sa’ li qayu’am. Nokorahok rik’in li tenq’ank—rik’in xk’eeb’al li k’a’ru naru chiwu, us ta yal b’ayaq. Naqaraheb’ li qas qiitz’in naq naqatenq’aheb’ rik’in li qaseeb’al li xqak’ul rik’in li Dios.
Xxraab’aleb’ li qas qiitz’in naraj ajwi’ li kuyuk, li q’unil ch’oolej, ut xyeeb’al li yaal. Naraj xkuyb’al li maak chi moko ramb’il ta. Naraj roxloq’inkileb’ li qas qiitz’in chixjunileb’.
Naq naqara jun li qas qiitz’in, sa’ wiib’al noko’osob’tesiik. Naniman li qaam, jwal chaab’il wi’chik li qayu’am, ut jwal nasaho’ wi’chik li qach’ool.
Li osob’tesiik
Li wiib’ xnimal ru taqlahom—xraab’al li Dios ut xraab’al li qas qiitz’in—a’aneb’ xk’ojob’ankil chixjunileb’ lix taqlahom li Dios (chi’ilmanq Mateo 22:40). Naq naqara li Dios xb’een xb’een, ut naqara ajwi’ li qas qiitz’in, taatuqlaaq ru li qayu’am. Li rahok a’an tixjal li qak’a’uxl, li k’a’ru naqab’aanu, li k’a’ru naqaj xjayalinkil, ut li k’a’ru aajel ru choq’ qe.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Tz’aqal rahok,” “Rahok”
-
Temas del Evangelio: “Caridad,” “Amor”
Xtaaqenkil li profeet
Li Dios naxb’oqeb’ li profeet re naq te’ruuchila sa’ li ruchich’och’. Rik’ineb’ lix profeet, naxk’utb’esi li yaal, nab’eresink, ut naxye b’ar wan li xiwxiw.
Li Dios kixb’oq laj Jose Smith choq’ xb’een profeet sa’ roso’jikeb’ li kutan (chi’ilmanq tzolok 1). Li Dios ak kixb’oqeb’ ajwi’ li reeqaj laj Jose Smith re xb’eresinkil lix Iglees, jo’ li profeet li nab’eresin re li Iglees anajwan. Tento taqak’ul qanawom naq li profeet xb’oqe’ xb’aan li Dios, ut taqapaab’ li na’leb’ naxk’ut.
Li na’leb’ neke’xk’ut li yo’yookil profeet ut li apostol nokoxk’ojob’ sa’ li k’a’ru yaal, us ta neke’jala li na’leb’ sa’ li ruchich’och’. Naq naqataaqe lix profeet li Dios, li sachok na’leb’ ut wech’ok-ib’ re li ruchich’och’ ink’a’ taanumtaaq sa’ qab’een. Jwal sahaq wi’chik qach’ool sa’ li yu’am a’in, ut taqak’ul qab’eresinkil naq yooko chi b’eek arin sa’ xjayal li junelik q’e kutan.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Profeet,” “Profeet ixq,” “Profeetil aatin, aatinak joʼ profeet”
-
Temas del Evangelio: “Profetas,” “Profecía”
Xpaab’ankileb’ li Lajeeb’ chi Taqlahom
Li Dios kixk’utb’esi li Lajeeb’ chi Taqlahom chiru jun li najteril profeet aj Moises xk’ab’a’ re naq tixb’eresi lix tenamit. Toj wankeb’ xwankil li taqlahom a’in sa’ li qakutankil anajwan. Neke’xk’ut naq taqaloq’oni ut taqoxloq’i li Dios. Neke’xk’ut ajwi’ chan ru tento toowanq rik’ineb’ li qas qiitz’in.
-
“Miwan jalan chik aaDios chiwu laa’in” (Exodo 20:3). K’iila paay ru li “dios” wan chiqu, maare a’an li eechej, li qawankil sa’ tenamit, malaj li nimank-ib’.
-
“Maapech’ chi moko taayiib’ xjalam-uuch junaq k’a’ re ru” (Exodo 20:4).
-
“Maapatzʼ xkʼabʼaʼ li Qaawaʼ laa Dios sa’ tik’ti’” (chiʼilmanq Exodo 20:7).
-
“Jultikaq aawe li [hilobʼaal kutan], re naq taasantobʼresi” (chiʼilmanq Exodo 20:8).
-
“Chawoxloq’i laa na’ laa yuwa’” (Exodo 20:12).
-
“Maa’ani aakamsi” (Exodo 20:13).
-
“Matmuxuk sumlaak” (Exodo 20:14).
-
“Mat-elq’ak” (Exodo 20:15).
-
“Matyoob’ank aatin chirix laa was aawiitz’in” (Exodo 20:16).
-
“Matrahink-u” (Exodo 20:17).
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Taqlahom, li lajeebʼ”
-
Temas del Evangelio: “Diez Mandamientos”
Xyu’aminkil li chaq’rab’ re saq ru ch’oolej
Jwal nim xna’aj li chaq’rab’ re saq ru ch’oolej sa’ li na’leb’ kixk’uub’ li Dios choq’ re li qakolb’al ut xtaqsinkil qaloq’al. K’ojob’anb’il xb’aan li Dios li aatinank-ib’ rik’in jun li b’eelomej ut li rixaqil choq’ re naq te’xyo’ob’tesi li kok’al ut re ajwi’ naq te’xk’utb’esi li rahok sa’ xsumal. Li Dios kixk’e xch’ina-usal ut xsantilal li aatinank-ib’.
Li chaq’rab’ k’eeb’il xb’aan li Dios choq’ re li saq ruhil ch’oolej naxye naq li aatinank-ib’ ka’ajwi’ taab’aanumanq rik’in jun li winq ut jun li ixq li sumsuukeb’ chiru li chaq’rab’. Jo’kan ajwi’, naxye naq jun li kristiaan ka’ajwi’ taaraatina lix sum aatin, ut maa’ani chik tixra.
Re qatenq’ankil chixpaab’ankil li chaq’rab’ re saq ru ch’oolej, eb’ li profeet nokohe’xtij naq saqaq ru li qak’oxlahom ut li qaatin. Tento naq maajun paay li tz’aj ruhil jalam-uuch taqil. Re xk’amb’al qib’ rik’in li chaq’rab’ re saq ru ch’oolej, tento naq saqaq ajwi’ ru li qab’aanuhom, li qayehom, ut li qilob’aal.
Eb’ li te’kub’eeq xha’ tento te’xpaab’ li chaq’rab’ re saq ru ch’oolej.
Li jalb’a-k’a’uxlej ut li kuyuk maak
Xq’etb’al li chaq’rab’ re saq ru ch’oolej, a’an jun li maak jwal nim sa’ rilob’aal li Dios (chi’ilmanq Exodo 20:14; Efesios 5:3). Ink’a’ naroksi li santil wankilal re yo’ob’tesink jo’ na’ajman. A’b’anan, li Dios toj nokoxra us ta ak xqaq’et li chaq’rab’ a’in. Nokoxb’oq chixjalb’al qak’a’uxl ut chi ch’ajob’resiik rik’in lix mayej li Jesukristo re xtojb’al qix. Ruuchil xrahilal li maak, naru taa’ok xsahilal li kuyuk xb’aan li Dios (chi’ilmanq Tzol’leb’ ut Sumwank 58:42–43).
Li osob’tesiik
Li Dios kixxaqab’ li chaq’rab’ re saq ru ch’oolej re qosob’tesinkil laa’o ut re rosob’tesinkileb’ li kok’al li naxtaqla chaq sa’ li ruchich’och’. Na’ajman xpaab’ankil li chaq’rab’ a’in re naq tuqtu taakanaaq li qach’ool, ut re naq taawanq li rahok, li kawilal, ut li junajil sa’ li qajunkab’al.
Naq naqayu’ami li chaq’rab’ re saq ru ch’oolej, taakole’q li qamusiq’ chiru li rahilal naxk’ul xb’aan li aatinank-ib’ chi maak’a’ li sumlaak. Jo’kan ajwi’, ink’a’ taqak’ul xjotb’al li qach’ool ut li qatib’el li k’iila sut nawakli sa’ xb’aanunkil li na’leb’ a’an. Taanimanq lix kawilal qachʼool chiru li Dios (chi’ilmanq Tzol’leb’ ut Sumwank 121:45). Taayamaaq ru li qaam re naq jwal taqak’ul wi’chik li Santil Musiq’ej. Jwal kawresinb’ilaqo chi wulak sa’ li santil ochoch b’ar wi’ too’ok sa’ li santil sumwank li naxjunaji li qajunkab’al chi junelik.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Saq ru chʼoolej”
-
Temas del Evangelio: “Castidad”
Xpaabʼankil li chaqʼrabʼ re li lajetqil
Jun li nimla usilal li naqak’ul jo’ komon sa’ li Iglees, a’an xtojb’al li lajetqil. Naq naqatoj li lajetqil, yooko chixtenq’ankil lix k’anjel li Dios ut chirosob’tesinkileb’ li ralal xk’ajol.
Kitikla li chaq’rab’ re li lajetqil sa’ xkutankil li Najter Chaq’rab’. Li profeet aj Abraham kixtoj lix lajetq raqal chixjunil li kʼaʼru re (chi’ilmanq Alma 13:15; Genesis 14:18–20).
Li aatin lajetqil naraj naxye naq lajeeb’ xsa’ li k’a’ru tustu. Naq naqatoj li lajetqil, naqaq’axtesi re li Iglees lix lajetq raqal li qatojb’al (chi’ilmanq Tzol’leb’ ut Sumwank 119:3–4; li k’iijik naraj naxye li qatojb’al). Chixjunil li wan qe, a’an jun li maatan k’eeb’il xb’aan li Dios. Naq naqatoj li lajetqil, nokob’antioxin chiru li Dios rik’in xq’ajsinkil jun raqal li k’a’ru naxk’e qe.
Xtojb’al li lajetqil naxk’utb’esi li qapaab’aal. Naxk’e ajwi’ roxloq’inkil li Dios. Li Jesus kixk’ut naq tento “taqasik’ xb’een wa lix nimajwal awa’b’ejihom li Dios” (Mateo 6:33), ut naru naqab’aanu a’an rik’in li lajetqil.
Chan ru na’oksiman xtuminal li lajetqil
Wan xsantilal lix tuminal li lajetqil. Naqak’e li qalajetqil re jun xkomon li obiispil, a’ut sa’ k’iila tenamit naru ajwi’ xb’aanunkil sa’ internet. Naq li obiispil naxk’ul li lajetqil, neke’xtaqla toj sa’ xjolomil li Iglees.
Li Xb’eenil Awa’b’ejil, lix Molameb’ li Kab’laju chi Apostol, ut li Jolomil Obiispil neke’wan sa’ jun ch’utam re xtz’ilb’al rix chan ru taa’oksimanq xtuminal li lajetqil choq’ re xk’anjel li Dios (chi’ilmanq Tzol’leb’ ut Sumwank 120:1). Naru na’oksiman re:
-
Xkab’lankileb’ ut rilb’aleb’ li santil ochoch ut li ch’utleb’aal kab’l.
-
Xjaltesinkileb’ ru ut xpuktesinkileb’ li loq’laj hu.
-
Xtenq’ankil li k’anjel sa’eb’ lix ch’uut li Iglees.
-
Xtenq’ankil xk’anjeleb’ li misioneer sa’ chixjunil li ruchich’och’.
-
Xwaklesinkil li k’anjel re li resilal li junkab’al.
-
Xk’eeb’al li tumin choq’ reheb’ li tzoleb’aal.
Ink’a’ na’oksiman li lajetqil re xtojb’aleb’ li neke’jolomink sa’eb’ lix ch’uut li Iglees. Neke’xk’ulub’a xch’ool li k’anjelak chi maak’a’ xtojb’al.
Li osob’tesiik
Naq naqatoj li lajetqil, li Dios naxyeechi’i li osob’tesiik li q’axal nim chiru li tumin naqak’e. A’an “tixte … rilob’aal choxa, ut tixhoy … jun osob’tesink toj reetal naq moko tz’aqalaq ta li na’ajej re xk’ulb’al” (Malakias 3:10; che’ilmanq raqal 7–12). Naru toorosob’tesi sa’ musiq’ej jo’ ajwi’ sa’ li qayu’am.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Lajetqil”
-
Temas del Evangelio: “Diezmo”
Xpaab’ankil li Aatin re Chaab’il Na’leb’
Lix chaqʼrabʼ li Qaawaʼ choqʼ re xkawilal li qatibʼel
Li qatib’el, a’an jun li loq’laj maatan k’eeb’il xb’aan li Dios. Naqaj ru jun li qatib’el re naq toowulaq jo’ chanru li Dios. K’a’jo’ xnimal ru li qatib’el, jo’kan naq li loq’laj hu naxjuntaq’eeta a’an rik’in li santil ochoch (chi’ilmanq 1 Korintios 6:19–20).
Li Qaawa’ naraj naq taqak’e roxloq’ li qatib’el. Re qatenq’ankil chixb’aanunkil, kixk’utb’esi jun li chaq’rab’ re xkawilal li qatib’el, a’an li Aatin re Chaab’il Na’leb’ nayeeman re. Li na’leb’ a’in naxye naq taqatzeka li chaab’il tzakemq ut ink’a’ taqaket li k’a’ru naxtawasi li qatib’el, kama’ li uk’a nakaltesin, li may, ut li tiqwal uk’a (a’an li te ut li kape).
Sa’ xk’ab’a’ li na’leb’ a’an, eb’ li profeet anajwan xe’xye naq ink’a’ ajwi’ taqaket xkomon chik li k’a’ru nokoxtawasi, li naxq’et xchaq’rab’ li qatenamit, malaj li naxmin qu chiratawankil. Eb’ li profeet neke’xye ajwi’ naq ink’a’ us roksinkil li b’an chi ink’a’ ch’olch’o ru. (Li awa’b’ej re laa mision naru tixye ma wan k’a’aq chik re ru li ink’a’ us sa’ li tenamit wankex wi’).
Li osob’tesiik
Li Qaawa’ kixk’e li Aatin re Chaab’il Na’leb’ choq’ re xkawilal li qatib’el jo’ ajwi’ li qamusiq’. Naxyeechi’i li qosob’tesinkil jwal nim wi naqapaab’ li chaq’rab’ a’in. Naru tixk’e xkawilal li qatib’el, xchaabʼilal li qanaʼlebʼ, xch’ina-usal li qanawom, ut li qakolb’al chiru li xiwxiw (chi’ilmanq Tzol’leb’ ut Sumwank 89:18–21).
Xpaab’ankil li Aatin re Chaab’il Na’leb’ tooxtenq’a chirab’inkil li Santil Musiq’ej. Us ta chiqajunilo naqak’ul xmajelal li qoq quq’, xpaab’ankil li chaq’rab’ a’in tooxtenq’a chi kawuk sa’ qatib’el, qak’a’uxl, ut qamusiq’.
Eb’ li te’kub’eeq xha’ tento te’xpaab’ li Aatin re Chaab’il Na’leb’.
Re xtawb’al li na’leb’ chirix xtenq’ankileb’ li neke’atawank chi minb’ileb’ ru, chi’ilmanq li ch’ol 10.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Aatin re Chaabʼil Naʼlebʼ”
-
Temas del Evangelio: “Palabra de Sabiduría
-
Ayuda para la vida: “Adicción”
Xpaab’ankil li hilob’aal kutan
Jun li kutan re hilank ut loq’onink
Li hilob’aal kutan, a’an jun li santil kutan kixxaqab’ li Dios choq’ qe re naq toohilanq ut taqaloq’oni a’an. Jun reheb’ li Lajeeb’ chi Taqlahom li kixk’ul laj Moises naxye, “Jultikaq aawe li [hilobʼaal kutan], re naq taasantobʼresi” (Exodo 20:8; che’ilmanq ajwi’ raqal 9–11).
Sa’ li qakutankil anajwan, li Qaawa’ kixye naq li hilob’aal kutan toj wan jo’ “jun kutan xaqabʼanbʼil choqʼ aawe re tathilanq chiru laa kʼanjel, ut re taaqʼaxtesi aaloqʼonihom chiru li Qʼaxal Taqenaq Xwankil” (Tzol’leb’ ut Sumwank 59:10). Li Qaawa’ kixye ajwi’ naq li hilob’aal kutan, a’an jun li kutan re saho’k ch’oolej, tijok, ut b’antioxink (che’ilmanq raqal 14–15).
Sa’ li loq’onink naqab’aanu chiru li hilob’aal kutan rajlal xamaan, nokowulak ajwi’ sa’ li ch’utam re li loq’laj wa’ak. Sa’ li ch’utam a’an, naqaloq’oni li Dios ut naqak’ul li loq’laj wa’ak re xjultikankil li Jesukristo ut lix mayej aj tojol-ix. Naq naqak’ul li loq’laj wa’ak, naqa’ak’ob’resi li qasumwank rik’in li Dios ut naqak’ut naq wan qach’ool chixjalb’al qak’a’uxl chirixeb’ li qamaak. Li loq’laj wa’ak wan tz’aqal sa’ xch’oolil li loq’onink naqab’aanu chiru li hilob’aal kutan.
Naq wanko sa’ iglees naqab’aanu ajwi’ li tzolok chirix lix evangelio li Jesukristo. Naniman li qapaab’aal naq naqatzoleb’ li loq’laj hu sa’ komonil. Naniman li qarahom naq naqatenq’a qib’ ut naqakawob’resi qib’ chiqib’il qib’.
Naq ink’a’ yooko chi k’anjelak sa’ li hilob’aal kutan, ink’a’ ajwi’ tooxik chi loq’ok malaj chixb’aanunkil li ka’ru yal k’aynaqo chixb’aanunkil wulaj wulaj. Naqakanab’ li k’a’aq re ru re li ruchich’och’ ut naqajayali li qak’oxlahom ut li qab’aanuhom rik’in li musiq’ej.
Jun kutan re xb’aanunkil li us
Re xpaab’ankil li hilob’aal kutan, na’ajman xb’aanunkil li us jo’ ajwi’ xkanab’ankil li k’a’aq re ru. Naqatzol li evangelio, naqakawob’resi li qapaab’aal, nokowan sa’ komonil, nokok’anjelak chiru li qas qiitz’in, ut nokotz’aqon sa’ xkomoneb’ chik li chaab’il k’anjel rik’ineb’ li qajunkab’al ut li qamiiw.
Li osob’tesiik
Xpaab’ankil li hilob’aal kutan naxk’utb’esi naq k’eeb’il qach’ool choq’ re li qaChoxahil Yuwa’ ut li Jesukristo. Naq wanko sa’ li k’a’ru naraj li Dios choq’ re li kutan a’an, taasaho’q ut taatuqlaaq li qach’ool. Ch’olaninb’ilaq li qamusiq’ ut sahob’resinb’ilaq li qatib’el. Nach’ taqeek’a li Dios qik’in ut jwal too’ok wi’chik sa’ komonil rik’in laj Kolol qe. Jwal tookanaaq wi’chik “chi maakʼaʼ qatzʼajnil xbʼaan li ruchichʼochʼ” (Tzol’leb’ ut Sumwank 59:9). Li hilob’aal kutan taa’ok choq’ jun “sahil kutan” (Isaias 58:13; chi’ilmanq ajwi’ raqal 14).
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
Temas del Evangelio: “Día de reposo”
-
K’utul Raqal reheb’ li Loq’laj Hu: “Hilob’aal kutan”
Xpaab’ankil ut roxloq’inkil xchaq’rab’ li tenamit
Eb’ laj Santil Paab’anel sa’ Roso’jikeb’ li Kutan neke’xpaab’ naq tento xpaab’ankil xchaq’rab’il li tenamit ut naq tento too-okenq jo’ chaab’il komon sa’ li tenamit (chi’ilmanq Tzol’leb’ ut Sumwank 134; Eb’ lix Raqalil li Paab’aal 1:12). Nayeeman reheb’ li komon re li Iglees naq us li tz’aqonk sa’ li k’anjel re xchaab’ilob’resinkil li k’aleb’aal ut li tenamit. Nayeeman ajwi’ reheb’ naq us li okenk sa’ xwaklesinkil li tiikilal sa’ xchaq’rab’il li tenamit.
B’oqb’ileb’ li komon re li Iglees chi tz’aqonk sa’ li jolomink tenamit ut sa’ li politica, a’ yaal jo’ naxye xchaq’rab’il li tenamit. Li komon re li Iglees li neke’k’anjelak sa’ xjolomil li tenamit neke’xb’aanu a’an jo’ xkomon li tenamit, ink’a’ jo’ aj k’anjel sa’ xk’ab’a’ li Iglees.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
“Li tz’aqonk sa’ li tenamit ut sa’ li politica” sa’ li raqal 38.8 re li Jolomil K’anjenel Hu
-
Temas del Evangelio: “Civismo”
Li k’anjelak chiru li Dios ut li qas qiitz’in
Kʼanjelak chiru li qas qiitzʼin
Naq nakub’e qaha’, noko’ok sa’ aatin ut naqaye naq took’anjelaq chiru li Dios ut chiruheb’ li qas qiitz’in. Xtenq’ankileb’ li qas qiitz’in, a’an jun reheb’ li xb’eenil k’anjel naqab’aanu chiru li Dios (chi’ilmanq Mosiah 2:17). Li profeet aj Alma kixk’ut naq eb’ li te’raj kub’eek xha’ tento “wanq xchʼooleb’ chixkʼambʼal riiqeb’ chiribʼileb’ ribʼ , … chi yaabʼak rikʼinebʼ li nekeʼyaabʼak … , ut xkʼojobʼankilebʼ xchʼool li nekeʼajok kʼojobʼaak xchʼool” (Mosiah 18:8–9).
Chirix naq neke’kub’e xha’, li ak’ komon neke’xk’ul jun xb’oqb’al chi k’anjelak sa’ li Iglees. Neke’xk’ulub’a xch’ool xb’aanunkil li k’anjel a’an chi maak’a’ xtojb’al. Naq naqak’ulub’a xb’aanunkil li k’anjel a’an chi anchal qach’ool, nokok’i sa’ qapaab’aal ut qaseeb’al, ut naqatenq’aheb’ li qas qiitz’in.
Jun chik li tenq’ank naqab’aanu sa’ li Iglees, a’an li qak’anjel jo’ li “winq aj ilol komon” ut li “ixq aj ilol komon.” Sa’ li k’anjel a’an, nayeeman qe aniheb’ li komon ut li junkab’al li taqatenq’a.
Jo’ xtzolom li Jesukristo, naqasik’ chan ru taqatenq’aheb’ li qas qiitz’in wulaj wulaj. Jo’ li Jesukristo, nokonume’ yalaq b’ar chixb’aanunkil li us (chi’ilmanq Hechos 10:38). Naqatenq’aheb’ li qech kab’al ut li wankeb’ sa’ qayanq. Naru naqasik’ b’ar tooxik chi tenq’ank rik’in li aplicacion JustServe, wi wan sa’ qatenamit. Naru naqatenq’a li Iglees chixtaqlankil li tenq’ sa’ chixjunil li ruchich’och’, ut naru naqak’e li tenq’ b’ar wi’ xk’ulman li k’a’ru xiwxiw.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Kʼanjelak chiru”
-
Temas del Evangelio: “Servicio”
Xwotzb’al li evangelio
Naq noko’ok sa’ sumwank rik’in li kub’iha’, naqayeechi’i naq “tooxaqliiq joʼ aj yehol nawom chirix li Dios” (Mosiah 18:9). Naru naqab’aanu a’an rik’in xwotzb’al lix evangelio li Jesukristo. Jun li tenq’ank li jwal naxk’e xsahil qach’ool, a’an xtenq’ankileb’ li qas qiitz’in chixk’ulb’al li evangelio (chi’ilmanq Tzol’leb’ ut Sumwank 18:15–16). Jwal naxk’utb’esi li qarahom.
Naq naqak’ul li qosob’tesinkil rik’in xyu’aminkil li evangelio, ak re naq taqaj xwotzb’al li usilal a’an. K’iila sut, eb’ li qakomon, li qamiiw, ut xkomoneb’ chik li kristiaan neke’raj xnawb’al chirix li evangelio naq neke’ril li usilal naqak’ul naq yooko chixyu’aminkil. Re xwotzb’al li evangelio, naru taqab’aanu li k’a’ru ak k’aynaqo chixb’aanunil (chi’ilmanq Jolomil K’anjenel Hu, ch’ol 23).
Naqab’oqeb’ li qas qiitz’in chi tz’aqonk qik’in sa’ li tenq’ank, li komonil wank, ut li b’atz’unk, ma sa’ li Iglees malaj sa’ li tenamit. Naru naqab’oqeb’ sa’ jun li ch’utam re li Iglees malaj sa’ jun li kub’iha’. Naru naqab’oqeb’ chirilb’al sa’ internet jun li video li naxch’olob’ lix evangelio li Jesukristo, chirilb’al lix Hu laj Mormon, malaj chirilb’al jun li ak’ santil ochoch li ok re chi osob’tesiik. Naab’al li k’a’ru naru taab’oqeb’ chixb’aanunkil. K’iila sut, yal na’ajman xk’ulb’aleb’ li qakomon, li qamiiw, ut li qas qiitz’in sa’ li k’a’ru ak yooko chixb’aanunkil.
Wi taqapatz’ re li Dios, tooxtenq’a chixk’eeb’al reetal jo’q’e naru taqawotz li evangelio ut taqaye chan ru narosob’tesi li qayu’am.
Re xtawb’al li na’leb’ chirix li rahok, wotzok, ut b’oqok, chi’ilmanq “Li k’anjelak sa’ komonil rik’ineb’ li komon” sa’ li ch’ol 9.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Xkʼanjelebʼ laj kʼamol aatin”
-
Temas del Evangelio: “Obra misional”
Li kuyuk sa’ ut li mayej re kuyuk sa’
Li Dios kixxaqab’ li chaq’rab’ re kuyuk sa’ re naq taqak’e xmetz’ew li qamusiq’ ut taqatenq’aheb’ li wankeb’ sa’ majelal.
Li kuyuk sa’ naraj naxye naq ink’a’ nokotzekank ut ink’a’ noko’uk’ak chiru jun k’amok. Li Iglees nareetali li xb’een domingo rajlal po jo’ xkutankil li kuyuk sa’. Sa’ li kutan re kuyuk sa’, ink’a’ nokotzekank ut ink’a’ noko’uk’ak chiru 24 hoor, wi kaw rib’ li qatib’el. Sa’ li domingo re kuyuk sa’, naqab’aanu ajwi’ li tijok ut xyeeb’al xnawom qach’ool. Nayeeman qe naq us ajwi’ xb’aanunkil li kuyuk sa’ yalaq jo’q’e naqaj.
Xkawresinkil li qamusiq’
Li kuyuk sa’ naru nokoxtenq’a chi tuulano’k, chi nach’ok rik’in li Dios, ut chi ak’ob’resiik sa’ musiq’ej. Rub’elaj xtikib’ankil lix k’anjel, li Jesukristo kixkuy xsa’ (chi’ilmanq Mateo 4:1–2). Sa’ li loq’laj hu wan k’iila esilal chirixeb’ li profeet ut li kristiaan li ke’xkuy xsa’ re naq te’xk’e xmetz’ew xmusiq’ ut te’xpatz’ rosob’tesinkileb’ malaj rosob’tesinkileb’ li ras riitz’in.
Laq’lo li kuyuk sa’ rik’in li tijok. Naq naqakuy qasa’ ut nokotijok rik’in paab’aal, jwal yo’on wi’chik nokowan chixk’ulb’al qana’leb’ rik’in li Dios. Jwal yo’on ajwi’ nokowan chixk’eeb’al reetal li yaal, ut chixtawb’al ru li rajom li Dios.
Xtenq’ankileb’ li wankeb’ sa’ majelal
Naq naqakuy qasa’, naqak’e tumin re li Iglees re xtenq’ankileb’ li wankeb’ sa’ majelal. Aʼan li mayej re li kuyuk saʼ nayeeman re. B’oqb’ilo chixk’eeb’al jun mayej jo’ xteram xtz’aq li tzakemq li ink’a’ xqatzeka. Nayeeman qe naq us ajwi’ xk’eeb’al xb’een xtz’aq li tzakemq a’an, wi naru chiqu. Xk’eeb’al li mayej re li kuyuk sa’, a’an jun reheb’ li tenq’ank li naru taqab’aanu choq’ reheb’ li qas qiitz’in.
Li mayej re kuyuk sa’ na’oksiman re xk’eeb’al li tzakemq ut xkomon chik li k’a’ru aajel ru choq’ reheb’ li wan xmajelal yalaq b’ar sa’ li ruchich’och’. Re xtawb’al chan ru nak’eeman li mayej re kuyuk sa’, chi’ilmanq “ Chan ru xk’eeb’al li lajetqil ut xkomon chik li mayej” sa’ li tzolok a’in.
Xtzolb’aleb’ li loq’laj hu
Li kuyuk saʼ
Xtenq’ankileb’ li wankeb’ sa’ majelal
Xtzolb’al xkomon chik chirix li na’leb’ a’in
-
K’utul Raqal reheb’ li Loq’laj Hu: “Ayuun, ayuunik”
-
Jolomil K’anjenel Hu: 22.2.2
-
Temas del Evangelio: “Ayuno y ofrendas de ayuno”
Li kuyuk toj sa’ roso’jik
Naq nakub’e qaha’, noko’ok sa’ aatin rik’in li Dios ut naqaye naq “tookuyuq toj sa’ roso’jik” sa’ xyu’aminkil lix evangelio li Jesukristo (2 Nefi 31:20; chi’ilmanq ajwi’ Mosiah 18:13). Naqayal qaq’e chixtaaqenkil li Jesukristo chiru chixjunil li qayu’am.
Li profeet aj Nefi sa’ lix Hu laj Mormon kixye naq li kub’iha’, a’an rokeb’aal lix b’ehil li evangelio (chi’ilmanq 2 Nefi 31:17). Chirix li kub’iha’, toj “naqatiikisi qib’ chi uub’ej chi xaqxooqo rik’in li Kristo” (2 Nefi 31:20).
Naq “naqatiikisi qib’ chi uub’ej” sa’ li b’e re xtaaqenkil li Kristo, naqakawresi qib’ chi wulak sa’ li santil ochoch. Aran too’ok sa’ sumwank rik’in li Dios naq naqak’ul li k’ojob’anb’il k’anjel re li santil ochoch. Sa’ li santil ochoch tootiqib’aaq rik’in wankilal ut naru tootz’ape’q sa’ junajil rik’in li qajunkab’al chi junelik. Xpaab’ankil li sumwank li naqak’ojob’ sa’ li santil ochoch tixte li okeb’aal chiru chixjunileb’ li usilal ut li qosob’tesinkil naraj xk’eeb’al qe li Dios.
Naq nokoxik chi uub’ej rik’in paab’aal chiru xb’ehil li evangelio, taqak’ul lix maatan li Dios li q’axal nim, a’an li junelik yu’am (chi’ilmanq 2 Nefi 31:20; Tzol’leb’ ut Sumwank 14:7).
Arin taq’a wan xch’olob’ankil jujunq li k’a’ru kixkawresi li Dios re qatenq’ankil chi kuyuk toj sa’ xraqik li qayu’am sa’ li ruchich’och’—ut re xtawb’al xsahil qach’ool arin.
Li tijonelil ut lix ch’uutil li Iglees
Li tijonelil, a’an xwankil li Dios. Rik’in li tijonelil, li qaChoxahil Yuwa’ naxb’aanu lix k’anjel re “xkʼeebʼal chi uxmank lix kolbʼal chiru li kamk ut lix yuʼam chi junelik” li ralal xk’ajol (Moises 1:39). Li Dios naxk’e wankilal reheb’ li ralal ut xrab’in sa’ li ruchich’och’ re naq te’tenq’anq sa’ lix k’anjel.
Li tijonelil nokorosob’tesi chiqajunil. Li k’ub’iha’, li loq’laj wa’ak, ut xkomoneb’ chik li k’ojob’anb’il k’anjel neke’k’ule’ rik’ineb’ li wankeb’ ropiis sa’ li tijonelil. Naqak’ul ajwi’ li qosob’tesinkil re qak’irtesinkil, re xk’ojob’ankil qach’ool, ut re xk’ulb’al qana’leb’.
Li tijonelil, li jolomink, ut xk’ulb’al qak’anjel sa’ li Iglees
B’eresinb’il li Iglees xb’aan li Jesukristo rik’ineb’ li profeet ut li apostol. B’oqb’ileb’ laj jolominel a’in xb’aan li Dios, k’ojob’anb’ileb’, ut k’eeb’ileb’ xwankil chi k’anjelak sa’ xk’ab’a’ li Kolonel.
Najter chaq, li Kristo kixk’e reheb’ lix apostol lix wankilal li tijonelil ajwi’ a’in, jo’kan naq ke’ru chixb’eresinkil li Iglees chirix naq li Jesus kitaqe’ sa’ choxa. Moqon kisachman li wankilal a’an naq li kristiaan ke’xtz’eqtaana li evangelio ut ke’kam li apostol.
Eb’ li choxahil aj taql ke’xk’ojob’ wi’chik li tijonelil sa’ 1829 rik’in li profeet aj Jose Smith, ut li Qaawa’ kixxaqab’ wi’chik lix Iglees rik’ineb’ li profeet ut li apostol. (Chi’ilmanq tzolok 1.)
Sa’ li na’ajej wankeb’ wi’, li obiisp ut li awa’b’ej re oqech wankeb’ xwankil sa’ li tijonelil re xb’eresinkileb’ li ch’uut re li Iglees.
Naq eb’ li winq ut li ixq neke’b’oqe’ ut neke’k’ojob’aak chi k’anjelak sa’ li Iglees, neke’xk’ul xwankil rik’in li Dios re naq te’xb’aanu li k’anjel a’an. Nakana li wankilal a’in rik’ineb’ li misioneer, laj jolominel, laj k’utunel, ut xkomoneb’ chik toj reetal naq neke’raqe’ sa’ xk’anjel. Najek’iman li wankilal a’in chi b’eresinb’il xb’aaneb’ li ani nekek’amok re xlaawil li tijonelil.
Li wankilal re li tijonelil ka’ajwi’ naru na’oksiman sa’ tiikilal (chi’ilmanq Tzol’leb’ ut Sumwank 121:34–46). Li wankilal a’in, a’an jun li loq’laj teneb’aak chiruuchilankil li Kolonel ut chi k’anjelak sa’ xk’ab’a’. Ka’ajwi’ naru roksinkil choq’ re rosob’tesinkil ut xtenq’ankil li qas qiitz’in.
Li Tijonelil re Aaron ut li Tijonelil re Melkisedek
Sa’ li Iglees, wiib’ ru li tijonelil: li Tijonelil re Aaron ut li Tijonelil re Melkisedek. Chi b’eresinb’il xb’aaneb’ li neke’xk’am xlaawil li tijonelil, li Tijonelil re Aaron ut re Melkisedek neke’q’axtesiman sa’ xb’eeneb’ li komon winq li k’ulub’ejeb’ sa’ li Iglees. Chirix naq neke’xk’ul li tijonelil, neke’k’ojob’aak sa’ jun li opiis re li tijonelil, maare a’an xk’anjel jo’ aj tenq’anel malaj jo’ xb’eenil. Tento te’k’ojob’aaq xb’aan li ani k’eeb’il xwankil chixb’aanunkil.
Naq jun li winq naxk’ul li tijonelil, na’ok sa’ aatin rik’in li Dios re naq tixb’aanu li loq’laj k’anjel, tixtenq’a li ras riitz’in, ut taa’okenq sa’ xwaklesinkil li Iglees.
Eb’ li saaj winq naru neke’xk’ul li Tijonelil re Aaron chalen li po enero chiru li hab’ te’xket wi’ 12 chihab’. Naru neke’k’ojob’aak choq’ aj tzolonel chiru li hab’ te’xket wi’ 14 chihab’, ut choq’ aj tij chiru li hab’ te’xket wi’ 16 chihab’. Eb’ li ak’ komon li ak xe’winqilo’ naru neke’xk’ul li Tijonelil re Aaron chi seeb’ naq ak xkub’e xha’ ut xk’ojob’aak choq’ komon. Li wankeb’ sa’ li Tijonelil re Aaron neke’xb’aanu li kub’sink ha’ ut xjek’inkil li loq’laj wa’ak.
Chirix naq ak xk’anjelak jo’ aj tij sa’ li Tijonelil re Aaron, jun winq li k’ulub’ej ut numenaq 18 chihab’ xyu’am naru nak’ojob’aak jo’ xb’eenil sa’ li Tijonelil re Melkisedek. Eb’ li winq li neke’xk’ul li Tijonelil re Melkisedek naru neke’rosob’tesiheb’ li yaj ut li ani neke’raj xk’ojob’ankil xch’ool.
Chi’ilmanq Jolomil K’anjenel Hu, 38.2.9.1, re xtawb’al li na’leb’ chirixeb’ li ak’ komon li neke’xk’ul li tijonelil.
Eb’ li molam ut lix ch’uutil li Iglees
Eb’ li molam re li tijonelil. Li molam, a’an jun xch’uuteb’ li xe’xk’ul li tijonelil. Sa’eb’ lix teep li Iglees, wan xmolameb’ li xb’eenil choq’ reheb’ li winq. Choq’ reheb’ li saaj winq, wan xmolameb’ laj tenq’anel, laj tzolonel, ut laj tij.
Li Komonil re Tenq’ank. Eb’ li ixq li numenaq 18 chihab’ xyu’ameb’ neke’tz’aqonk sa’ li Komonil re Tenq’ank. Eb’ li ixq sa’ li Komonil re Tenq’ank neke’xkawob’resi li junkab’al, li kristiaan, ut li tenamit.
Eb’ li Saaj Ixq. Eb’ li saaj ixq naru neke’ok sa’ li ch’uut reheb’ li Saaj Ixq chalen li po enero chiru li hab’ neke’xket wi’ 12 chihab’.
Li Tzoleb’aal reheb’ li Kok’al. Eb’ li kok’al li 3 toj 11 chihab’ xyu’ameb’ neke’oken sa’ li Tzoleb’aal reheb’ li Kok’al.
Li Dominkil Tzoleb’aal. Eb’ li ninq ut eb’ li saaj neke’xik sa’ li Dominkil Tzoleb’aal, b’ar wi’ neke’ch’utla re xtzolb’aleb’ li loq’laj hu sa’ komonil.
Re xtawb’al xkomon chik li na’leb’ chirix li tijonelil, chi’ilmanq Jolomil K’anjenel Hu, ch’ol 3.
Re xtawb’al xkomon chik li na’leb’ chirixeb’ lix molam li tijonelil ut lix ch’uutil li Iglees, chi’ilmanq Jolomil K’anjenel Hu, eb’ li ch’ol 8–13.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
Jolomil K’anjenel Hu, ch’ol 3: “Eb’ li na’leb’ chirix li tijonelil”
-
Temas del Evangelio: “Sacerdocio Aarónico,” “Sacerdocio de Melquisedec,” “Sacerdocio”
Li sumlaak ut li junkab’al
Li sumlaak
Li sumlaak rik’in jun li winq ut jun li ixq, a’an k’ojob’anb’il xb’aan li Dios. Wan tz’aqal sa’ xch’oolil li na’leb’ kixk’uub’ re naq li ralal xk’ajol te’xik chi uub’ej sa’ li junelik q’e kutan.
Lix sumlajik jun li winq ut li ixq, a’anaq raj li komonil li jwal te’roxloq’i sa’ li ruchich’och’. Wan jun li loq’laj teneb’aak sa’ xb’eeneb’ re naq tiikaqeb’ sa’ lix sumal.
Juntaq’eet xwankil li b’eelomej ut li ixaqilb’ej sa’ rilob’aal li Dios. Maajun reheb’ taataqlanq sa’ xb’een li jun chik. Tento te’xwotz li taqlank rik’in rahok, ut te’tz’aqonq chi tz’aqal sa’ wiib’al.
Naq neke’xra rib’ chirib’ileb’ rib’ ut neke’k’anjelak sa’ wiib’al, li okenk sa’ sumal naru tixk’e li sahil ch’oolej jwal nim sa’ xyu’ameb’. Naru neke’xtenq’a rib’ a’an ut eb’ lix kok’al re naq te’xik sa’ xjayal li junelik yu’am.
Li junkab’al
Chanchan li sumlaak, k’ojob’anb’il ajwi’ li junkab’al xb’aan li Dios, ut wan sa’ xch’oolil li na’leb’ kixk’uub’ choq’ re xsahil qach’ool sa’ li junelik q’e kutan. Jwal sahaq wi’chik xch’ool li qajunkab’al naq naqayu’ami li na’leb’ kixk’ut li Jesukristo. Eb’ li na’b’ej yuwa’b’ej neke’xk’ut ut neke’xyu’ami li evangelio chiruheb’ lix kok’al. Sa’ li junkab’al naru taqara ut taqatenq’a qib’ chiqib’il qib’.
Li junkab’al, a’anaq raj li k’a’ru jwal aajel ru sa’ xyu’ameb’ li na’b’ej yuwa’b’ej. Lix ch’olaninkileb’ li kok’al li neke’yola malaj neke’k’ule’ sa’ xjunkab’al, a’an jun li santil usilal ut k’anjel choq’ reheb’ li na’b’ej yuwa’b’ej.
Wan li ch’a’ajkilal sa’ chixjunileb’ li junkab’al. Naq naqasik’ xtenq’ li Dios ut naqapaab’eb’ lix taqlahom, eb’ li ch’a’ajkilal sa’ li junkab’al naru toohe’xtenq’a chi k’iik. Wan naq li ch’a’ajkilal nokoxtenq’a chixtzolb’al li jalb’a-k’a’uxlej ut li kuyuk maak.
Eb’ laj jolominel re li Iglees neke’xye reheb’ li komon naq us raj xb’aanunkil jun li q’ojyin re junkab’al rajlal xamaan. Chiru li hoonal a’an, li na’b’ej yuwa’b’ej neke’xk’ut li evangelio chiruheb’ lix kok’al, neke’xkawob’resi xkomonileb’, ut neke’b’atz’un sa’ junkab’al. Eb’ laj jolominel re li Iglees ke’xpuktesi ajwi’ jun li aatin li naxk’ut li xnimal ru na’leb’ chirix li junkab’al (chi’ilmanq “Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org).
Naru ajwi’ naqakawob’resi li qajunkab’al rik’in li tijok, xtzolb’aleb’ li loq’laj hu, ut li loq’onink sa’ komonil sa’ li iglees. Naru ajwi’ taqasik’ li esilal tz’iib’anb’il chirixeb’ li qaxe’ qatoon, taqach’utub’eb’ li seraq’ chirix li qajunkab’al, ut tookok’anjelaq chiru li qas qiitz’in.
Naab’aleb’ li kristiaan maji’ neke’ru chi sumlaak malaj chixk’ulb’al li rahok sa’ junkab’al. Naab’aleb’ neke’xk’ul li jachok-ib’ ut jalan chik li ch’a’ajkilal sa’ li junkab’al. A’b’anan, li evangelio nokorosob’tesi chi junjunqil, maak’a’ naxye chan ru li qajunkab’al. Wi tiikaqo chi paab’ank, li Dios tixkawresi li b’e re naq taqak’ul li rahok sa’ junkab’al, ma sa’ li yu’am a’in malaj sa’ li yu’am chal re.
Xtzolb’aleb’ li loq’laj hu
Li sumlaak
Li junkabʼal
Xtzolb’al xkomon chik chirix li na’leb’ a’in
-
Jolomil K’anjenel Hu, ch’ol 2: “Xtenq’ankileb’ li komon ut eb’ li junkab’al sa’ li k’anjel re li kolb’a-ib’ ut li taqenaqil loq’al”
-
Temas del Evangelio: “Matrimonio,” “Familia,” “Ser padres”
Xkʼanjel li santil ochoch ut resilal li junkabʼal choq’ reheb’ li kamenaq
Li qaChoxahil Yuwa’ naxraheb’ chixjunileb’ li ralal xk’ajol ut naraj naq te’xk’ul li kolb’a-ib’ ut li taqenaqil loq’al. A’ut wankeb’ k’iila billon li kamenaq li ink’a’ xe’rab’i resil lix evangelio li Jesukristo, chi moko xe’xk’ul li k’ojob’anb’il k’anjel re li kolb’a-ib’. Li k’ojob’anb’il k’anjel re li kolb’a-ib’, a’an li kub’iha’, li k’ojob’aak choq’ komon, li k’ojob’aak sa’ li tijonelil choq’ reheb’ li winq, li loq’laj tiqib’aak sa’ li santil ochoch, ut li sumlaak chi junelik q’e kutan.
Sa’ xk’ab’a’ li rusilal ut li ruxtaan, li Qaawa’ xkawresi jalan chik li b’e neke’ruhan wi’ chixk’ulb’al li evangelio ut eb’ lix k’ojob’anb’il k’anjel. Sa’ li ruchich’och’ reheb’ li musiq’ej, najultikaman li evangelio reheb’ li ink’a’ ke’xk’ul sa’ xyu’am (chi’ilmanq Tzol’leb’ ut Sumwank 138). Sa’eb’ li santil ochoch, naru naqab’aanu li k’ojob’anb’il k’anjel choq’ reheb’ li qaxe’ qatoon ut xkomoneb’ chik li ak kamenaqeb’. Eb’ li kamenaq aran sa’ li ruchich’och’ reheb’ li musiq’ej naru te’xk’ulub’a malaj te’xtz’eqtaana li evangelio ut li k’ojob’anb’il k’anjel li nab’aanuman choq’ reheb’.
Chi rub’elaj xb’aanunkil li k’ojob’anb’il k’anjel a’an, tento taqataw aniheb’ li qaxe’ qatoon li maji’ neke’xk’ul. Xtawb’aleb’ a’an re naq te’xk’ul li k’ojob’anb’il k’anjel, a’an ajwi’ aj-e naq naqakawresi resilal li qajunkab’al. Naq naqataw li na’leb’ chirixeb’, naqoksi sa’ jun li k’uuleb’aal na’leb’ re li Iglees sa’ FamilySearch.org. Toja’ naq naru xb’aanunkil li k’ojob’anb’il k’anjel choq’ reheb’ sa’ li santil ochoch.
Naq naqataw xk’ab’a’eb’ li qaxe’ qatoon ut naqab’aanu li k’ojob’anb’il k’anjel choq’ reheb’, li qajunkab’al naru taajunajimanq chi junelik.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
Jolomil K’anjenel Hu, ch’ol 28: “Eb’ li k’ojob’anb’il k’anjel re li santil ochoch choq’ reheb’ li kamenaq”
-
Temas del Evangelio: “Bautismos por los muertos,” “Historia familiar”
Li santil ochoch, li loq’laj tiqib’aak, ut li sumlaak ut li junkab’al li maak’a’ roso’jik
Li santil ochoch
Li santil ochoch a’an rochoch li Qaawa’. A’an jun li loq’laj na’ajej b’ar wi’ naru noko’ok sa’ sumwank rik’in li Dios rik’in xk’ulb’al lix santil k’ojob’anb’il k’anjel. Naq naqapaab’ li sumwank a’in, taak’utmanq li wankilal re choxahilal sa’ li qayu’am (chi’ilmanq Tzol’leb’ ut Sumwank 84:19–22; 109:22–23).
Li loq’laj tiqib’aak
Jun reheb’ li k’ojob’anb’il k’anjel naqak’ul sa’ li santil ochoch, a’an li loq’laj tiqib’aak nayeeman re. Li loq’laj tiqib’aak a’an jun li maatan. Li maatan a’in nachal rik’in li Dios, ut naxk’e qanawom ut qawankilal. Sa’ li loq’laj tiqib’aak, noko’ok sa’ jun sumwank rik’in li Dios li nokoxlaq’ab’ rik’in a’an ut rik’in li Ralal, li Jesukristo (chi’ilmanq ch’ol 1).
Li komon li ak xe’winqilo’ xe’ixqilo’ naru neke’xk’ul li loq’laj tiqib’aak naq ak xe’xket jun chihab’ sa’ li Iglees. Re xtawb’al xkomon chik li na’leb’ chirix li loq’laj tiqib’aak, chi’ilmanq Jolomil K’anjenel Hu, 27.2.
Li sumlaak ut li junkab’al li maak’a’ roso’jik
Xb’aan li na’leb’ kixk’uub’ li Dios choq’ re li sahil ch’oolejil, li komonil sa’ junkab’al naru takanaaq chirix li kamk. Sa’ li santil ochoch naru nokosumla choq’ re li yu’am a’in jo’ ajwi’ li junelik q’e kutan. Jo’kan naq li junkab’al naru taawanq chi junelik.
Chirix naq li ak sumsuukeb’ neke’xk’ul li loq’laj tiqib’aak, naru te’tz’ape’q sa’ junajil choq’ re li junelik q’e kutan. Eb’ lix kok’al naru te’tz’ape’q sa’ junajil rik’ineb’.
Li b’eelomej ut ixaqilb’ej li tz’aptz’ookeb’ sa’ junajil sa’ li santil ochoch tento te’xpaab’ lix sumwank rik’in li Dios re naq taa’osob’tesiiq lix sumal sa’ li junelik q’e kutan.
Xtzolb’aleb’ li loq’laj hu
Xtzolb’al xkomon chik chirix li na’leb’ a’in
-
Jolomil K’anjenel Hu, ch’ol 27: “Eb’ li k’ojob’anb’il k’anjel re li santil ochoch choq’ reheb’ li yo’yookeb’”
-
Temas del Evangelio: “Templos,” “Investidura,” “Matrimonio”